1. Sai yeepi a foluku fu Yehofa fu tan dini en winsi fa omen polobelema e miti den?

 BEIBEL be taki aini a ten fuu, a ‘libi o taanga’ (2 Tim. 3:1). Den ogii sani di e miti sama aini a goontapu fu Saatan ya e miti a foluku fu Yehofa tu. Ma boiti taki den sani ya e miti den, taa polobelema e miti den tu fu di den e dini Yehofa. Ma sai yeepi u fu tan dini Yehofa winsi fa den sani ya e miti u? Wan fu den sani di e yeepi u, a di u si fa Yehofa yeepi u aini den ten di pasa. U sabi en tu enke ‘a Gadu di de a libi’.​—Yel. 10:10;2 Tim. 1:12.

2. Sowtu sani di u sabi fu Yehofa e taanga u?

² Yehofa e si ala den tesi di e miti u. A de kabakaba fu yeepi u tu (2 Kolon. 16:9; Ps. 23:4). Te we holi a pakisei taki a Gadu fu u e booko en ede anga u, taki a de kabakaba fu yeepi u, da a sani ya e gi u taanga-sikin fu holidoo winsi sowtu tesi e miti u. A so sani be waka anga kownu David.

3. San David be wani taki di a taki ‘Yehofa de a libi’?

³ David be sabi Yehofa, a be e fitoow en. Neen meke David be begi en fu a yeepi en di kownu Saul anga den taa feyanti fi en be de neen baka fu du ogii anga en (Ps. 18:6). Baka di Gadu piki a begi fu David fu di a yeepi en, neen David taki: ‘Yehofa de a libi!’ (Ps. 18:46) San David be wani taki anga a sani ya? Wantu sama di ondoosuku sani be taki David be wani taki anga a sani ya taki Yehofa ‘a wan tuu Gadu di e yeepi den sama di e dini en ala yuu’. A sani ya e soi taki David be sabi taki a Gadu fi en sabi san be e miti en, a be de kabakaba fu yeepi en tu. A sani ya be e gi David taanga-sikin fu holidoo.​—Ps. 18:28, 29, 49.

4. Sowtu wini we fende te we holi a pakisei taki Yehofa de a libi?

 ⁴ A holi di we holi a pakisei taki Yehofa de a libi e yeepi u fu dini en fayafaya. A sani ya o yeepi u fu holidoo te tesi e miti u, aw yeepi u tu fu dini Yehofa anga u hii ati. A sani ya o gi u taanga-sikin tu fu tan koosube a Yehofa.

A LIBILIBI GADU O TAANGA I

5. Saw yeepi u fu holidoo te tesi e miti u? (Filipisama 4:13)

⁵ Wo man holidoo te tesi e miti u te we holi a pakisei taki Yehofa de a libi, a poi yeepi u ala yuu. Tesi á de di Yehofa á poi yeepi wi anga en. Yehofa na a moo taanga Gadu, a poi gi wi a kaakiti di wi abi fanowdu fu holidoo. (Leisi Filipisama 4:13.) A sani ya e gi u taanga-sikin te tesi e miti u. Te u si fa Yehofa e yeepi u anga pikinpikin tesi, da a sani ya e gi u taanga-sikin taki aw yeepi u anga den moo gaanwan di o miti u aini a ten di e kon tu.

6. San be miti David di a be yonkuu? Fa a sani ya be e yeepi en fu moo fitoow Yehofa?

⁶ Wo luku tu sani di be miti David di be meke a moo fitoow Yehofa. Di David be yonkuu di a be e luku den sikapu fi en dda, wan leisi wan lew tyai wan fu den sikapu ya gwe. Wan taa leisi, wan beer tyai wan fu den gwe. Ma ala den tu leisi ya David soi deki-ati. A yeepi den sikapu fu den meti ya á fende den kii. Winsi fa David be du a sani ya, tokuso aa be si enke anga en eigi kaakiti a be du en. A be sabi taki a Yehofa gi en a kaakiti fu du a sani ya (1 Sam. 17:34-37). Noiti David be feegete san Yehofa du gi en. Te a be e pakisei den sani ya, a be e moo biibi taki a libilibi Gadu o gi en a kaakiti di a abi fanowdu tu aini a ten di e kon.

