1. Enke fa 1 Peitilisi 5:2 e soi, da sowtu faantiwowtu owluman abi?

 AINI a ten ya a den owluman abi a faantiwowtu fu solugu den sikapu fu Yehofa di a lobi. Ai bigi gi den baala ya taki den abi a gaandi fu yeepi den baala anga sisa fu den. Den e wooko taanga fu ‘solugu den tuutuu’ (Yel. 23:4; leisi 1 Peitilisi 5:2). Ai bigi giw taki wi abi den baala ya aini den kemeente.

2. San a wantu sani di e miti owluman?

² A omen sani e miti den owluman te den e du a wooko fu den. Den baala ya e wooko taanga fu solugu a kemeente. Tony a wan owluman di e tan na Ameekankondee. A baala ya be e du tyaipi wooko aini a kemeente. Ma a be mu holi a pakisei taki a ná ala sani aw poi du. A taki: ‘Di a COVID-19 siki be booko a hii goontapu, mi be bigin teke moo wooko fu seeka den komakandaa anga a peleikiwooko. Ma winsi fa mi be e meke moiti fu du tyaipi wooko, toku a omen wooko be de fu du aini a kemeente ete. A sani ya meke mia be e abi ten moo fu leisi Beibel anga fu sutudeli. Mia be e abi ten fu begi tu. IIir a wan owluman di e tan a Kosovo, a baala ya be abi wan taa polobelema. A be e taanga gi en fu du san a olikanisâsi taki di feti be booko na a pisi pe ai tan. A taki: ‘Aa be makiliki di a beikantoo be sende mi fu go yeepi den baala anga sisa. Mi be mu abi deki-ati, bika ogii be sa miti mi. Mi be e feele, bika mi be e si enke a ná wan koni sani den baala wani mi du.’ Tim a wan zendeling di e tan a Asiya, a be e taanga gi a baala ya fu du ala den sani di a be mu du ala dei. A taki: ‘Son leisi mi be e weli te, da mia be e poi poti pakisei a den baala anga sisa.’ San sa yeepi owluman te den sani ya e miti den?

3. San u sa leli fu kuutuman Gidiyon?

³ A omen sani u sa leli fu Gidiyon. A man ya a be wan  kuutuman (Heb. 6:12; 11:32). A be e tii a foluku fu Gadu, a be e kibii den tu fu ogii a miti den (Kuut. 2:16; 1 Kolon. 17:6). Leti enke Gidiyon, Yehofa gi owluman a faantiwowtu fu solugu a foluku fi en aini a taanga ten ya (Toli 20:28; 2 Tim. 3:1). Gidiyon be sabi taki a ná ala sani a be o poi du. A be abi sakafasi, a be e aliki Gadu tu. Ma a ná ala yuu a be e makiliki gi en fu du san Yehofa be akisi en. Winsi wi a owluman efuso wa ná owluman, toku ibiiwan wan fu u mu e teke san den owluman e du fu bigi. Den baala ya lobi Gadu, den e wooko taanga. Neen meke u mu du ala san u poi fu holibaka gi den.​—Heb. 13:17.

4. Fa Gidiyon soi taki a be abi sakafasi?

⁴ Gidiyon a be wan man di be abi sakafasi. A be sabi taki a ná ala sani a poi du. b Di a engel fu Yehofa be taigi en taki neen Gadu teke fu fii den Islayelisama puu a den Midiyansama ondoo, a be taki: ‘Mi famii á pelensipali seefiseefi aini a lo fu Manase. Anga ala a mi na a moo pikinwan aini a osufamii fu nda’ (Kuut. 6:15). Gidiyon be e si enke a naw poi du san Yehofa be akisi en, ma Yehofa be sabi taki a be o poi. Fu di Yehofa be yeepi Gidiyon, meke a be poi du a wooko fi en bun.

5. San sa meke a taanga gi wan owluman fu soi sakafasi?

⁵ Owluman e meke moiti fu abi sakafasi (Mika 6:8; Toli 20:18, 19). Den nai gafa fu den sani di den poi du. Den nai si enke den á bun te den meke wan fowtu tu. Ma toku a ná ala yuu a makiliki gi owluman fu soi sakafasi. Kande wan owluman e wani du omen wooko aini a kemeente winsi fa a sabi taki en wawan naw poi du den. Efuso kande ai taanga gi en fu soi sakafasi te sama e gafa en, efuso te sama e kuutu en fu a fasi fa ai du sani. San owluman sa leli fu Gidiyon te den sowtu sani ya e miti den?

