1. Saide u sa taki Saatan de enke wan ontiman?

A WOOKO fu wan ontiman, a fu kii efuso kisi wan meti. A omen sowtu wookosani ai koboloiki fu du a sani ya, leti enke fa wan fu den falisi mati fu Yopu be taki (Yopu 18:8-10). Fa wan ontiman e koli wan meti fu kisi en? Ai keli luku fosi san a meti e du, anga san a lobi. Baka dati ai luku san na a moo bun fasi fu kisi en. Na aseefi sani ya Saatan e du. Ai keli u luku bun. A sabi pe wi e go, anga san u lobi. Baka dati ai luku fa a sa kisi wi anga wan fu den sani di u lobi. Ma Beibel e soi u taki winsi Saatan kisi u, u poi komoto aini a akaapana fi en. Beibel e leli u tu san u mu du fu a á kisi u.

2. San a tu fu den moo pelensipali beti fu Saatan?

² Tu fu den beti fu Saatan, a heimembee anga takuudu. * A omen dunsu yali kaba ai koboloiki den beti ya fu kisi sama. Saatan de enke wan sama di e sidon e luku a akaapana fi en fu si efu wan sani go aini fu a kisi en (Ps. 91:3). Ma efu u de na ain, Saatan ná o fende u kisi. Saide? Bika Yehofa e soi u fa Saatan e koli sama.​—2 Kor. 2:11.

3. Saide Yehofa meke sama sikiifi toli aini Beibel fu sama di be abi heimembee anga takuudu?

³ Yehofa sabi san miti sama di be abi heimembee anga takuudu. Neen meke ai gi u toli fu den sama ya fu di a wani yeepi u fu den sani di be miti den, á miti u. Wi o luku fa Saatan be man koli sama di be e dini Yehofa wan hii pisiten kaba. A sani ya wani taki wi á poi wai pasi gi heimembee anga takuudu? Nono. Yehofa poti den toli ya aini Beibel fu wasikoi u (1 Kor. 10:11). A sabi taki efu u leli wan  sani fu den sama di kai aini Beibel, a sani ya o yeepi u fu Saatan á fende u kisi.

4. San o pasa anga wan sama di abi heimembee?

⁴ Saatan wani u kon abi heimembee. A sabi taki efu u kon abi heimembee, wi o kon de enke en, da u ná o fende a teego libi (Odo 16:18). Neen meke Pawlesi be taki efu wan sama kon abi heimembee, da ‘Gadu o sitaafu en enke fa a o sitaafu Didibii’ (1 Tim. 3:6, 7). A sani ya sa pasa anga iniiwan fu u, winsi on langa wi e dini Yehofa kaba.

5. Enke fa Peleikiman 7:16, 20 e soi, da san e soi taki wan sama abi heimembee?

⁵ Sama di abi heimembee e denki denseefi namo, den nai booko den ede anga taawan. Saatan wani u denki useefi namo, pe fu u denki Yehofa, moomoo te tesi e miti u. Kande wan sama e libi ogii anga i, efuso kande wan sama lei gi i. Saatan be o poolo efu a si taki yu ati boon a Yehofa, efuso taki yu e holi den baala anga sisa na ati. A be o switi gi en efi i du san iseefi wani fu losi a polobelema, pe fi i wooko anga san Yehofa taki aini a Wowtu fi en.​—Leisi Peleikiman 7:16, 20.