7. Sowtu sani David be e poti pakisei? Fa a sani ya yeepi en fu go feti anga Goliyat?

⁷ Bakaten David be go na a suudati kampu fu den Islayelisama pe den gaan baala fi en be de. A ten de aa be abi den 20 yali ete. Di a go ape a si taki den suudati fu Islayeli be e feele wan gaan gadyaa Filisteyaman den e kai Goliyat. A man ya be e taigi den taki: ‘Mi wani si on du fu den fetiman fu Islayeli o peefuu kon feti anga mi’ (1 Sam. 17:10, 11). Den suudati be e feele Goliyat fu di a be bigi anga fu di den be e poti pakisei a den sani di a be e taki (1 Sam. 17:24, 25). Ma David á be e poti pakisei a den sani de. David be sabi taki di Goliyat be e wisiwasi den suudati fu Islayeli, a ‘den fetiman fu a tuutuu Gadu a be e wisiwasi’ (1 Sam. 17:26). A Yehofa David be e poti pakisei fu yeepi en. David be sabi taki a Gadu di be e yeepi en di a be e luku den sikapu fi en dda, be o yeepi en baka. Fu di a be sabi taki Yehofa o yeepi en, meke a go feti anga Goliyat. A wini en di a go feti anga en tu!​—1 Sam. 17:45-51.

8. Saw yeepi u fu biibi taki Yehofa o yeepi u te tesi e miti u? (Luku a fowtow tu.)

⁸ Useefi poi holidoo te tesi e miti u, efu we biibi taki a Gadu di de a libi de kabakaba fu yeepi u (Ps. 118:6). Efu u pakisei fa a yeepi u aini a ten di pasa, a sani de o yeepi tu fu biibi taki a poi yeepi u aini a ten di e kon. U sa poti en enke maiki fu leisi den toli aini Beibel di e soi fa Yehofa be yeepi den sama di e dini en (Yes. 37:17, 33-37). U sa luku efuso leisi toli a jw.org tu di e soi fa Yehofa yeepi baala anga sisa aini a ten ya. I sa teke ten pakisei tu fa Yehofa be yeepi i. Ná booko yu  ede tumisi efu kande ya fende gaan kufaliki fasi fa Yehofa yeepi i, leti enke fa a be yeepi David fu feti anga wan lew anga wan beer. Saide? Bika a omen sani Yehofa du gi u. Yehofa kai i fii toon en mati (Yoh. 6:44). A fu di ai yeepi i tu, meke te anga a dei fu tide ye dini en ete. Neen meke i sa akisi Yehofa fu a yeepi i fu membee fa a be piki son begi fii, fa a be yeepi i fu fende son sani dii be abi fanowdu na a moo bun yuu efuso fa a be yeepi i di sani á be mailiki gii. Te we teke ten pakisei den sani ya, da u naw feegete taki Yehofa o tan yeepi u te wi abi booko-ede efuso polobelema.

9. Saw mu holi a pakisei te tesi e miti u? (Odo 27:11)

⁹ Efu we si Yehofa enke wan tuutuu sama, a sani de o yeepi u fu wa booko wi ede tumisi anga den tesi di e miti u. Saide? Te tesi e miti u, u mu poti pakisei a den moo pelensipali sani. Bika Saatan be taki te ogii e miti u wo gwe fika Yehofa. Neen meke den sani di we du o meke Yehofa piisii efuso tyali. (Yopu 1:10, 11; leisi Odo 27:11.) Te u holidoo winsi sowtu tesi e miti u, da we soi Yehofa taki u lobi en. We soi tu taki Saatan a wan leiman. Kande lanti e libi ogii anga den Kotoigi a pe ye tan, kande a moni polobelema yu abi, kande sama nai wani aliki na a pisi pe we peleiki efuso kande yu abi taa polobelema. Efu den sani ya e miti i, ya mu feegete taki efi i holidoo, a sani ya o meke Yehofa piisii. Ya mu feegete taki iniiwan tesi di Yehofa fika fu miti i, a tesi dii poi tyai (1 Kor. 10:13). Aw gi yu a kaakiti di yu abi fanowdu tu fu holidoo.

