1. San a wantu sani di e meke son baala anga sisa feele?

 MEKE u luku wantu sani di e meke son baala anga sisa e feele fu du san den mu du. Nestor anga en uman María be wani foloisi go a pe moo peleikiman de fanowdu. Ma den be o abi fu fika son sani fu man du a sani ya. * A toowpaa ya be e si enke te den be o foloisi, a wooko di den be o du anda, á be o pai enke a wan di den be abi. Den be e si enke a sani ya be o meke den á piisii moo. Di Biniam toon wan Yehofa Kotoigi aini wan kondee pe lanti tapu a wooko, a be sabi taki a omen sani be sa miti en fu di aini dini Yehofa. A sani ya be e meke a feele. Ma a sani di be e meke a moo feele, a te a be pakisei san den famii fi en be o du di den be o yee taki a toon wan Yehofa Kotoigi. Di dataa taigi Valérie taki a abi kanker, a meke ala sowtu moiti fu fende wan dataa di be wani yeepi en sondee fu gi en buulu. A sani ya á be makiliki. A be e feele taki ao dede.

2. Saide u mu meke moiti fu feti anga a feele di we feele son yuu?

² Wan sani e miti i nownow di e meke i feele? Gaanse fu wi abi sani di e meke u feele. Efu u nai meke moiti fu feti anga a fii ya, wo du sani di Yehofa á lobi. A dati Saatan wani. Neen meke na ala yuu ai suku fasi fu du sani anga u fu meke u feele. A be o poolo efu u be o tapu anga a moo pelensipali wooko di Yesesi gi u fu peleiki a bun nyunsu (Openb. 12:17). Saatan abi ogii-ati. A abi makiti.  A nai weli fu suku fasi fu poli wi anga Yehofa tu. Ma toku i sa wini en. Fa yo du a sani ya?

3. San o yeepi u fu wa feele?

³ Efu we biibi taki Yehofa lobi u, taki ala yuu ao holibaka gi u, u naw feele Saatan (Ps. 118:6). We si a sani ya te u luku a toli fu a sama di sikiifi Psalm 118. A omen sani be e miti en. Sama be e suku fu du ogii anga en. Son wan fu den sama ya be abi makiti tu (vers 9, 10). Son yuu sani be e moo en te ná sani (vers 13). Boiti dati, te aa be e tyai enseefi bun, Yehofa be e puu kaasi gi en (vers 18). Toku a man ya be singi taki: ‘Mi nai feele.’ San be e yeepi en fu aa feele? A be sabi taki winsi fa Yehofa be e puu kaasi gi en son yuu, toku a lobi en tuutuu. A be e biibi tu taki winsi sowtu sani be o miti en, a Gadu fi en be o de kabakaba fu yeepi en.​—Ps. 118:29.

4. San a wantu sani di u naw feele te we biibi taki Yehofa lobi u?

⁴ I mu e biibi anga i hii ati taki Yehofa lobi i. Efu we biibi a sani ya, (1) u naw feele te u naabi moni sai fu solugu wi osufamii. (2) U naw feele te sama wani du ogii anga u. (3) U naw feele fu dede tu. Den baala anga sisa di u be taki fu den na a bigin be e biibi taki Yehofa lobi den, na a sani ya be yeepi den fu den á feele di sani be e miti den.

5. Anga san wan osufamii edeman sai booko en ede? (Luku a fowtow a fesise fu A Wakititolen.)

⁵ Wan osufamii edeman mu yeepi en osufamii fu fende nyanyan anga den taa sani di den abi fanowdu (1 Tim. 5:8). Enke osufamii edeman, kande ye feele san sa pasa efii lasi i wooko. Kande di a corona siki kon, ye moo booko yu ede anga a sani ya. Kande ye akisi iseefi fa yo man bai nyanyan anga den taa sani di a osufamii abi fanowdu efii lasi i wooko. Kande ye booko yu ede fa yo pai a yuu osu. Kande ye pakisei tu pe yo fende wan taa wooko di e pai bun. Nestor anga María be e booko den ede taki den á be o poi dini Yehofa anga piisii moo te den be o foloisi. Kande ye booko yu ede anga aseefi sani ya tu. Saatan meke omen sama gwe fika Yehofa fu di den be e feele denseefi sani ya.

