1, 2. (a) San na a gaan bun di Yehofa du gi u? (b) Sowtu akisi wi o luku aini a artikel ya?

YEHOFA soi u taki a lobi u di a du wi wan gaan bun. A bun de, na a sende di a sende en Manpikin kon a goontapu! (Yohanisi 3:16; 1 Yohanisi 4:9, 10). A apostel Pawlesi taki „a du u wan gaan bun” (2 Korentesama 9:15). Saide Pawlesi taki a sani ya?

² Pawlesi be sabi taki na a dede di Yesesi kon dede gi u, meke ala den sani di Gadu paamisi u, o kon tuu. (Leisi 2 Korentesama 1:20.) A sani ya e soi taki „a gaan bun” di Gadu du gi u, na a dede fu Yesesi anga ala den bun sani di Gadu e du gi u. Noiti wi o kaba fusutan a gaan bun di Gadu du gi u. Fa i mu fii te yu e denki a sani di Gadu du gi u? Fa a bun di a du gi u, o gi u taanga-sikin fu teke seeka gi a Membeefesa di o holi diidewooko, 23 maart 2016?

3, 4. (a) Fa yu e fii te wan sama gi i wan kado? (b) Fa wan gaan sani di wan sama du gi i, sa kengi i libi?

³ Wi e piisii te wan sama gi u wan kado. Son wan fu den kado pelensipali, bika den e kengi u hii libi. Kon u taki i du wan gaan ogii, neen den leisi dede sitaafu gi i. Neen wan sama di yu á sabi kon taigi i taki a o teke a sitaafu fi i. A de kabakaba fu dede gi i! Fa a sani ya o meke i fii?

⁴ Kande a sani di a sama du gi i o meke i kengi i libi. A o gi i taanga-sikin tu fu du sani gi taawan efuso soi den taki i lobi den. Kande a o meke i gi den sama paadon di du wan hati sani anga i. I hii libi yu o wani soi taki ai bigi gi i taki wan taa sama kon dede gi i.

5. Saide a dede fu Yesesi bigi moo iniiwan taa sani di wan taa sama be sa du gi u?

⁵ A dede di Gadu meke Yesesi kon dede gi u, bigi moo a dede di wan taa sama be sa dede gi u (1 Peitilisi 3:18). Pakisei a sani ya: Ala u kisi a sondu fu Adan, neen meke ala wi e dede (Romesama 5:12). A di Yehofa lobi u meke a sende Yesesi kon a goontapu fu dede gi ala sama (Hebrewsama 2:9). Ma a dede fu Yesesi, o tyai moo wini gi u! A o puu dede fu teego (Yesaya 25:7, 8; 1 Korentesama 15:22, 26). Ala den sama di e biibi taki a dede fu Yesesi o tyai wini gi den, o abi wan bun libi fu teego aini a ten di e kon. Son wan fu den sama ya o tii enke Kownu a hemel anga Yesesi. Taawan o libi a goontapu ya (Romesama 6:23; Openbaring 5:9, 10). Sowtu taa wini wi e fende fu di Yehofa meke Yesesi kon dede gi u?

6. (a) Sowtu wan fu den bun sani di Gadu o du gi libisama, yu e angii fu si? (b) San a den dii sani di wi o wani du fu di Yehofa du wi wan gaan bun?

⁶ Wantu taa wini di wi o fende fu a dede di Yesesi kon dede gi u, a taki goontapu o toon wan paladeisi, den sama di siki o betee, anga den sama di dede o weki baka (Yesaya 33:24; 35:5, 6; Yohanisi 5:28, 29). U lobi Yehofa anga Yesesi, bika den du wi wan gaan bun. San wi o wani du fu di Yehofa du wi a bun ya? Wi o wani (1) waka soifili a Yesesi baka, (2) lobi u baala anga sisa, anga (3) gi taawan paadon anga u hii ati.

7, 8. Fa u mu si a lobi di Kelestesi lobi u? San wi o wani du te u teke a lobi di Kelestesi lobi u fu bigi?

⁷ U hii libi u mu wani gi Yesesi gaandi. A apostel Pawlesi be taki: „A lobi di Kelestesi lobi u, e bigi gi u.” (Leisi 2 Korentesama 5:14, 15.) Pawlesi be sabi taki efu u teke a lobi di Yesesi lobi u fu bigi, a sani de o gi u taanga-sikin fu lobi Yesesi efuso fu gi en gaandi. Efu u fusutan bun san Yehofa du gi u, da a lobi di a lobi u, o meke wi o wani libi wan libi di e gi Yesesi gaandi. Fa wi o du a sani ya?

⁸ Efu u lobi Yehofa, wi o wani waka soifili a Yesesi baka (1 Peitilisi 2:21; 1 Yohanisi 2:6). Wi e soi Gadu anga Kelestesi taki u lobi den te wi e aliki den. Yesesi taki: „A te wan sama sabi den weiti fu mi, te ai du san a weiti taki, da a lobi mi. Nda o lobi a sama di lobi mi, mi o lobi en tu. Mi o meke a sabi mi.”​—Yohanisi 14:21; 1 Yohanisi 5:3.

