1, 2. (a) San Yehofa be taki fu a ten ya? (b) Sowtu akisi wi o luku aini a artikel ya? (Luku a fowtow na bigin.)

YEHOFA be taki, aini a ten ya „tin man fu ala sowtu nasi di e taki ala sowtu tongo, o kisi a impi fu wan Dyu holi, da den o taki: ’U wani go anga u, bika u yee taki Gadu de anga u’” (Sakaliya 8:23). A „Dyu” aini a tekisi ya e soi go a den sama di Gadu salufu anga en santa yeye. Son leisi den e kai den „a Islayeli fu Gadu” (Galasiyasama 6:16). Den „tin man”, a den sama di o libi fu teego a goontapu. Den sabi taki Yehofa e holibaka gi den salufu Kelesten. Ai bigi gi den taki den poi dini Yehofa makandaa anga den salufu Kelesten.

² Leti enke a polofeiti Sakaliya, Yesesi be soi fa a foluku fu Gadu be o libi na a wan. Yesesi be kai den sama di o go a hemel a „pikin kulu”. A be kai den sama di o libi fu teego a goontapu den „taa sikapu”. Ma ala den tu kulu be o de enke wan kulu. Den be o waka a Yesesi baka, a „wan kodo sikapuman” fu den (Lukasi 12:32; Yohanisi 10:16). Fu di tu kulu de, meke kande son sama e akisi denseefi taki: (1) Den taa sikapu mu sabi ala den nen fu den salufu  Kelesten? (2) Fa den salufu Kelesten mu e si denseefi? (3) Fa mi mu si den sama aini mi kemeente di bigin nyan a beele efuso diingi a win na a Membeefesa? (4) Mi mu booko mi ede te mi si taki den sama di e nyan a beele efuso e diingi a win na a Membeefesa e kon moo ipi? A artikel ya o taki fu den akisi ya.

3. Saide meke wi á poi sabi pilisisi sama a den 144.000 Kelesten di o go a hemel?

³ A de fanowdu fu sabi a nen fu ala den salufu Kelesten fu a ten ya? Nono. Fu saide? Efu Gadu kai wan sama fu go a hemel, da a sani de á wani taki a o go a hemel winsi san e pasa. ^[1] (Luku a pisi ete wantu pelensipali sani.) Winsi fa Gadu kai den fu go a hemel, efu den á holidoo, den ná o fende a paiman di Gadu paamisi den. Saatan sabi a sani ya, neen meke ai meke moiti fu „koli” den salufu Kelesten. Ai koboloiki „falisi polofeiti” fu du a sani ya (Mateyesi 24:24). Te Yehofa si taki den salufu Kelesten holidoo, da ai gi den a kiiboi maiki fu soi den taki den fiti fu go a hemel. A o gi den a kiiboi maiki fosi den dede efuso fosi a „gaan banowtu” bigin.​—Openbaring 2:10; 7:3, 14.

4. Fa wi o man „go anga” den salufu Kelesten aini a ten ya efu wi a sabi den nen?

⁴ Fa wi o man „go anga” den salufu Kelesten aini a ten ya efu wi a sabi den nen? Beibel taki tin man be „o kisi a impi fu wan Dyu holi, da den o taki: ’U wani go anga u, bika u yee taki Gadu de anga u.’” A Dyu aini a tekisi e soi go na ala den salufu Kelesten. Den taa sikapu e fusutan a sani ya, neen meke den anga den salufu Kelesten e dini Yehofa makandii. A á de fanowdu fu den sabi a nen fu ala den salufu Kelesten. A á de fanowdu tu fu den waka na ala den baka. A Yesesi a wi fesiman. Beibel taki neen wawan baka u mu waka.​—Mateyesi 23:10.

5. San den salufu Kelesten mu e holi a pakisei? Fu saide?

⁵ Den salufu Kelesten mu denki a sani bun di sikiifi aini 1 Korentesama 11:27-29. (Leisi.) Fa wan salufu Kelesten e soi taki a ná abi lesipeki gi a beele anga a win na a Membeefesa? Efu ai nyan a beele anga diingi a win, ma a nai libi moo enke fa Yehofa wani, a ná abi lesipeki gi a Membeefesa (Hebrewsama 6:4-6; 10:26-29). A sani ya e soi taki den salufu Kelesten mu tan meke moiti fu dini Gadu anga den hii ati, efu den wani „fende a pai fu Gadu. Dati na a libi a hemel. Gadu meke Yesesi kai mi fu gi mi a libi ya.”​—Filipisama 3:13-16.

