Mi meke a 22 december aini a yali 1929 aini Noville, dati a wan pikin kampu fu Nine, wan peesi pe den e kweki meti koosube fu Bastogne a België ardenes. Mi anga mi pikin baala Ramon be e meliki den kaw fu wi ala dei anga ana. Boiti dati u be e yeepi wooko goon tu. Winsi fa a kampu fuu be nyoni, tokuso ala u be e wooko makandaa fu yeepi useefi.

Nda Emile anga mi mma Alice kiya aini a Katholiek biibi. Ala sonde den be e gwa keliki. Aini a pisi ten fu 1939 wan tu pionili fu Ingiisikondee be kon na a kampu fu u. Den be gi Nda wan buku (Awake di u sabi nownow enke Ontwaakt!). Nda be fusutan wanten taki a disi na a waaleiti. A sani ya be meke a bigin leisi Beibel ala dei. Fu di Nda á be e go a den Katholiek keliki moo, meke den sama di be e tan koosube fu u be daai toon u feyanti. Den be e dwengi Nda fu tan go a den Katholiek komakandaa. Ná pikin taanga a be taanga gi en.

Mi be e tyali te mi be si fa den sama di be e tan koosube fu u be e libi ogii anga Nda. Neen meke mi begi gadu fu a yeepi en leti enke fa mi be taki kaba na a bigin. Ná pikin switi a be switi gi mi di den á be e libi ogii anga Nda moo. A sani ya meke mi biibi taki a Yehofa na ‘a sama di e aliki begi’.

Den suudati fu Doisilikondee booko kon aini België a 10 mei aini a yali 1940. A sani ya be meke omen sama lowe komoto aini a kondee. A osufamii fu u be lowe go naa  zuidse fu Faansikondee. Di u be de a pasi, u miti anga ogii. U be miti anga a feti fu Doisilikondee anga Faansikondee. Ná pikin sinpan a feti ya be sinpan.

Di u be daai go baka na a kampu fu wi a pe u be e kweki meti, u si taki den fufuu ala den sani fu u. Na a dagu fuu wawan too di den be e kai Bobbie den fika gi u. A sani ya meke mi akisi miseefi taki: ‘Saide feti anga oloku de?’

A ten de wan pionili baala den e kai Emile Schrantz a be e kon a wi a osu fu gi u taanga-sikin. A be taigi u kiin taki Beibel e soi saide so fuu ogii e pasa. A be piki den taa akisi di mi be abi fu a libi tu.

Fosi a oloku kaba, wi osufamii be e moo mosoo anga den taa baala anga sisa. Aini augustus 1943 Baala Jose-Nicolas Minet be kon holi wan lezing a wi a osu. A akisi u taki: ‘Sama wani dopu?’ Di a akisi a sani ya, nda anga mi omu opo den ana a tapu, miseefi opo mi ana tu. A so u dopu aini wan pikin liba di be de koosube fu pe u be e kweki meti.

Aini december 1944 den suudati fu Doisilikondee be e du ala san den man fu feti anga den taa kondee na a West se fu Europa. A pisiten de á be moin seefiseefi, bika a wan sani fu 1 mun langa u be abi fu de aini wi osu. Wan dei di mi go a doose fu go gi den meti nyanyan, neen a faya fu den raket di den be e sutu, kai kon na a daki fu den meti. Te fu kaba, a hii daki boon poli. Wan Ameekan suudati be de na a pisi de bali gi mi taki: ‘Kai paata’! Di a bali gim, mi lon neen mi didon a doti. Bakadati a poti a helm fi en a mi ede, fu a faya a boon mi.

Baka a feti, wi anga den baala anga sisa fu wan fu den kemeente aini Liège be de aini contact. A kemeente ya be de so wan 90 kilometer fu pe u be e tan. Aa teke langa neen u seeka wan pikin kulu aini Bastogne fu be sutudeli makandaa. Mi bigin wooko bakaten a wan belasting kantoo, neen mi fende  a okasi fu go a hei sikoo di e soi sowtu leti wi enke libisama abi. Te fu kaba, mi bigin wooko a wan lanti kantoo. Aini 1951, u holi wan pikin kelen komakandaa aini Bastogne, neen wan sani fu 100 sama kon. Wan fayafaya pionili sisa den e kai Elly Reuter be kon tu. A wan sani fu 50 kilometer a be rij anga baisigii fu kon doo ape. Mi be kon leli sabi a sisa ya moo bun, neen u paamisi makandii taki wo toow. Ma na a pisiten de, den baala be kai en fu go na a Gileyad sikoo na Ameekankondee. Elly sikiifi wan biifi gi den baala, neen a taigi den saide a naw poi go. Baala Knorr di be e teke fesi a ten de, sikiifi kon baka neen a taigi en taki a naa toobi, kande wan dei en anga a man fi en sa go makandii na a Gileyad sikoo enke toowpaa. Bakadati u toow aini februari 1953.

