1-2. San a wantu sani di e miti u leti enke Lot?

 TE WE luku a tyobo fasi fa sama e libi aini a ten ya, a sani ya e meke we fii enke fa Lot be e fii. Lot be e ‘kusumi, bika den sama be e du omen ogii. Sen á be e kisi den’. Winsi fa den be sabi taki den Dda a hemel á lobi den sani di den be e du, toku den be e du den (2 Peit. 2:7, 8). Fu di Lot be e lesipeki Gadu, meke aa be e libi a tyobo libi fu den sama fu a ten fi en. Useefi de aini wan goontapu pe omen sama nai lesipeki den weiti fu Yehofa. Ma toku u sa libi wan kiin libi te we tan meke moiti fu moo lobi Yehofa. Wo poi libi wan kiin libi tu te we lesipeki en anga u hii ati.​—Odo 14:2.

² Fu di Yehofa wani yeepi u, meke ai giw taanga-sikin anga den sani di sikiifi aini a buku Odo. Ala Kelesten, man anga uman, yonkuuwan anga gaansama, sa fende wini fu den sani sikiifi aini a buku ya.

3. Enke fa Odo 17:3 e soi, da saide u mu kibii wi ati? (Luku a fowtow tu.)

³ A moo pelensipali sani saide u mu kibii wi ati, a fu di Yehofa e ondoosuku en. Dati wani taki ai si sani di taa sama á poi si. A sabi sama u de tuutuu. (Leisi Odo 17:3.) Efu we meke moiti fu du den sani di ai leli u, a sani ya o meke a moo lobi u, bika den sani di ai leli u sa meke u fende teego libi (Yoh. 4:14). Saatan anga den sama di e holibaka gi en naw fende u koli anga den lei fu den  (1 Yoh. 5:18, 19). Efu we meke moiti fu sabi Yehofa moo bun, wo moo lobi en. Wo moo lesipeki en tu. Wa wani du sani di o hati Yehofa, neen meke wa wani sidon pakisei sani di sa meke u sondu. Te we fii fu du wan sani di á bun, u mu akisi useefi taki: ‘Ná pikin lobi Yehofa lobi mi, da saide mi be o du wan sani di o hati en?’​—1 Yoh. 4:9, 10.

4. Fa a lesipeki di wan sisa be e lesipeki Yehofa yeepi en fu aa du wan sondu?

⁴ Luku a toli fu Marta, wan sisa fu Krowasiya. Wan sama be wani siibi anga a sisa ya. A sikiifi taki: ‘A be taanga gi mi fu denki kiin. A be taanga gi mi tu fu feti anga den fii fu mi. Ma a lesipeki di mi be e lesipeki Yehofa yeepi mi.’ b Fa a sani ya yeepi Marta? Marta taki a be e denki san be o de den bakapisi efu a be siibi anga wan sama di en anga en á toow. Useefi sa du a sani ya te tesi e miti u. U mu holi a pakisei taki te u du wan sani di Yehofa á lobi, a sani ya e booko Yehofa ati. A sa meke u lasi a gaandi di wi abi fu dini en fu teego tu.​—Gen. 6:5, 6.

5. San a toli fu Leo e leli i?

⁵ Efu we lesipeki Yehofa tuutuu, u naw paa anga sama di nai tyai denseefi bun. Na a sani ya wan baala den e kai Leo be leli. A baala ya e tan aini Kongo. Fo yali baka di a dopu, neen a bigin paa anga sama di nai tyai denseefi bun. A be e denki taki solanga a nai du denseefi sani di den mati fi en e du, da sani á pasa. Ma aa langa seefi neen a bigin du denseefi sani di den mati fi en be e du. A be bigin diingi pasa peesi. Te fu kaba a be bigin libi wan hululibi. Ma bakaten a be bigin pakisei den sani di en mma anga  en dda be e leli en, anga fa a be e piisii di a be e dini Yehofa. San a be a bakapisi? A daai ana pali a boto. Den owluman yeepi en fu a kon dini Yehofa baka. Nownow a baala ya a wan owluman. Ai du a spesuutu-pionili wooko tu. Ná pikin piisii ai piisii.

6. San a den tu uman di wo taki fu den?

⁶ Meke u poti pakisei a Odo kapitel 9. A kapitel ya e taki fu tu uman. Wan fu den e soi taki a koni, ma a taawan don. (Luku Romesama 5:14 anga Galasiyasama 4:24 tu.) Te wo luku a kapitel ya, da holi a pakisei taki a goontapu fu Saatan e gi sama taanga-sikin fu libi wan hululibi. Ná ala se den gi sama taanga-sikin fu luku porno (Efe. 4:19). Ma a sani di o yeepi u fu wa du den sani ya, a te wi abi tuutuu lesipeki gi Gadu. U mu tan faawe fu sani di á bun tu (Odo 16:6). Ala sama sa fende wini fu den sani di sikiifi a Odo kapitel 9. Mannengee anga umansama seefi sa fende wini fu den sani ya. Ala den tu uman aini a toli ya, e kai sama di ‘naabi ondoofeni’ fu kon a den. A leti enke den e taki: ‘U kon nyan wan sani a mi osu’ (Odo 9:1, 5, 6, 13, 16, 17). Ma sani á waka bun gi den sama di go na a don uman osu.

