1-2. Enke fa Psalm 25:14 e soi, da saw mu du efu u wani wi anga Yehofa toon bun mati?

 SOWTU manii o yeepi i fu man de wan bun mati? Kande i be o taki bun mati mu lobi denseefi. Den mu e holibaka gi denseefi tu. A wan bun sani te mati abi den manii ya. Ma a lesipeki di den e lesipeki denseefi pelensipali tu. Enke fa a tekisi fu a artikel ya e soi, da efu u wani wi anga Yehofa toon bun mati, u mu e ‘lesipeki en’.​—Leisi Psalm 25:14.

² Winsi on langa we dini Yehofa kaba, toku u mu e lesipeki en anga u hii ati. Ma san a wani taki fu abi tuutuu lesipeki gi Gadu? Saw yeepi u fu lesipeki Yehofa anga u hii ati? Saw sa leli fu Obadya, Gaan Pilisite Yoyada, anga Kownu Yowas te a abi fu du anga a lesipeki di u mu abi gi Yehofa?

3. Saide a bun fu e feele son yuu?

³ Te we lesipeki Gadu tuutuu, wo feele fu du wan sani di aa lobi. Son yuu we si enke feele a ná wan bun sani, ma toku a bun te we feele son yuu, bika a sani ya e yeepi u fu du sani anga koni. Fu di we feele taki u sa kai, meke u naw waka a wan mongo mofu. Fu di wa wani kisi mankei, meke we luku bun fu wa du sani efuso go a peesi di sa meke u kisi mankei. Boiti dati, fu di wa wani wi anga den mati fu u poli, meke we luku bun fu wa taki efuso du sani di o hati den.

4. Saide Saatan wani u feele Yehofa?

 ⁴ Saatan wani u feele Yehofa. A wani u biibi taki Yehofa a wan Gadu di ati e boon ala yuu. A wani u biibi tu taki Yehofa a wan ogii-ati Gadu di e suku fasi fu sitaafu u. Boiti dati, a wani u biibi taki wa poi du sani di o meke Gadu piisii (Yopu 4:18, 19). Saatan wani u feele Yehofa te, da u nai dini en moo. Ma wa mu meke a fende u koli, bika Yehofa á wani u feele en, ma a wani u lesipeki en anga u hii ati.

5. On ten u sa taki wan sama e lesipeki Gadu tuutuu?

⁵ Wan sama di e lesipeki Yehofa lobi en. Sowan sama e meke moiti fu aa du sani di o poli en anga Yehofa. Beibel taki Yesesi ‘be e lesipeki Gadu tuutuu’ (Heb. 5:7). Aa be e feele taki Yehofa be o du ogii anga en (Yes. 11:2, 3). Fu di a be lobi Yehofa tuutuu, meke a be e aliki en (Yoh. 14:21, 31). Leti enke Yesesi, te u si fa Yehofa lobi u, fa a koni, fai du sani a wan letifasi anga fa a abi makiti, da a sani ya e meke wi abi tuutuu lesipeki gi en. Boiti dati, u sabi taki fu di Yehofa lobi u meke tyali e kisi en te we du sani di aa lobi. Ma u sabi tu taki ai poolo te we du san ai leli u.​—Ps. 78:41; Odo 27:11.

6. San a wan sani di u mu du efu u wani kon abi tuutuu lesipeki gi Yehofa? (Psalm 34:11)

⁶ U nai meke anga a fii fu abi lesipeki gi Gadu, neen meke a moiti u mu meke fu kon abi tuutuu lesipeki gi en. (Leisi Psalm 34:11.) Wan fasi faw sa du a sani ya, a te we luku den sani di a meke. Te we luku den sani ya, we si fa Yehofa koni, we si a makiti fi en anga den fasi fa ai soi taki a lobi u. A sani ya e meke u moo lobi en. We moo lesipeki en tu (Rom. 1:20). Wan sisa den e kai Adrienne taki: ‘Te mi e luku den sani di Yehofa meke, a fasi fa a koni, da a sani ya e meke mi foondoo. Ai yeepi mi fu fusutan taki Yehofa sabi san moo bun gi mi.’ Fu di a sisa ya be gwenti pakisei den sani ya meke a taki: ‘Saide mi be o wani du wan sani fu poli mi anga Yehofa, a Sama di gi mi libi?’ Kande i sa meke ten a wiki ya fu luku wan sani di Yehofa meke. Efii du a sani ya, yo moo lesipeki en. Yo moo lobi en tu.​—Ps. 111:2, 3.