9. San wi o wani du efu wi á luku bun?

 ⁹ Na a ten fu a Membeefesa a bun fu sidon pakisei san wi e du anga u libi. Akisi iseefi a sani ya: ’San a den sani di mi e du nownow fu waka a Yesesi baka? San mi sa du moo bun fu waka neen baka?’ A bun fu akisi useefi den sani ya, bika den sama fu a goontapu wani u libi enke fa den e libi (Romesama 12:2). Efu wi á luku bun, wi o wani libi enke den koniman fu a goontapu efuso den sama di abi balinen (Kolosesama 2:8; 1 Yohanisi 2:15-17). San o yeepi u fu wi á de enke den?

10. San u mu akisi useefi na a ten fu a Membeefesa? Sowtu taanga-sikin wi o fende te u sabi a piki fu den akisi ya (Luku a fowtow na a bigin.)

¹⁰ A ten fu a Membeefesa, a be o bun fu sidon pakisei den koosi di wi e wei, den felon di wi e luku anga den poku di wi e aliki. Boiti dati, u mu luku san de a wi computer, u telefon efuso tablet. Akisi iseefi: ’Sen be o kisi mi efu Yesesi be de ya e si san mi wei?’ (Leisi 1 Timotiyesi 2:9, 10.) ’Den koosi di mi e wei e soi taki mi a wan bakaman fu Yesesi? Yesesi be o lobi den felon di mi e luku? A be o aliki den poku di mi e aliki? Sen be o kisi mi efu Yesesi be o si den sani di de a mi telefon efuso tablet? A be o taanga gi mi fu taigi Yesesi saide mi lobi pee den game di mi e pee?’ Efu u lobi Yehofa, wi o towe ala den sani di á fiti wan Kelesten, winsi a dii sani (Toli 19:19, 20). A paamisi di u paamisi Yehofa taki wi o libi enke fa a wani, wani taki a fasi fa wi o libi mu gi Yesesi gaandi. Neen meke wi á mu abi nawan sani di o meke a taanga gi u fu waka soifili a Yesesi baka.​—Mateyesi 5:29, 30; Filipisama 4:8.

11. (a) Fa wi o du a peleikiwooko te u lobi Yehofa anga Yesesi? (b) San wi o wani du gi taawan aini a kemeente te u lobi Yehofa anga Yesesi?

¹¹ A lobi di u lobi Yesesi e meke u du ala san u man fu peleiki gi sama. Ai meke u leli sama den sani di sikiifi aini a Beibel (Mateyesi 28:19, 20; Lukasi 4:43). I poi seeka sani na a ten fu a Membeefesa fu go aini a yeepi pionili wooko? I sa peleiki 30 efuso 50 yuu a ten de. Wan baala fu 84 yali di uman dede, be denki taki a ná o poi pionili, bika a gaandi. En gusontu á be bun tu. Ma den pionili na a pisi pe ai tan be wani yeepi en. Den be e kon teke en e tyai go a peleikiwooko. Den be suku wan peesi tu di be bun gi en fu peleiki. A sani de yeepi a baala fu doo den 30 yuu. I poi yeepi wan sama aini i kemeente fu du a yeepi-pioniliwooko aini maart efuso april? A tuu taki a ná ala sama poi pionili, ma u sa meke moiti fu du moo gi Yehofa aini a peleikiwooko. Te u du so, da wi e soi taki a lobi di Yesesi lobi u e bigi gi u, leti enke Pawlesi. Sowtu taa sani wi o wani du fu di Gadu lobi u?

12. San wi o wani du fu di Gadu lobi u?

¹² Fu di Gadu lobi u, meke u mu lobi u baala anga sisa tu. A apostel Yohanisi be sikiifi taki: „Den sama di mi lobi, efu a so Gadu lobi u, da u musu fu lobi useefi tu” (1 Yohanisi 4:7-11). Neen meke Gadu ná o poi lobi u efu wi á lobi u baala anga sisa (1 Yohanisi 3:16). Fa u sa soi den taki u lobi den?

13. Fa Yesesi be e soi taawan taki a lobi den?

 ¹³ Te u waka a Yesesi baka, wi o sabi fa u mu soi taawan taki u lobi den. Di a be de a goontapu, a be e yeepi sama, moomoo den sama di abi sakafasi. A be e deesi sama di siki, sama di lan, sama di beendi, sama di dofu anga babawman (Mateyesi 11:4, 5). Yesesi á be de enke den keliki fesiman, bika anga piisii a be e yeepi sama fu sabi Gadu (Yohanisi 7:49). A be lobi den sama de, bika den be abi sakafasi. Neen meke a be e du ala san a poi fu yeepi den.​—Mateyesi 20:28.

14. San i sa du fu soi i baala anga sisa taki i lobi den?

¹⁴ A ten fu a Membeefesa a wan bun ten fu sidon pakisei fa i sa yeepi den baala anga sisa aini a kemeente, moomoo den gaandiwan. Kande i sa go luku den, boli wan sani tyai gi den efuso yeepi den anga pikinpikin wooko a den osu. Kande i sa go teke den fu tyai go a komakandaa, efuso akisi den fu wooko anga i aini a peleikiwooko. (Leisi Lukasi 14:12-14.) Meke a lobi di Gadu lobi i, gi i taanga-sikin fu soi i baala anga sisa taki i lobi den!

