A OMEN yali kaba den Islayelisama be gwenti gi moni fu holibaka gi a tuu biibi. Ma aini a ten fu Yesesi, a omen lantimoni den Dyu be mu pai. A sani ya be e meke a libi taanga gi den.

Ala yali, ala den man aini Islayeli di be pasa twenti yali, be mu gi moni fu holibaka gi a wooko di be e du na a tabernakel, bakaten a tempel. Aini a ten fu Yesesi, na a moni ya den be e koboloiki fu holibaka gi a wooko di be e du na a tempel di Herodes be meke. Wantu Dyu be akisi Peitilisi fa Yesesi be e si a pai di sama be mu pai lantimoni. Kelestesi á be taki a fowtu fu pai lantimoni. Di Peitilisi taki a toli ya anga en, neen a soi en pe a sa fende wan solufu moni fu pai a lantimoni.​—Mat. 17:24-27.

A ten de, a foluku fu Gadu be mu gi du fu tin pisi fu den sani di den be paandi, efuso fu a moni di den be e wooko (Lef. 27:30-32; Num. 18:26-28). Den kelikifesiman fu a ten de be e wani sama gi du fu tin pisi fu ala pikinpikin sani. Sani enke ‘menti-uwii, a dille-uwii anga dyira’. Yesesi á be taki a fowtu fu gi du fu tin pisi, ma den leliman fu a weiti anga den Faliseiman be e suku fini tumisi. Na a sani de Yesesi á be lobi.​—Mat. 23:23.

Boiti dati, a omen sowtu lantimoni den Dyu be mu pai den Romesama di be e tii den. Den be mu pai lantimoni fu den goon fu den. Ma efu den á be abi a moni, den be mu gi taa sani na a moni peesi. Te den be koti wan sani fu 10 kilo alisi efuso taa sani a goon, da den be mu gi den Romesama 2 kilo efuso 2 kilo anga afu fu a sani di den koti. Boiti dati, ala den Dyu be mu pai wan moni tu. Na a moni ya den Faliseiman be sende sama go akisi Yesesi efu a fiti fu pai en. A sani di Yesesi piki den e soi u kiin fa u mu si a pai di u mu pai lantimoni. A taigi den taki: ‘U mu pai a Gaankownu san a fu a Gaankownu, ma pai Gadu san a fu Gadu.’​—Mat. 22:15-22.

Sama be mu pai lantimoni tu te den be e tyai sani go aini wan taa foto efuso te den be e sende sani go a wan taa foto. Den be e pai den lantimoni ya a den lanpeesi pe den sipi pe e kon, a den booki, den pasi, den gaan doo fu a foto, efuso a wowoyo pe den be e go.

A lantimoni be e ibi gi den sama fu pai. Wan ondoosukuman di den e kai Tikikus taki a pisiten di Tiberiyus be e tii, den Siriyasama anga den sama fu Yudeya go begi a kownu fu den á pai lantimoni ipi so moo, bika a be kon ibi gi den. Na aseefi ten de Yesesi be de a goontapu.

A fasi fa den be e piki a lantimoni be e meke sani moo ogii gi a foluku. Na a sama di be pai moo moni be e fende a wooko fu piki lantimoni. Te a be fende a wooko ya, da a be e poti sama fu piki a moni gi en. Den sama di be e piki a moni be e meke den sama pai ipi tumisi, a so den be e meke moni a den sama tapu. A gei enke Sakeyesi a be wan fu den man di be abi wookoman di be e piki lantimoni gi en (Luk. 19:1, 2). A fu den sani ya ede a foluku be e buuse den sama di be e piki lantimoni.