1. Saw mu du efu u wani pasa a dei fu Yehofa libilibi?

 TE BEIBEL e taki fu a dei fu Yehofa, da ai taki fu a ten di Yehofa o kuutu den feyanti fi en. Ma ai taki fu a ten di aw fii a foluku fi en tu. Aini a ten di pasa, a omen foluku Yehofa be sitaafu (Yes. 13:1, 6; Eseik. 13:5; Sef. 1:8). Aini a ten ya, a dei fu Yehofa o bigin di a Gaan Babilon o kisi poli na a feti fu Alimakedon. Efu u wani pasa a dei ya libilibi, da u mu seeka a fesi. Yesesi be taki u mu de ‘seekaseeka fosi a gaan banowtu doo’.​—Mat. 24:21; Luk. 12:40.

2. Saide u sa fende wini fu den sani di sikiifi aini a Beibel buku 1 Tesalonikasama?

² Aini a fosi biifi di apostel Pawlesi be sikiifi gi den Kelesten fu Tesalonika, a be gi wantu ageisitoli fu yeepi den fu de seekaseeka fosi a gaan kuutu dei fu Yehofa doo. Pawlesi be sabi taki a dei fu Yehofa á be o kon wantenwanten (2 Tes. 2:1-3). Ma toku a be e gi den baala anga sisa taanga-sikin fu seeka gi a dei fu Yehofa enke a tamaa a dei ya be o doo. Useefi mu wooko anga a sani di Pawlesi be taigi den Kelesten ya. Neen meke wo luku: (1) Fa a dei fu Yehofa o kon, (2) sama naw pasa a dei ya libilibi, anga (3) faw sa seeka a fesi.

3. Fa a dei fu Yehofa o kon? (Luku a fowtow tu.)

³ ‘Enke fa wan fufuuman e kon a neti’ (1 Tes. 5:2). A disi na a fosi ageisitoli di Pawlesi gi fu soi fa a dei fu Yehofa o kon. Gaanse leisi fufuuman a neti den e fufuu. Sama nai sabi on ten den o kon. A so a dei fu Yehofa o kon tu. Nawan sama á sabi on ten a dei fu Yehofa o doo. Tuu  Kelesten seefi o foondoo te den si fa son sani e pasa baka makandaa. Ma u nai feele, bika a den ogii sama o kisi poli.

4. Fa a dei fu Yehofa o de enke a pen di wan bee uman e fii te a de fu meke?

⁴ ‘Enke fa bee e nyan wan uman di de fu meke’ (1 Tes. 5:3). Wan bee uman á poi sabi pilisisi on ten aw meke. Ma ai biibi taki wan dei aw meke namo. Di a yuu di a mu meke o doo, a bee o nyan mi en. Solanga aa meke, a bee naw tapu fu nyan mi en. A so a de anga a dei fu Yehofa tu. Wa sabi on ten a dei fu Yehofa o doo. Ma u sabi taki a dei ya o kon namo. Te Yehofa o sitaafu den ogiisama den naw poi kibii gi en. A wanboowanboo den o kisi poli.

5. Fa a gaan banowtu o de enke te peesi e kiin?

⁵ Enke te peesi e kiin. Du fu dii ageisitoli fu Pawlesi e taki fu wan fufuuman di e go fufuu a neti tu. Ma a leisi ya Pawlesi e maiki a dei fu Yehofa enke te peesi e kiin (1 Tes. 5:4). Son fufuuman e fufuu te, da den e feegete taki a yuu seefi e lon. Te fu kaba a peesi e kiin, da sama e kisi den. A so a gaan banowtu o kon wanboowanboo tu. Te a sani ya o pasa, wo sabi sama a den sama di Gadu fende bun. Wi anga den ogiisama a ná aseefi, bika we du sani enke fa Yehofa wani. U lobi bun sani anga sani di tuu (Efe. 5:8-12). Kow luku tu taa ageisitoli di Pawlesi gi fu den sama di naw pasa a dei fu Yehofa libilibi.

