1. San Yehofa du gi ibiiwan fu u di de aini a olikanisâsi fi en?

A YEHOFA seefi hali ibiiwan fu den sama di de aini a olikanisâsi fi en fu kon dini en (Yoh. 6:44). Denki a toli ya luku. Fu ala den miliyunmiliyun sama di de a goontapu, Yehofa si wan sani a yu. A si taki yu o man dini en anga wan kiin ati (1 Kolon. 28:9). Yehofa sabi i, ai fusutan i, a lobi i. Te wi e pakisei den sani ya wi e fii bun.

2. Fa Yesesi soi taki Yehofa e booko en ede anga ibiiwan fu den sama di e dini en?

² Yehofa lobi i, ma a lobi ala den taa baala anga sisa aini a kemeente tu. Yesesi be taki en Dda de enke wan sikapuman. Efu wan sikapuman abi 100 sikapu, neen wan fu den sikapu ya lasi, san i denki a o du? ‘A o fika den taa 99 sikapu fu go suku a wan di lasi.’ Di a o fende a sikapu ya, a ná o ligei anga en, ma a o poolo taki a fende en baka. San a toli ya e leli u? Ala den sama di e dini Yehofa pelensipali gi en. Yesesi taki: ‘Nda a hemel á wani nawan fu den pikinwan ya dede.’​—Mat. 18:12-14.

3. San wi o luku aini a artikel ya?

³ Nawan fu wi á wani tyai a nen taki a wi du meke u baala efuso sisa dyakata. San u mu du efu wi á wani a sani ya miti u? San u sa du efu wan sama du wan sani di hati u? Wi o luku den akisi ya aini a artikel ya. Ma fosi u poti pakisei a den akisi ya, wi o luku fosi sama a ‘den pikinwan’ di Yesesi be e taki aini Mateyesi kapitel 18.

4. Sama a ‘den pikinwan’ di Yesesi be e taki?

⁴ ‘Den pikinwan’ ya, na ala den bakaman fu Yesesi. Winsi den yonkuu efuso gaandi, toku ala den de enke yonkuu pikin di de kabakaba fu leli sani fu Yesesi (Mat. 18:3).  A sama fu ala nasi, lo, kondee anga tongo e dini Yehofa. Ma winsi sowtu gwenti efuso manii den sama ya be abi, toku ala den e meke moiti fu du san Kelestesi taki. Yesesi lobi ibiiwan fu den bakaman fi en.​—Mat. 18:6; Yoh. 1:12.

5. Fa Yehofa e fii te sama e libi ogii anga a foluku fi en?

⁵ Ibiiwan fu ‘den pikinwan’ ya pelensipali gi Yehofa. Fu fusutan fa Yehofa e si den, da luku fa iseefi e si pikinnengee. Enke libisama, ai du wi ogii te u si taawan e pina, ma ai moo du wi ogii te pikinnengee e pina. Wi e wani yeepi den. A letiso Yehofa e booko en ede anga u. Ai du en ogii te sama e libi ogii anga u.​—Yes. 63:9; Malik. 9:42.

6. Enke fa 1 Korentesama 1:26-29 e soi, da fa a goontapu ya e si den bakaman fu Yesesi?

⁶ Ma Yesesi be wani taki wan taa sani tu di a kai den bakaman fi en ‘pikinwan’. Sowtu taa sani a be wani taki? We, sowtu sama a goontapu ya e teli fu pelensipali sama? A den sama di gudu, den sama di abi balinen, anga den sama di abi makiti. Den bakaman fu Yesesi nai suku balinen efuso makiti, neen meke a goontapu ya e si den enke sama di á pelensipali. (Leisi 1 Korentesama 1:26-29.) Ma winsi fa a goontapu ya e si u, toku u pelensipali gi Yehofa.

7. Fa Yehofa wani u si den baala anga sisa fu u?

⁷ Yehofa lobi ala den sama di e dini en. A ná abi toobi on langa wan sama de a waaleiti. Ibiiwan fu den baala anga sisa aini a olikanisâsi pelensipali gi Yehofa, neen meke den mu pelensipali gi u tu. Beibel taki u mu ‘lobi ala den baala fu u’ (1 Peit. 2:17). Efi i kon sabi taki i du wan sani di hati wan baala efuso sisa, meke moiti fu meke en bun anga en baka. Winsi a wan sani di nai gei wan gaan sani gi i. Yu á mu luku taki a kaakeli a sama kaakeli tumisi. Saide son sani di wi e du e hati taawan? We, kande a fasi fa a sama kiya e meke ai si sani taa fasi. Sani miti son baala anga sisa di meke den e fii enke den á bun. Taawan á de a waaleiti langa ete. Den sani ya sa meke a moo taanga gi den fu gi den baala anga sisa paadon te den du wan sani di hati den. A ná abi toobi san meke wan sama mandii. Efi i sabi taki i du wan sani di hati en, du ala san i poi fu meke en bun anga i baala efuso sisa. Ma efi yu a wan sama di e mandii gaw, efuso kande yu ati e boon gaw, da iseefi mu meke moiti fu kengi i manii. A sani ya o yeepi i fi yu anga den baala anga sisa aini a kemeente libi na a wan. Yu o go e moo piisii tu.