6. San i leli fu a toli fu a sisa di e tan a Bakaakondee?

⁶ Luku a toli fu wan sisa di e tan a Bakaakondee. Son fowtu di den baala anga sisa be e meke, be e meke en ati boon. A be fende taki a be kon weli fu den manii fu den. A taki: ‘Mi be e fii enke a mi wawan be de. Mi á be poi du nawan sani fu kengi a fasi fa mi be e denki fu den baala anga sisa. Neen meke mi taigi mi man taki mi wani foloisi go a wan taa kemeente.’ Baka dati, a sisa ya luku a JW Broadcasting^® fu maart 2016. A Broadcasting ya e soi san i sa du te taawan e meke fowtu. A sisa taki: ‘Mi be kon si taki mi be mu abi sakafasi. Pe fu mi meke moiti fu kengi den baala anga sisa, a moo bun fu mi luku den fowtu di miseefi e meke, da mi kengi mi manii. A yeepi mi tu fu fusutan taki a Yehofa abi a leti fu taigi u fa u mu  du sani.’ San a toli fu a sisa ya e leli u? Te tesi e miti i, i mu tan poti pakisei a Yehofa. Begi en fu a yeepi i fu si den baala anga sisa enke fa ai si den. I Dda di de a hemel e si den fowtu di den e meke, ma toku ai gi den paadon anga en hii ati. Na aseefi sani ya a wani i du tu.​—1 Yoh. 4:20.

7. San miti Kownu Usiya?

⁷ Kownu Usiya fu Yuda be kon abi heimembee. A á be e wani aliki moo te taawan be e poti en a pasi. Neen meke a go du wan sani di a á be abi a leti fu du. A omen bun sani Usiya be du. A wini omen feti, a be meke omen foto, a be abi omen gaan goon tu. ‘A tuu Gadu be e meke sani waka bun gi en’ (2 Kolon. 26:3-7, 10). Ma Beibel taki ‘di a fende moo makiti, neen a kon abi bigifasi. Neen meke sani á waka bun gi en’. Yehofa be taki a den pilisite wawan be abi a gaandi fu tyai ofaandi gi Yehofa, ma toku Kownu Usiya go aini a tempel fu tyai ofaandi. Neen meke Yehofa ati boon neen, neen a meke a kisi kokobe. Anga a siki ya a tan fu te enke a dede.​—2 Kolon. 26:16-21.

8. Enke fa 1 Korentesama 4:6, 7 e soi, da san o yeepi u fu wi á kon abi heimembee?

⁸ I si enke a sani di miti Usiya sa miti u tu? Kon u luku a toli fu wan owluman den a kai José. A baala ya be abi wan wooko di be e daai bun. A be e holi lezing a kelen-komakandaa anga konkelesi tu. Son leisi kelen-owluman seefi be e akisi en fa den sa du son sani moo bun. Ma a baala ya taki: ‘A ondoofeni di mi be abi be meke mi bigin fii miseefi. Mi á be e fitoow Yehofa moo. Mi be e si enke mi biibi be taanga, neen meke te Yehofa be e poti mi a pasi, mi á be e aliki. Bakaten José du wan gaan sondu, neen den baala puu en na a kemeente. Nownow a wantu yali kaba di den teke en baka. A taki: ‘Yehofa leli mi taki a moo pelensipali sani a ná den gaandi di wi abi aini a olikanisâsi, ma a libi u mu libi enke fa a wani.’ Neen meke winsi u sabi du son sani, efuso wi abi omen gaandi aini a kemeente, wi á mu feegete taki a Yehofa e gi u den sani ya. (Leisi 1 Korentesama 4:6, 7.) Efu wi abi heimembee, Yehofa ná o teke u fu wooko gi en.

9. San Saatan anga Efa du fu di den be abi takuudu?

⁹ Te u yee a wowtu takuudu, da wi e pakisei Saatan Didibii wanten. Saatan be musu abi tyaipi gaandi, bika en a be wan engel fu Yehofa. Ma a be wani moo. A be wani sama dini en, leti enke fa den be e dini Yehofa. Ma a Yehofa wawan abi a leti fu sama dini en. Saatan wani u de enke en. Neen meke ai suku ala fasi fu meke wi á tifeedi anga san wi abi. A fosi leisi di a du a sani ya, a di a go taki anga Efa. Yehofa be gi Adan anga Efa omen sii aini a dyali fu Eden fu den nyan. A wan kodo namo a be taki den á mu nyan (Gen. 2:16). Saatan koli Efa fu denki taki a mu nyan a sii fu a bon de tu. Efa á be e piisii moo anga san Yehofa be gi en, a be wani moo. U sabi fa sani waka. Efa sondu, neen a dede te fu kaba.​—Gen. 3:6, 19.