6. San Saatan wani u biibi?

⁶ Saatan wani u biibi taki Yehofa nai booko en ede anga u. A wani u biibi taki Yehofa nai yeepi u fu fende san wi abi fanowdu fu solugu wi osufamii. Efu u bigin biibi a sani de, wo du ala san u poi fu wa lasi u wooko. U naw abi toobi seefi fu pasa den weiti fu Yehofa, soso fu di wa wani lasi u wooko.

7. Sowtu taanga-sikin Yesesi gi u?

⁷ Yesesi taki fosi wi akisi Yehofa wan sani, ai ‘sabi kaba san wi abi fanowdu’. U sa biibi a sani ya, bika Yesesi sabi en Dda moo ala taa sama (Mat. 6:8). A sabi taki Yehofa de kabakaba fu yeepi u fu fende den sani di wi abi fanowdu. Ala tuu Kelesten de aini a osufamii fu Yehofa. A Yehofa na a Edeman fu a osufamii ya. U sa biibi taki ao solugu u, bika na aseefi sani ya a taigi ala osufamii edeman fu du aini 1 Timotiyesi 5:8.

8. (a) San o yeepi u te we fii enke u naw poi solugu wi osufamii? (Mateyesi 6:31-33) (b) Te u luku a fowtow da we si fa wan baala anga en uman e tyai nyanyan go gi wan sisa. Fa u sa waka na a toowpaa ya baka?

⁸ Efi ye biibi taki Yehofa lobi yu anga  yu osufamii, da a naw taanga gii fu biibi taki ao yeepi u fu fende den sani di wi abi fanowdu. (Leisi Mateyesi 6:31-33.) Yehofa lobi u tuutuu. Ai booko en ede anga u. A wani yeepi u fu fende san wi abi fanowdu. We si a sani ya te u luku fa a seeka a goontapu gi u. Aa gi u san wi abi fanowdu fu tan a libi namo, ma a gi u tyaipi sani di e meke a libi switi gi u (Gen. 2:9). Winsi a den moo pelensipali sani namo u poi bai, toku u mu holi a pakisei taki a Yehofa e yeepi u fu fende san wi abi fanowdu (Mat. 6:11). Kande i be sa fende omen wooko anga taa sani, ma i fika den sani de fu di ya wani gwe fika Yehofa. Holi a pakisei taki den sani di Yehofa o gi yu aini a ten di e kon, bun moo ala den sani di ye fika a baka fu di ya wani gwe fika en. Boiti dati, aini a ten di e kon, ao gii teego libi tu. Na a sani ya Nestor anga María kon fusutan bakaten.​—Yes. 65:21, 22.

9. San a toli fu Nestor anga María e leli u?

⁹ Nestor anga María be abi wan bun libi a Kolombiya. Den taki: ‘U be wani du moo gi Yehofa, neen meke wa be wani libi bigi moo. Ma u be sabi taki te u be o du a sani ya, wa be o abi moni moo enke fosi. U be e feele taki wa be o piisii moo.’ San yeepi den fu den á booko den ede anga a sani ya moo? A sani di yeepi den, a di den be e pakisei den somen fasi fa Yehofa soi den taki a lobi den. A sani ya yeepi den fu biibi taki Yehofa be o poi solugu den te den be o du moo gi en. Neen meke den fika a wooko fu den di be e pai bun. Den seli a osu fu den tu, neen den foloisi go a wan peesi pe moo peleikiman be de fanowdu. Sowtu wini den fende di den du a sani ya? Nestor taki: ‘U si taki a sani di sikiifi a Mateyesi 6:33 a tuu, bika wi abi ala san wi abi fanowdu. Nownow we piisii moo enke fosi.’

10. Saide sama e feele taa libisama?

¹⁰ Senten di goontapu sete neen sama e du ogii anga taawan (Peleik. 8:9). We si a sani ya te u luku fa son sama di abi makiti e du ogii anga taawan. Fufuuman e kii sama sosokaali. Te pikin go a sikoo, son yuu taa pikin e fuufeli den te da den nai wani go a sikoo moo. Son sama e du gaan ogii anga den eigi famii tu. A fu den  sani ya ede sama e feele taa libisama enke denseefi. Fu di Saatan sabi a sani ya, meke ai meke sama du sani fu meke u feele. San a wantu fasi fa ai du a sani ya?

11-12. Fa Saatan sa meke a feele di we feele libisama tapu u fu dini Yehofa?

