1. Sowtu wini we fende fu Psalm 15:1-5?

 AINI a artikel di pasa u leli taki, a den sama di paamisi Yehofa taki den o libi enke fa a wani anga di e meke moiti fu toon en mati poi kon aini a ageisi tenti fi en. Ma saw yeepi u fu toon en mati? Psalm 15 o taigi u moo fu a toli ya. (Leisi Psalm 15:1-5.) A Psalm ya e taki fu wantu sani di o yeepi u fu kon moo koosube a Gadu.

2. San David be sai pakisei di a taki fu a tenti fu Yehofa?

² Psalm 15 e bigin anga den wowtu: ‘Yehofa, sama sa kon aini i tenti? Sama sa tan na a santa mongo fi i?’ (Ps. 15:1) Di David be e taki fu a ‘tenti’ fu Yehofa, kande na a tabernakel di be de a Gibiyon wan pisiten a be e pakisei. Di a be e taki tu fu a ‘santa mongo’ fu Yehofa, kande a Siyon Mongo di be de a Yelusalem a be e taki. David be meke wan tenti di be de na a zuid se fu Gibiyon neen a poti a Ark fu a kuudei anda te enke a tempel be kaba meke.​—2 Sam. 6:17.

3. Saide u mu meke moiti fu fusutan Psalm 15? (Luku a fowtow.)

³ A omen fu den Islayelisama á be fende a okasi fu wooko na a tabernakel. Ma boiti dati, a wantu fu den namo be poi go aini a tenti a pe a ark fu a kuudei be de. Ma aini a ten ya, na ala den sama di e dini Yehofa anga den hii ati poi kon na a ageisi tenti fi en. Den poi toon en mati tu. We angii tuutuu fu a sani ya pasa. Psalm 15 e kai wantu sani di u mu du fu wi anga Yehofa sa tan mati.

 LIBI WAN KIIN LIBI, DU SAN BUN

4. Faw du sabi taki a ná dopu wawan Yehofa wani u dopu? (Yesaya 48:1)

⁴ Enke fa Psalm 15:2 e taki, da wan mati fu Gadu a wan sama di e libi wan ‘kiin libi anga di e du san bun’. Den wowtu ‘libi’ anga ‘du san bun’, e soi taki a wan sani di u mu tan du. Ma u poi libi wan kiin libi tuutuu? Eeye u poi. Winsi fa ala wi e meke fowtu, toku Yehofa e si u enke sama di e libi wan kiin libi te we meke moiti fu aliki en ala yuu. Te u paamisi Yehofa taki wo libi enke fa a wani da u dopu, da a bigin we bigin waka anga en. Aini a ten di pasa, a ná fu di wan sama a be Islayelisama da dati wani taki anga a Gadu a be mati. Bika a omen fu den be e kai Yehofa nen, ma den á be e ‘du san bun’. (Leisi Yesaya 48:1.) Den Islayelisama be mu leli sabi san Yehofa lobi anga san aa lobi. A letiso a de aini a ten ya tu. A ná dopu wawan u mu dopu efuso go a den komakandaa. Ma u mu ‘tan du san bun’. Faw sa du a sani ya?

5. San a wani taki fu aliki Yehofa ala yuu?

⁵ Gi Yehofa, te we ‘libi wan kiin libi’ efuso ‘du san bun’ da dati a ná a go di u mu e go a den komakandaa wawan (1 Sam. 15:22). U mu meke moiti ala yuu fu aliki en, seefi aini den pikinpikin sani di we du. U mu e aliki en te u wawan de a wan peesi (Odo 3:6; Peleik. 12:13, 14). A pelensipali taki we aliki Yehofa ala yuu, bika a sani ya e soi taki u lobi en. Enseefi o moo lobi u tu.​—Yoh. 14:23; 1 Yoh. 5:3.

6. Enke fa Hebrewsama 6:10-12 e taki, da san pelensipali gi Yehofa moo den bun sani di u du aini a ten di pasa?

⁶ A tuu taki Yehofa e teke den sani di  u du gi en fu bigi. Ma dati á wani taki fu di u be wooko gi en den ten di pasa, da u de aini a ageisi tenti fi en kaba. Hebrewsama 6:10-12. (Leisi en.) A wani u tan meke moiti fu dini en anga u hii ati ‘te na a kaba’. Noiti u mu ‘weli’. U mu tan du a sani ya, da wi anga en o tan mati fu teego.​—Gal. 6:9.

I MU E TAKI A TUU ALA YUU

7. San a wani taki fu taki a tuu ala yuu?

⁷ Wan sama di wani tan aini a tenti fu Yehofa mu e ‘taki a tuu aini en ati’ (Ps. 15:2). A ná lei wawan wa mu e lei, ma a fasi fa we taki anga den sani di we du mu e soi taki u nai bidiigi taawan (Heb. 13:18). A sani ya pelensipali bika Yehofa e buuse wan sama di e lei efuso bidiigi taawan. A den sama di e ‘du sani anga wan kiin ati’ ai teke enke en mati.​—Odo 3:32.

