1-2. Sowtu toli pelensipali gi Yehofa Kotoigi?

ALA sama mu sabi taki a Yehofa abi a leti fu tii hemel anga goontapu. A o santa a nen fi en tu. Wi enke Yehofa Kotoigi lobi taki fu den pelensipali toli ya. A leti di Gadu abi fu tii, anga a santa di a mu santa a nen fi en, abi fu du anga denseefi.

² Ala wi e si kiin taki a nen fu Gadu mu santa, bika sama poli en. Di u sutudeli Beibel u kon fusutan tu taki a Yehofa na a moo bun Tiiman. Den tu toli ya pelensipali gi wi enke Yehofa Kotoigi.

3. San a nen fu Yehofa e soi?

³ A nen Yehofa e soi go na ala sani di abi fu du anga Gadu. Neen meke u sa taki a abi fu du anga a fasi fa ai tii tu. Te u taki a nen fu Yehofa mu kiin, efuso santa, da dati wani taki sama mu kon sabi taki a Yehofa na a moo bun Tiiman. Efu Yehofa a wan santa Gadu di e du sani a wan letifasi ala yuu, da a musu fu de wan bun Tiiman tu.​—Luku a faki ‘ Wantu sani di abi fu du anga a santa di a nen fu Gadu mu santa’.

4. San Psalm 135:13 e taki fu a nen fu Gadu? Sowtu akisi wi o luku aini a artikel ya?

⁴ A nen Yehofa a wan apaiti nen. (Leisi Psalm 135:13.) Saide a nen fu Gadu pelensipali so? San na a fosi leisi di sama poli a nen fu Gadu? Fa Gadu e santa a nen fi en? Fa u sa yeepi santa a nen fu Gadu? Meke u luku a piki fu den akisi ya.

5. San son sama sa e akisi denseefi te den yee taki a nen fu Gadu mu santa?

⁵ ‘I nen mu santa’ (Mat. 6:9). Yesesi taki a sani ya a wan fu den moo pelensipali sani di u mu akisi Yehofa te wi e begi. Ma san Yesesi be wani taki di a taki Gadu nen mu santa? Fu meke wan sani kon santa, wani taki fu kiin wan sani. Kande son sama e akisi denseefi taki: ‘Yehofa nen á santa kaba noh?’ Fu man piki a akisi ya, u mu sabi fosi san a nen fu wan sama wani taki.

6. San e meke wan nen pelensipali?

⁶ A nen fu wan sama, a ná wan wowtu di sikiifi a pampila namo, efuso wan wowtu di sama e kai namo. Beibel taki: ‘Wan bun nen betee moo tyaipi gudu’ (Odo 22:1; Peleik. 7:1). Saide a nen fu wan sama pelensipali so? Bika a nen fu wan sama e soi sama neen tuutuu anga fa sama sabi en. Neen meke a ná a fasi fa wan sama nen sikiifi a pampila, efuso fa sama e kai en pelensipali. Ma san pelensipali, a san taawan e pakisei te den yee a nen fu wan sama, efuso te den leisi en a pampila.

7. Fa sama poli a nen fu Gadu?

⁷ Te sama e lei gi Yehofa, den e meke taawan denki taki Yehofa a á bun. A so den e poli en nen. Aini a dyali Eden sama lei gi Yehofa fu a fosi leisi. Meke u luku san u sa leli fu a toli ya.

8. San Adan anga Efa be sabi? Sowtu akisi wi o luku?

⁸ Adan anga Efa be sabi taki a nen fu Gadu a Yehofa. Den be sabi omen taa pelensipali sani fi en tu. Den be sabi taki a Yehofa meke ala sani. Den be sabi taki neen be meke den de a libi. Neen be meke a moin peesi di den be e tan tu. Boiti dati, neen be meke den enke man anga uman di á be abi sondu (Gen. 1:26-28; 2:18). Ma Adan anga Efa be o tan pakisei ala den sani di Yehofa be du gi den? Den be o tan soi Yehofa taki den lobi en? Den be o  tan soi en taki den e teke den sani di a du gi den fu bigi? Di a feyanti fu Gadu tesi den, den soi kiin san be de aini den ati.

9. Enke fa Genesesi 2:16, 17 anga 3:1-5 e soi, da san Yehofa be taigi a fosi man anga uman? Fa Saatan meke den bigin si enke Yehofa á bun?