A seefi yali de mi anga Elly go na a kelen komakandaa di be holi a Yankee stadion aini New York. U be miti wan baala ape di be wani seeka wan bun wooko gi mi, neen a akisi u fu foloisi go tan na Ameekankondee. Ma baka di u begi Yehofa fu a toli, u soi a baala taki u naw poi go. Te fu kaba u daai go a België baka a den baala anga sisa na a pikin kulu di u be de aini Bastogne. A yali bakadati Yehofa gi u wan kado, u meke wan beibi. U kisi wan boi neen u kai en Serge, ma a tyali taki a be kon siki neen baka seibin mun, a lasi libi. Tyali kisi u te ye, neen meke na ala yuu u be e begi Yehofa. A ten de, na a opobaka howpu be e taanga u.

Aini oktober 1961 mi bigin pionili, bika mi be e du wan parttime wooko. A seefi dei de, den baala fu a beikantoo fu België telefon mi. Neen den akisi mi efu mi wani dini enke wan kelen-owluman. Mi akisi den taki: ‘Wa poi bigin pionili fosi da bakaten daw luku go na a kelen-wooko noh?’ Den taigi u taki a naabi toobi. Neen meke a baka di u bigin aitin mun fosi anga a pioniliwooko, neen u bigin du a kelen-wooko aini september 1962.

Baka di u du a kelen wooko tu yali langa, den akisi u fu go wooko a Betel a Brussel, neen u bigin aini oktober 1964. A omen belesi u fende di u bigin anga a wooko ya. Baka di baala Knorr kon luku a Betel famii aini 1965, a poti mi enke wan fu den baala di e teke fesi na a beikantoo. Mi foondoo di mi fende a faantiwowtu ya. Wan fu den belesi di u fende tu, na a 41 Gileyad sikoo di mi anga Elly be poi go. A sani di baala Knorr be taki kon tuu baka 13 yali. Di u kaba anga a sikoo ya, neen u daai go baka a Betel a België.

Den yali di pasa mi be fende a okasi fu opo taki gi den leti di wi enke a foluku fu Yehofa abi aini Europa anga omen taa peesi, bika mi go a sikoo gi den sowtu sani ya (Filip. 1:7). Fu di mi be e du a sani ya, meke mi  be kon sabi moo enke 55 kuutubakaa fu omen kondee pe lanti be tapu a wooko fu u. Te mi be e taki anga den sama ya, mia be e soi den fa mi sabi den weiti kisi, ma mi be e meke den sabi taki mi a ‘wan man di e dini Gadu’. Ala yuu mi be e holi a pakisei taki ‘a ati fu wan kownu de enke wan liba aini Yehofa ana. Neen na a sama di e tyai en go a pe a wani.’—Odo 21:1.

Mi sabi ete wan leisi mi be taki anga wan man fu a Europese Parlement. A omen leisi mi be e suku okasi fu go taki anga en, te fu kaba mi miti en. Di mi miti a man ya, a taigi mi taki: ‘A feifi miniti namo yu abi, ná moo enke dati’. Di a taki a sani ya, mi bendi mi ede sii, neen mi bigin begi. Di mi bendi mi ede, a akisi mi san mi e du. Neen mi taigi en taki: ‘Mi e gi Gadu daa, bika yu a wan fu den sama di e wooko gi en.’ Neen a taigi mi taki: ‘Mi a kaba fusutan sai taki.’ Neen mi soi en Romesama 13:4, bika en a wan man di be e lesipeki a Beibel. Baka dati, a wan sani fu 30 miniti u taki. A taigi mi tu taki ai lesipeki a wooko di wi enke Yehofa Kotoigi e du.

Den yali di pasa, a omen toli fu wi enke Kotoigi go a kuutu aini Europa. Toli di e soi taki u nai teke se aini politiki anga omen taa toli ete. Ná pikin bigi ai bigi gi mi taki mi be poi yeepi anga so wan fu den kuutu ya anga fu si fa Yehofa yeepi u fu wini omen fu den toli ya tu. Te anga a dei fu tide a moo enke 140 kuutu u wini na a Kuutu osu fu Europa di e holibaka gi den leti di libisama abi!

