Na a ten fu a Du Fu Tu Goontapu feti, mma anga dda be foloisi komoto a Estkondee go a Doisilikondee. Aini Doisilikondee mi meke. A ten de den be bigin seeka sani fu foloisi go a Kanada. A fosi osu fu u a Kanada, a be wan peesi pe sama be e kweki foo koosube fu Ottawa. Ná pikin pooti u be pooti. Ma toku ala mmanten u be e nyan igi.

Wan dei den Yehofa Kotoigi leisi Openbaring 21:3, 4 gi mma. A sani di mma leisi doo en ati te, neen a bigin kee. Bakaten mma anga dda bigin sutudeli Beibel. Aa langa seefi neen den dopu.

Winsi fa mma anga nda á be sabi taki Ingiisitongo bunbun, toku den be e si a dini di den be e dini Yehofa enke wan pelensipali sani. Nda be e wooko a wan peesi pe den be e sumutu nikkel aini Sudbury, a Ontario. Winsi fa a neti a be e wooko, toku beina ala wiki a be e tyai mi anga mi sisa Sylvia go aini a peleikiwooko sataa. Boiti dati, ala wiki u be e sutudeli A Wakititolen enke osufamii. Mma anga nda leli mi fu lobi Yehofa anga mi hii ati. Neen meke mi dopu aini 1956 di mi be abi tin yali. Ala yuu te mi e pakisei fa den be lobi Yehofa, a sani de e gi mi taanga-sikin fu tan dini en.

Baka di mi kaba hei sikoo, mia be e poti ala mi pakisei na a dini di mi e dini Yehofa moo. Mi be e denki taki efu mi bigin pionili, da noiti mio abi moni sai fu go koi a taa kondee. Mi be fende a wooko fu pee poku a wan laadiyow sitasiyon. Mi be lobi a wooko ya, ma fu di mi be e wooko a neti meke mia be e poi go na ala den komakandaa. Boiti dati, mi be e de makandaa anga sama di nai dini Yehofa. Te fu kaba mi kosensi be bigin fon mi. Neen meke mi kengi a fasi fa mi be e du sani.

Mi foloisi go a Oshawa, Ontario. Na ape mi miti Ray Norman anga en sisa Lesli anga wantu taa pionili. Den be e meke mi e fii bun. Di mi si fa den be de koloku, mi go denki san mi wani du anga mi libi. Den gi mi deki-ati fu pionili. Neen meke aini september 1966 mi bigin du a pioniliwooko. Mi be de koloku. Mi be lobi fa mi libi be de. Ma wan sani pasa di kengi mi hii libi.

Di mi be de a hei sikoo, mi poti mi nen fu go wooko a Betel aini Toronto. Bakaten di mi be e pionili, mi kisi a kai fu go wooko fo yali a Betel. Ma mi be lobi Lesli, neen meke mi be e feele taki efu  mi go a Betel, da mi naw si en noiti moo. Mi begi Yehofa fayafaya fu a sani ya. Mi be e begi langa tu. Te fu kaba mi teke a kai fu go a Betel. Tyali kisi mi te di mi e gwe fika Lesli.

Mi be e wooko a pe den be e wasi koosi a Betel. Bakaten mi be e du a seketasi wooko. A ten de Lesli be toon wan spesuutu-pionili a Gatineau, Kibek. Mi be lobi akisi miseefi san a be e du. Mi be e akisi miseefi tu efu a wan bun bosoloiti mi teke di mi go a Betel. Bakaten wan moin sani pasa aini mi libi. Lesli gaan baala Ray kon a Betel tu. A mi anga en be e tan aini aseefi kambaa. A so mi anga Lesli be bigin taki baka. Mi anga en toow a 27 februari 1971. Na a dei de a be a lasiti dei fu den fo yali di mi be o wooko a Betel.