10. San Kownu David du fu di a be kon abi takuudu?

¹⁰ Yehofa be meke David toon kownu, a be meke a kon gudu, a be meke a wini omen feti tu. A be e bigi gi David te a be pakisei den sani di Yehofa du gi en. A be taki den sani di Yehofa du gi en be ipi te a á be poi teli den (Ps. 40:5). Ma bakaten David á be e poti pakisei moo a den sani di Yehofa du gi en. A á be e piisii moo anga san a be abi. A be wani moo. Winsi fa David be abi omen uman, toku a be e angii fu siibi anga a uman fu wan taa man. A uman ya nen a Batseiba, a man fi en a be Uriya, wan man fu Het. David be abi takuudu, neen meke a siibi anga Batseiba. A so Batseiba kon de anga bee. A wan gaan ogii David be du di a siibi anga Batseiba, ma a du wan moo gaan ogii seefi di a meke sama kii Uriya (2 Sam. 11:2-15). San David be e pakisei seefi? A be e si enke Yehofa á be o si en? Winsi omen yali David be dini Yehofa, toku a be kon abi takuudu, neen meke a du wan sani di tyai ogii gi en. Bakaten David soi taki a sondu di a du be e hati en. A be e bigi gi en taki Yehofa gi en paadon.​—2 Sam. 12:7-13.

11. Enke fa Efeisesama 5:3, 4 e soi, da san o yeepi u fu u ná abi takuudu?

¹¹ San a toli fu David e leli u? Wi e leli taki efu wi e teke den sani di Yehofa e du  gi u fu bigi, a sani ya o yeepi u fu u ná abi takuudu. (Leisi Efeisesama 5:3, 4.) U mu e tifeedi anga san wi abi. Te wi e sutudeli anga wan sama, wi e leli den taki den mu sidon pakisei den bun sani di Yehofa e du gi den, da den gi en daa fu den sani de. Efu wan sama e du a sani ya, na ala dei a o fende wan nyun sani fu gi Yehofa daa te ai begi (1 Tes. 5:18). Yu e du a sani ya? Efi yu e teke ten pakisei den sani di Yehofa e du gi i, da a sani de o yeepi i fu teke den sani ya fu bigi. Efi yu e teke den sani di Yehofa e du gi i fu bigi, yu o tifeedi anga san yu abi. A sani ya o yeepi i fi i ná abi takuudu.

12. San Yudasi du fu di a be abi takuudu?

¹² Takuudu meke Yudasi Iskariot du wan gaan ogii. A konkuu Yesesi. Ma Yudasi á be abi a manii ya fosi (Luk. 6:13, 16). Neen meke Yesesi be teke en enke wan apostel. A musu de taki Yesesi be e fitoow en, efuso a á be o poti en fu luku a moni kedee. Anga a moni ya Yesesi anga den apostel be e bai san den be abi fanowdu te den be e du a peleikiwooko. A leti enke a moni di wi e gi aini a ten ya fu holibaka gi a wooko di e du a hii goontapu. Ma bakaten, Yudasi be bigin fufuu a moni ya, winsi fa a be e yee Yesesi e leli sama omen leisi taki den á mu abi takuudu (Malik. 7:22, 23; Luk. 11:39; 12:15). Yudasi á be e poti pakisei a san Yesesi be e leli den.

13. On ten a be de gagagaa fu si taki Yudasi be abi takuudu?

¹³ Wantu dei fosi Yesesi dede, neen wan sani pasa di be soi taki Yudasi be kon abi takuudu. Yesesi, Maliya anga en sisa Maata, anga wantu taa disipel be go nyan na a osu fu Simon, wan man di be abi kokobe fosi. Di den e nyan, neen Maliya opo neen a kandi wan dii oli a Yesesi ede. Di a du a sani ya, Yudasi anga den taa disipel ati boon neen. Kande den taa disipel be fende taki a be o moo bun fu koboloiki a moni ya gi a peleikiwooko. Ma a taa sani Yudasi be e denki. A be e fufuu. A wani a be wani fufuu a moni di den be o poti en aini a moni kedee. Bakaten, takuudu meke Yudasi konkuu Yesesi, neen a seli en a moni di den be e seli wan saafu.​—Yoh. 12:2-6; Mat. 26:6-16; Luk. 22:3-6.

