1. Saide son sama di e dini Yehofa e fii enke a den wawan de son yuu?

SOMEN fu wi abi dei pe wi e fii enke a u wawan de. A fii ya nai tan langa a son sama. Ma son wan fu wi, a wan hii pisiten wi e fii so. Son leisi winsi i de aini wan gaan kulu sama, toku yu e fii enke ai wawan de. Ai taanga gi son sama fu meke mati te den go a wan nyun kemeente. A sani ya e meke den fii enke a den wawan de. Taawan e fii so te den foloisi go tan moo faawe fu den famii. Taawan e fii enke a den wawan de, te den toowpaa dede. Omen sama di á bigin dini Yehofa langa ete e fii enke a den wawan de, te den famii anga mati fu den á wani mumui anga den moo fu di den e dini Yehofa.

2. Sowtu akisi wi o luku?

² Yehofa sabi ala sani fu u. Neen meke te wi e fii enke a u wawan de, ai fusutan fa wi e fii. A wani yeepi u tu fu kisi useefi baka. Fa Yehofa e yeepi u? San useefi sa du fu kisi useefi baka? Fa u sa yeepi taa sama aini a kemeente di e fii so? Wi o luku den akisi ya aini a artikel ya.

3. Fa Yehofa soi taki a be e booko en ede anga Eliya?

³ Yehofa wani ala den sama di e dini en de koloku. Ai poti pakisei a ibiiwan fu u. A sabi te u booko-saka fu di wi e fii enke a u wawan de (Ps. 145:18, 19). Luku fa Yehofa soi taki a be e booko en ede anga polofeiti Eliya, anga fa a yeepi en fu kisi enseefi baka. A pisiten di Eliya be e du en wooko enke polofeiti, sani á be e go bun aini Islayeli. Sama di be abi makiti aini a kondee be e du ogii anga  a foluku fu Yehofa. Den sama ya be de namonamo fu kii Eliya (1 Kow. 19:1, 2). Eliya be denki taki neen wawan be e dini Yehofa ete aini Islayeli. A sani ya be meke a fii booko-saka (1 Kow. 19:10). Yehofa á daaidaai fu yeepi Eliya. A sende wan engel fu go gi Eliya taanga-sikin. A engel soi Eliya taki a neen wawan be de, a omen taa sama be de aini Islayeli ete di be e dini Yehofa anga den hii ati.​—1 Kow. 19:5, 18.

4. Fa Malikisi 10:29, 30 e soi taki Yehofa e holibaka gi den sama di fika den famii anga mati fu kon dini en?

⁴ Yehofa sabi taki a omen sani son sama fika fu man dini en. Son leisi kande famii efuso mati nai wani holibaka gi u moo fu di wi e dini Yehofa. Wan leisi apostel Peitilisi be akisi Yesesi taki: ‘U gwe fika ala san u be abi, neen u kon waka ai baka. Sowtu paiman wi o fende?’ (Mat. 19:27) Yesesi be soi den disipel fi en taki den baala anga sisa aini a kemeente be o toon den famii. (Leisi Malikisi 10:29, 30.) A Yehofa na a edeman fu a osufamii ya. A paamisi u taki a o holibaka gi ala den sama di e dini en (Ps. 9:10). Luku wantu sani di i sa du efi i wani Yehofa yeepi i te yu e fii enke ai wawan de.

5. Saide u mu e teke ten pakisei den fasi fa Yehofa e yeepi u?

⁵ Poti pakisei a den fasi fa Yehofa e yeepi i (Ps. 55:22). Te yu o du a sani ya, yu o si taki a nai wawan de. Carol, * a wan sisa di á toow. A ná abi famii a waaleiti tu. A sisa ya taki: ‘Te mi e teke ten pakisei ala den fasi fa Yehofa e holibaka gi mi, a sani de e yeepi mi fu mi á fii enke a mi wawan de moo. Ai yeepi mi tu fu biibi taki noiti Yehofa o gwe fika mi.’