8. Sowtu fasi fu denki be abi kaakiti na a fasi fa den bakaman fu Yesesi be e si sani?

⁸ San meke Yesesi bigin taki fu ‘den pikinwan’ aini a tekisi ya? Den disipel fi en be akisi en taki: ‘Sama o de a moo gaanwan aini a Kownukondee fu hemel?’ (Mat. 18:1) Gaanse fu den Dyu aini a ten de be e fende taki a te wan sama abi hei posisi fosi da a pelensipali. Wan koniman be taki: ‘A sani di be moo pelensipali gi den sama fu a ten de, a be fu abi hei posisi. Den be wani taawan e lesipeki den.’

9. San den bakaman fu Yesesi be abi fu du?

⁹ Yesesi be sabi taki den Dyu aini a ten de be e si hei posisi enke a moo pelensipali sani. Neen meke a be sabi taki a bunbun moiti den bakaman fi en be o abi fu meke fu puu a fii ya aini den ati. A be taigi den taki: ‘A moo gaanwan mu de enke  a moo pikinwan. A sama di e teke fesi mu de enke a futuboi’ (Luk. 22:26). Wi e tyai useefi enke a moo pikinwan ‘te wi e si taawan pelensipali moo u’ (Filip. 2:3). Te u nai fii enke u bun moo taawan, a sani ya o yeepi u fu libi bun anga u baala anga sisa. A o yeepi u tu fu wi á du sani di o meke den dyakata.

10. San Pawlesi taki u mu holi a pakisei?

¹⁰ Ala baala anga sisa abi wan sani di den poi du bun moo u. Te yu e poti pakisei a den bun sani di den e du, yu o si taki a sani ya a tuu. Wi á mu feegete a sani di Pawlesi be taigi den sama fu Korente. A be taigi den taki: ‘Saide yu e si enke i bun moo taawan? San yu abi di a ná fende i fende en? Efu a fende i fende en, da saide yu e meke bigi enke a ná fende i fende en? (1 Kor. 4:7) U mu e luku bun fu u nai du, efuso taki sani fu meke sama si enke u bun moo taawan. Efi yu a wan baala di poi holi moin lezing, efuso wan sisa di abi omen Beibelsutudi, sama o go e gafa i. Ma yu á mu feegete taki a Yehofa meke i poi du den sani ya.

11. San Yesesi be wani leli den bakaman fi en anga a ageisitoli fu a kownu anga a saafu?

¹¹ Baka di Yesesi taigi den bakaman fi en taki den mu luku bun fu den á meke taawan dyakata, a gi den wan ageisitoli fu wan kownu anga wan saafu. A saafu ya be abi wan gaan paiman na a kownu, ma a kownu be taigi en taki a á be abi fu pai en moo. Bakaten aseefi saafu ya go ligei anga wan taa saafu di be mu pai en wan pikin moni. Di a kownu yee san pasa, a meke sama sooto a fosi saafu. San a toli ya e leli u? Yesesi taki: ‘A so Nda di de a hemel o libi anga u tu te u nai gi u baala paadon anga u hii ati.’​—Mat. 18:21-35.

12. San o pasa efu u nai gi u baala anga sisa paadon?

¹² A ná a saafu wawan be fii den bakapisi fu a sani di a du. A be meke sama sooto a taa saafu ‘te enke a be fende a moni fu pai en baka’. Boiti dati, den taa saafu di be si san pasa be fii en tu. Beibel taki ‘di den taa saafu si san pasa, a du den ogii te’. A so taawan e fii a bakapisi fu den sani di wi e du tu. San sa pasa efu wan sama du wan sani anga i, ma yu á wani gi en paadon? A sani ya o hati i baala efuso sisa, bika kande i ná o go e taki anga en moo, efuso kande i ná o lafu anga en moo enke fosi. Ma a neen wawan o fii a sani ya. Den taa baala anga sisa seefi o fii en. A sani ya o meke den nai libi na a wan moo.

13. San a toli fu wan pionili sisa e leli u?

¹³ Te wi e gi u baala efuso sisa paadon, a ná den wawan e fende wini fu a sani ya. Useefi o fii moo bun. Na a sani ya wan pionili sisa den e kai Crystal be kon fusutan. Wan sisa aini a kemeente be du wan hati sani anga en. Crystal taki: ‘Te mi be pakisei den sani di a sisa ya be taki, mi be e fii enke a sutu ai sutu mi anga wan nefi. Te u be de a peleikiwooko, mi á be e wani den poti mi aini aseefi wagi anga en. Wan pisiten mi á be e piisii moo.’ Crystal be fii taki a be abi leti fu mandii, ma a be sabi tu taki nawan sama o fende wini fu a holi di ai holi a sisa na ati. Neen meke a meke moiti du den sani di sikiifi aini Saanantongo Wakititolen fu 15 oktober 1999 di e taki ‘Gi taawan paadon anga i hii ati’. Crystal taki: ‘Mi kon fusutan taki a moiti ala wi e meke fu du sani enke fa Yehofa wani. Na ala dei Yehofa e gi u paadon te  wi e meke fowtu. Di mi gi a sisa ya paadon, mi fii enke wan gaan koko komoto a mi ati. Nownow mi e piisii baka.’