6. Fa den salufu Kelesten mu e si denseefi?

⁶ Pawlesi be taigi den salufu Kelesten taki: „Mi di e koti sitaafu fu Masaa ede, e begi u fu tyai useefi a wan fasi di fiti sama di Gadu kai.” Pawlesi be taigi den fa den mu du a sani ya. A taki: „Ala yuu u mu abi sakafasi anga safu-ati. U mu abi pasensi, u mu abi lobi, da wi o man abi boo anga taawan. U mu libi bun anga useefi. U mu du ala san u poi fu libi na a wan, enke fa a santa yeye e yeepi u” (Efeisesama 4:1-3). A santa yeye e yeepi den sama di e dini  Yehofa fu abi sakafasi. A nai meke den fii denseefi (Kolosesama 3:12). Neen meke den salufu Kelesten nai si enke den bun moo taawan. Den sabi taki Yehofa nai gi den santa yeye moo den taa baala anga sisa. Den nai si enke den e fusutan a Beibel bun moo taawan tu. Den nái taigi taawan fu nyan a beele efuso diingi a win na a Membeefesa. Ma den sabi taki a Yehofa wawan abi a leti fu kai sama go a hemel.

7, 8. San den salufu Kelesten á wani den taa baala anga sisa du? Fu saide?

⁷ Winsi fa den salufu Kelesten sabi taki a wan gaandi den abi fu go a hemel, tokuso den nai si enke den taa baala anga sisa fu den mu tyai den a tapu (Efeisesama 1:18, 19; leisi Filipisama 2:2, 3). Den sabi tu taki di Yehofa kai den fu go a hemel, a á meke kondee sabi. Neen meke den nai foondoo te taa sama nai biibi wantenwanten taki Yehofa salufu den fu go a hemel. Bika den sabi taki Beibel e soi taki u mu ondoosuku luku fosi u biibi wan sama di taki Gadu gi en wan faantiwowtu (Openbaring 2:2). Fu di wan sama di salufu á wani taawan e poti pakisei neen tumisi, meke a ná o go e taigi den sama di ai miti a fosi leisi taki Yehofa salufu en anga santa yeye. Kande a ná o taigi sama a sani de seefi. A ná o go e gafa taki a o go a hemel.​—1 Korentesama 1:28, 29; leisi 1 Korentesama 4:6-8.

⁸ Den salufu Kelesten nai si enke anga taa salufu Kelesten namo den mu e mosoo. Den nai waka e suku taa salufu Kelesten fu den sa taki fu a libi fu den efuso sutudeli a Beibel makandaa (Galasiyasama 1:15-17). Den baala anga sisa á be o go e libi na a wan efu a so sani be o waka aini a kemeente. Neen meke efu a so den salufu Kelesten be o du sani, den á be o du san a santa yeye fu Gadu wani den du, bika na a yeye ya e yeepi a foluku fu Gadu fu libi na a wan.​—Leisi Romesama 16:17, 18.

9. Saide u mu luku bun fa wi e libi anga den sama di e nyan a beele efuso e diingi a win na a Membeefesa? (Luku a faki di den e kai: „Lobi ’nai tyai enseefi a wan fa ná fiti fasi.’”)

⁹ Fa u mu libi anga den salufu baala anga sisa fu u? Yesesi be taigi den disipel fi en taki: „Ala wi a baala.” A taigi den tu taki: „Gadu o saka a sama di e hei enseefi, ma a o hei a sama di e saka enseefi” (Mateyesi 23:8-12). A á bun fu e tyai wan sama a tapu tumisi, winsi a wan fu den salufu baala fu Kelestesi. Te Beibel e taki fu den owluman, da ai gi u taanga-sikin fu abi aseefi biibi fu den, ma a nai taigi u taki u mu si wan libisama enke u fesiman (Hebrewsama 13:7). A tuu taki Beibel e taki u mu „moo lesipeki” son baala. Ma na fu di den e „teke fesi a wan bun fasi”. Den e „wooko taanga fu taki fu a wowtu fu Gadu” (1 Timotiyesi 5:17). Efu wi e poti pakisei tumisi a den salufuwan efuso e gafa den tumisi, da sen o kisi den. Kande son wan fu den o fii denseefi. A sani de be o moo ogii (Romesama 12:3). Nawan fu wi á wani den baala fu Kelestesi meke so wan gaan fowtu!​—Lukasi 17:2.

10. Fa i sa soi taki yu e lesipeki den sama di salufu?

¹⁰ Fa u sa soi lesipeki gi den sama  di Yehofa salufu? U ná o akisi den fa den toon salufu Kelesten. A pisi toli de a fu den anga Yehofa. U ná abi fu sabi (1 Tesalonikasama 4:11; 2 Tesalonikasama 3:11). Wi á mu si enke den man, den uman, den mma, den dda efuso taa famii salufu tu. Bika a sani de a ná wan famii gudu (1 Tesalonikasama 2:12). U mu luku bun fu wi á poti akisi gi taawan di o meke sen kisi den efuso di o du den ogii. U ná o akisi a uman fu wan baala di salufu fa ai fii taki en wawan o libi a goontapu fu teego sondee en man. Bika u sabi taki aini a nyun goontapu Yehofa o „gi ala sani di de a libi san den wani”.​—Psalm 145:16.