6. Fa a toli fu Gidiyon sa yeepi owluman fu abi sakafasi? (Luku a fowtow tu.)

⁶ Akisi taawan fu yeepi i. Wan sama di abi sakafasi sabi taki a ná ala sani a poi du. Gidiyon be sabi san a poi du anga san aa poi du. Neen meke a be e akisi taawan fu yeepi en (Kuut. 6:27, 35; 7:24). Owluman di koni, e meke moiti fu du aseefi sani ya.  Tony, di u be taki fi en kaba taki: ‘Mi be lobi teke omen wooko fu a kemeente fu du, winsi fa mia be poi du ala den wooko ya. A so den sama fu mi kiya mi. Ma fu di mi be wani kengi a manii ya meke mi go ondoosuku san sa yeepi mi. U luku a toli ya na a Osufamii Anbegi, neen mi akisi mi uman fa ai si mi. Mi luku a felon tu di den e kai Gi trawan leri, frutrow den èn gi den frantwortu neleki fa Yesus du dati, a jw.org.’ Tony be bigin akisi taawan fu yeepi en anga den wooko di a be mu du. San a be a bakapisi? Tony taki: ‘Den wooko di mu du aini a kemeente e go moo bun. Mi be abi moo ten tu fu taanga a de di mi anga Yehofa de mati.’

7. Fa owluman sa waka a Gidiyon baka te sama e kuutu den? (Yakowbesi 3:13)

⁷ Yu ati á mu boon te taawan e kuutu i. Wan taa sani di sa meke a taanga gi owluman fu abi sakafasi a te sama e kuutu den. A toli fu Gidiyon sa yeepi owluman tu te sama e kuutu den. Fu di Gidiyon be sabi taki enseefi abi swakifasi, meke aa ligei di den Efrayimsama be e kuutu en (Kuut. 8:1-3). Gidiyon be abi sakafasi, neen meke a aliki san den Efrayimsama be wani taki. Aa kwali anga den, ma a taki switi anga den. A fasi fa Gidiyon taki anga den meke den ati koo. Leti enke Gidiyon den owluman e aliki bun. Den ati nai boon te taawan e kuutu den tu. (Leisi Yakowbesi 3:13.) Te owluman e du sani na a fasi ya, a kemeente o poi libi na a wan.

8. Gi wan toli di e soi san owluman sa taki te sama e gafa den.

⁸ Meke sama gafa Yehofa. Di Gidiyon wini den Midiyansama, sama be bigin gafa en. Ma a soi den taki a Yehofa den mu gafa (Kuut. 8:22, 23). Fa owluman sa waka a Gidiyon baka te sama e gafa den? Den sa gafa Yehofa fu den sani di ai yeepi den fu du (1 Kor. 4:6, 7). Kow taki sama e gafa wan owluman fu a fasi fa ai gi leli, a sa soi den taki den leli ya komoto aini a Wowtu fu Gadu. A sa soi den tu taki na a olikanisâsi fu Yehofa e giw den moin leli ya. Son yuu owluman mu luku bun efu a fasi fa den e gi leli nai meke sama poti pakisei a den tumisi, bika a Yehofa sama mu gafa. Luku san be miti wan owluman den e kai Timothy. Di Timothy toon wan owluman a be lobi holi lezing. A taki: ‘Te mi be e holi lezing mi be lobi gi omen kofaliki ageisitoli. Sama be lobi gafa mi fu a sani ya. Ma a sani ya be e meke sama poti pakisei a mi, aa be e meke sama poti pakisei na a Beibel efuso Yehofa.’ Bakaten Timothy kon si taki a be mu kengi a fasi fa a be e gi leli efu aa wani sama poti pakisei neen tumisi (Odo 27:21). San a be a bakapisi? A taki: ‘A omen baala anga sisa e taki fa son lezing di mi holi yeepi den anga wan booko ede, fu pasa wan tesi, efuso fu den anga Yehofa toon bun mati. Te sama e taigi mi den sani ya nownow, mi e moo fii bun.’

9. San be sa meke a taanga gi Gidiyon fu aliki Yehofa anga fu soi deki-ati? (Luku a fowtow a fesise fu A Wakititolen.)

⁹ A omen sani be miti Gidiyon di a toon kuutuman. Den sani di miti en be sa meke a taanga gi en fu aliki Yehofa anga fu soi deki-ati. Yehofa be gi en wan wooko di á be makiliki. A be mu booko den altari di en dda be meke fu dini Baa-al (Kuut. 6:25, 26). Wan leisi di Gidiyon be mu go a feti, Yehofa be taigi en tu leisi taki a be mu sende gaanse fu den suudati fi en go a osu, bika den be ipi tumisi (Kuut. 7:2-7). Bakadati Yehofa taigi en taki a mu go feti  anga den feyanti fi en a gaan neti.​—Kuut. 7:9-11.