7. Fa begi e yeepi u fu moo lesipeki Yehofa?

⁷ Wan taa sani di o yeepi u fu kon abi tuutuu lesipeki gi Yehofa, a te we begi en ala yuu. Ala yuu te u begi Yehofa, we kon sabi en moo bun. Te we begi en fu a giw kaakiti fu pasa wan tesi, a sani ya e membee u taki a abi makiti. Te we gi en daa fu a dede di a meke en Manpikin kon dede giw, a sani de e membee u taki ná pikin lobi Yehofa lobi u. Boiti dati, te we begi Yehofa fu a yeepi u anga wan polobelema, a sani ya e membee u taki a koni tuutuu. Den sowtu begi ya, e yeepi u fu moo lesipeki Yehofa. Wo meke moiti fu wa du sani di o poli wi anga en tu.

8. Saw yeepi u fu tan lesipeki Yehofa?

⁸ Wan sani di o yeepi u fu tan lesipeki Yehofa, a te we sutudeli Beibel. U sa leli omen sani fu den sama di kai aini Beibel. U sa leli fu den fowtu di den be meke tu. Wo taki fu tu futuboi fu Yehofa di be e lesipeki en. A fosiwan a Obadya di be abi a faantiwowtu fu solugu taki sani waka bun aini a osu fu Kownu Akab. A taawan a Gaan Pilisite Yoyada. Bakadati wo luku saw sa leli fu Kownu Yowas fu Yuda. Biginbigin a kownu ya be e lesipeki Yehofa, ma bakaten aa be e dini Yehofa moo.

9. Fa a lesipeki di Obadya be e lesipeki Yehofa yeepi en? (1 Kownu 18:3, 12)

⁹ A fosi sani di Beibel e taki fu Obadya b a den wowtu ya: ‘Obadya be e lesipeki Yehofa tuutuu.’ (Leisi 1 Kownu 18:3, 12.) Fa a lesipeki di Obadya be e lesipeki Yehofa yeepi en? Sama be poi fitoow en. Neen meke a kownu be poti en fu solugu taki sani waka bun aini a osu fi en. A lesipeki di Obadya be e lesipeki Gadu, be meke a abi deki-ati tu. A be abi a manii ya taanga fanowdu, bika a be e libi na a ten di kownu Akab be e tii. A kownu ya be abi ogii-ati. Den kownu di be tii a Akab fesi be e du sani di Yehofa á lobi. Ma ‘Kownu Akab be ogii moo den taa kownu di be tii neen fesi’ (1 Kow. 16:30). Boiti dati, Iseibel a uman fu Akab, be e dini Baa-al. A uman ya be e buuse Yehofa, neen meke a be e meke moiti fu tapu ala sama na a tin-lo kownukondee fu Islayeli fu dini Yehofa. A kii tyaipi polofeiti fu Gadu tu (1 Kow. 18:4). Ala den sani ya e soi taki a ten di Obadya be e dini Yehofa á be makiliki.

10. Fa Obadya soi taki a be abi deki-ati tuutuu?

¹⁰ Fa Obadya soi taki a be abi deki-ati? Di Iseibel be wani kii den polofeiti fu Yehofa, Obadya kibii 100 fu den polofeiti ya. A be paati den aini ‘tu kulu fu 50 sama, neen a kibii den aini wan mongo-olo. A be e tyai beele anga wataa go gi den’ (1 Kow. 18:13, 14). Efu Iseibel be sabi taki a so Obadya be e du, a be o kii en. Obadya be musu e feele, bika aa be wani dede. Ma a be lobi Yehofa anga den sama di e dini en moo en eigi libi.