11. Saide meke u mu luku bun fu wi á lesipeki son baala anga sisa pasa peesi?

¹¹ Wi e kibii useefi te u nai tyai den salufu Kelesten a tapu. Saide? Bika Beibel taki „sama di du enke den a baala” be o de aini a kemeente di be o taki den a salufu Kelesten (Galasiyasama 2:4, 5; 1 Yohanisi 2:19). Kande son wan fu den salufu Kelesten gwe fika Yehofa bakaten tu (Mateyesi 25:10-12; 2 Peitilisi 2:20, 21). Ma efu u nai lesipeki taawan pasa peesi, u ná o waka a den baka. A ná abi toobi efu den a salufu Kelesten, sama di abi balinen efuso taawan di dini Yehofa omen yali kaba. Efu u nai waka a den baka, da winsi den gwe fika Yehofa efuso gwe fika a kemeente, u biibi ná o swaki. U ná o gwe fika Yehofa tu.​—Yudasi 16.

12, 13. Saide wi á mu booko wi ede te u si taki den sama di e nyan na a Membeefesa e kon moo ipi?

¹² Wan hii pisiten den sama di be e nyan na a Membeefesa be e kon moo mendii. Ma den yali di pasa ya den sama di e nyan e kon moo ipi. U mu booko wi ede anga a pisi toli ya? Nono. Meke u luku fu saide.

¹³ „Yehofa sabi sama a den sama fi en” (2 Timotiyesi 2:19). Den baala di e teli omen sama e nyan na a Membeefesa á sabi efu ala den sama di e nyan a salufu Kelesten tuutuu. A Yehofa wawan sabi. Na a sani de meke den baala e teli den sama tu di denki taki den a salufu Kelesten. Aini a ten di pasa, son sama di be e nyan na a Membeefesa nai nyan moo. Son wan fu den sama di e nyan, ede nai kaba wooko bun, neen meke den e denki taki den o tii anga Yesesi a hemel. Fu taki en kiin, wi á sabi omen salufu Kelesten de a goontapu ete.

14. Omen salufu Kelesten o de a goontapu te a gaan banowtu o bigin?

 ¹⁴ Salufu Kelesten o de na ala se fu goontapu ete, te Yesesi o kon fu tyai den go a hemel. Beibel e soi taki Yesesi „o sende den engel fi en go anga gaan tutu di o go e piki. Den engel o go teke ala den sama di Gadu kai puu na ala se fu hemel, tyai kon a wan” (Mateyesi 24:31). Beibel e soi tu taki aini den lasiti dei, a wantu salufu Kelesten namo o de a goontapu (Openbaring 12:17). Ma a nai taki omen o de a goontapu te a gaan banowtu o bigin.

15, 16. San u mu fusutan fu den 144.000 sama di Yehofa kai fu go a hemel?

¹⁵ A Yehofa seefi e luku on ten a mu salufu wan sama (Romesama 8:28-30). Baka di Yehofa weki Yesesi, neen Yehofa bigin salufu sama anga santa yeye. A gei enke na ala den Kelesten aini a ten fu den apostel be salufu anga santa yeye. Fanafu a ten fu den apostel te anga now, a omen falisi Kelesten e taki den e waka a Yesesi baka. Ma aini ala den yali de, a den sama di be de Kelesten tuutuu Yehofa be e salufu. Den Kelesten ya be de enke a alisi aini a ageisitoli fu Yesesi. Yesesi be taki busi be o goo tapu den (Mateyesi 13:24-30). Aini den lasiti dei Yehofa e salufu sama ete fu de aini a kulu fu den 144.000 salufu Kelesten. ^[2] (Luku a pisi ete wantu pelensipali sani.) Neen meke u ná o buuya efu Gadu salufu son sama na a kaba pisi fu den lasiti dei, bika Yehofa sabi san ai du (Yesaya 45:9; Daniyeli 4:35; leisi Romesama 9:11, 16). ^[3] (Luku a pisi ete wantu pelensipali sani.) U mu luku bun fu wi á de enke den wookoman aini wan fu den ageisitoli fu Yesesi. Den be bigin kuutu di den si fa den masaa wooko anga den taa wookoman di kon wooko moo lati.​—Leisi Mateyesi 20:8-15.

¹⁶ A ná ala den sama di o go a hemel na „a koni saafu di u sa fitoow” (Mateyesi 24:45-47). Leti enke a ten fu den apostel, a so Yehofa anga Yesesi e koboloiki wantu sama aini a ten ya fu leli tyaipi sama. A wantu salufu Kelesten namo aini a ten fu den apostel be sikiifi den Giiki buku fu Beibel. Aini a ten ya, a wantu salufu Kelesten namo abi a faantiwowtu fu gi a foluku fu Gadu „nyanyan na a ten di den abi en fanowdu”.

17. San i leli aini a artikel ya?

¹⁷ San u leli aini a artikel ya? Yehofa o meke wan gaan kulu sama libi fu teego a goontapu, ma wantu sama namo o go tii anga Yesesi a hemel. Yehofa o pai ala den sama di e dini en, winsi den de enke a „Dyu” efuso den „tin man”. A wani ala den wooko anga aseefi weiti. A wani den holidoo tu. Ala den mu abi sakafasi. Den mu libi na a wan, da den dini en enke wan foluku. A kaba á de faawe moo, neen meke u mu tan dini Yehofa da u waka a Yesesi baka, a sikapuman fu u.