1. San den disipel fu Yesesi be taigi wan gaan kulu sama fu du?

WAN gaan kulu man anga uman be komoto na ala se, kon a Yelusalem. Den sama ya á be e taki aseefi tongo. Wan foondoo sani pasa di den sama ya kon makandaa. Wan kulu Dyu di á be go a hei sikoo be bigin taki ala den tongo fu den sama ya. Den sama be foondoo taki den Dyu be poi taki a tongo fu den. Ma a sani di be moo hali den pakisei, na a bosikopu di den apostel be e paati. Peitilisi be taigi den taki efu den be e biibi Yesesi Kelestesi, den be o fii. Den sani di den sama be yee be naki den ati, neen meke den akisi en taki: ‘San u mu du?’ Peitilisi piki den taki: ‘U daai u libi, da u dopu.’​—Toli 2:37, 38.

2. San wi o luku aini a artikel ya? (Luku a fowtow a fesise fu A Wakititolen.)

² Wan taa foondoo sani be pasa a dei de. Wan sani fu 3000 sama dopu na a wan dei, neen den toon Yesesi bakaman. Disi a be a bigin fu a gaan wooko di Yesesi be gi den disipel fi en, fu yeepi sama toon en bakaman. Na aseefi wooko wi e du aini a ten ya ete. Nownow, wan sama á poi dopu baka te u peleiki gi en wantu yuu namo. Son sama e sutudeli wantu mun, wan yali, efuso moo langa seefi fosi den dopu. Efi yu abi wan sutudi, da i sabi taki a bunbun moiti wi abi fu meke aini a ten ya, fu yeepi wan sama fu toon Yesesi bakaman. Aini a artikel ya wi o luku san i sa du fu yeepi den Beibelsutudi fi i fu go a fesi te enke den dopu.

3. Enke fa Mateyesi 28:19, 20 e soi, da san wan sutudi mu du efu a wani dopu?

³ Efu wan sutudi wani dopu, a mu e du den sani di ai leli aini Beibel. (Leisi Mateyesi 28:19, 20.) Te wan Beibelsutudi e du den sani di ai leli, da a o de enke a man  aini a ageisitoli fu Yesesi. A man ya be diki dipi fu meke a fondamenti fu a osu fi en a siton doti (Mat. 7:24, 25; Luk. 6:47, 48). Fa u sa yeepi den sutudi fu u fu du san den e leli? Meke u luku dii sani di u sa du.

4. Fa u sa yeepi wan sutudi fu go a fesi te enke a dopu? (Luku a faki ‘ Yeepi a sutudi fu poti maiki, anga fu doo den maiki ya.’)

⁴ Yeepi a sutudi fu poti maiki di a sa doo. Saide a pelensipali fu du a sani ya? Meke u taki i komoto a bilo e go a fakansi a Ndyuka. Winsi fa a pasi langa, efi yu e sitopu a santi bangi fu nati i futu pikinso, efuso e poti pakisei a den moin sani di yu e si a pasi, i ná o fii en so. A letiso a de anga den Beibelsutudi fu u tu. Efu den e poti maiki di den poi doo nownow, a sani de o yeepi den fu biibi taki den poi doo a maiki di den poti fu dopu bakaten. I sa wooko anga a pisi di den e kai ‘Puubei a sani ya’ aini a Piisii fu teego!-buku fu yeepi a sutudi fu poti maiki gi enseefi. Baka te u luku wan toli, yeepi a sutudi fi i fu si fa a sani di a mu puubei o yeepi en fu wooko anga den sani di a leli. Efi i wani a sutudi fi i du wan taa sani, i sa sikiifi en aini a faki di den e kai ‘Taa sani di i sa puubei.’ I mu e wooko anga den sani ya ala yuu fu yeepi a sutudi fi i fu poti maiki di a poi doo nownow. Yeepi en tu fu luku san a wantu sani di a sa du aini a ten di e kon.

