WAN sisa den e kai Lisa taki a sani di hali en kon a waaleiti, na a fasi fa den baala anga sisa e libi switi anga denseefi anga fa den libi anga en. * Wan taa sisa den e kai Anne taki: ‘A fasi fa den libi anga mi be naki mi ati moo den sani di den be leli mi.’ Nownow den sisa ya e leisi Beibel ala yuu da den e pakisei san den leisi. Ma toku den á poi feegete a fasi fa den baala anga sisa be libi switi anga den.

A sani ya e soi taki taawan e fende wini te we soi switifasi gi den. Ma fa u sa soi switifasi gi taawan? Aini a artikel ya, wo luku tu fasi fa u sa du a sani ya: A fasi fa we taki anga taawan, anga den sani di we du. Wo si tu sama u mu soi switifasi gi.

U sa waka na a uman di Odo kapitel 31 e taki fi en baka. A tekisi ya taki ‘a weiti fu bunfasi de neen tongo tapu’ (Odo 31:26). A sani ya e soi taki a uman ya e taki switi anga taawan ala yuu. Den dda seefi mu e taki switi anga taawan ala yuu. Te mma anga dda e bali den pikin fu den efuso e taki goofu anga den, da gaanse leisi a sani ya e meke den pikin nai wani aliki den. Ma te mma anga dda e meke moiti fu taki switi anga den pikin fu den, ai moo makiliki gi den pikin fu aliki den.

Ma san o yeepi i fu man taki switi anga taawan ala yuu winsi i naabi pikin? A bigin pisi fu Odo 31:26 e soi san o yeepi u. Ai taki: ‘Den sani di ai taki e soi taki a koni.’ A sani ya e soi taki den sani di ye taki mu soi taki i koni. Fosi i taki wan sani, a bun fu akisi iseefi taki: ‘A sani di mi o taki ya o meke a taawan ati boon efuso ao meke en ati koo?’ (Odo 15:1) A wan koni sani fu denki fosi i taki wan sani.

Wan taa tekisi aini Odo e taki: ‘Te wan sama nai denki fosi a taki, da a leti enke ai sutu taawan anga wan fetihow’ (Odo 12:18). Ala yuu i mu e pakisei sowtu bakapisi den sani di ye taki o tyai gi taawan. A sani de o yeepi i fu ya taki sani di o hati taawan. Ao yeepi i tu fi yu á taki goofu anga den (Efe. 4:31, 32). Efu we denki bun fosi u taki, wo go e taki switi anga taawan. Sama o go e fii bun te we taki anga den. U sa waka a Yehofa baka te u luku a fasi fa a be taki anga Eliya di a be e feele. A engel di Yehofa be meke taki anga Eliya á be e bali di a be e taki anga en, ma a ‘saafisaafi’ a be taki anga en (1 Kow. 19:12). Ma a ná taki wawan u mu taki switi anga taawan. U mu soi switifasi gi den tu anga den sani di we du. Fa u sa du sani ya?

Efu we waka a Yehofa baka, u naw go e taki switi anga taawan namo, ma wo go e libi bun anga den tu (Efe. 4:32; 5:1, 2). Lisa di u be taki fi en kaba taki ná pikin yeepi den Kotoigi be yeepi en. A taki: ‘Di a osufamii fu mi be mu foloisi, tu Kotoigi toowpaa puu den wooko dei fu den fu kon yeepi u. A ten de mi á be e sutudeli  ete seefi.’ A di den baala anga sisa libi bun anga Lisa meke a bigin sutudeli Beibel bakaten.

Anne di u be taki fi en kaba taki den Kotoigi be libi bun anga en tu. A taki: ‘Te mi be e pakisei a fasi fa sama be e libi anga mi, a be e taanga gi mi fu fitoow sama. Neen meke di mi miti den Yehofa Kotoigi, mi á be e kaba fitoow den. Mi be e akisi miseefi saide den be e kon a mi ala yuu. Ma mi be e fitoow a sama di be e sutudeli Beibel anga mi, bika a be abi bun manii.’ San a be a bakapisi? Anne taki: ‘A fasi fa a be e libi anga mi meke mi bigin poti pakisei a den sani di a be e leli mi.’