¹¹ Saatan wani u feele sama te da u tapu anga a peleikiwooko. Son leisi ai meke den tiiman du ogii anga u. Son yuu den tiiman ya e tapu a wooko fu wi aini a kondee fu den (Luk. 21:12; Openb. 2:10). A omen olikanisâsi e paati lei fu Yehofa Kotoigi. Son yuu sama e biibi den lei ya, da den e bigin libi ogii anga u (Mat. 10:36). U nai foondoo te Saatan e koli sama fu du ogii anga u, bika na aseefi sani ya a be e du anga den Kelesten na a ten fu den apostel.​—(Toli 5:27, 28, 40).

¹² Ma a ná tiiman wawan Saatan e meke du ogii anga u. Son sama di e leli sabi Yehofa e feele den famii fu den moo den sani di tiiman sa du anga den. Den lobi den famii. Den wani den famii leli sabi Yehofa fu den sa dini en. Neen meke ai hati den te den famii e taki ogii fu Yehofa anga a foluku fi en. Son leisi den sama di be e libi ogii anga u, e daai kon dini Yehofa bakaten. Ma kande den famii fii á wani taki anga i moo fu di i toon wan Yehofa Kotoigi. San yo du efu a sani ya miti i?

13. Saide u sa biibi taki Yehofa o yeepi u te u famii á wani taki anga u moo? (Psalm 27:10)

¹³ Ná pikin taanga-sikin we fende te u luku san sikiifi a Psalm 27:10. (Leisi en.) Efu we holi a pakisei taki Yehofa lobi u, a sani ya o yeepi u fu holidoo te sama e suku fu tapu u fu dini en. Ai yeepi u tu fu biibi taki ao belesi u te wo holidoo. Yehofa poi yeepi u fu fende ala san wi abi fanowdu fu tan a libi. A poi yeepi u tu fu wa buuya te tesi e miti u. Boiti dati, ao yeepi u fu dini en anga piisii, winsi sai miti u. Na a sani ya Biniam be kon fusutan.

14. San a toli fu Biniam e leli i?

¹⁴ Di Biniam bigin dini Yehofa, a kon fusutan taki a omen ogii lanti be e du anga den Kotoigi aini a kondee fi en. Ma a be e biibi taki Yehofa lobi en. Na a sani de yeepi en fu aa feele fu dini en. Biniam taki: ‘Aa be makiliki. Sani be ogii moo enke san mi be denki. Ma mi be e moo feele san den famii fu mi be o du di mi  toon wan Kotoigi. Mi be e si enke nda be o si enke mi go kaba a soso. Mi be e feele taki den famii fu mi be o taki mi e poli a nen fu a famii.’ Winsi fa Biniam be e booko en ede anga den sani ya, a be e biibi taki Yehofa e holibaka gi den sama di a lobi. Biniam taki: ‘Mi be e pakisei fa Yehofa be yeepi sama di be abi moni polobelema, anga fa a be e holibaka gi baala anga sisa te sama be du ogii anga den. A omen leisi sikowtu kisi mi. Ná pikin fon den fon mi. Ma toku mi á gwe fika Yehofa. Mi si fa Yehofa holibaka gi mi di mi á gwe fika en.’ Yehofa be de enke wan Dda gi Biniam. Den baala anga sisa be de enke en famii.

15. Saide aa fowtu son yuu fu feele dede?

¹⁵ Beibel e kai dede wan feyanti fu libisama (1 Kor. 15:25, 26). Te we pakisei dede da a sani ya e meke we feele son yuu, moomoo te u siki wan gaan siki efuso te wan sama di u lobi siki. Ma saide we feele dede? Bika Yehofa meke wi anga a fii fu libi fu teego (Peleik. 3:11). Ma a feele di we feele dede e tyai wini gi u tu. Ai yeepi fu konikoni anga u libi. Ai yeepi u fu du sani di o meke wi abi wan bun gusontu. Ai yeepi u fu wa nyan sani di sa meke u siki. Ai yeepi u tu fu suku dataa yeepi te a de fanowdu. Boiti dati, u naw du sani di sa meke u kisi gaan mankei.