Mi anga Lesli fende a gaandi fu go yeepi aini wan Faansitongo kemeente a Kibek. Baka wantu yali, den baala be akisi mi fu du a kelen-wooko. Mi be foondoo, bika a 28 yali namo mi be abi. Mi be fende taki mi yonkuu tumisi, mi naabi ondoofeni. Ma den sani di sikiifi a Yelemiya 1:7, 8 be gi mi taanga-sikin. Ma Lesli be naki anga wagi wantu leisi, neen meke aa be e poi siibi a neti. A sani ya be o meke a taanga giw fu du a kelen-wooko. Toku Lesli taki: ‘Efu Yehofa akisi u fu du wan sani, da u mu meke moiti fu den. Na so noh?’ U teke a gaandi di u fende. A 17 yali langa u du a kelen-wooko. Ná pikin piisii u be e piisii fu du a wooko ya.

Di mi be e du a kelen-wooko mi be lai sani fu du. Ma mi leli wan pelensipali sani. A ná ala yuu mi be e meke ten gi Lesli. Wan monde mmanten, wan sama koko a doo fu u. Ma di mi opo a doo, mia si nawan sama. Wan manki be de na a bakadoo. Di mi luku aini a manki, neen mi si wan tafaa koosi, sii, kasi, beele, wan bataa win anga gaasi aini. Wan kaita be de aini tu. Den be sikiifi na a kaita ya tapu taki: ‘Go koi anga yu uman.’ A be wan moin dei, bika a san be e pii. Ma mi taigi Lesli taki mi naw poi go, bika mi be mu seeka wan lezing. A be fusutan mi, ma aa be fii bun. Di mi go sidon fu seeka a lezing, mi kosensi bigin fon mi. Mi pakisei Efeisesama 5:28, 29. A gei enke a Yehofa seefi be e membee mi taki mi mu poti pakisei a den fii fu a uman fu mi. Baka di mi begi neen mi taigi Lesli taki: ‘Kow gwe.’ Ná pikin poolo a be poolo. U lei go a wan moin peesi a wan sikinliba. U be abi wan moin ten makandaa anga useefi a dei de. Di u doo osu, mi be abi ten fu seeka a lezing fu mi ete.

Ná pikin piisii u be e piisii di u be e du a kelen-wooko. A omen peesi u be e du a kelen-wooko. Fanafu wan peesi den e kai British Kolombiya te anga Newfoundland. A deen fu mi kon tuu, bika nownow a omen peesi mi e go. Mi be wani go na a Gileyad sikoo, ma mia be wani den sende mi go a wan taa kondee. Mi be e si enke mia bun sai fu du a zendeling wooko. Boiti dati, mi be e feele  taki den be o sende u go a wan Afiikankondee pe siki anga feti lai. Mia be wani komoto a Kanada.

Aini a yali 1992, lanti be opo a wooko aini son wan fu den kondee fu Soviyet Unie. Neen meke den baala akisi u fu foloisi go a Estkondee enke zendeling. Wa be sabi taki u be o fende a gaandi ya, neen meke u begi Yehofa. U be denki baka taki: ‘Efu Yehofa akisi u fu du wan sani, da u mu meke moiti fu den. Ná so noh?’ U teke a gaandi di u be fende. Mi be e pakisei taki: ‘Winsi fa, toku a ná Afiikan we go.’

Faisi u doo aini a kondee, a so u bigin leli Est-tongo. Baka wantu mun di u tan aini a kondee, den baala akisi u fu du a kelen-wooko. U be mu go a 46 kemeente anga kulu aini den dii Baltiskondee: Estkondee, Latfia anga Litoniya. U be mu go a Kaliningrad anga Rosiyakondee tu. Dati wani taki u be mu leli wantu sani aini Latfiyatongo, Litoniyatongo anga Rosiyatongo. A sani ya á be makiliki. Toku den baala anga sisa be e piisii te den si fa we meke moiti fu taki a tongo fu den. Den be e yeepi u tu. Aini 1999, Estkondee be kon abi wan beikantoo. Mi be fende a gaandi fu de aini a beikantoo komte makandaa anga Toomas Edur, Lembit Reile, anga Tommi Kauko.