⁹ Leisi Genesesi 2:16, 17 anga 3:1-5. Saatan be meke a gei enke a wan sineki be e taki anga Efa. A akisi Efa taki: ‘A tuu taki Gadu taigi u taki wi á mu nyan den sii fu ala den bon di de aini a dyali?’ Di Saatan akisi Efa a sani ya a lei a lei gi Gadu. Na a sani ya meke Efa be bigin denki taki Gadu á bun. Gadu be taigi den taki den be sa nyan ala den sii di be de aini a dyali, boiti wan fu den. A omen sowtu sii be de aini a dyali gi Adan anga Efa fu nyan (Gen. 2:9). A sani ya e soi kiin taki Yehofa lobi gi sama sani. Ma Gadu be taigi Adan anga Efa taki den á be mu nyan wan fu den sii di be de aini a dyali. Ma a sani di Saatan akisi Efa be meke a gei enke Gadu giili. Kande Efa bigin pakisei taki: ‘A sa de taki Gadu e kibii wan bun gi mi?’

10. Fa Saatan poli Gadu nen? San a be a bakapisi?

¹⁰ A ten di Saatan akisi Efa a sani ya, Efa be e aliki Yehofa ete. A soi Saatan kiin san Gadu be taigi den. A taigi en taki den á be mu holi a bon seefi. A be sabi taki efu a be taangayesi Gadu, a be o dede. Ma Saatan taigi en taki: ‘U ná o dede seefi’ (Gen. 3:2-4). A sani di Saatan taki ya soi kiin taki a be e kai Yehofa leiman. A so a poli Yehofa nen. A so Saatan toon Didibii, efuso Ogii-ati leiman. A bunbun koli Saatan koli Efa, bika a biibi en (1 Tim. 2:14). Efa be biibi Saatan moo Yehofa, neen meke a du wan don sani. A taangayesi Yehofa. A nyan a sii di Yehofa be taigi den taki den á mu nyan. Bakaten a gi Adan fi enseefi nyan tu.​—Gen. 3:6.

11. San u fosi dda anga mma be sa du di Saatan lei gi Gadu? Ma san den du?

¹¹ Pakisei san Efa be sa taigi Saatan. A be sa taigi en taki: ‘Mi á sabi i, ma mi sabi Nda Yehofa, mi lobi en, mi e fitoow en. Neen gi mi anga Adan ala den sani di wi abi. Fa i sa abi a deki-ati de fu lei gi en? Pasa komoto ya!’ Efu Efa be taki a sani ya, ná pikin piisii Yehofa be o piisii (Odo 27:11). Ma Adan anga Efa á be lobi Yehofa anga den hii ati, neen meke di Saatan lei gi Yehofa den biibi en.

12. Fa Saatan koli Efa? San Adan anga Efa du di Saatan lei gi Yehofa?

¹² Enke fa u si, da Saatan taki sani di meke Efa bigin akisi enseefi efu Yehofa a wan bun Dda. Di Saatan lei gi Yehofa, Adan anga Efa ná holibaka gi  Yehofa. Den biibi Saatan, neen meke den taangayesi Yehofa. Na aseefi fasi Saatan e koli sama aini a ten ya. Ai poli Yehofa nen fu di ai lei gi en. Den sama di e biibi Saatan nai wani Yehofa tii den.

13. Fa Eseikiyeli 36:23 e soi u san na a moo pelensipali bosikopu fu Beibel?

¹³ Yehofa e sidon pii e luku fa Saatan e poli en nen? Ehee. Te wi e leisi Beibel wi e si san Yehofa du fu soi taki den sani di Saatan taki fi en aini a dyali Eden a ná tuu (Gen. 3:15). Beibel e soi kiin san Yehofa o du fu santa a nen fi en. Ai soi taki te a Manpikin fi en o tii goontapu, sani o waka a wan letifasi. Sama ná o go e du ogii anga taawan moo, da a so a nen fu Yehofa o santa. Te wi e leisi Beibel wi e fusutan moo bun san Yehofa o du fu santa a nen fi en.​—Leisi Eseikiyeli 36:23.

14. San Yehofa du di Saatan sitee anga en aini a dyali Eden?

¹⁴ Saatan du ala san a man fu tapu Yehofa fu a á du san a abi a pakisei. Ma noiti Saatan fende wini. Beibel e soi u san Yehofa du. Den sani di sikiifi aini Beibel e soi kiin taki Yehofa a wan Dda di lobi u. Neen na a moo bun Tiiman tu. A hati Yehofa di Saatan anga den sama di e holibaka gi en sitee anga en (Ps. 78:40). Ma toku Yehofa soi taki a koni, a abi pasensi. Ai du sani a wan letifasi ala yuu. A soi tu taki a abi makiti. Ma a moo pelensipali sani a taki Yehofa e soi lobi aini ala san ai du (1 Yoh. 4:8). Te anga now Yehofa e du sani fu santa a nen fi en.