10. San sa meke a taanga gi owluman fu aliki den baala di e teke fesi?

¹⁰ Owluman mu ‘de kabakaba fu aliki’ (Yak. 3:17). Wan owluman di e aliki e du san Beibel taki ala yuu. Ai du ala san a olikanisâsi taki tu. Te wan owluman e du sani na a fasi ya, taawan o poi waka neen baka. Ma toku son yuu a sa taanga gi den owluman fu aliki den baala. Kande ai taanga gi wan owluman fu fiti enseefi a den nyun fasi fa den baala wani u du sani. Kande son yuu ai akisi enseefi efu den nyun fasi fa den baala wani u du sani bun. Efuso kande den baala e akisi en fu du wan sani di sa meke lanti sooto en. Fa owluman sa du sani enke Gidiyon te den sani ya e miti den?

11. San sa yeepi owluman fu aliki?

¹¹ Aliki den baala, dai du sani enke fa Gadu wani. Gadu be taigi Gidiyon fa a be mu poli a altari fi en dda. A be taigi en tu pe a be mu meke wan nyun altari gi Yehofa, anga sowtu meti a be mu tyai enke ofaandi. Di a taigi Gidiyon den sani ya aa kuutu, ma a du sani enke fa Yehofa taki. Aini a ten ya, a so a olikanisâsi fu Yehofa e taigi owluman san den mu du. Den baala di e tii a wooko e sende biifi gi den kemeente fu soi den fa den mu du sani fu ogii á miti den. Den e soi den owluman tu fa den mu du sani. Ná pikin lobi u lobi den owluman, bika den e du san a olikanisâsi fu Yehofa e taigi den. Ala sama aini a kemeente e fende wini fu a fasi fa den baala ya e aliki Yehofa.​—Ps. 119:112.

12. Fa owluman sa wooko anga san sikiifi a Hebrewsama 13:17 te a olikanisâsi taigi den fu du sani taa fasi?

¹² De kabakaba fu du sani taa fasi te a de fanowdu. Di Yehofa be taigi Gidiyon fu a sende gaanse fu den suudati fi en go a osu, a du san Yehofa taki (Kuut. 7:8). Kande a be e akisi enseefi taki: ‘A de fanowdu fu mi du a sani ya? Sani o waka bun?’ Wa sabi san a be e denki, ma saw sabi a taki a du san Yehofa be taigi en. Na aseefi sani ya den owluman e du tu. Te a olikanisâsi taki den mu du sani taa fasi, den nai daaidaai fu aliki. (Leisi Hebrewsama 13:17.) Aini 2014, den baala di e tii a wooko kengi a fasi faw be e pai fu meke wan Kownukondee zaal anga den peesi pe we holi gaan komakandaa (2 Kor. 8:12-14). Fosi na a olikanisâsi be e leni den kemeente moni fu meke komakandaa peesi. Baka te a be kaba meke, da den kemeente be e pai a moni baka. Ma nownow a den moni di we gi fu holibaka gi a wooko den baala e teke fu meke den Kownukondee zaal, anga den peesi pe we holi gaan komakandaa. Den kemeente naabi fu pai a moni ya baka. Winsi a wan pooti kondee, efu den baala si taki a de fanowdu fu meke wan  Kownukondee zaal ape, den e meke en. Di José yee taki a so den baala o du sani, a be e denki taki: ‘Efu na a fasi ya den baala o du sani, da nawan Kownukondee zaal o meke moo. Aini a kondee ya sama nai du sani so.’ San yeepi José fu holibaka gi a kengi ya? A taki: ‘A tekisi fu Odo 3:5, 6 membee mi fu fitoow Yehofa. Mi fende wini di mi du a sani ya. Nownow we meke moo Kownukondee zaal. A fasi fa den baala e koboloiki a moni di we gi meke den poi yeepi omen kemeente.’

13. (a) San Gidiyon be e biibi? (b) Fa owluman sa waka a Gidiyon baka? (Luku a fowtow tu.)