5. Enke fa Malikisi 10:17-22 e soi, da san Yesesi be taigi wan guduman fu du? Saide a be taigi en a sani ya?

⁵ Yeepi a sutudi fu du san ai leli. (Leisi Malikisi 10:17-22.) Yesesi be sabi taki a be o taanga gi wan guduman fu seli ala den sani di a abi (Malik. 10:23). Toku a taigi wan guduman fu seli ala den sani di a be abi. Saide? A fu di Yesesi be lobi a  man ya. Son leisi, kande u nai wani taigi wan sutudi sowtu sani a mu kengi fu di wi e si enke a á kaba ete fu du a sani ya. A tuu taki biginbigin a o taanga gi son sama fu fika a fasi fa den be e libi fu bigin du sani enke fa Yehofa wani (Kol. 3:9, 10). Ma a moo bun te i nai daaidaai fu soi a sama san a mu kengi fu Yehofa fende en bun. Te yu e yeepi en fu si fa a sa wooko anga den sani di ai leli, da yu e soi taki yu e booko yu ede anga en tuutuu.​—Ps. 141:5; Odo 27:17.

6. Saide a bun fu e akisi a sutudi fa ai denki fu son toli?

⁶ Te yu e sutudeli anga wan sama, a bun fu e akisi en fa ai denki fu son toli. A sani ya o yeepi i fu si efu a fusutan a pisi di u luku. A o yeepi i tu fu sabi san a sama e biibi. Efi i gwenti akisi a sutudi fi i sani di o yeepi en fu taki fa ai denki, a o moo makiliki gi i fu taki anga en fu toli di a nai biibi ete. A Piisii fu teego!-buku abi akisi di e yeepi a sutudi fu taki fa ai denki fu wan toli. Akisi enke a wan di de a toli 04 di e taki: ‘Fa i si enke Yehofa e fii te yu e kai a nen fi en?’ Efuso du fu toli 09 di e taki: ‘San a wantu sani di i be sa wani akisi Gadu te yu e begi?’ Kande biginbigin a o taanga gi a sutudi fu piki den sowtu akisi ya. I sa yeepi en fu taki fa ai denki te yu e akisi en san ai leli fu den fowtow, den felon anga den tekisi.

7. Fa i sa wooko anga ondoofenitoli fu yeepi den sutudi fi i?

⁷ Baka te a sutudi fusutan fa a mu piki den sowtu akisi ya, i sa soi en toli fu sama di be abi aseefi polobelema di a abi, anga san yeepi den sama ya fu kengi. Meke u taki ai taanga gi a sutudi fu kon a komakandaa. I sa soi en a felon di den e kai Yehofa e booko en ede anga mi. A felon ya de a toli 14, na a pisi di den e kai ‘Moo sani fu a toli ya’. Gaanse fu den toli aini a Piisii fu teego!-buku, abi moin ondoofenitoli a den pisi di den e kai ‘Luku a toli ya moo fini’ anga ‘Moo sani fu a toli ya’. * Ma te yu e soi a sutudi den toli ya, luku bun fi i nai maiki en anga taa sama. Yu á mu e taki sani enke: ‘Efu a sama de be poi du en, da iseefi poi du en tu.’ Na a sutudi seefi mu fusutan taki efu taa sama be poi du son sani, da enseefi poi du en tu, ma a ná wi mu taigi en a sani de. I sa soi en wantu sani di be yeepi den sama fu du den sani di den leli aini Beibel. Kande a wan tekisi efuso wan taa sani be yeepi a sama fu bigin du san a leli. Soi a sutudi tu fa Yehofa yeepi a sama.

8. Fa i sa yeepi a sutudi fi i fu kon lobi Yehofa?

⁸ Yeepi a sutudi fu lobi Yehofa. Fa i sa du a sani ya? Yeepi en fu poti pakisei a den moin manii fu Yehofa. Yeepi en fu si Yehofa enke a piisii Gadu di e holibaka gi ala den sama di lobi en (1 Tim. 1:11; Heb. 11:6). Soi a sutudi sowtu wini a o fende te a o meke moiti fu du den sani di ai leli. Soi en tu taki Yehofa lobi en, ala yuu a o holibaka gi en (Yes. 48:17, 18). O moo a sutudi o lobi Yehofa, o moo a o wani du san Yehofa e taki.​—1 Yoh. 5:3.

