Beibel nai taki fu a sani de. Ma wantu pelensipali sani de aini Beibel di e yeepi u fu sabi saide den á daai go baka a Nasaleti.

Wan engel be taigi Maliya taki a be o de anga bee, da a be o meke wan pikin. A ten di a engel taigi en a sani ya, en anga Yowsefu be de a Nasaleti, wan foto di de aini Galileya (Luk. 1:26-31; 2:4). Baka di den komoto a Egepte, den daai go a Nasaleti baka. Aini a foto ya Yesesi kiya (Mat. 2:19-23). Neen meke te we taki fu Yesesi, Yowsefu anga Maliya, we pakisei Nasaleti.

Wan famii fu Maliya be e tan aini Yuda. Den be e kai en Elisabet. Elisabet a be a uman fu pilisite Sakaliya. Na a uman ya meke Yohanisi a Dopuman (Luk. 1:5, 9, 13, 36). Maliya be go luku Elisabet a Yuda. A be tan dii mun anga en. Bakadati a daai go baka a Nasaleti (Luk. 1:39, 40, 56). Neen meke Maliya be sabi son peesi fu Yuda.

Baka wan pisiten, a tiiman fu Rome be taki ala sama mu go sikiifi den nen a ‘lanti buku’. Neen meke Maliya anga Yowsefu komoto a Nasaleti go a Betlehem, a foto fu David. Aini a foto ya a Mesiyas be o meke enke fa den polofeititoli be taki (Luk. 2:3, 4; 1 Sam. 17:15; 20:6; Mika 5:2). Baka di Maliya meke Yesesi, Yowsefu á meke a waka a langa pasi fu go a Nasaleti anga a yonkuu pikin fu den. Den tan a Betlehem. A foto ya be de wan sani fu neigin kilomeiti fu Yelusalem. A sani ya meke a be moo makiliki gi den fu tyai Yesesi go na a tempel. A be moo makiliki gi den tu fu tyai den ofaandi di den be mu tyai enke fa a weiti be e taki.​—Lef. 12:2, 6-8; Luk. 2:22-24.

Fosi Yesesi meke, a engel be taigi Maliya taki a be o meke wan manpikin. ‘Aw tii a kownusutuu fi en dda David. A Kownukondee fi en o tan fu teego.’ Kande na a sani ya meke Yowsefu anga Maliya be e si en enke wan pelensipali sani fu Yesesi meke aini a foto fu David (Luk. 1:32, 33; 2:11, 17). Kande den be e denki tu taki a be o moo bun fu den tan ape te enke den kon fusutan san Gadu wani den du.

Wa sabi on langa den tan a Betlehem di den lukuman be go luku den. A ten di den lukuman doo a den, den be e tan aini wan osu kaba. A boi fu den á be de wan beibi moo, ma a be de wan yonkuu pikin a ten de (Mat. 2:11). A gei enke den á daai go baka a Nasaleti, ma den tan a Betlehem wan pisiten.

Herodes be sende ‘sama fu go kii ala den mannengee pikin di be abi tu yali go a ondoo a Betlehem’ (Mat. 2:16). Fu di wan engel be wasikoi Yowsefu taki a so Herodes be wani du, meke den lowe go a Egepte. Bakaten, Yowsefu teke a osufamii fi en, neen den go tan a Nasaleti. Saide den á daai go baka a Betlehem? Bika a ten de na a boi fu Herodes, Akelayus be e tii Yudeya. A man ya be abi ogii-ati. Boiti dati, wan engel be bali Yowsefu taki aa mu go anda. Neen meke a tyai a osufamii fi en go a Nasaleti. A be poi kiya Yesesi aini a foto ya sondee fu ogii miti en.​—Mat. 2:19-22; 13:55; Luk. 2:39, 52.

A gei enke Yowsefu dede fosi Yesesi opo a pasi gi sama fu go a hemel. Dati wani taki Yowsefu a goontapu ya aw weki baka. A omen sama anga en o miti. Wo man sabi saide en anga Maliya be tan a Betlehem baka di Yesesi meke.