¹³ Abi deki-ati, dai du sani enke fa Yehofa wani. Gidiyon du san Yehofa taigi en winsi fa a be e feele. A aliki Yehofa tu winsi fa ogii be sa miti en (Kuut. 9:17). Baka di Yehofa paamisi Gidiyon taki a be o yeepi en, a be e biibi taki Yehofa be o yeepi en fu kibii a foluku fi en. Owluman di e tan aini kondee pe lanti tapu a wooko sa waka a Gidiyon baka. Winsi fa lanti sa sooto den, toku den e teke fesi a den komakandaa, a peleikiwooko, winsi den sa lasi den wooko, efuso efu sama wani du ogii anga den. c Na a ten fu a gaan banowtu owluman o abi deki-ati fanowdu fu man du san den baala o taigi den winsi ogii sa miti den. Kande den baala o soi den faw mu paati a kuutu bosikopu anga saw mu du fu tan a libi te Gok fu Magok o kon feti anga u.​—Eseik. 38:18; Openb. 16:21.

14. San be sa meke a taanga gi Gidiyon fu holidoo?

¹⁴ A wooko di Gidiyon be e du enke kuutuman be taanga. A neti di den be e feti anga den Midiyansama, den sama ya lon gi den. Ma den lon a den baka fu te den doo a saka peesi fu Yisreyel te anga a Yordaan liba pe tyaipi bon de (Kuut. 7:22). Gidiyon be tapu fu lon a den Midiyansama baka di a doo na a Yordaan liba? Nono! Winsi fa a be weli toku en anga den  300 man fi en abaa a Yordaan liba. Den lon a den Midiyansama baka fu te den kisi den, neen den kii den.​—Kuut. 8:4-12.

15. On ten a sa taanga gi owluman fu holidoo?

¹⁵ Son yuu a bunbun fasi den owluman e weli, bika a omen sani den mu du fu yeepi den baala anga sisa. Den mu solugu den osufamii tu. Fa owluman sa waka a Gidiyon baka te a sani ya e miti den?

16-17. San be yeepi Gidiyon fu holidoo? San owluman sa biibi? (Yesaya 40:28-31) (Luku a fowtow tu.)

¹⁶ I sa biibi taki Yehofa o gii kaakiti. Gidiyon be e biibi taki Yehofa be o gi en a kaakiti di a abi fanowdu. A so sani waka tuu (Kuut. 6:14, 34). Wan leisi Gidiyon anga den man fi en be e lon a tu kownu fu den Midiyansama baka. Kande anga kameili den kownu ya be de (Kuut. 8:12, 21). Ma toku Yehofa yeepi den fu kisi den kownu ya neen den kii den. Leti enke Gidiyon owluman sa fitoow Yehofa, a sama di ‘noiti e weli, a nai lasi kaakiti’. Aw gi owluman kaakiti te den abi en fanowdu.​—Leisi Yesaya 40:28-31.

¹⁷ Luku a toli fu Matthew, wan baala di e wooko na a Ati-osu Komte. San yeepi en fu holidoo? Matthew taki: ‘Mi si taki a sani di sikiifi a Filipisama 4:13 a tuu. Son yuu mi e weli te, da mi e si enke mia poi du nawan sani moo. Te mi e fii so, da mi e begi Gadu anga mi hii ati fu a gi mi a kaakiti di mi abi fanowdu fu yeepi den baala anga sisa fu mi. Te mi begi, mi e fii fa a yeye fu Yehofa e gi mi kaakiti. Ai yeepi mi fu holidoo.’ Leti enke Gidiyon, den owluman e wooko taanga fu yeepi den baala anga sisa winsi a ná ala yuu a makiliki gi den. Den mu holi a pakisei tu taki a ná ala sani di den o man du. Ma den sa biibi taki Yehofa o aliki a begi fu den. Aw yeepi den fu holidoo.​—Ps. 116:1; Filip. 2:13.

18. Fa owluman sa waka a Gidiyon baka?

¹⁸ A omen sani owluman sa leli fu a toli fu Gidiyon. Owluman mu holi a pakisei taki den á mu teke tyaipi wooko a den tapu. Den mu soi sakafasi te taawan e kuutu den efuso te sama e gafa den. Den mu e du san den baala e taigi den tu. Boiti dati, den mu abi deki-ati, moomoo fa a kaba e koosube namo. Den mu e biibi tu taki winsi sai miti den, Gadu o gi den a kaakiti di den abi fanowdu. Ai bigi giw taki wi abi den baala ya. U wani ‘tan soi lesipeki gi den’ tu.​—Filip. 2:29.