A LIBILIBI GADU O PAI YU

10. San a libilibi Gadu o du gi den sama di e dini en?

¹⁰ Ala yuu Yehofa e pai den sama di e dini en (Heb. 11:6). Ai yeepi u fu wa booko we ede tumisi, ai gi u omen bun sani aini a ten ya tu di e meke u piisii. Boiti  dati, aw gi u teego libi aini a ten di e kon. U sabi taki Yehofa o pai u, u sabi tu taki sani á de di poi tapu en fu du a sani ya. Neen meke we du ala san u poi fu dini Yehofa anga u hii ati, leti enke den sama fu fositen. A so Timotiyesi be du sani aini a ten fu den fosi Kelesten.​—Heb. 6:10-12.

11. San be yeepi Timotiyesi fu wooko taanga aini a kemeente? (1 Timotiyesi 4:10)

¹¹ Leisi 1 Timotiyesi 4:10. Timotiyesi be e biibi taki Gadu be o pai en. Neen meke a be e wooko taanga gi Yehofa anga fu yeepi taa sama. San a be e du? Apostel Pawlesi be e gi en taanga-sikin fu meke moiti fu toon wan moo bun peleikiman anga fu meke moiti fu moo gi leli bun aini a kemeente. Pawlesi be gi en taanga-sikin tu fu du ala san a poi fu yonkuuwan anga gaandiwan be sa waka neen baka. Son wan fu den sani di a be mu du á be makiliki bika a be mu poti taawan a pasi tu, ma a be mu du en a wan switifasi (1 Tim. 4:11-16; 2 Tim. 4:1-5). Son leisi taawan á be e sabi seefi sowtu sani Timotiyesi be e du. Son sama á be e teke san a be e du fu bigi, ma tokuso a be e holi a pakisei taki Yehofa be o pai en fu san ai du.​—Rom. 2:6, 7.

12. Saide meke den owluman e wooko taanga aini a kemeente? (Luku a fowtow tu.)

¹² Owluman aini a ten ya mu holi a pakisei taki den sani di den e du e bigi gi Yehofa. Boiti taki den owluman e go luku den baala anga sisa a osu fu gi den taanga-sikin efuso te den abi polobelema, den e gi leli aini a kemeente, den e peleiki. Den e yeepi tu anga bow wooko efuso te wan gaan ogii pasa a wan peesi. Taawan e go luku baala anga sisa na ati-osu di siki. A omen fu den e yeepi na Ati-osu Komte. Den e yeepi anga den wooko ya fu di den sabi taki a kemeente a fu Yehofa, a ná fu libisama. Neen meke den e wooko taanga aini a kemeente, bika den  e biibi taki Yehofa o pai den fu a moiti di den e meke.​—Kol. 3:23, 24.

13. Fa Yehofa e si den sani di we du gi en?

¹³ A ná ala sama poi toon owluman. Ma ala u poi du wan sani gi Yehofa. Neen meke ai bigi gi en te we du ala saw poi fu dini en. Ai si a moiti di we meke fu gi ala saw poi fu holibaka gi a wooko di e du a hii goontapu, winsi kande a moni di u poi gi ná ipi. Ai bigi gi en te we meke moiti fu gi piki a komakandaa, winsi fa kande sen e kisi u. A kan taki ye si enke i nai du fuu gi Yehofa, ma tokuso ai teke en fu bigi. Neen meke aw pai i gi den sani di ye du.​—Luk. 21:1-4.