15. San u mu holi a pakisei?

¹⁵ A lobi di Yehofa lobi u, e gi u taanga-sikin tu fu gi u baala anga sisa paadon. Ala u kisi a sondu fu Adan anga Efa, neen meke nawan sama á poi taki:„Mi ná abi a ofaandi fu Yesesi fanowdu.” Den sama seefi di e dini Gadu anga den hii ati abi a ofaandi ya fanowdu. A wan gaan bun Yehofa anga Yesesi du gi u, bika a dede fu Yesesi meke Yehofa sa gi u paadon fu sondu! Saide a de taanga fanowdu fu holi a sani ya a pakisei? Wi e fende a piki aini wan fu den ageisitoli fu Yesesi.

16, 17. (a) San a ageisitoli di Yesesi be gi fu a kownu anga a saafu e leli u? (b) San i wani du di i sidon pakisei a ageisitoli fu Yesesi?

¹⁶ Yesesi be gi wan ageisitoli fu wan saafu di be mu pai wan kownu wan gaan moni. A be mu pai en 60.000.000 solufu moni. Ma a kownu taigi en taki a á de fu a gi en a moni moo. Bakaten, a saafu ya á be wani gi wan taa saafu paadon. A be de neen baka namonamo fu a gi en a 100 solufu moni di a be mu pai en. Efu a saafu ya be pakisei fa a kownu be gi en paadon, da enseefi be o gi a saafu paadon di be mu pai en 100 solufu moni. A kownu ati boon di a yee taki a so a saafu du. A taigi en taki: „Yu ogii-ati saafu yu! Mi á meke i pai mi a gaan moni di i be mu pai mi, fu di i begi mi. Neen saide yu á soi tyali-ati gi a taa saafu, enke fa mi soi tyali-ati gi i?” (Mateyesi 18:23-35) Leti enke fa a kownu gi a saafu paadon, a so Yehofa gi u paadon  tu. San u mu du fu di Yehofa soi lobi anga tyali-ati gi u?

¹⁷ Te wi e seeka gi a Membeefesa, u mu akisi useefi taki: ’Wan baala efuso wan sisa du wan hati sani anga mi? A taanga gi mi fu gi en paadon?’ Efu a taanga gi u, da a bun fu waka a Yehofa baka, bika a „de kabakaba fu gi sama paadon” (Nehemiya 9:17; Psalm 86:5). Efu wi e teke en fu bigi taki Yehofa e gi u paadon, wi o gi taawan paadon tu anga u hii ati. Efu wi á lobi taawan, efuso u nai gi den paadon, wi á mu denki taki Yehofa o lobi u. Wi á mu denki taki a o gi u paadon tu (Mateyesi 6:14, 15). Te wi e gi sama paadon, a ná si wi e si enke a sani di a sama du anga u ná hati u. Ma wi o fii moo bun te u gi en paadon.

18. Fa a lobi fu Yehofa yeepi wan sisa fu a á luku den fowtu di wan taa sisa be e meke?

¹⁸ Son leisi ai taanga fu wi á luku den fowtu fu u baala anga sisa. (Leisi Efeisesama 4:32; Kolosesama 3:13, 14.) A sani ya be taanga gi wan sisa di den e kai Lily. ^[1] (Luku a pisi ete wan pelensipali sani.) A be e yeepi wan uman di den e kai Carol. Carol man be dede kaba. Te Carol be wani go a wan peesi, Lily be de kabakaba fu tyai en go. A be e go a wenkii gi en. A be e yeepi en anga omen taa sani tu. Ma anga ala fa Lily be e yeepi en, ala yuu Carol be e kuutu. Neen meke a be e taanga gi en fu yeepi en son leisi. Ma Lily be e poti pakisei a den bun manii fu Carol. Neen meke a be yeepi en omen yali. Di a siki seefi a yeepi en te enke a dede. Winsi fa a be taanga fu yeepi Carol, tokuso Lily taki: „Mi e angii fu si Carol te a o weki baka. Mi wani si en te a ná o abi nawan fowtu moo.” A sani ya e soi kiin taki a lobi di Yehofa lobi u, e gi u taanga-sikin fu wi á luku den fowtu di den baala anga sisa e meke. Ai yeepi u fu pakisei a ten te nawan sama o abi sondu moo.

19. San i wani du te i pakisei a gaan bun di Gadu du gi u?

¹⁹ Yehofa du wi „wan gaan bun”. A sani di a du mu e bigi gi u! A ten fu a Membeefesa a wan bun ten fu sidon pakisei ala den sani di Yehofa anga Yesesi du gi u. A lobi di den lobi u, mu gi u taanga-sikin fu waka soifili a Yesesi baka. A mu gi u taanga-sikin tu fu lobi u baala anga sisa, efuso fu gi den paadon anga u hii ati.