7. Enke fa Odo 9:13-18 e soi, da sai pasa anga den sama di teke a kai fu a don uman? (Luku a fowtow tu.)

⁷ Kow taki fu a kai fu a don uman fosi. (Leisi Odo 9:13-18.) A uman ya e kai den sama di naabi ondoofeni. Ai taki: Kon, kon na a fesa fu mi. San miti den sama di teke a kai fi en? ‘A soso dedesama de neen osu.’ A Beibel buku Odo e wasikoi u tu gi wan ‘hulu uman’ anga wan ‘yayo uman’. ‘A osu fu a uman ya e meke sama saka go aini geebi’ (Odo 2:11-19). Odo 5:3-10 e wasikoi u tu gi wan taa ‘hulu-uman’. ‘Den futu fi en e tyai sama go dede.’

8. Sowtu bosoloiti u mu teke son yuu?

⁸ Den sama di a ‘don uman’ e kai mu luku san den o du. Den mu luku efu den o teke a kai fi en efuso den naw teke en. Son yuu useefi mu teke den sowtu bosoloiti ya tu. Sai be o du efu wan sama akisi i fii siibi anga en? Sai be o du efii si porno a internet efuso tv?

9-10. Saide u mu koti pasi gi hululibi?

⁹ We fende wini te we lon gi hululibi. A ‘don uman’ taki: ‘Fufuu wataa switi fu  diingi.’ San na a ‘fufuu wataa’ aini a tekisi ya? Beibel e maiki a piisii di toowpaa e piisii te den e siibi anga denseefi, anga a diingi di sama e diingi kiin wataa (Odo 5:15-18). A wan piisii sani te man anga uman di toow e siibi anga denseefi. Ma ‘fufuu wataa’ a wan taa sani. Den wowtu ya sa abi fu du anga hululibi. Leti enke wan fufuuman di gwenti fufuu sani kibiikibii, a so a sani ya e pasa kibiikibii tu. A fufuu wataa sa switi, moomoo te den sama di e hulu e denki taki sama á si den. Ma a koli den e koli denseefi, bika Yehofa e si ala sani. A moo gaan ogii di sa miti wan sama, a te anga Yehofa á de mati moo (1 Kor. 6:9, 10). Ma moo de ete.

¹⁰ A omen sani e miti den sama di e hulu. Sen e kisi den, den e si enke den naabi fa. Son yuu den e teke wan bee di den á be wani. Hululibi, e booko osufamii. Boiti dati, a omen fu den e kisi takuu siki di sa kii den bakaten. Neen meke a wan koni sani fu tan faawe fu a osu fu a don uman. Wa mu nyan mi en nyanyan tu (Odo 7:23, 26). Vers 18 fu kapitel 9 e taki: ‘Ala den sama di teke a kai fi en de dededede aini geebi.’ Ma saide tyaipi sama e teke a kai fu a uman ya, winsi fa den sabi a bakapisi?​—Odo 9:13-18.

11. Saide u mu tan faawe fu porno?

¹¹ Wan fu den beti fu a don uman, a porno. Porno a sekisi felon, fowtow, anga ala taa sani di sama e meke fu meke taawan poti pakisei a hululibi. Son sama e si enke aa fowtu fu luku porno. Ma porno a ná wan bun sani. Ai meke sama nai lesipeki denseefi. Ai meke den nai lesipeki taawan tu. Te sama bigin luku porno, den nai poi tan den á luku en. Den nai poi feegete san den luku tu. Porno nai kii den seks fii fu wan sama, ma a meke ai meke den fii ya kon moo taanga (Kol. 3:5; Yak. 1:14, 15). Neen meke gaanse sama di e luku porno, e hulu bakaten.

12. Faw sa soi taki we luku bun anga sani di sa weki den seks fii fu u?

¹² Saw mu du efu sekisi fowtow efuso felon dyombo kon aw telefon wanboowanboo? U mu daai u fesi, wa mu luku en. Efu we holi a pakisei taki a de di wi anga Yehofa de mati na a moo pelensipali sani, da aw makiliki giw fu puu den sani de aw telefon. Son yuu winsi a ná porno, toku son sani di we si sa weki den seks fii fu u. Saide wa mu tan luku den sowtu sani de? Bika wa wani denki nawan sani di sa meke u hulu aini wi ati (Mat. 5:28, 29). David wan owluman aini Tailand taki san ai du te a si den sowtu sani ya. A taki: ‘Mi e akisi miseefi taki: “Winsi a sani ya a ná porno, Yehofa o piisii efu mi tan luku en?” Den sowtu akisi ya e yeepi mi fu du sani anga koni.’

13. Saw yeepi u fu du sani anga koni?

¹³ Te we feele fu du sani di Yehofa á lobi, da a sani de o yeepi u fu du sani anga koni. ‘Tuutuu lesipeki’ gi Yehofa, na a bigin fu koni (Odo 9:10). Na a sani ya den fosi vers fu kapitel 9 e taki, te ai taki fu a ‘koni uman’.