11. Fa den sama di e dini Yehofa aini a ten ya de enke Obadya? (Luku a fowtow tu.)

¹¹ Aini a ten ya, a omen baala anga sisa e tan aini kondee pe lanti tapu a wooko fu u. Den baala anga sisa ya e lesipeki den weiti fu a kondee fu den, ma leti enke Obadya den nai meke nawan sama tapu den fu dini Yehofa (Mat. 22:21). Fu di den e lesipeki Yehofa, meke den e aliki en  moo den tiiman (Toli 5:29). Neen meke den e tan paati a bun nyunsu. Den e holi den komakandaa kibiikibii tu (Mat. 10:16, 28). Boiti dati, den e meke moiti fu den baala anga sisa fende den sani di den abi fanowdu fu den sa tan dini Yehofa. Luku a toli fu Henri, di e tan na Afiikankondee pe lanti be tapu a wooko fu u wan pisiten. A ten di a wooko be tapu, Henri be go yeepi fu tyai den buku fu u go gi den baala anga sisa. A sikiifi taki: ‘Mia wan sen sama. Neen meke mi e biibi taki na a lesipeki di mi e lesipeki Yehofa be yeepi mi fu soi deki-ati.’ I si enke i poi abi deki-ati enke Henri? Eeye. I poi abi deki-ati efi ye lesipeki Yehofa.

12. Fa Gaan Pilisite Yoyada anga en uman soi taki den nai gwe fika Yehofa?

¹² Gaan Pilisite Yoyada be e lesipeki Yehofa. Neen meke aa gwe fika Yehofa. A be e gi taawan deki-ati fu tan dini Yehofa tu. Na a sani ya a du di Ataliya, a umanpikin fu Iseibel be poti enseefi enke umankownu fu Yuda. A foluku be e feele Ataliya, bika a be e kii ala den galanpikin fi en fu di a be wani tii enke umankownu (2 Kolon. 22:10, 11). Ma aa be fende Yowas kii, bika Yosabat a uman fu Yoyada be kibii en. Yoyada anga en uman be e solugu a pikin ya tu. Na a sani di Yoyada anga Yosabat du ya, meke a famii fu David di be e tii enke kownu be de ete. Yoyada á gwe fika Yehofa. Boiti dati, aa be meke Ataliya tapu en fu du san bun.​—Odo 29:25.

13. Fa Yoyada soi baka taki a nai gwe fika Yehofa di Yowas be abi seibin yali?

¹³ Di Yowas be abi seibin yali, Yoyada soi baka taki a nai gwe fika Yehofa. A be seeka sani fu meke Yowas toon kownu. Efu ala sani be waka bun, da Yowas be o toon kownu, bika neen na a sama di be mu toon kownu enke bakapikin fu David. Ma efu sani á be waka bun, da den be o kii Yoyada. Ma Yehofa be meke sani waka bun. Den edeman anga den Leifisama be holibaka gi Yoyada. Te fu kaba den poti Yowas enke kownu, neen den kii Ataliya (2 Kolon. 23:1-5, 11, 12, 15; 24:1). Bakadati ‘Yoyada meke a foluku meke wan kuudei anga Yehofa. A foluku paamisi taki den o tan a foluku fu Yehofa’ (2 Kow. 11:17). Boiti dati, ‘Yoyada poti wakitiman fu holi wakiti a den doo fu a osu fu Yehofa. Nawan sama di á be kiin be o man go aini a osu.’​—2 Kolon. 23:19.

14. Sowtu gaandi Yoyada fende fu di a be e gi Yehofa gaandi?

¹⁴ Yehofa be taki a fesi taki: ‘A den sama di e gi mi gaandi, mio gi gaandi.’ Yehofa be pai Yoyada fu den bun di a du (1 Sam. 2:30). Wan fasi fa a pai en, a di a meke sama sikiifi den bun sani di a du poti aini Beibel. A omen sani u sa leli fu a toli fi en (Rom. 15:4). Di Yoyada dede a fende wan gaan gaandi. ‘Den beli en aini a foto fu David pe den be gwenti beli den kownu. Den be beli en ape, fu di den be e pakisei ala den bun di a be du gi den Islayelisama, gi a tuu Gadu, anga a osu fu Yehofa.’​—2 Kolon. 24:15, 16.

