Yehofa be meke Eseikiyeli taki a fesi taki en foluku be o daai go na a Paamisi kondee baka, da den be o toon wan foluku. Eseikiyeli be taki a fesi tu taki den sama di be o dini Yehofa aini den kiiboi dei, be o dini en makandii enke wan foluku.

Yehofa meke Eseikiyeli sikiifi a tu tiki. A be mu sikiifi a wan fu den tiki taki: „Disi a fu Yuda anga den sama fu Islayeli di e holibaka gi en.” A be mu sikiifi na a taawan taki: „Disi a fu Yowsefu, a tiki fu Efrayim anga ala den Islayelisama di e holibaka gi en.” Den tu tiki be mu toon  „wan kodo tiki” aini Eseikiyeli ana.​—Eseikiyeli 37:15-17.

San a wowtu „Efrayim” wani taki? A lo fu Efrayim a be a moo pelensipali lo fu a tin-lo kownukondee. A fosi kownu di tii den tin-lo ya, a be Yerobiyam wan Efrayim man (Deitolonomi 33:13, 17; 1 Kownu 11:26). A lo Efrayim a den bakapikin fu wan fu den boi fu Yowsefu di den e kai Efrayim (Numeri 1:32, 33). Yakopu be belesi en manpikin Yowsefu. Neen meke u sa taki „a tiki fu Efrayim” a den tin-lo fu a tin-lo kownukondee. Aini a yali 740 fosi Kelestesi, fosi Eseikiyeli toon polofeiti, Asiriya be feti anga a tin-lo kownukondee fu Islayeli, neen a tyai den sama go a katibo (2 Kownu 17:6). Baka omen yali, neen den Babilonsama wini den Asiriyasama. Neen meke a ten di Eseikiyeli taki den tu tiki o toon wan tiki, den Islayelisama á be e tan na a wan peesi. Den be e tan paatipaati aini den kondee di Babilon be e tii.

Aini a yali 607 fosi Kelestesi, den Babilonsama be wini a tu-lo kownukondee fu Yuda, neen den tyai den sama go a Babilon. Kande den tyai den sama fu a tin-lo kownukondee di be fika go a Babilon tu. Den kownu di be e tii a tu-lo kownukondee, a be fu a lo fu Yuda. A Yuda den pilisite be e tan, bika a den be e wooko na a tempel di be de a Yelusalem (2 Koloniki 11:13, 14; 34:30). Neen meke u sa taki „a tiki fu Yuda” a be a tu-lo kownukondee.

On ten den tu tiki toon wan tiki? A sani ya pasa aini a yali 537 fosi Kelestesi, di den sama fu a tin-lo kownukondee anga den du fu a tu-lo kownukondee daai go a Yelusalem fu meke a tempel baka. Den Islayelisama á be paati a tu-lo anga tin-lo moo. Den be e dini Yehofa makandii baka (Eseikiyeli 37:21, 22). Yesaya anga Yelemiya be taki a sani ya a fesi tu.​—Yesaya 11:12, 13; Yelemiya 31:1, 6, 31.

San a sani di Eseikiyeli taki a fesi e soi fu a tuu biibi? Ai soi taki Yehofa o tyai ala den sama di e dini en kon a „wan” (Eseikiyeli 37:18, 19). A sani ya pasa? Eeye. A bigin pasa aini a yali 1919. Fosi a yali ya, Saatan be puubei fu paati a foluku fu Gadu. Ma aini 1919, a wooko fu a foluku fu Gadu be sete moo bun. Boiti dati den be toon wan.

Aini a ten de, a moo gaanse fu a foluku fu Gadu be abi a howpu fu toon kownu anga pilisite a hemel makandaa anga Yesesi (Openbaring 20:6). Den be de enke a tiki fu Yuda. A ten de, a wantu sama namo be abi a howpu fu tan a goontapu. Ma bakaten a kulu ya kon moo bigi (Sakaliya 8:23). Den be de enke a tiki fu Yowsefu.

Nownow den tu kulu ya e dini Yehofa makandii. Boiti dati, a wan Kownu den abi, Yesesi Kelestesi. A buku Eseikiyeli kai Yesesi mi ’futuboi David’ (Eseikiyeli 37:24, 25). Yesesi begi en Dda gi den bakaman fi en taki: „Nda, meke ala den toon wan leti enke fa mi anga i na a wan” * (Luku a maiki a ondoo.) (Yohanisi 17:20, 21). Yesesi be taki a fesi tu taki den salufu bakaman fi en anga den „taa sikapu” be o toon „wan ipi”. A „wan kodo sikapuman” be o tii ala den (Yohanisi 10:16). Enke fa Yesesi taki, da ala den sama di e dini Gadu o libi na a wan, winsi a hemel efuso goontapu den o libi fu teego.