Efu u wani Yehofa piisii anga u, u mu biibi en. Ma tokuso a Beibel e taigi u taki ‘a ná ala sama e biibi’ (2 Tes. 3:2). Di apostel Pawlesi be e taki fu den ‘takuu ati, ogii ati sama’, a den sama di be e buuse en a be e taki. Ma a sani di a taki fu biibi, a wan tuu toli tu. A omen sama aini a ten ya nai biibi taki wan Gadu de di meke ala sani, winsi fa den e si kiin taki a sani ya a ná wan lei (Rom. 1:20). Son sama e biibi taki wan sama de di abi moo makiti efuso di hei moo den. Ma a biibi di wan sama e biibi a sani ya wawan, á sai fu Yehofa piisii anga en. A mu du moo enke dati.

U mu biibi taki Yehofa de. U mu holi a pakisei tu taki ai pai den sama di e du sani fu soi taki den biibi taanga (Heb. 11:6). Biibi a wan fu den manii di a yeye e meke sama kon abi. Efu we begi Yehofa ala yuu, aw gi wi en Santa yeye (Luk. 11:9, 10, 13). Wan fasi faw sa fende a santa yeye tu, a te we leisi Beibel. A sani de o yeepi u fu pakisei den sani di we leisi anga fu wooko anga san u leli. Yehofa poi yeepi u fu libi enke fa a wani. A poi yeepi u fuu biibi taanga tu. Efu we meke moiti fu du den sani ya, aw piisii anga u.