A fasi fa den baala anga sisa be libi anga Lisa anga Anne be doo den ati. Na a sani ya meke den be wani sabi moo fu Yehofa. Na a switifasi di den soi den meke den be wani aliki.

Son sama e taki switi anga taawan fu di den sama fu den gwenti taki so anga  sama. A abi wini te i gwenti taki bun anga taawan. Ma efi ye du a sani ya fu di a so den sama fii gwenti, da dati á wani taki yu soi switifasi enke Yehofa.​—Luku Toli fu den apostel 28:2 tu.

Bunfasi anga switifasi a wan fu den manii di a yeye fu Gadu e meke sama abi (Gal. 5:22, 23). Neen meke na a santa yeye fu Yehofa wawan sa yeepi u fu abi den manii ya. A so wo man waka a Yehofa anga Yesesi baka. Leti enke Yesesi, i mu e soi taki ye booko yu ede anga taawan. U mu lobi Yehofa anga taa sama. Na a lobi di wo lobi den o yeepi u fu libi bun anga den, leti enke fa Yehofa e libi anga sama.

Ai moo makiliki gi u fu libi bun anga den sama di u sabi anga den sama di e libi bun anga u (2 Sam. 2:6). Wan fasi fa u sa du a sani ya a te we gi den daa te den du u wan bun (Kol. 3:15). San u mu du te we si enke aa de fanowdu fu gi wan sama daa?

U sa waka a Yehofa baka te u wani sabi sama u mu du bun gi. Sama á de di e du bun gi taawan enke en. Ai du bun gi ala sama. Ai du bun gi den sama di á sabi en tu. A soi wi aini en Wowtu fa u sa waka neen baka. Fa Yehofa e soi switifasi gi sama?

Yehofa e du bun gi ala sama di de a goontapu, bika ai gi den san den abi fanowdu fu tan a libi (Mat. 5:45). Fosi u leli sabi Yehofa a be e du bun gi u kaba (Efe. 2:4, 5, 8). A moo gaan bun di a du gi u, a di a meke en Manpikin kon dede gi ala sama. Pawlesi be sikiifi taki ‘Gadu soi u a bun-ati fi en pasa maiki’ di a meke a wan kodo Manpikin fi en kon dede gi u (Efe. 1:7). Boiti dati, Yehofa e tan gi u leli, winsi fa we du sani son yuu di e hati en. Den sani di ai leli u de enke ‘alen di e kai filifili’ (Deit. 32:2). Noiti wo man pai Yehofa fu ala den bun di ai du gi u. A di Yehofa abi bun-ati meke wi abi a howpu fu libi fu teego aini a ten di e kon.​—Luku 1 Peitilisi 1:13 tu.

Te we pakisei a bun-ati di Yehofa e soi u, a sani ya e meke u wani toon en mati. Ai meke u fii bun tu. Neen meke useefi mu meke moiti fu waka a Yehofa baka. Wa mu e du bun gi wantu sama namo, ma u meke moiti fu libi bun anga ala sama (1 Tes. 5:15). Efu we meke moiti fu libi switi anga taawan, wo de enke wan faya di e waan taawan te koo e kii den. Efi ye meke moiti fu abi a manii ya, den famii fi yo fii bun te den de makandaa anga i. Yo de wan gaan yeepi gi den baala anga sisa, den sama a wookope, den pikin a sikoo anga den sama na a pisi pe ye tan.

Pakisei fa den sama aini yu osufamii efuso den baala anga sisa aini i kemeente o piisii te ye taki switi anga den efuso te ye du bun gi den. Kande i sa yeepi wan sama aini kemeente di abi yeepi fanowdu fu seeka wan sani neen osu. I sa yeepi wan sama tu di e suku sama fu tyai en go a goon. Kande i sa go bai sani gi sama di á poi komoto a osu. Kande i sa yeepi wan sama tu di i miti aini a peleikiwooko di abi yeepi fanowdu.

Meke u meke moiti fu taki switi anga taawan ala yuu. Meke u meke moiti tu fu du bun gi taawan. A so we soi taki we waka a Yehofa baka.