GAANSE sama sabi a toli fu Yesesi. Den sabi taki Beibel e taki den be sipikii en a wan ponsu a tu ogiiman mindii (Mat 27:35-38). Beibel e soi taki di a dede, den seeka a dedesikin fi en, neen den poti en aini wan geebi. Ma a ná ala sama e biibi a pisi fu a toli ya.​—Malik. 15:42-46.

Son sama di e ondoosuku den buku di e taki fu a libi fu Yesesi, nai biibi taki den be e beli sama di be dede a wan ponsu enke fa den be e beli taa sama. Te den be kii wan sama na a fasi ya, den be e si en enke wan ogiiman. Neen meke den nai biibi taki den be e beli den sama ya a wan bun fasi. Ariel Sabar wan sikiifiman fu wan kolanti na a Ameekankondee taki saide son sama nai wani biibi a pisi fu a toli ya. A taki: ‘A den sama di be du den moo gaan ogii den be e kii na a fasi ya. Neen meke son sabiman e si enke noiti den Romesama be o gi pasi fu den beli den sama ya a wan bun fasi.’ Den Romesama be e wani gi ogiiman sen. Neen meke te den be kii den a wan ponsu, den be e fika den dedesikin fu den ape te enke meti kon nyan den. Baka dati, den be e fiingi den pisi fu den di be fika go a pe den be e iti taa dedesikin.

Ma den sani di sabiman fende, e soi taki den be e beli son Dyu di den be kii a wan ponsu leti enke fa den be e beli ala taa sama. Aini 1968, den fende den bon fu wan man di den be kii na a ten di Yesesi be de a goontapu. Den be fende den aini wan kedee a wan mongo koosube fu Yelusalem. Wan bakafutu-bon be de aini a kedee tu. A bon ya be sipikii fasi a wan paanga anga wan sipikii di be langa fo doin anga afu. Sabar taki: ‘A bakafutu-bon di den fende aini a kedee a fu wan man di den be e kai Yehokanan.’ Den bon ya e soi taki a sani di Beibel e taki fu a beli di den be beli Yesesi aini wan siton olo a tuu. Winsi fa den be sipikii Yehokanan a wan ponsu, toku den Romesama be gi den Dyu pasi fu beli en enke fa den be e beli ala taa sama.

Te sama e luku a bakafutu-bon fu Yehokanan, da te den e taki fu a fasi fa den be sipikii Yesesi a wan ponsu, den nai denki go na a wanse. Ma winsi fa den nai denki go na a wanse fu a toli de, toku a bon di den fende e soi kiin taki den Romesama be e gi pasi fu den beli son ogiiman di den be kii a wan ponsu. A ná ala ogiiman den be e fiingi go na a geebi pe den be e towe den ogiiman. U sa biibi a sani di sikiifi aini Beibel taki den be seeka a dedesikin fu Yesesi neen den be beli en aini wan siton olo.

Yehofa be taki den be o beli Yesesi aini a siton olo fu wan guduman. A so sani waka tuu. Bika noiti Yehofa e taki wan sani da aa pasa enke fa a taki.​—Yes. 53:9; 55:11.