6. Saide u sa taki gaanse sama e siibi aini a ten ya? (1 Tesalonikasama 5:6, 7)

⁶ ‘Den sama di e siibi.’ (Leisi 1 Tesalonikasama 5:6, 7.) Pawlesi e maiki den  sama di naw pasa a dei fu Yehofa anga wan sama di e siibi. Wan sama di e siibi á sabi sai pasa neen lontu. Aa poi sabi on lati a de tu. Boiti dati, aa poi du nawan sani, bika ai siibi. A so omen sama e siibi aini a ten ya (Rom. 11:8). Den nai biibi den polofeititoli di e soi taki aini den ‘lasiti dei’ we libi. Den nai biibi taki dyonson a gaan banowtu o kon tu. Son yuu a te sani kengi a goontapu fosi da son sama e weki. Den e wani yee sani fu a Kownukondee fu Gadu. Toku son sama e siibi baka. Son sama di e biibi taki wan kuutu dei o kon seefi, e si enke a sani ya naw pasa ete (2 Peit. 3:3, 4). Ma u sabi taki a kaba e koosube namo, neen meke Beibel e taigi u taki u mu de na ain.

7. Fa den sama di Gadu o sitaafu de enke sama di lobi duungu?

⁷ ‘Sama di lobi duungu.’ Apostel Pawlesi e maiki den sama di Gadu o sitaafu anga sopiman. Te wan sama duungu, a nai poi du sani gawgaw. A nai man denki kiin. A so a de anga den ogii sama tu. Den nai aliki te Gadu e wasikoi den. Den e libi enke fa denseefi wani, wan libi di o tyai dede kii den. Ma Pawlesi e taigi Kelesten taki den á mu lasi denseefi. Den mu e denki kiin (1 Tes. 5:6). Wan Beibel ondoosukuman taki wan sama di de na ain, nai buuya. Fu di a poi denki kiin, meke a poi du sani anga koni. Saide wa mu e buuya? Bika a sani ya o yeepi u fu wa mumui anga politiki. Te dyugudyugu de aini a kondee pe we tan, u naw teke se. O moo a dei fu Yehofa e koosube, o moo sama o wani dwengi u fu teke se. Ma aa de fu u feele. A santa yeye poi yeepi u fu wa buuya. A poi yeepi u tu fu du sani anga koni.​—Luk. 12:11, 12.

8. Enke fa 1 Tesalonikasama 5:8 e soi, da saw yeepi u fu wa lasi useefi? (Luku a fowtow tu.)

⁸ ‘Wei a sani di mu kibii u boofu-ati anga a suudati-ati.’ Pawlesi e maiki Kelesten anga suudati di e seeka fu go a feti. (Leisi 1 Tesalonikasama 5:8.) Wan suudati di e go a feti mu e de seekaseeka ala yuu. A so a de anga u tu. A biibi anga a lobi fu u mu de enke wan sani di e kibii u boofu-ati. A howpu fu u mu de enke wan suudati-ati. Efu u wei ala den sani ya, da wo de seekaseeka gi a dei fu Yehofa.

9. Fa biibi e kibii u?

⁹ Wan suudati di e go a feti, e wei wan sani fu kibii en boofu-ati. A so biibi anga lobi e kibii a ati fu u tu. Den manii ya o yeepi u fu tan dini Gadu anga fu tan waka a Yesesi baka. Yehofa taki aw pai u efu we dini en anga u hii ati. U sa biibi a sani ya (Heb. 11:6). A sani ya o yeepi u fu aliki a fesiman fu u Yesesi anga u hii ati, winsi tesi e miti u. Te we luku den ondoofenitoli fu den sama di e holidoo aini a ten ya winsi fa sama e libi ogii anga den, a sani ya e taanga u biibi. Boiti dati, te we meke moiti fu waka a den sama di kengi den libi baka, fu di den wani poti a Kownukondee a fesi, a sani ya o yeepi u fu wa feti a gudu baka. b