8. Anga sowtu manii u mu luku bun?

⁸ Wan sama di e taki a tuu ain en ati, nai du sama ain sani. A nai du enke ai aliki Yehofa te a de a sama aini, da ai taangayesi en kibiikibii (Yes. 29:13). A nai koli efuso bidiigi taawan. Wan sama di e koli taawan sa meke i bigin denki taki den weiti fu Yehofa naw tyai wini gi i (Yak. 1:5-8). Son yuu efu a si enke aa de fanowdu, a nai aliki Yehofa. Te a taangayesi Yehofa neen nawan sani á pasa, ai go doo anga den ogii di ai du. Sowan sama e denki taki ai dini Gadu, ma noiti Yehofa o piisii anga en (Peleik. 8:11). Neen meke wi fuu se mu du ala saw poi fu wa koli taawan. Wa wani bidiigi den tu.

9. San pasa a fosi leisi di Yesesi miti Nathanael? San a sani ya e leli u? (Luku a fowtow tu.)

⁹ A sani di pasa di Filipus kai en mati Nathanael fu kon miti Yesesi, e soi u kiin taki a pelensipali fu e ‘taki a tuu aini wi ati’. Winsi fa a fosi leisi Yesesi miti Nathanael, tokuso a taki: ‘A man ya a tuutuu wan Islayelisama di nai bidiigi sama’ (Yoh. 1:47). A tuu taki Yesesi be sabi taki den bakaman fi en  nai bidiigi taawan, ma di a miti Nathanael, a be poi fusutan wanten taki enseefi abi a moin manii ya tu. Winsi fa a man ya be abi sondu enke u, toku a be e meke moiti fu du ala sani anga wan kiin ati. Na a sani ya Yesesi be teke fu bigi, neen meke a gafa a man ya. Ya si enke a wan moin sani fu Yesesi luku u, da a taki aseefi sani ya noh?

10. Saide u mu luku bun san we taki? (Yakowbesi 1:26)

¹⁰ Omen fu den sani di sikiifi aini Psalm 15 e taki fu faw mu libi anga taawan. Psalm 15:3 e taki: Wan sama di de aini a tenti fu Yehofa ‘nai lei gi taawan anga en mofu. A nai du nawan ogii anga en mati. A nai taki ogii fu den mati fi en.’ Efu we du den sani ya, wo poli u baala anga sisa nen, da wi anga Yehofa naw de mati moo tu.​—Leisi Yakowbesi 1:26.

11. On ten u sa taki wan sama e lei gi taawan? San kan pasa anga sowan sama efu aa wani kengi?

¹¹ A Psalm sikiifiman e kai a wowtu ‘lei’ tu. Lei gi wan taawan, a te ye taki sani fu wan sama di ná tuu. Te ye taki sani fu poli a taawan nen. Efu wan sama e tan du a sani ya neen aa wani kengi, den baala sa puu en na a kemeente.​—Yel. 17:10.

12-13. On ten u sa taki ogii fu wan sama efuso poli wan sama nen? (Luku a fowtow tu.)

¹² Psalm 15:3 e taigi u taki den sama di Yehofa e kai kon aini a tenti fi en, nai libi ogii anga taawan, den nai taki ogii fu den tu. Ma on ten u sa taki ogii fu wan sama efuso poli wan sama nen?

¹³ Efu wa luku bun, gawgaw u sa poli taawan nen efuso taki sani fu den di ná tuu. Meke u taki: (1) Wan sisa nai pionili moo, (2) Wan toowpaa nai dini a Betel moo, efuso (3) Wan baala á de  owluman efuso dinali moo. I si enke a be o bun, fu e sidon pakisei saide den sama ya naabi den faantiwowtu di den be abi fosi moo, daw go taigi taawan a toli? Nono. U mu holi a pakisei taki a omen sani sa pasa di wa sabi, neen meke sani e kengi son yuu. Noiti u mu feegete taki, den sama di de aini a tenti fu Yehofa ‘nai libi ogii anga taawan, den nai taki ogii fu den mati tu’.

LESIPEKI DEN SAMA DI E LIBI ENKE FA YEHOFA WANI

14. Anga sama u mu luku bun?

¹⁴ Psalm 15:4 e taki a sama di Yehofa teke enke en mati e ‘buuse den sama di abi takuu manii’. Faw sa du a sani ya? Fu di wi abi sondu, meke a ná ala yuu u poi sabi efu wan sama e tyai enseefi bun. Son yuu we paa anga wan sama fu di wi anga en moo gwenti, da we poti den sama di wa kaba sabi a wan se. Ma a sani di u mu holi a pakisei, a taki a den sama di Yehofa e ‘buuse’, a den useefi mu koti pasi gi (1 Kor. 5:11). U mu luku bun anga den sama di e du sani di Yehofa á lobi, di nai lesipeki a biibi fu u anga di e taki ogii fu u. U mu luku bun anga den sama di sa poli wi anga Yehofa efuso di sa swaki a biibi fu u.​—Odo 13:20.