9. Enke fa Malikisi 10:29, 30 e soi, da san o yeepi a sutudi fu fika son sani fu toon Yesesi bakaman?

⁹ Fosi wan sutudi sa dopu, a o abi fu fika son sani di a be gwenti. Leti enke a guduman  di Yesesi be taki, son leisi den o lasi gudu, efuso taa sani di den be abi. Efu den e du wan wooko di nai kai anga san Beibel e taki, den o abi fu suku wan taa wooko. Somen fu den sutudi fu wi abi fu fika mati di á lobi Yehofa. Son wan a den famii fu den nai wani mumui den moo. Yesesi be taki a be o taanga gi son sama fu fika den sani ya. Ma a paamisi u tu taki den sama di o toon en bakaman, o fende omen wini. Yehofa o gi den wan gaan osufamii anga omen baala anga sisa di lobi den. (Leisi Malikisi 10:29, 30.) Fa i sa yeepi a Beibelsutudi fi i fu kon aini a osufamii fu Yehofa?

10. San a toli fu Manuel e leli i?

¹⁰ Meke mati anga a sutudi fi i. I mu e soi a sutudi taki yu e booko yu ede anga en. Saide a sani ya pelensipali? Manuel, di e tan a Mekisikow taki: ‘A pisiten di mi be e sutudeli Beibel, a sama di be e sutudeli anga mi, be lobi akisi fa ai go anga mi fosi u bigin sutudeli. Bakaten di mi anga en be kon gwenti, mi be poi taigi en san a den polobelema fu mi, bika mi be e si taki ai booko en ede anga mi tuutuu.’

11. Sowtu wini den sutudi fu wi o fende te wi e meke ten fu de makandaa anga den?

¹¹ Leti enke fa Yesesi be e meke ten fu de makandaa anga den bakaman fi en, a so iseefi mu e meke ten fu du sani makandaa anga a sutudi fi i (Yoh. 3:22). Te i si taki wan sutudi e meke moiti fu du den sani di ai leli, i sa e kai en kon a yu osu fu nyan wan pikin sani efuso fu luku a Broadcasting anga i. Kande i sa kai en kon a yu osu a den dei di a be gwenti go a fesa anga den famii fi en. Kazibwe, di e tan a Uganda taki: ‘A omen sani mi be e leli na a sutudi, ma a omen taa sani mi leli tu te mi be de makandaa anga a sama di be e sutudeli anga mi. Mi be e si fa Yehofa e yeepi a foluku fi en fu piisii. Na a libi ya mi be wani tu.’

12. Saide a bun fu e tyai taa peleikiman go a den Beibelsutudi fu u?

 ¹² Meke moiti fu e tyai taa peleikiman te yu e sutudeli anga a sama. Son leisi kande yu e fii enke a o moo makiliki gi i fi i wawan go na a sutudi, efuso fu go anga aseefi peleikiman ala yuu. A tuu taki a o moo makiliki gi i, ma a sutudi o moo fende wini te yu e tyai taa peleikiman go neen. Dmitrii, di e tan a Moldofa taki: ‘Ala yuu te a sama di be e sutudeli anga mi be kon anga wan taa peleikiman, mi be e leli wan nyun sani. A sani ya be e yeepi mi fu si a toli a omen sowtu fasi. A be e yeepi mi tu fu si fa mi sa wooko anga den sani di mi e leli. Fu di mi be miti omen fu den peleikiman fu a kemeente, meke a á be taanga gi mi tumisi fu go a komakandaa a fosi leisi.’

13. Saide u mu yeepi den sutudi fu u fu kon a den komakandaa?

¹³ Yeepi a sutudi fu kon a den komakandaa. Saide a sani ya pelensipali? Yehofa taki ala den sama di e dini en mu e kon makandaa ala yuu. A sani ya a wan pisi fu a dini di wi e dini Gadu (Heb. 10:24, 25). Den baala anga sisa aini a kemeente a u famii. Te wi e kon makandaa anga den, da a leti enke i be o sidon a tafaa anga yu osufamii e nyan wan switi nyanyan. A yeepi di yu o yeepi a sutudi fi i fu kon a den komakandaa, a wan fu den moo pelensipali maiki di a mu doo fu a sa dopu bakaten. Ma a ná ala yuu ai makiliki gi den sutudi fu bigin kon a den komakandaa. Fa a Piisii fu teego!-buku sa yeepi a sutudi fu kon a den komakandaa, winsi ai taanga gi en?