10. Fa a lobi di u lobi Gadu anga taa sama e yeepi u fu holidoo?

¹⁰ Lobi o yeepi u fu de na ain tu. Aw yeepi u fu wa lasi useefi (Mat. 22:37-39). A lobi di u lobi Yehofa o yeepi u fu tan du a peleikiwooko, winsi sani e miti u  (2 Tim. 1:7, 8). Fu di we booko wi ede anga den sama di nai dini Yehofa, meke we tan du a peleikiwooko na a pisi pe we tan. We telefon sama. We sikiifi biifi gi den tu. Ya poi sabi, kande den sama ya sa kengi bakaten. Neen meke wa mu gi abaa.​—Eseik. 18:27, 28.

11. Fa a lobi di u lobi den baala anga sisa fu u o yeepi u? (1 Tesalonikasama 5:11)

¹¹ U lobi den baala anga sisa fu u. Neen meke we gi useefi ‘taanga-sikin’. We ‘yeepi useefi tu’. (Leisi 1 Tesalonikasama 5:11.) Leti enke fa suudati e holibaka gi denseefi, a so useefi e gi den baala anga sisa fu u taanga-sikin. Son leisi ai pasa taki wan suudati gi wan taa suudati fu a kulu fi en mankei aini wan feti. Ma a ná fuseefi. A so a de anga den baala anga sisa fu u tu. A ná fuseefi den e du sani fu hati u fii. Wa wani pai ogii fu ogii tu (1 Tes. 5:13, 15). Wan taa fasi fa we soi taki u lobi den baala anga sisa fu u, a te we lesipeki den baala di e teke fesi aini a kemeente (1 Tes. 5:12). Di Pawlesi be sikiifi a biifi ya gi den Kelesten fu Tesalonika, a kemeente á be doo wan yali ete fu di a be sete. Kande den baala di be e teke fesi a ten de á be abi ondoofeni. Kande den be e meke fowtu tu. Toku den baala anga sisa be mu e lesipeki den. O moo a gaan banowtu e koosube, o moo wo abi fu fitoow den owluman te den o taigi u wan sani. Kande u naw yee sani fu a edekantoo efuso a beikantoo wan pisiten. A den owluman o soi u saw mu du den ten de, neen meke a nownow kaba u mu e lesipeki den owluman. U mu lobi den tu. Winsi sai pasa, wa mu lasi useefi. Wa mu poti pakisei tumisi a den pikinpikin fowtu fu den baala di e teke fesi, bika den a sondu sama. Ala yuu u mu e holi a pakisei taki a Yehofa poti Yesesi fu tii den baala ya.

12. Fa a howpu fu u e kibii u fusutan?

¹² Leti enke fa wan suudati-ati e kibii a ede fu wan suudati, a so a howpu fu u e  kibii a denki fu u. Efu a howpu fu u taanga, wo poi si kiin taki den sani fu a goontapu ya naabi wini (Filip. 3:8). A howpu fu u e yeepi u tu fu wa buuya. Na a sani ya Wallace anga Laurinda di e yeepi na a Afiikan be kon si. Aini dii wiki wan fu den dda dede. Bakadati a taawan mma dede. Fu di a COVID-19 siki be de na ala se, meke den á be poi daai go a den kondee baka fu toosutu den famii fu den. Wallace sikiifi taki: ‘Mi sabi taki den o weki baka. Te mi e pakisei den, mi nai pakisei fa den be de a lasiti dei a goontapu ya, ma mi e pakisei fa den o de a fosi dei aini a nyun goontapu. A sani ya e toosutu mi te mi e tyali.’