15. Faw sa lesipeki den sama di e libi enke fa Gadu wani?

¹⁵ Wan taa sani di Psalm 15:4 e taki fi en, a fu lesipeki den sama di e ‘libi enke fa Gadu wani’. U mu libi bun anga den sama di Yehofa teke enke en mati, u mu soi taki we booko wi ede anga den (Rom. 12:10). Aseefi tekisi ya e kai ete wan sani di u sa du. Ai taki: ‘U mu du saw paamisi, winsi sani á waka enke faw wani.’ Efu u nai du saw paamisi, taawan sa fii booko-saka (Mat. 5:37). Yehofa wani taki toowpaa holi denseefi a san den paamisi makandaa a den toowdei. Ai piisii tu te mma anga dda nai kengi mofu te den paamisi den pikin fu den wan sani. Efu u lobi Yehofa anga taa sama, wo meke moiti ala yuu fu du saw paamisi.

16. San a wan taa fasi faw sa lesipeki den sama di Yehofa e teke enke en mati?

¹⁶ Wan taa sani di u sa du fu soi taki we lesipeki den sama di Yehofa e teke enke en mati, a fu kai den kon a wi osu. U mu libi switi anga den tu (Rom. 12:13). Boiti a peleikiwooko anga den komakandaa di we go, u mu e meke ten gi u baala anga sisa a taa okasi tu. Efu we du a sani ya, wi anga den o toon moo bun mati. Aw yeepi u fu kon moo koosube a Yehofa. Te we bali wadaa gi den, we soi taki we waka a Yehofa baka.

NÁ SI MONI ENKE A MOO PELENSIPALI SANI

17. Saide meke Psalm 15 e taki fu moni?

¹⁷ Aseefi kapitel e taki fu den sama di Yehofa e teke enke mati taki: ‘Te ai leni sama moni, a nai teke rente. A nai teke tyuku fu lei gi taawan’ (Ps. 15:5). Saide meke a psalm ya e taki fu moni? Bika efu u si moni enke a moo pelensipali sani, a sa poli wi anga taawan. A sa poli wi anga Yehofa tu (1 Tim. 6:10). Aini Beibel ten, a omen Islayelisama á be e libi bun anga den sama di be pooti. Te den be leni den wan moni, ala yuu den be e teke moo moni a den. Den kuutuman seefi be e teke tyuku, den á be e  kuutu den toli fu den pootiman anga leti. Ala den sani ya Yehofa e buuse.​—Eseik. 22:12.

18. Sowtu akisi o yeepi u fu luku efu we si moni enke a moo pelensipali sani? (Hebrewsama 13:5)

¹⁸ U mu e ondoosuku luku fa we si moni. Abun fu akisi useefi taki: ‘Na ala yuu mi e denki moni? Na ala yuu mi e wani fende moni fu bai sani? Te wan sama leni mi wan moni, mi e pai en baka? Efuso mi e si enke a sama di leni mi a moni naabi en fanowdu? Mi e si enke mi bun moo taawan te mi abi moni? Ai taanga gi mi fu yeepi den? Mi e si enke wan baala efuso sisa di abi tyaipi moni nai poti Yehofa na a fosi peesi aini en libi? Mi e poti den pootiman a wan se, da mi e paa anga den sama di abi moni?’ A pelensipali taki we akisi useefi den sani ya, bika Yehofa e gi wi a okasi fu de aini ageisi tenti fi en. Efu we soi taki u nai si moni enke a moo pelensipali sani, aw bigi gi u taki u fende a gaandi ya. Boiti dati, noiti Yehofa o gwe fika u!​—Leisi Hebrewsama 13:5.

YEHOFA LOBI DEN MATI FI EN

19. Saide Yehofa wani u du ala den sani di sikiifi aini Psalm 15?

¹⁹ Psalm 15 e kaba anga den wowtu: ‘Sani o waka bun anga den sama di e libi na a fasi ya’ (Ps. 15:5). A Psalm sikiifiman e soi u ya, saide u mu du ala den sani di Yehofa e taigi u. A wani u piisii. A wani u de koloku tu, neen meke ai leli u fu du sani di o tyai wini gi u. Te we du ala den sani ya, aw belesi u. Aw kibii u tu.​—Yes. 48:17.

20. Fa sani o waka gi den mati fu Yehofa aini a ten di e kon?

²⁰ Den mati fu Yehofa sa biibi taki ala sani o go bun aini a ten di e kon. Yesesi be taki den salafu Kelesten o tan ‘aini a osu’ fi en Dda di a seeka gi den a hemel (Yoh. 14:2). Den wan di abi a howpu fu libi fu teego a goontapu ya e angii fu si fa Openbaring 21:3 o kon tuu. A wan gaandi wi abi taki u poi toon Yehofa mati. We fii bun tuutuu taki u poi de aini a ageisi tenti fi en fu teego!