6. Fa 1 Peitilisi 5:9, 10 e yeepi den sama di e fii enke a den wawan de?

⁶ Teke ten pakisei fa Yehofa e yeepi taa baala anga sisa aini a kemeente. (Leisi 1 Peitilisi 5:9, 10.) Hiroshi, wan baala di  á be abi famii a waaleiti wan hii pisiten taki: ‘Te i go a den komakandaa, te yu e yee den toli fu taa baala anga sisa, da yu e si taki a nai wawan abi booko-ede. A sani ya e yeepi den baala anga sisa di ná abi famii a waaleiti fu den á fii enke a den wawan de.’

7. Fa begi e yeepi u?

⁷ I mu e begi ala yuu, leisi Beibel ala dei, yu á mu e misi komakandaa tu. Te yu e begi, i mu e taigi Yehofa pilisisi fa yu e fii (1 Peit. 5:7). Di wan yonkuu sisa den e kai Massiel bigin dini Yehofa, nawan fu den famii fi en be de a waaleiti. A sisa ya taki: ‘Wan fu den sani di be e yeepi mi te mi be e fii enke a mi wawan de, na a begi di mi e begi Yehofa ala yuu. Mi be e si Yehofa enke Nda. Son yuu a omen leisi wan dei mi be e begi fu taigi en fa mi e fii.’

8. Sowtu wini yu o fende te yu e teke ten pakisei den sani di yu e leisi aini Beibel?

⁸ I mu e leisi Beibel ala dei, da i teke ten pakisei san i leisi. Poti pakisei a den toli aini Beibel di e soi taki Yehofa lobi den sama di e dini en. Di wan sisa den e kai Bianca, kon dini Yehofa, a omen hati sani den famii fi en taigi en. A sisa ya taki: ‘Te mi e teke ten pakisei toli fu sama aini Beibel di be miti aseefi sani ya, mi e fende taanga-sikin fu holidoo.’ Son Kelesten e meke moiti fu holi wantu tekisi a ede di e gi den taanga-sikin te den e fii booko-saka. Tu moin tekisi di i sa meke moiti fu holi a ede, a Psalm 27:10 anga Yesaya 41:10. Son baala anga sisa taki te den e seeka gi den komakandaa, efuso te den e leisi Beibel, den lobi aliki den audio. Na a sani ya e yeepi den fu den á fii enke a den wawan de.

9. Sowtu wini yu e fende te yu e go a den komakandaa?

⁹ Meke moiti fu go a komakandaa ala yuu. Den sani di yu o leli a den komakandaa o gi i taanga-sikin. Yu o kon sabi den baala anga sisa moo bun tu (Heb. 10:24, 25). Massiel, di u be taki fi en kaba taki: ‘Winsi fa sen e kisi mi fu go a sama ini, toku mi be e go na ala den komakandaa. Mi be e gi piki tu. A sani ya be e meke mi fii enke mi a be wan pisi fu a kemeente.’

10. Saide u mu meke mati anga baala anga sisa di e dini Yehofa anga den hii ati?

¹⁰ Meke mati anga sama di e dini Yehofa anga den hii ati. Suku mati aini a kemeente di o yeepi i fu go a fesi. Winsi den sama ya a nai supee, efuso kande yu anga den á kiya na aseefi fasi, toku i sa meke mati anga den. Beibel  taki ‘gaandi sama abi koni’ (Yopu 12:12). A omen sani den gaandiwan sa leli fu den yonkuuwan di e dini Yehofa anga den hii ati tu. Winsi fa David be yonkuu moo Yonatan, toku a sani de á be tapu den fu toon bun mati (1 Sam. 18:1). David anga Yonatan be e yeepi denseefi fu tan dini Yehofa winsi san be e miti den (1 Sam. 23:16-18). Irina, wan sisa di ná abi famii a waaleiti taki: ‘Den baala anga sisa aini a kemeente sa de enke sisa, baala, mma anga dda gi u. A den sama ya Yehofa gi wi enke famii.’