14. Fa wan toowpaa wooko anga a sani di sikiifi a Lukasi 16:13?

¹⁴ Yesesi be taigi den bakaman fi en taki: ‘Wi á poi dini Gadu anga Gudu na aseefi yuu.’ (Leisi Lukasi 16:13.) A toli fu wan toowpaa aini Romeiniya e soi taki a sani di Yesesi taki a tuu. Den be fende wan wooko aini wan taa kondee pe den be o meke moo moni. Den taki: ‘U be leni wan gaan moni a banku, neen meke di u fende a wooko ya, u be si enke a Yehofa be belesi u.’ Ma a wooko ya be de enke wan beti fu Saatan, bika efu den be teke en, den á be o abi ten fu dini Yehofa enke fa den be gwenti moo. Baka di den leisi a artikel di den e kai ‘Tan dini Yehofa anga i hii ati’ di de aini a Saanantongo Wakititolen fu 15 augustus 2008, den du san den be mu du. Den taki: ‘Efu u be o foloisi go a wan kondee pe a be o moo taanga gi u fu dini Yehofa soso fu di u be wani meke moo moni, da a sani de be o soi taki wi á lobi Yehofa anga u hii ati.’ Neen meke den á teke a wooko. Fa sani waka? A man kon fende wan wooko aini a kondee pe den e tan di be e pai a moni di den be abi fanowdu fu solugu denseefi. A toowpaa ya e piisii tuutuu, bika den soi anga a sani di den du taki a Yehofa a be den Masaa, ná moni.

15. Saide u sa biibi taki winsi wi abi takuudu efuso heimembee u poi kengi?

¹⁵ San u sa du efu u kon si taki wi abi heimembee efuso takuudu? U poi kengi. Pawlesi be taki son sama ‘di Didibii be kisi libilibi’ be komoto aini a akaapana fi en (2 Tim. 2:26). A so sani be waka anga David. Den sani di a be du be soi taki a be kon abi takuudu. Ma di Natan taki anga en, a aliki. A soi taki a sani di a du be hati en. Neen en anga Yehofa toon mati baka. Noiti wi á mu feegete taki Yehofa taanga moo Saatan. Efu u gi en a okasi fu yeepi u, Didibii ná o kisi wi anga den beti fi en.

16. San o yeepi u fu Saatan á kisi u?

¹⁶ Ma pe fu meke moiti fu komoto aini a akaapana fu Saatan, a moo bun fu u meke moiti fu a á kisi u seefiseefi. Wi á mu denki taki u biibi taanga te, da noiti wi o kon abi heimembee efuso takuudu. Son sama di be e dini Yehofa anga den hii ati wan hii pisiten be kon abi heimembee. Son wan fu den be kon abi takuudu. A Gadu wawan poi yeepi u fu a sani ya á miti u. Neen meke u mu e begi Yehofa ala dei fu a yeepi u fu si efu a fasi fa wi e denki efuso a fasi fa wi e du sani e soi taki wi abi wan fu den manii ya (Ps. 139:23, 24). Du ala san i poi fi yu á kon abi heimembee efuso takuudu.

17. San o pasa dyonson anga Saatan Didibii?

¹⁷ A omen dunsu yali kaba Saatan e onti u. Ma dyonson den o tei Saatan wan dunsu yali. Te fu kaba, Saatan ná o de moo (Openb. 20:1-3, 10). Wi e angii te fu si a ten di Saatan ná o de moo. Ma solanga a sani ya á pasa ete, u mu de na ain fu Saatan á kisi wi anga den beti fi en. U mu meke moiti taanga fu wi á kon abi heimembee anga takuudu. Meke u du ala san u poi fu ‘toto futu gi Saatan, da a o lon gwe’.​—Yak. 4:7.