15. San a toli fu Yoyada e leli u? (Luku a fowtow tu.)

¹⁵ A toli fu Yoyada e leli u fu moo lesipeki Yehofa. Owluman sa waka a Yoyada baka te den de na ain fu si fa den sa kibii a kemeente (Toli 20:28). Gaandi baala anga sisa sa leli fu Yoyada taki Yehofa poi koboloiki den fu du a wani fi en efu  den e lesipeki en. A nai poti den a wan se fu di den kon gaandi. Te yonkuuwan luku a fasi fa Yehofa be libi anga Yoyada, da a sani ya e leli den taki den mu e lesipeki den gaandi baala anga sisa. Moomoo den wan di dini Yehofa wan pisiten kaba (Odo 16:31). Ala u sa leli wan sani fu den edeman anga den Leifisama di be holibaka gi Yoyada. Te we aliki den baala ‘di e teke fesi’, we soi taki we holibaka gi den.​—Heb. 13:17.

16. Sai soi taki Kownu Yowas be daai baka gi Yehofa?

¹⁶ A omen sani Yowas leli fu Yoyada (2 Kow. 12:2). Neen meke di a be yonkuu, a be wani du sani di e meke Yehofa piisii. Ma baka di Yoyada dede, a den edeman di be daai baka gi Yehofa Yowas be e aliki. San a be a bakapisi? Yowas anga a foluku ‘go dini santa ponsu anga falisi gadu’ (2 Kolon. 24:4, 17, 18). Fu di a sani di Yowas du ya be e hati Yehofa, meke na ala yuu a be e ‘sende polofeiti go a den fu den daai kon dini en baka, ma den á be wani aliki’. Den á be wani aliki Sakaliya, a manpikin fu Yoyada tu. Sakaliya a ná be polofeiti namo, ma a be wan pilisite tu. Winsi fa Sakaliya a be Yowas famii, toku a ná aliki en. Kownu Yowas meke sama kii Sakaliya, winsi fa den sama fu Sakaliya be kibii en fu aa dede.​—2 Kolon. 22:11; 24:19-22.

17. Fa sani waka anga Yowas?

 ¹⁷ Yowas á be e lesipeki Yehofa moo. Neen meke sani á waka bun gi en. Yehofa be taki: ‘Efu wan sama soso mi, mi naw si a sama de fu wan sani’ (1 Sam. 2:30). Bakaten den Asiriya suudati wini den somen suudati fu Yowas. Boiti dati, Yowas be kisi ‘gaan mankei’ aini a feti. Baka di den Asiriya suudati gwe, neen a futuboi fu Yowas kii en fu di a be kii Sakaliya. Fu di a kownu ya du omen ogii, meke den á beli en a pe den ‘be gwenti beli den kownu’.​—2 Kolon. 24:23-25. c

18. Enke fa Yelemiya 17:7, 8 e soi, da saw yeepi u fu wa de enke Yowas?

¹⁸ Saw sa leli fu a toli fu Yowas? Yowas be de enke wan bon di den lutu fi en á dipi. A Yoyada be de enke a ahala di be e holi en taampu. Faisi Yoyada dede, a so Yowas kai hollow. A sani ya e soi u kiin taki, wa mu e du enke we lesipeki Yehofa fu di u famii efuso wan baala efuso sisa e lesipeki en. Efu wa wani u biibi swaki, u mu meke moiti fu wi anga Yehofa toon bun mati. U mu meke moiti tu fu moo lesipeki en. Neen meke u mu e sutudeli, daw teke ten pakisei saw leli. U mu e begi ala yuu tu.​—Leisi Yelemiya 17:7, 8; Kol. 2:6, 7.

19. San Yehofa wani u du?

¹⁹ Yehofa nai akisi u fu du omen sani. Peleikiman 12:13 e soi san Yehofa wani u du. Ai taki: ‘Lesipeki a tuu Gadu, du san den weiti fi en taki, bika a fu dati a meke u.’ Te we lesipeki Gadu, da leti enke Obadya winsi sai pasa, u naw gwe fika Yehofa. Nawan sani o poi poli wi anga en.