11. San i mu du efi i wani abi tuutuu mati?

¹¹ A ná ala yuu a makiliki fu meke mati, moomoo efi yu a sen sama. Ratna, a wan tan pii sama. A omen tesi miti en di a be de fu kon a waaleiti, toku a holidoo. San yeepi en? A taki: ‘Mi be kon fusutan taki mi be abi den baala anga sisa aini a kemeente fanowdu.’ A á makiliki fu taigi taawan fa yu e fii efuso san e miti i. Ma efi i wani abi tuutuu mati, yu abi fu taki anga taawan. Efi i nai taigi den mati fi i sowtu booko-ede yu abi, den ná o sabi fa den mu yeepi i.

12. Fa a peleikiwooko sa yeepi i fu fende bun mati?

¹² Wan fu den moo bun fasi fu meke mati anga i baala anga sisa, a fu wooko anga den aini a peleikiwooko. Carol, di u be taki fi en kaba taki: ‘A omen bun mati mi fende fu di mi be e wooko makandaa anga taa sisa. A den mati ya Yehofa koboloiki fu gi mi taanga-sikin aini den ten di pasa.’ A omen wini wi e fende te wi e meke mati anga baala anga sisa di e dini Yehofa anga den hii ati. Te yu e fii booko-saka efuso te yu e fii enke ai wawan de, a den mati ya o gi i taanga-sikin.​—Odo 17:17.

13. Sowtu faantiwowtu ala sama aini a kemeente abi?

¹³ Ala sama aini a Kelesten kemeente mu e meke moiti fu soi lobi gi iniiwan sama di e kon a komakandaa. Na a sani ya o yeepi den fu fii taki a ná den wawan de (Yoh. 13:35). Den sani di wi e taki anga den sani di wi e du, sa gi taawan taanga-sikin. Wan sisa taki: ‘Di mi kon sabi a waaleiti, den baala anga sisa aini a kemeente toon mi famii. Na a fasi fa den libi anga mi, yeepi mi fu toon wan Kotoigi.’ Fa u sa yeepi den sama di ná abi famii a waaleiti fu den á fii enke a den wawan de?

14. San i sa du fu meke mati anga den nyun sama di e kon a komakandaa?

¹⁴ Meke mati anga den nyun sama di e kon a komakandaa. Te i si wan nyun sama kon a komakandaa, bali wadaa gi en (Rom. 15:7). Ma a ná odi namo u mu gi den sama, u mu meke moiti fu toon den mati tu. Soi a sama taki i piisii fu miti en, akisi en sani di e soi taki i wani sabi en moo bun, ma luku bun fi i nai akisi en sani di o meke a fii wan fasi. Te a sama e taigi i sowtu polobelema efuso booko-ede a abi, aliki en anga pasensi. Kande i sa akisi en fa a du kon sabi a waaleiti.

15. Fa Kelesten di abi ondoofeni sa yeepi a kemeente?

¹⁵ A kemeente o go a fesi, te den owluman anga taa Kelesten di abi ondoofeni e poti pakisei a taawan. Wan sisa den e kai Melissa taki: ‘A mma wawan kiya mi a waaleiti. Ná pikin bigi ai bigi gi mi taki den baala aini a kemeente be de enke dda gi mi. Ala yuu den be de kabakaba fu aliki mi.’ Wan yonkuu baala den e kai  Mauricio taki: ‘Di a sama di be sutudeli anga mi komoto a waaleiti, mi be e fii enke a mi wawan be de. Ma a fasi fa den owluman be poti pakisei a mi, be yeepi mi fu kisi miseefi baka. Te den be fende wan moin toli aini Beibel, den be e paati en anga mi. Son leisi den be e kai mi fu go sport anga den.’ Nownow Melissa anga Mauricio e du a fuuten diniwooko.

16-17. Sowtu taa sani u sa du fu yeepi u baala anga sisa?

