Pawlesi be sikiifi taki: ‘Mi dede te a abi fu du anga a weiti. Nownow a Gadu mi e libi gi.’​—Gal. 2:19.

A den Kelesten a Galasiya Pawlesi be sikiifi a sani ya gi. A pisiten de, a Rome be e taki gi Galasiya. Son wan fu den Kelesten be bigin biibi den falisi leli di sama be e paati a ten de. Wantu man be e leli sama taki efu den wani Gadu fende den bun, da den mu e wooko anga a Weiti fu Mosesi ete, moomoo a pisi di be e soi taki wan sama mu besnei. Ma Pawlesi be sabi taki sama á be abi fu besnei moo fosi Gadu be o fende den bun. Neen meke a soi den baala anga sisa kiin taki a falisi sani den man ya be e leli sama, neen a gi den taanga-sikin fu poti pakisei a den wini di a dede fu Yesesi be tyai gi den.​—Gal. 2:4; 5:2.

Beibel e soi kiin taki te wan sama dede, a á sabi nawan sani moo (Peleik. 9:5). Neen meke di Pawlesi be taki a ‘dede te a abi fu du anga a weiti’ a be wani soi taki a á be abi fu wooko anga a Weiti fu Mosesi moo. Pawlesi be sabi taki fu di a be e biibi taki a dede fu Yesesi o tyai wini gi en, meke a ‘be sa bigin libi gi Gadu’.

Pawlesi be taki na a weiti be yeepi en fu bigin libi gi Gadu. San a be wani taki anga a sani ya? Pawlesi taki ‘a ná te wan sama e du san a weiti e taki da Gadu e si en enke wan sama di e libi a wan letifasi, ma a te ai biibi Yesesi Kelestesi’ (Gal. 2:16). A Weiti tyai wan pelensipali sani kon a kiin. Pawlesi be taigi den Kelesten a Galasiya taki: ‘Gadu gi wi a Weiti fu meke u sabi san a sondu, te enke a bakapikin di be o fende san Gadu paamisi be doo’ (Gal. 3:19). A Weiti tyai kon a kiin taki sondu libisama á poi holi ala den sani di sikiifi aini a weiti fu Gadu finifini enke fa a wani. Den be abi wan ofaandi fanowdu di be o tapu ala den sondu fu den. A Weiti be e yeepi sama fu fusutan taki a Yesesi a be a bakapikin di be o tapu den sondu fu den. Efu wan sama be wani Gadu si en enke wan sama di e libi a wan letifasi, a be mu biibi Yesesi Kelestesi (Gal. 3:24). Gadu be e si Pawlesi enke wan sama di e libi a wan letifasi fu di a Weiti be yeepi en fu sabi sama a Yesesi. A Weiti be yeepi en tu fu biibi Yesesi. A so Pawlesi be ‘dede te a abi fu du anga a weiti’, neen ‘a bigin libi gi Gadu’. A á be abi fu wooko anga san a Weiti e taki moo, bika a Gadu a be e libi gi now.

A wan seefi sowtu sani Pawlesi be taigi den Kelesten a Rome. A be sikiifi gi den taki: ‘We baala, a so a de anga u tu. Fu di Kelestesi dede gi u, meke u ná abi fu wooko anga a Weiti moo . . . Now u fii, u ná abi fu holi a weiti di be e fooseli u moo’ (Rom. 7:4, 6). Den wowtu ‘ná abi fu holi a weiti moo’ anga ‘dede te a abi fu du anga a weiti’ wani taki aseefi sani. A ná fu wan tuutuu dede Pawlesi be e taki aini Romesama 7:4, 6 anga Galasiyasama 2:19. A fu a fii di a be fii a be e taki. En anga den taa Kelesten di be e biibi Yesesi á be abi fu holi a Weiti moo. Den be fii fu di den be e biibi taki a dede fu Yesesi o tyai wini gi den.