16. Fa Saatan sa koboloiki a feele di wi feele dede, fu poli wi anga Yehofa?

¹⁶ Saatan sabi taki wa wani dede. A be taki, te wan sama de fu dede ao du ala san a poi fu tan a libi. Winsi a sani di a sama du o meke en anga Yehofa poli seefi, ao du en soso fu a mu tan a libi (Yopu 2:4, 5). Ma a sani di Saatan taki ya a ná tuu! Ma toku Beibel taki neen na a sama di e ‘kii sama’. Di a sabi kaba taki wa wani dede, da ai du sani fu meke u feele fu u sa du wan sani di o meke wi anga Yehofa poli (Heb. 2:14, 15). Son leisi ai meke den tiiman efuso taa sama di e holibaka gi en taigi u taki den o kii wi efu wa tapu fu dini Yehofa. Son yuu te a si taki wi abi dataa yeepi fanowdu, ai koboloiki a okasi de fu poli wi anga Yehofa. Ai meke dataa efuso famii dwengi u fu teke buulu. Efuso kande wan sama e gii taanga-sikin fu go suku yeepi a bonuman efuso fu teke wan dataa yeepi di nai kai anga den leli fu Beibel.

17. Enke fa Romesama 8:37-39 e soi, da saide aa de fu u feele dede?

¹⁷ Nawan sama á wani dede, ma u sabi taki winsi u dede seefi sani á de di poi tapu Gadu fu lobi u. (Leisi Romesama 8:37-39.) Winsi wan mati fu Yehofa dede, a nai feegete en. Gi en a leti enke a de a libi ete (Luk 20:37, 38). Ai angii fu weki den mati fi en baka (Yopu 14:15). Yehofa meke en Manpikin kon dede gi u ‘fu u sa fende teego libi’ (Yoh. 3:16). U sabi taki Yehofa lobi u. Ai booko en ede anga u tu. Neen meke efii siki efuso sama wani kii i fu di ye dini Yehofa, ná gwe fika en. Begi en fu a gii a kaakiti anga a koni fi en di yu abi fanowdu fu man du sani enke fa a wani. Na a sani ya Valérie anga en man du.​—Ps. 41:3.

18. San a toli fu Valérie e leli i?

¹⁸ Di Valerie be abi 35 yali, dataa be si taki a abi wan takuu sowtu kanker. Ma a biibi di a be e biibi taki Yehofa lobi en, be yeepi en fu aa feele tumisi. A taki: ‘Di u yee taki mi abi kanker ná pikin dyombo u dyombo. A sani ya kengi u hii libi. Dataa  be taigi u taki mi mu du wan gaan opalasi. Mi be taki anga omen dataa, ma nawan fu den á be wani du a opalasi sondee fu gi mi buulu. Mi be e feele, ma mi á be wani du nawan sani di be sa poli mi anga Yehofa. Mi hii libi langa Yehofa soi taki a lobi mi. Ma mi be abi a okasi now fu soi en fa mi lobi en. Ala yuu te mi be yee takuu nyunsu fu a kanker fu mi, mi be e si a sani ya enke wan okasi fu soi Yehofa taki mi naw gwe fika en. A so Saatan á be o poi wini mi. Te fu kaba u fende wan dataa di yeepi mi sondee buulu. Winsi fa mi á kaba kisi miseefi ete, toku ala yuu Yehofa be e gi u den sani di wi abi fanowdu. Fosi a opalasi, u be luku a artikel di den e kai “No frede te problema e miti yu na ini a ten disi” a komakandaa. * Ná pikin yeepi a artikel ya yeepi u. Ala yuu u be e leisi en. A artikel ya, anga a sutudeli di u be gwenti sutudeli yeepi u fu wa buuya.’

19. San Yehofa o du dyonson?

¹⁹ A omen baala anga sisa a hii goontapu Yehofa yeepi fu holidoo di omen gaan tesi be miti den. A yeepi den fu wini Didibii (1 Peit. 5:8, 9). Yehofa poi yeepi i tu fu holidoo te tesi e miti i. Dyonson moo Yehofa o meke Yesesi a Sama di a poti fu tii a Kownukondee fi en, ‘tapu den wooko fu Didibii’ (1 Yoh. 3:8). Te a sani ya o pasa, ‘nawan sama efuso sani o meke den sama di e dini Yehofa feele’ (Yes. 54:14; Mika 4:4). Solanga a ten de á doo, sani o de di sa meke u feele. Ma wa mu meke den sani ya tapu u fu du sani enke fa Yehofa wani.

20. San o yeepi u fu wa feele moo?

²⁰ U sa biibi taki Yehofa lobi den sama di e dini en. U sa biibi tu taki ao kibii den. Ma san o yeepi u fu biibi a sani ya? A sani di o yeepi u fu biibi a sani ya, a te we pakisei fa Yehofa be e kibii den sama di be e dini en a fositen. U mu holi pakisei tu fa Yehofa be yeepi wi aini a ten di pasa. Yehofa poi yeepi u fu wa feele moo!​—Ps. 34:4.