15. Fa Saatan e poli a nen fu Gadu aini a ten ya? San na a bakapisi?

¹⁵ Te anga now Saatan e poli a nen fu Gadu ete. Ai meke sama biibi taki Gadu ná abi makiti, a nai du sani a wan letifasi, a á koni, a á lobi u. Saatan wani sama biibi taki a ná Yehofa meke u.  Te wan sama e biibi taki Gadu de, da Saatan e meke a fii enke den weiti fu Gadu ibi tumisi. Ai leli sama taki Yehofa abi ogii-ati bika ai boon sama aini faya. Te sama e biibi den lei ya, da a moo makiliki gi den fu den taangayesi Yehofa. Solanga Yehofa á puu Saatan a pasi, a o du ala san a man fu poli a nen fu Yehofa fu di a wani sama daai baka gi en. A wani koli i tu fu gwe fika Yehofa. Yu o meke a fende i koli?

16. San i sa du di Adan anga Efa á be du?

¹⁶ Yehofa e gi sondu libisama a okasi fu yeepi santa a nen fi en. Yu abi a okasi fu du san Adan anga Efa á be du. Gaanse sama aini a goontapu e poli a nen fu Yehofa, ma yu abi a okasi fu soi sama taki Yehofa santa, taki ai du sani a wan letifasi, a lobi u tu (Yes. 29:23). I mu du sani di e soi taki yu e si Yehofa enke a sama di mu tii yu. Yeepi sama fu fusutan taki te Yehofa o tii, na ala se fu goontapu sama o libi na a wan. Ala sama o go e piisii tu.​—Ps. 37:9, 37; 146:5, 6, 10.

17. Fa Yesesi yeepi sama fu sabi a nen fi en Dda?

¹⁷ Te wi e meke moiti fu santa a nen fu Yehofa, wi e waka a Yesesi Kelestesi baka (Yoh. 17:26). A ná kai namo Yesesi be e kai a nen fi en Dda, ma a be e leli sama tu fa Yehofa de tuutuu. Den Faliseiman be e meke sama denki taki Yehofa goofu, taki ai dwengi sama, taki a de faawe fu u. Den be wani sama si Yehofa tu enke wan Dda di ná abi tyali-ati. Ma Yesesi be e yeepi sama fu fusutan taki en Dda nai suku fini tumisi, a abi pasensi, a lobi u, ai gi sama paadon tu. A fasi fa a be e libi be e yeepi sama tu fu si fa Yehofa de tuutuu.​—Yoh. 14:9.

18. Fa u sa yeepi sama fu si taki den sani di Saatan e taki fu Yehofa a ná tuu?

¹⁸ Leti enke Yesesi u sa taigi taawan san u sabi fu Yehofa. U sa leli den taki Yehofa lobi sama, a abi switifasi. Te wi e du a sani ya wi e yeepi sama fu den á biibi den lei di Saatan e taki fu Yehofa.  Leti enke Yesesi u poi waka a Yehofa baka winsi fa wi abi sondu (Efe. 5:1, 2). Den sani di wi e du anga den sani di wi e taki, mu soi sama fa Yehofa de tuutuu. A so wi e yeepi santa a nen fi en. Te wi e du a sani ya wi e soi taki winsi wi abi sondu, u poi dini Yehofa anga u hii ati.​—Yopu 27:5.

19. Fa Yesaya 63:7 e yeepi u fu si san na a moo pelensipali sani di u mu leli sama?

¹⁹ Ete wan sani de di u sa du fu yeepi santa a nen fu Yehofa. Te wi e sutudeli Beibel anga sama, wi e yeepi den fu si taki a Yehofa wawan abi a leti fu tii hemel anga goontapu. Wi e yeepi den fu sabi den weiti fu Yehofa tu. Ma a moo pelensipali sani di u mu du, a fu yeepi den fu lobi Yehofa. U mu yeepi den tu fu den á gwe fika Yehofa noiti. Neen meke u mu leli den san a den moo pelensipali manii fu Yehofa, da den o sabi sama a Yehofa tuutuu. (Leisi Yesaya 63:7.) Te wi e leli sama na a fasi ya, den o lobi Yehofa, den o wani aliki en tu.

20. San wi o luku aini a taa artikel?

²⁰ San u mu du efu u wani a fasi fa wi e tyai useefi anga a fasi fa wi e leli sama yeepi den fu kon dini Yehofa. Wi o luku a toli ya aini a taa artikel.