14. Sowtu kai sikiifi a Odo 9:1-6?

¹⁴ Leisi Odo 9:1-6. Aini a tekisi ya Yehofa a Sama di meke u, a sama di abi ala koni, e giw wan kai (Odo 2:6; Rom. 16:27). Odo e taki fu wan gaan osu di abi seibin ponsu. A sani ya e soi taki Yehofa lobi gi sama sani. Ai kai ala sama fu gi  den leli di o yeepi den fu du sani anga koni.

15. San Yehofa e kai u fu du?

¹⁵ A toli fu a koni uman e leli u taki Yehofa a wan Gadu di lobi gi sama sani. Odo kapitel 9 e soi taki a uman ya boli te a kaba, a sete en tafaa taa anga switi win (Odo 9:2). Aini vers 4 anga 5, a koni uman e bali taki: ‘Ala sama di naabi ondoofeni mu kon nyan a beele fu mi.’ Saide u mu teke a kai fu a uman ya? Bika Yehofa wani den pikin fi en koni. Aa wani ogii miti den. Aa wani u du sani di o hati u bakaten. Neen meke ‘a poti koni a wan se gi den sama di e du sani anga wan kiin ati’ (Odo 2:7). Efu we lesipeki Yehofa tuutuu, wo wani du sani di o meke a piisii. U naw yee san ai taigi u namo, ma wo wooko anga san a taki tu.​—Yak. 1:25.

16. Fa a lesipeki di Alain be e lesipeki Yehofa yeepi en fu du sani anga koni? San a be a bakapisi?

¹⁶ Luku fa a lesipeki di Alain be e lesipeki Yehofa yeepi en fu du sani anga koni. A baala ya a wan owluman di e leli pikin a sikoo. A taki: ‘Gaanse fu den sama di mi anga den e wooko, fende taki porno e yeepi den fu kon sabi moo sani fu seks.’ Ma Alain á meke den fende en koli. A taki: ‘Fu di mi e lesipeki Yehofa tuutuu, meke noiti mi luku den felon de. Mi taigi den sama di mi anga den be e wooko tu saide mi nai luku den.’ Alain wooko anga a sani di ‘tuutuu koni’ taki: ‘Waka a wan fasi di e soi taki i de anga kiin fusutan’ (Odo 9:6). Di den sama di be e wooko anga Alain fusutan taki aa be e luku porno, den foondoo. Son wan fu den bigin sutudeli Beibel bakaten. Den e kon a den komakandaa tu.

17-18. Sowtu wini den sama di teke a kai fu a ‘koni uman’ e fende nownow? Sowtu wini den o fende aini a ten di e kon? (Luku a fowtow tu.)

¹⁷ Yehofa koboloiki wan ageisitoli fu tu uman fu soi u faw sa abi wan bun libi aini a ten di e kon. Den sama di e teke a kai fu a ‘don uman’ e piisii fu wan pisiten namo te den e libi wan hululibi. Den nai poti pakisei a den bakapisi di a libi fu den o tyai gi den. Den sani di den e du o tyai den go ‘aini geebi’.​—Odo 9:13, 17, 18.

¹⁸ Ma sani e waka bun anga den sama di teke a kai fu a ‘koni uman’. Den sama ya e piisii, bika a wan ageisi fasi den e fende gusontu switi nyanyan na a tafaa di Yehofa seeka gi den (Yes. 65:13). Yehofa be meke polofeiti Yesaya sikiifi taki:  ‘Aliki mi bun. U nyan bunbun nyanyan, da wo piisii’ (Yes. 55:1, 2). We leli taki u mu lobi san Yehofa lobi, daw buuse san ai buuse (Ps. 97:10). Anga ala piisii we kai taawan fu kon leli san a ‘tuutuu koni’. U de enke a futuboi fu a uman di be e bali a den moo hei peesi fu a foto taki: ‘Ala sama di naabi ondoofeni mu kon.’ Wi anga den sama di teke a kai fu a koni uman e fende wini nownow kaba, ma wo fende wini aini a ten di e kon tu. Wo fende a okasi fu ‘libi’ fu teego, bika ‘we waka a wan fasi di e soi taki u de anga kiin fusutan’.​—Odo 9:3, 4, 6.

19. Enke fa Peleikiman 12:13 e soi, da saw mu meke moiti fu du? (Luku a faki di den e kai ‘ We fende wini te wi abi tuutuu lesipeki gi Gadu.’)

¹⁹ Leisi Peleikiman 12:13, 14. Efu we lesipeki Yehofa tuutuu, a sani ya o kibii wi. A goontapu fu Saatan e poli e gwe namo, ma a lesipeki di we lesipeki Yehofa o yeepi u fu wa libi wan hululibi. A sani ya e giw taanga-sikin tu fu kai tyaipi sama fu den kon leli san a ‘tuutuu koni’. Efu den teke a kai ya, Yehofa o belesi den.