13. Saw mu du efu u wani fende a santa yeye fu Gadu?

¹³ ‘Ná tapu a santa yeye fu Gadu fu wooko aini i’ (1 Tes. 5:19). Pawlesi e maiki a santa yeye anga wan faya di de aini u. A santa yeye poi yeepi u fu de fayafaya fu du san bun. Wo de kabakaba fu wooko gi Yehofa anga u hii ati tu (Rom. 12:11). Saw mu du fu fende a santa yeye fu Gadu? U sa begi Yehofa. U mu sutudeli a Wowtu fi en. Boiti dati, u mu e wooko makandaa anga a olikanisâsi fi en di a santa yeye e tii. Efu we du den sani ya, wo abi ‘den manii di a santa yeye’ e meke sama abi.​—Gal. 5:22, 23.

14. San wa mu du efu u wani Gadu tan gi wi a santa yeye fi en? (Luku a fowtow tu.)

¹⁴ Te Yehofa gi wi a santa yeye fi en, u mu luku bun fu wa tapu en fu wooko aini u. A den sama di e meke moiti fu denki kiin Yehofa e gi a santa yeye fi en. Efu we denki sani di á bun, Yehofa naw gi wi a santa yeye fi en. A naw gi wi a santa yeye fi en efu we du sani di á bun tu (1 Tes. 4:7, 8). Efu u wani Gadu tan gi wi a santa yeye fi en, da ‘wa mu si den polofeititoli enke soso sani’ (1 Tes. 5:20). A wowtu polofeititoli aini a tekisi ya, wani taki wan bosikopu di a santa yeye fu Gadu tyai giw. Den bosikopu ya a den  polofeititoli di e taki fu a dei fu Yehofa anga a kaba fu a goontapu ya. Noiti wa mu denki taki Alimakedon naw kon. A fasi fa we libi mu e soi taki we wakiti a dei fu Yehofa. Faw sa du a sani ya? A te we meke moiti fu tyai useefi bun anga te we ‘dini Gadu anga u hii ati’.​—2 Peit. 3:11, 12.

15. Saw yeepi u fu wa biibi den lei di sama e paati? (1 Tesalonikasama 5:21)

¹⁵ Dyonson den feyanti fu Gadu o taki: ‘Freide de, ala sani e go bun!’ (1 Tes. 5:3) A Saatan anga den ogii yeye o paati a lei ya. A omen sama den o koli (Openb. 16:13, 14). Fa a de anga wi? Efu we ‘ondoosuku ala sani luku efu a tuu’, Saatan naw poi fende u koli anga den lei fi en. (Leisi 1 Tesalonikasama 5:21.) Sama be e koboloiki a Giiki wowtu ‘ondoosuku’ di kai aini a tekisi ya, te den be e luku sani enke solufu anga gowtu fu si efu a tuutuu wan. A so a de anga den sani di we yee anga den sani di we leisi. U mu e ondoosuku luku efu den sani ya a tuu. A sani ya be pelensipali gi den Kelesten fu Tesalonika. Ma o moo a gaan banowtu e koosube, o moo a sani ya o pelensipali giw. Wa mu e biibi ala san sama e taki, ma u mu luku efu den sani ya e kai anga den leli fu Beibel anga den sani di a olikanisâsi fu Yehofa e taki. Efu we du den sani ya, da Saatan anga den ogii yeye fi en naw poi koli u fu biibi den lei fu den.​—Odo 14:15; 1 Tim. 4:1.

16. Sowtu howpu wi abi? Saw mu de kabakaba fu du?

¹⁶ U sabi taki a foluku fu Yehofa o pasa a gaan banowtu libilibi. Ma nawan fu u sabi faw libi o waka tamaa (Yak. 4:14). Efii pasa a gaan banowtu libilibi efuso efii dede fosi a ten de, i sa biibi taki Yehofa o pai i anga teego libi solanga i tan dini en anga i hii ati. Den salufu Kelesten o tii makandaa anga Yesesi a hemel. Ma den taa sikapu o tan a goontapu ya aini a paladeisi. Neen meke poti ala i pakisei na a howpu fu u. De seekaseeka fosi a dei fu Yehofa doo!