1-2. Sowtu kai Yehofa e gi den sama di e dini en anga den hii ati?

 SAI be o taki, efu wan sama be akisi i taki: Fa ye si Yehofa? We kande i be o taki: ‘Yehofa, a mi Dda, mi Gadu anga mi mati.’ Ma taa fasi de tu, faw sa si Yehofa. Pakisei a wan ya: Ye si Yehofa enke a sama di e kai i fu kon neen osu?

² Kownu David be taki, wan sama di e kai taawan kon neen osu, lobi den sama di ai kai. We na aseefi fasi Yehofa lobi den sama di e dini en anga den hii ati. David be akisi ‘Yehofa, sama sa kon aini i tenti? Sama sa tan na a santa mongo fi i?’ (Ps. 15:1) A sani di sikiifi aini a tekisi ya e soi taki Yehofa wani u kon neen​—ai kai u fu toon en mati. Disi a tuutuu wan moin gaandi di wi enke libisama abi.

YEHOFA WANI U KON NEEN

3. Sama na a fosi sama di Yehofa be kai kon aini en tenti? Fa en anga a sama ya be fii?

³ Fosi Yehofa bigin meke sani, neen wawan too be de. Ma baka wan pisiten, neen a bali wadaa gi en Manpikin na a tenti fi en. Ná pikin switi a switi gi Yehofa taki a be poi du a sani ya. A Beibel e taigi u taki Yehofa be ‘lobi en manpikin tuutuu’. Ma na a taa se, en Manpikin seefi be piisii taki a be poi de neen Dda se​—Odo 8:30.

4. Sama a wantu taa sama di Yehofa be kai kon aini en tenti?

⁴ Yehofa be meke engel tu, neen a kai den kon aini en tenti. Den e kai den engel ya ‘manpikin fu Gadu’.  Denseefi e piisii tu fu de makandaa anga Yehofa (Yopu 38:7; Dan. 7:10). Wan hii pisiten, a hemel wawan den mati fu Yehofa be de. Ma bakaten a kon abi mati a goontapu ya tu. Wantu fu den sama ya, a be Heinok, Nowa, Abalaham anga Yopu. Den sama ya be e dini en anga den hii ati. Beibel e kai den, Gadu mati efuso sama di be e ‘waka anga a tuu Gadu’​—Gen. 5:24; 6:9; Yopu 29:4; Yes. 41:8.

5. Saw sa leli fu a polofeititoli di sikiifi a Eseikiyeli 37:26, 27?

⁵ Aini den ondoo yali di pasa, Yehofa tan kai den mati fi en fu kon neen tenti (Leisi Eseikiyeli 37:26, 27.). Aini a polofeititoli fu Eseikiyeli we leli taki Yehofa wani den sama di e dini en anga den hii ati kon moo koosube neen. A paamisi den taki aw meke ‘wan kuudei fu freide’ anga den. A polofeititoli e soi go a wan pisiten pe den wan di o tii a hemel anga den wan di abi howpu fu libi a goontapu ya o de makandii enke ‘wan kulu’ na a tenti fu Yehofa (Yoh. 10:16). A nownow ya a sani de e pasa!

GADU E BOOKO EN EDE ANGA U WINSI PE U DE

6. On pe a tenti fu Yehofa de? Fa wan sama sa kon aini a tenti ya?

⁶ Aini Beibel ten, a tenti fu wan sama be de wan peesi pe a be sa teke boo, efuso kibii gi sani enke alen anga san. Te wan sama be kai wan taawan kon neen tenti, da a be e solugu en. Wan fasi fa Yehofa e bigin kai u kon aini a tenti fi en, a te u paamisi en taki wo libi enke fa a wani da u dopu (Ps. 61:4). We fende den moin leli di Yehofa e gi u, ma boiti dati wi abi den baala anga sisa di de enke mati gi u, bika den seefi de aini a tenti fu Yehofa. A tenti fu Yehofa á de a wan peesi namo. Efii go a wan konkelesi a taa kondee yo miti sama na anda di e piisii fu de aini a tenti fu Yehofa. A tenti ya de fu fende na ala pe den anbegiman fu Yehofa de.​—Openb. 21:3.