U be kon sabi omen baala anga sisa di be de aini sitaafuman kampu a Siberiya. A wan hii pisiten den á si den famii fu den. Winsi fa sama be e libi ogii anga den, toku den á be holi den sama ya na ati. Den be e piisii. Den be e tan du a peleikiwooko anga den hii ati. A sani ya e leli u taki useefi poi holidoo. Ai leli u tu taki u poi piisii winsi tesi e miti u.

A omen yali u wooko taanga. Wa be e meke ten fu boo bunbun fasi seefi. Neen meke Lesli be kon weli. Ma wa be sabi taki a wan siki a be abi den e kai fibromyalgie. A siki ya e meke wan sama weli bunbun fasi. Neen meke u be wani daai go baka a Kanada. A ten de u be kisi a kai fu go na a sikoo di be e holi gi den baala fu a beikantoo Komte. A sikoo ya be o holi a Patterson, New York, Ameekankondee. Mi be e si enke wa be o poi go na a sikoo ya. Ma u begi Yehofa fayafaya, neen u go na a sikoo. Yehofa belesi a bosoloiti di u teke. Di u be de na a sikoo, Lesli fende a dataa yeepi di a be abi fanowdu. A sani ya meke u be poi du den sani di u be gwenti du go doo.

Aini 2008, di u be daai go baka a Estkondee, den baala fu a edekantoo be telefon mi a wan neti. Den be akisi mi efu u wani go a Kongo. Mi be dyombo, bika na a tamaa fi en mi be mu piki den. Mia be piki Lesli taki a so den baala akisi mi, bika aa be o siibi a neti de. Ma miseefi á siibi a neti de tu, bika mi be e begi Yehofa fu taigi en saide mi be e booko mi ede fu go na Afiikan.

A taa dei neen mi taigi Lesli. U taki: ‘A Yehofa e akisi u fu go na a Afiikan. Neen meke efu wa puubei fosi, u naw sabi efu wo man du en.’ Baka di u tan 16 yali aini Estkondee, u fee anga opalani go a  Kinshasa, Kongo. A dyali fu a beikantoo be moin. A peesi á be doloki. A fosi sani di Lesli lengelenge aini a kambaa fu u a be wan kaita di a be abi senten di u foloisi komoto a Kanada. A be sikiifi na a kaita tapu taki: ‘I mu e piisii winsi pe i de.’ Di u miti den baala anga sisa ape, u go anga den a den Beibelsutudi fu den. U kon si taki ná pikin piisii ye piisii te ye du a zendeling wooko. U be e moo piisii fu wooko gi Yehofa. Baka wan pisiten u fende a gaandi fu go luku den beikantoo aini 13 Afiikankondee. Te u be e du a wooko ya u be e miti anga omen baala anga sisa. Mia be e booko mi ede moo. Boiti dati, u gi Yehofa daa taki a sende u go na Afiikan.

Di u be de aini Kongo, na ala sowtu sani den be e giw fu u nyan. Sowan fu den sani ya u be e si enke wa be o lobi den. Ma di u si taki den baala anga sisa be lobi nyan den sani ya, neen useefi puubei luku. U be lobi en.

U be go na a oost se fu a kondee fu gi den baala anga sisa taanga-sikin. U be tyai den sani di den be abi fanowdu gi den tu, bika wantu kulu suudati be e booko go aini den kampu fu den sama. Den be e du ogii anga den umansama anga den pikinnengee. Gaanse fu den baala anga sisa a be pootiman. Den be e biibi taki Yehofa o weki den sama fu den di dede. Den be lobi Yehofa tu. Ná pikin taanga-sikin den giw. A ondoofenitoli fu den meke u go pakisei saide we dini Yehofa. Di u si fa den biibi taanga, a sani ya taanga u biibi tu. Sowan fu den baala anga sisa osu be booko. Sama be e fufuu den sani den be paandi tu. A sani ya e membee u taki a gawgaw u sa lasi den sani di wi abi. Neen meke a de di wi anga Yehofa de mati na a moo pelensipali sani. Winsi fa a libi be taanga gi den baala anga sisa, toku den á be e kuutu. A sani ya e giw taanga-sikin fu holidoo winsi tesi e miti u. Ai giw taanga-sikin tu fu holidoo te siki e fooseli u.