14. Fa u sa yeepi den sutudi fu u fu kon a den komakandaa?

¹⁴ I sa koboloiki toli 10 fu a Piisii fu teego!-buku fu gi a sutudi fi i taanga-sikin fu kon a den komakandaa. Di u be e meke a buku ya, wi akisi wantu peleikiman di abi ondoofeni fu luku efu den sutudi e fusutan den sani aini. Den taki a omen fu den sutudi fu den den yeepi fu kon a komakandaa, di den wooko anga toli 10 fu a buku. Dati á wani taki i mu wakiti te i doo toli 10 fu a buku fosi yu o kai a sutudi fu kon a den komakandaa. Fanafu a fosi leisi di wi o sutudeli, i sa kai en kaba fu kon a den komakandaa. Winsi a á kon a leisi de, yu á mu e weli fu kai en. A omen sani e miti den sutudi fu u, neen meke i mu e poti pakisei a ibiiwan fu den sutudi fi i fu luku fa i sa yeepi den. Yu á mu weli te a sutudi á kon a komakandaa den fosi leisi di yu o kai en. I mu e pasensi anga en.

15. Sowtu booko-ede son sutudi abi?

¹⁵ I sabi ete fa i be e fii di yu á be toon wan Yehofa Kotoigi ete? Kande i be e feele son sani. Kande i be e si enke noiti i be o poi peleiki gi sama. Efuso kande i be e feele taki den famii anga den mati fi i be o bigin libi ogii anga i. Efu a so, da i sa fusutan fa a sutudi fi yu e fii. Yesesi be taki son sama be o abi den sowtu booko-ede ya. Ma a be taigi den bakaman fi en taki den á be mu meke den sani ya tapu den fu dini Yehofa (Mat. 10:16, 17, 27, 28). Fa Yesesi be yeepi den bakaman fi en fu den á meke a feele di den be e feele tapu den fu dini Yehofa? Fa i sa waka a Yesesi baka?

16. Fa u sa yeepi den sutudi fu u fu taigi taawan san den e leli?

¹⁶ Leli a sutudi fa a sa peleiki gi taawan. Kande a fosi leisi di Yesesi be sende den disipel fi en fu go peleiki, den be e senuwe pikinso. Ma di Yesesi taigi den pe den mu go peleiki anga sowtu bosikopu den  be mu paati, a sani ya yeepi den fu du a wooko di a gi den (Mat. 10:5-7). Fa i sa waka a Yesesi baka? Yeepi a sutudi fu si sama a sa peleiki gi. Te a leli wan moin toli aini Beibel, akisi en efu a sabi wan sama di be o fende wini fu a sani di a leli. Baka dati, soi en wan makiliki fasi fa a sa taigi a sama san a leli. Den pisi di den e kai ‘Son sama e taki’ anga ‘Kande son sama o akisi i taki’, di de aini a Piisii fu teego!-buku sa yeepi i fu du a sani ya. Soi a sutudi fi i fa a sa koboloiki Beibel fu piki den akisi fu den sama di a o peleiki gi.

17. Fa u sa wooko anga a sani di sikiifi a Mateyesi 10:19, 20, 29-31 fu soi a sutudi taki a sa fitoow Yehofa?

¹⁷ Yeepi a sutudi fu biibi taki Yehofa poi yeepi en. Yesesi be taigi den bakaman fi en taki Yehofa be o yeepi den, bika a lobi den. (Leisi Mateyesi 10:19, 20, 29-31.) Soi a sutudi fi i taki Yehofa o yeepi en tu. Fosi u bigin sutudeli, efuso baka te u kaba sutudeli, akisi Yehofa fu yeepi en fu doo den maiki di a poti. Franciszek, di e tan a Polen taki: ‘A sama di be e sutudeli anga mi be gwenti akisi Yehofa fu a yeepi mi anga den sani di mi be wani du te a be e begi anga mi. Di mi si fa Yehofa be e piki den begi fi en, miseefi bigin begi tu. Mi si fa Yehofa piki den begi fu mi, di mi akisi en fu a yeepi mi fu mi basi gi mi den dei di mi be abi fanowdu, fu go a den konkelesi anga den komakandaa.’

18. Fa Yehofa e si a wooko di wi e du fu yeepi sama fu kon dini en?

¹⁸ Yehofa lobi ala den Beibelsutudi fu u. Ai teke en fu bigi tu taki wi e meke ala moiti fu yeepi sama fu toon en mati (Yes. 52:7). Winsi kande i ná abi wan Beibelsutudi nownow, i sa yeepi den sutudi fu taa peleikiman aini a kemeente.