7. Saide u sa taki den sama di dede, ma di be e dini Yehofa anga den hii ati de aini a tenti fi en ete? (Luku a fowtow tu)

⁷ Ma fa fu den sama di be e dini Yehofa anga den hii ati, ma di dede kaba? U sa taki den de aini a tenti fu Yehofa ete? Eeye! Saide u sa taki a sani ya?  Bika noiti Yehofa e feegete den. Yesesi be taki: ‘Aini a toli fu a makabusi, Mosesi seefi be soi kiin taki dedesama o weki baka, di a kai Yehofa “a Gadu fu Abalaham, a Gadu fu Isaki, anga a Gadu fu Yakopu”. En a ná a Gadu fu den dedesama, ma a Gadu fu den sama di de a libi, bika gi en ala den de a libi ete’​—Luk. 20:37, 38.

DEN WINI DI WE FENDE ANGA SAW MU DU FU YEHOFA KAI U KON NEEN TENTI

8. Sowtu wini den sama di de aini a tenti fu Yehofa e fende?

⁸ Leti enke fa wan tuutuu tenti efuso masanga e kibii u gi sani enke a san anga alen, a so a tenti fu Yehofa e kibii u gi sani di sa meke wi anga en á de mati moo. Wan taa sani di moin, a taki a tenti fi en e yeepi u fu abi tuutuu howpu gi a ten di e kon, neen meke efu u tan neen se nownow Saatan naw poi du ogii anga u (Ps. 31:23; 1 Yoh. 3:8). Aini a ten di e kon, Yehofa o yeepi den sama di e dini en fu den biibi taanga. Aw kibii den tu, fu den á lasi den libi.​—Openb. 21:4.

9. Fa Yehofa wani taki den sama di de aini a tenti fi en tyai denseefi?

⁹ A wan gaandi wi abi fu man de aini a tenti fu Yehofa​—bika a sani ya e yeepi fu toon en mati. Ma saw mu du efu wa wani komoto aini a tenti fi en? Pakisei a sani ya: Te wan sama kai i kon neen osu, a bun fii sabi san a wantu sani di a sama lobi anga san aa lobi. Efu kande a akisi i fii puu i susu fosi i go aini a osu, i naw daaidaai, bika neen osu i go. We, a letiso useefi wani meke moiti fu kon sabi san Yehofa wani u du, te u de aini en tenti. Fu di u lobi en, meke wo meke ala moiti fu du sani di o meke a ‘piisii’ (Kol. 1:10). Boiti taki we si Yehofa enke u mati, u mu holi a pakisei tu taki u mu du sani di e soi taki we lesipeki en enke u Dda di de a hemel (Ps. 25:14). U mu taigi sama ala yuu, sowtu bun sani ai du gi u. U mu e tan poti pakisei neen tu. Efu we meke moiti fu ‘abi sakafasi’, a sani de o yeepi u fu du san Yehofa lobi.​—Mika 6:8.

YEHOFA NAI PAATIBEE

10-11. Saw sa taki fu a fasi fa Yehofa be libi anga den Islayelisama aini Sinai Sabana?

¹⁰ Yehofa nai paatibee anga den sama di de aini a tenti fi en (Rom. 2:11). Wo sabi moo fu a toli ya te u luku fa a be libi anga den Islayelisama di den be de aini Sinai Sabana.

¹¹ Baka di Yehofa fii a foluku fi en puu a katibo a Egepte, a poti pilisite fu wooko na a tabernakel. A den Leifisama be fende a gaandi fu du a wooko ya. I si enke Yehofa be e moo libi bun anga den pilisite efuso den sama di be e tan koosube fu a tabernakel? Kwetikweti! Yehofa nai paatibee.