14. Enke fa Mateyesi 18:21, 22 e soi, da san be e taanga gi Peitilisi fu du? San wi e leli fu a sani di Yesesi piki en?

¹⁴ U sabi taki u mu e gi taawan paadon. Toku a ná ala yuu a makiliki fu du a sani ya. A gei enke a be e taanga gi apostel Peitilisi fu gi sama paadon son yuu tu. (Leisi Mateyesi 18:21, 22.) San i sa du te ai taanga gi i fu gi taawan paadon? A fosi sani di i mu du a fu sidon pakisei fa Yehofa e gi i paadon te i meke wan fowtu (Mat. 18:32, 33). Yehofa á be abi fu e gi u paadon, toku ai du a sani ya anga en hii ati ala yuu (Ps. 103:8-10). Boiti dati, Yehofa taki ‘u musu fu lobi useefi’, neen meke wi á poi taki u ná o gi u baala efuso sisa paadon. A wan sani di u musu fu du efu u wani Yehofa piisii anga u (1 Yoh. 4:11). Wan taa sani di o yeepi i, a te yu e pakisei sowtu wini yu o fende te yu e gi taawan paadon. Te i gi a sama paadon, a leti enke wan koko e komoto a yu ati. Ma a sama di yu o gi paadon seefi o piisii. Boiti dati, a kemeente o poi libi na a wan go doo. Yu anga Yehofa ná o poli tu (2 Kor. 2:7; Kol. 3:14). Baka te i teke ten pakisei den sani ya, da i begi Yehofa, a Sama di taki u mu e gi taawan paadon, fu a yeepi i. Ná meke Saatan poli yu anga den baala anga sisa fi i (Efe. 4:26, 27). Efu wi á wani Saatan poli wi anga u baala anga sisa, u mu e du sani enke fa Yehofa taki.

15. Enke fa Kolosesama 3:13 e soi, da san u mu du efu wan baala efuso sisa du wan hati sani anga u?

¹⁵ San i sa du efu wan baala efuso sisa du wan hati sani anga i? Du ala san i poi fu wi á poli. Taigi Yehofa fa yu e fii. Begi en tu fu sani sa go bun anga a sama di libi ogii anga i. Akisi en fu a yeepi i fu  poti pakisei a den bun manii fu a sama ya, den manii di meke Yehofa hali en kon aini a olikanisâsi fi en (Luk. 6:28). Efi i si enke yu á poi fika a sani di a baala efuso sisa du anga i, da luku fosi san na a moo bun fasi fa i sa taki anga en. Yu á mu si enke a fu seefi a baala efuso sisa du wan sani fu hati i (Mat. 5:23, 24; 1 Kor. 13:7). Te yu e taki anga en, yu á mu e kuutu en aini yu ati. San i mu du efi i meke moiti, ma a á wani meke en bun anga i? We, i mu tan libi bun anga i baala efuso sisa. (Leisi Kolosesama 3:13.) Noiti i mu holi i baala efuso sisa na ati, bika a sani ya sa poli yu anga Yehofa. Te i nai meke nawan sama poli yu anga Yehofa, da yu e soi taki i lobi Yehofa moo iniiwan taa sani.​—Ps. 119:165.

16. San ala u mu du?

¹⁶ Ai bigi gi u taki u poi dini Yehofa makandaa anga u baala anga sisa (Yoh. 10:16). Bladzijde 165 fu a buku di den e kai Wi orga fu du a wani fu Yehovah, e taki: ‘A wan gaandi wi abi fu dini Yehofa makandaa anga taa baala anga sisa. Neen meke na ala u mu e du san u poi fu libi na a wan.’ Ala Kelesten mu e meke moiti fu si den baala anga sisa aini a kemeente enke fa Yehofa e si den, bika ala den pelensipali gi Yehofa. Yu e si i baala anga sisa enke fa Yehofa e si den? Yehofa e teke en fu bigi te yu e du ala san i poi fu libi na a wan anga i baala anga sisa.​—Mat. 10:42.

17. San u mu e meke moiti fu du?

¹⁷ U lobi ala den baala anga sisa fu u, neen meke u wani ‘du ala san u poi fu wi á meke den dyakata’ (Rom. 14:13). Wi e si den baala anga sisa fu u pelensipali moo useefi. Wi e gi den paadon anga u hii ati te den du wan sani di hati u. Wi á mu meke den sani di taawan e du, poli wi anga Yehofa. ‘Ala yuu u mu e meke moiti fu libi bun anga taawan. U mu e meke moiti fu e du sani di e gi taawan taanga-sikin.’​—Rom. 14:19.