A mi anga baala Philip Brumley anga Valter Farnet fu a ede kantoo be e wooko makandaa na a pisiten fu 1990. U be e du a sani ya fu feti gi a leti fu den baala anga sisa fu wi a Cuba fu be man dini Yehofa moo bun. Mi be sikiifi wan biifi go na a Ambasade fu Cuba aini België. Baka dati u taki anga wan kuutuman fu be yeepi wi anga a toli. A fosi leisi di u taki anga den wa be poi soi den finifini ete saide lanti be tapu a wooko fu den baala anga sisa fu u.

Baka di u begi Yehofa, lanti be gi u piimisi fu sende 5000 Beibel go a Cuba. Di den Beibel doo, u be poi si kiin taki Yehofa holibaka gi u. Baka dati den gi u piimisi fu sende ete 27.500 Beibel go a Cuba. Ná pikin piisii mi piisii taki mi be poi yeepi den baala anga sisa fu fende wan Beibel.

A omen leisi mi go a Cuba fu go holibaka gi den baala anga sisa te a abi fu du anga son  toli fu u di go a kuutu. A sani ya meke mi kon sabi omen fu den kuutubakaa.

Aini 1994, a moo enke wan miliyun sama fu a Tutsi lo lasi den libi a wan ogii ati fasi aini Rwanda. A tyali taki a omen baala anga sisa fu u lasi den libi tu. Baka di a sani ya pasa den akisi wantu baala anga sisa fu holibaka gi den Kotoigi anda.

Di den baala anga sisa doo na a mama foto di den e kai Kigali, den si taki den ogii-ati man sutu a vertaal kantoo fu wi anga goni. A omen olo be de fu si neen. U yee taki a omen baala anga sisa fuu den koti anga how kii. Ma winsi fa ala den sani ya be e pasa tokuso den baala anga sisa be e soi taki den lobi denseefi. U be miti wan Tutsi baala di wantu Hutu baala anga sisa be kibii aini wan olo 28 dei langa fu ogii á miti en. Wan leisi di u holi komakandaa a Kigali, a moo enke 900 baala anga sisa u be poi gi taanga-sikin.

Di u doo Zaire (di u sabi nownow enke a Republiek fu Kongo) u go suku den baala anga sisa di be lowe go a den loweman kampu koosube fu a foto Goma. Ma fu di wa be poi fende nawan fu den, meke u begi Yehofa fu a yeepi u, fu u be sa doo a den. Te fu kaba, u si wan sama e waka kon a wi, neen wi akisi en efu a sabi den Yehofa Kotoigi. Neen a taigi u taki: ‘Mi a wan Yehofa Kotoigi.’ Mi sa tyai u go a den baala di e yeepi u te wan gaan ogii pasa. Di u go a den baala ya, den tyai u go miti sowan 1600 baala anga sisa neen u gi den taanga-sikin. U leisi wan biifi gi den tu fu den baala di be e tii a wooko. Den fii bun te ye di den yee san be sikiifi aini a biifi. Den baala be sikiifi gi den taki: ‘Ala yuu we begi gi u. U sabi taki noiti Yehofa o gwe fika u’. We a sani ya tuu, bika nownow a moo enke 30.000 Kotoigi e dini Yehofa fayafaya aini Rwanda.

Baka di u toow 58 yali, neen Elly lasi libi aini 2011. Winsi fa mi be e fii booko-saka tokuso mi si fa Yehofa yeepi mi. A peleiki di mi be e peleiki gi den sama na a pisi pe mi be e tan yeepi mi tu fu mia lasi ati.

Nownow mi pasa 90 yali kaba, ma tokuso mi e meke moiti fu go ala wiki aini a peleikiwooko. Mi e holibaka gi den baala tu na a beikantoo, solanga den abi mi yeepi fanowdu anga den toli fu u di mu go a kuutu. Mi e poti pakisei tu a den yonkuuwan fu wi a Betel ya di abi taanga-sikin fanowdu.

A wan sani fu 84 yali pasa di mi begi Yehofa a fosi leisi. Fanafu a ten de, mi anga en toon moo bun mati. Ná pikin bigi ai bigi gi mi taki Yehofa aliki den begi fu mi.​—Ps. 66:19. b