12. Fa Yehofa soi taki a nai paatibee? (Ekisodesi 40:38) (Luku a fowtow tu.)

¹² A naabi toobi sowtu wooko wan Islayelisama be e du gi Yehofa efuso pe a be e tan, iniiwan sama be e fende a okasi fu toon en mati. A be seeka sani gi den taki a hii foluku, be poi si a woluku anga a gaan ponsu faya di be de na a tabernakel tapu. (Leisi Ekisodesi 40:38.) Te a woluku be e bigin wai go a wan taa se, ala sama be poi si en, winsi a wan Islayelisama di be de te a faawe.  A so den be e booko den pikin masanga fu den, da den be e go makandii anga ala den taa sama a pe a woluku be e tyai den go (Num. 9:15-23). Ala sama be poi yee te den bee boo den tu gaan solufu tutu, di be e soi den taki a foluku o bigin waka (Num. 10:2). A ná te wan sama be e tan koosube fu a tabernakel da dati wani taki Yehofa be lobi en moo den taawan. Ala sama be sa kon aini a tenti fi en. Den be sa biibi taki aw kibii den efuso holibaka gi den. A letiso a de aini a ten ya tu, taki a naabi toobi pe we tan te we dini Yehofa. U sa biibi taki aw de anga u, winsi sai pasa.

WANTU SANI AINI A TEN YA, DI E SOI TAKI YEHOFA NAI PAATIBEE

13. Sowtu sani e soi taki Yehofa nai paatibee aini a ten ya?

¹³ A omen baala anga sisa fu u e tan koosube fu a edekantoo a taa kondee. Taawan baka e tan efuso wooko a wan fu den beikantoo fu wi enke Yehofa Kotoigi. Te den de a den peesi ya, den poi du omen sowtu sani, den e fende a okasi tu fu de makandaa anga den baala di e teke fesi a den peesi ya. A omen Kotoigi e du a kelen-wooko efuso a fuuten diniwooko. Ma kande ye denki taki: ‘Mi a wan hii taa peesi mi e tan, a wan taa sowtu wooko mi e du gi Yehofa’. We efu dati de so, a bun fu holi a pakisei taki Yehofa lobi ala den sama di e wooko gi en. Ai booko en ede anga ala den fiya (1 Peit. 5:7). Yehofa e poti pakisei na ala den sama di e dini en anga den hii ati, ai kibii den, ai gi den san den abi fanowdu tu.

14. San a wan taa sani di e soi taki Yehofa nai paatibee?

¹⁴ Wan taa sani di e soi taki Yehofa nai paatibee, na a seeka di ai seeka  sani taki sama na ala se fu goontapu sa fende a Beibel leisi. Di Gadu meke sama bigin sikiifi den Santa buku fu Beibel, aini 3 tongo namo i be sa fende den leisi. I be sa fende den aini Hebrew, Arameisi anga Giikitongo. Ma i si enke a den sama di poi leisi efuso fusutan den tongo ya wawan poi toon Yehofa mati tuutuu? Nono.​—Mat. 11:25.

15. Sowtu sani e soi u kiin taki Gadu nai paatibee? (Luku a fowtow.)

¹⁵ Yehofa nai luku sowtu sikoo u go efuso omen sowtu tongo u poi taki fosi ai teke wi enke en mati. Ma a de kabakaba fu gi ala sama a koni fi en, winsi a wan sama di go a sikoo efuso di á go nawan dei. En wowtu Beibel de fu fende aini moo enke wan dunsu tongo. A sani ya e meke sama na ala se fu goontapu poi kon sabi san a wani leli den anga fa den sa toon en mati.​—2 Tim. 3:16, 17.

DU ALA SAI POI FU TAN AINI A TENTI FU YEHOFA

16. Enke fa Toli 10:34, 35 e taki, da saw yeepi u fu tan aini a tenti fu Yehofa?

¹⁶ A wan gaandi wi abi taki Yehofa e kai u kon na a tenti fi en. Ai booko en ede anga u, a lobi u moo iniiwan taa sama di be sa kai u kon a den osu. Boiti dati, a nai paatibee. Ai bali wadaa gi ala sowtu sama winsi pe den e tan, fa den kiya, sowtu kondee den komoto, omen yali den abi anga winsi den a manengee efuso umanpikin. A sani di ai luku a efu den sama ya de kabakaba fu aliki en.​—Leisi Toli fu den apostel 10:34, 35.

17. Pe u sa fende moo sani di e soi u, saw mu du fu Yehofa teke wi aini en tenti?

¹⁷ Aini Psalm 15:1, David e akisi taki: ‘Yehofa, sama sa kon aini i tenti? Sama sa tan na a santa mongo fi i?’ Bakaten, Yehofa be meke David piki a akisi ya anga yeepi fu a santa yeye. Aini a taa artikel di e kon, wo luku saw mu du efu u wani wi anga Yehofa tan mati.