MEKE MOITI FU TAN A YEHOFA SE

14. Fa a meke di we meke moiti fu tan koosube fu Yehofa e yeepi u fu dini en anga u hii ati? (Luku a fowtow tu.)

¹⁴ Efu wi anga Yehofa a bun mati, aw moo makiliki gi u fu dini en anga u hii ati. A so sani be de anga Yowsefu. Aa be wani siibi anga sama uman, bika a be sabi taki Yehofa á lobi a sani de (Gen. 39:9). Efu u wani wi anga Yehofa toon bun mati, u mu e meke ten fu e begi, u mu e sutudeli en Wowtu tu. A sani ya o yeepi wi anga en fu toon moo bun mati. Leti enke Yowsefu efu wi anga Yehofa a bun mati, u naw du nawan sani di o hati en.​—Yak. 4:8.

15. Saw sa leli fu den Islayelisama di den be de aini a sabana? (Hebrewsama 3:12)

¹⁵ Te wan sama nai fitoow Yehofa moo, da a sani de sa meke a daai baka gi Yehofa. Wa mu feegete san be miti den Islayelisama di den be de aini a sabana. Den be sabi taki Yehofa de tuutuu, ma tokuso den be si enke aa be o poi gi den san den be abi fanowdu. Den be akisi taki: ‘Yehofa de anga u tuutuu?’ (Ek. 17:2, 7). Bakaten den du sani di Yehofa á lobi. Neen meke wi aini a ten ya, wani du ala saw man fu aliki Yehofa ala yuu.​—Leisi Hebrewsama 3:12.

16. San sa meke a taanga gi u fu tan dini Yehofa?

 ¹⁶ A fasi fa den sama fu a goontapu ya e tyai denseefi sa meke a taanga gi u fu tan koosube a Yehofa. Omen sama nai biibi taki Gadu de. Gaanse leisi a gei enke sani e go moo bun anga den sama di nai dini Gadu. Te we si den sowtu sani ya e pasa, da son leisi ai taanga gi u fu tan dini Yehofa anga u hii ati. Winsi faw sabi taki Gadu de, tokuso u sai akisi useefi efu aw yeepi u anga den booko ede fu u. A sama di sikiifi Psalm 73 seefi be e fii so tu. A be e si fa den sama di á be e dini Gadu be e piisii. Neen meke a be e akisi enseefi taki efu a de fanowdu fu dini Gadu.​—Ps. 73:11-13.

17. Saw yeepi u fu tan koosube a Yehofa?

¹⁷ San yeepi a Psalm sikiifiman fu kengi en denki? A be e pakisei san be o pasa anga den sama di nai fitoow Yehofa moo (Ps. 73:18, 19, 27). A be e pakisei sowtu wini wo fende tu te we dini Gadu (Ps. 73:24). Useefi sa teke ten pakisei fa Yehofa e belesi u. Pakisei fa a libi fii be o de efu yu á be e dini Yehofa. Efu we teke ten pakisei sowtu wini we fende te we dini Yehofa, da a sani ya o yeepi u fu tan dini en anga u hii ati. Leti enke a Psalm sikiifiman useefi o taki: ‘A kon di mi e kon moo koosube a Gadu bun gi mi.’​—Ps. 73:28.

18. Saide aa de fu u feele saw pasa aini a ten di e kon?

¹⁸ U poi holidoo winsi sowtu tesi e miti u aini den lasiti dei ya, fu di we ‘dini a tuu Gadu enke saafu’ (1 Tes. 1:9). Yehofa e booko en ede anga u, a de kabakaba fu yeepi u tu. Leti enke fa a be de anga a foluku fi en aini a ten di pasa, a so a de anga u aini a ten ya tu. Aa fika langa moo fu a gaan banowtu bigin. Ma aa de fu u feele, bika Yehofa de anga u (Yes. 41:10). Neen meke ‘u sa taki anga ala deki-ati taki: ‘A Yehofa a mi yeepiman. Mi naw feele.’​—Heb. 13:5, 6.