Baka wan pisiten neen u fende wan taa gaandi. Den baala be akisi u fu foloisi go na a beikantoo fu Hong Kong. Noiti u be e denki taki u be o go tan a Asiya. Fu di u be si fa Yehofa be yeepi u  a den taa kondee di u be go, meke wa daaidaai fu go a Hong Kong. Aini 2013 u foloisi. U kee te, di we gwe fika den mati fu u anga den moin peesi fu Afiikan. Wa be sabi fa sani be o waka na a taa kondee di u be o go.

A be wan gaan kengi giw di u foloisi go tan a Hong Kong, bika a be wan gaan kondee. Sama fu ala se fu goontapu e tan aini a kondee ya. A be taanga giw fu leli Sineisitongo. Ma den baala anga sisa be bali wadaa giw. U be lobi den nyanyan fu a kondee ya tu. Tyaipi wooko be de fu du na a beikantoo, ma a be dii fu pai a doti pe u be de. Neen meke den baala di e tii a wooko seli gaanse fu a beikantoo. Aa langa seefi, neen u foloisi go tan a Zuid-Koreya aini 2015. A ya we tan te anga now. A be taanga fu leli a tongo fu a kondee ya tu. Winsi fa wa poi taki en bunbun ete, toku den baala anga sisa e giw taanga-sikin, bika den e gafa u.

A ná ala yuu a makiliki fu meke nyun mati. Ma u kon si taki te we kai sama kon a wi osu, da wi anga den e moo gwenti gaw. Winsi fa den baala anga sisa nai du sani na aseefi fasi ala yuu, toku beina a denseefi manii wi abi. Boiti dati, Yehofa meke wi a sowan fasi taki u poi opo wi ati gi taawan. A sani ya yeepi u fu kon abi tyaipi mati.​—2 Kor. 6:11.

U leli taki a pelensipali fu si taawan enke fa Yehofa e si den. U leli tu taki u mu meke moiti fu si fa Yehofa e soi taki a lobi u. U be mu e meke moiti tu fu sabi san Yehofa wani u du. Te u be e fii booko-saka efuso te u be e akisi useefi efu den baala anga sisa lobi u, daw be e leisi den moin kaita anga den biifi fu den mati fu u baka. U be e si fa Yehofa be e piki den begi fu u. Ai soi u taki a lobi u. Boiti dati, ai yeepi u fu holidoo.

Aini den yali di pasa mi anga Lesli leli taki a pelensipali fu meke ten gi useefi, winsi u lai sani fu du. U leli tu taki wa mu booko wi ede tumisi te u meke wan fowtu, moomoo te ye meke moiti fu taki wan taa tongo. Ala neti u be e denki wan sani di u be lobi fu a dei, daw be e gi Yehofa daa fi en.

Fu taki en leti, noiti mi be denki taki mi be o man du a zendeling wooko. Mi be e si enke mia be o poi tan aini wan taa kondee. Ma nownow mi e piisii, bika mi si taki u man du ala sani solanga Yehofa e holibaka giw. Mi e pakisei a sani di Yelemiya be taki: ‘I koli mi Yehofa’ (Yel. 20:7). Yehofa giw tyaipi sani di wa be denki u be sa fende. A belesi u tu. A deen fu mi fu fee anga opalani go a omen peesi kon tuu. U go a omen peesi moo enke san mi be e denki di mi be yonkuu. A omen beikantoo u go luku. Ai bigi gi mi te ye, fa Lesli holibaka gi mi ala den yali di pasa.

Ala yuu we meke moiti fu holi a pakisei taki den sani di we du, a fu di u lobi Yehofa meke we du den. Den belesi di we fende nownow e soi fa aw de te wo libi fu teego aini a ten di e kon. A ten de, Yehofa o ‘opo en ana, da aw gi ala sani di de a libi san den wani’.​—Ps. 145:16.