¹⁶ Yeepi den baala anga sisa fi i te den fuka (Gal. 6:10). Leo, wan baala di e du a zendeling wooko aini wan kondee faawe fi en famii taki: ‘Gaanse leisi a wan pikin sani wan sama e du gi i, da ai bigi gi i kaba. Mi sabi ete wan leisi mi be naki anga wagi. Di mi doo osu, ná pikin booko mi be e booko mi ede. Ma wan toowpaa be kai mi fu go nyan wan sani anga den. Mi á sabi moo san u nyan a dei de, ma mi e membee ete taki den be aliki mi anga pasensi. Den be soi taki den e booko den ede anga mi. Di mi go a osu, mi be e fii bun baka.’

¹⁷ Wi e piisii fu go a den kelen-komakandaa anga den konkelesi, bika wi e miti omen baala anga sisa. Ma a ná ala baala anga sisa ai makiliki gi fu go a den komakandaa ya. Carol, di u be taki fi en kaba taki: ‘Te mi go a den gaan komakandaa, mi e fii enke a mi wawan de. A omen ondoo baala anga sisa e de a den komakandaa ya, ma ala sama e de anga den paa. Famii e de a wan kulu, toowpaa e de makandaa, efuso mati e gi toli anga denseefi. Te mi si fa taawan e piisii anga den sama fu den, mi e moo fii enke a mi wawan de.’ Ai taanga gi son baala anga sisa fu den wawan go a wan kelen-komakandaa efuso konkelesi baka te den toowpaa dede. I sabi wan sama di e fii so? Kande i sa akisi en fu go makandaa anga yu anga yu osufamii na a taa gaan komakandaa di e kon.

18. Fa u sa wooko anga a sani di sikiifi a 2 Korentesama 6:11-13 te wi e luku sama wi o kai kon a wi osu?

¹⁸ Meke ten fu de makandaa anga i baala anga sisa. Te yu e go koi efuso te yu e  kai sama kon a yu osu, yu á mu e kai denseefi sama ala yuu. Suku fu kai den sama di i si enke ai taanga gi fu meke mati. Beibel taki u mu opo wi ati gi den sowtu sama ya. (Leisi 2 Korentesama 6:11-13.) Melissa, di u be taki fi en kaba taki: ‘Ná pikin poolo u be e poolo te baala anga sisa be kai u go a den osu, efuso te den be kai u fu go koi anga den.’ Wan sama de aini i kemeente di i sa kai kon a yu osu?

19. On ten a be o bun fu moo poti pakisei a den baala anga sisa fu u?

¹⁹ Son yuu a de moo taanga fanowdu fu meke ten gi den baala anga sisa fu u. Kande i sa kai den kon a yu osu a den dei te den famii fu den di nai dini Yehofa gwenti holi fesa di nai kai anga den leli fu Beibel. Wan sani di e meke sama e fii booko-saka, a te a dei di wan toowpaa, famii, efuso mati fu den be dede e koosube. Neen meke a be o bun fu poti pakisei a u baala anga sisa a den dei de. Te wi e meke ten gi den na a sowtu fasi ya, wi e soi taki wi e booko wi ede anga den.​—Filip. 2:20.

20. Fa den sani di Yesesi taki a Mateyesi 12:48-50 sa yeepi u te wi e fii enke a u wawan de?

²⁰ A omen sani sa meke den sama di e dini Yehofa aini a ten ya fii enke a den wawan de. Te yu e fii so, membee taki Yehofa sabi fa yu e fii, neen meke ai gi u san wi abi fanowdu fu kisi useefi baka. Gaanse leisi a den baala anga sisa aini a kemeente ai koboloiki fu gi u taanga-sikin. (Leisi Mateyesi 12:48-50.) Te wi e meke moiti fu holibaka gi den baala anga sisa aini a kemeente, wi e soi taki wi e teke en fu bigi taki Yehofa tyai u kon aini a osufamii fi en. Efi yu e fii enke ai wawan de son yuu, holi a pakisei taki Yehofa de ai se ala yuu.