A te u sabi wan sama manii, fosi u sa taki u sabi a sama. Wi anga a sama e toon bun mati tu. Na aseefi sani e pasa tu te wi e kon sabi den manii fu Yehofa. Wi o sabi san a lobi. A sani ya o yeepi u fu wi anga en toon bun mati. A omen manii Gadu abi, ma fo fu den moo pelensipali. Den fo manii ya na a kaakiti, a koni, a leti-du anga a lobi fi en.

„Yehofa a Moo Gaan Gadu, anga i kaakiti i meke hemel anga goontapu.”​—YELEMIYA 32:17.

Den sani di Gadu meke e soi taki a taanga tuutuu. Te i taampu a doose aini a hati san, fa yu e fii? A san e boon yu. Na a kaakiti fu Gadu di a poti gi a san yu e fii. Omen kaakiti a san abi? Leti mindii fu a san ati wan sani fu 15.000.000°C. A kaakiti di a san e meke ibii sekonde ipi moo omen ondoo miliyun fu den moo kofaliki bom (nucleaire bom).

A omen miliyun sitali de di bigi moo a san. Koniman taki a moo gaan sitali di den e kai UY Scuti bigi wan sani fu 1700 toon moo a san. Efu a sitali ya be de a pe a san de, a be o bigi te da a be tapu fo palaneiti di de koosube fu a san. Den palaneiti ya na: Mercurius, Venus, goontapu anga Mars. A be o bigi pasa a pisi pe a palaneiti di den e kai Jupiter de. A sani ya e meke u fusutan moo bun  san Yelemiya be taki. A be taki Yehofa Gadu meke hemel anga goontapu anga a kaakiti fi en di bigi tuutuu.

Sowtu wini wi e fende fu a kaakiti fu Gadu? A den sani di Gadu meke a hemel anga goontapu e yeepi u fu tan a libi. Wantu fu den sani ya na a san anga den sani di a meke poti a goontapu. Boiti den sani ya, Gadu e yeepi ibiiwan fu wi anga a kaakiti fi en tu. Fa ai du a sani ya? Aini Beibel ten, Gadu be gi Yesesi a kaakiti fi en fu du wonduu. Beibel taki: „Den sama di beendi e si baka, den wan di malengii e waka, den kokobeman e betee, den dofuman e yee, den dedesama e weki baka. Boiti dati pootiman e yee a bun nyunsu” (Mateyesi 11:5). Fa a de aini a ten ya? Beibel taki: „Te wan sama weli ai gi en kaakiti.” A taki tu taki: „Den sama di e fitoow Yehofa, o fende kaakiti baka” (Yesaya 40:29, 31). Gadu sa gi wi en kaakiti di „bigi pasa maiki” fu yeepi u fu pasa ala den polobelema efuso tesi di e miti u (2 Korentesama 4:7). Yu á be sa wani de mati fu wan Gadu di de kabakaba gi wi en kaakiti te wi abi polobelema noh?

„Yehofa, den sani di i meke ipi tuutuu. A fasi fa i meke den e soi taki i koni.”​—PSALM 104:24.

Te wi e kon sabi moo fu den sani di Gadu meke, wi e foondoo fu si fa a koni. Son koniman e ondoosuku den sani di Gadu meke, da den e meke moiti fu meke masini di e wooko enke den sani ya. A sani ya yeepi den fu meke opalani anga taa sani.

Wan fu den sani di e soi taki Gadu koni, na a fasi fa a meke libisama. Pakisei fa wan beibi e goo aini en mma bee. Ai bigin goo te a sii fu a man sumutu miti anga a igi fu a uman. Den tu sani ya di sumutu miti abi ala sani di de fanowdu fu toon wan beibi. A sii fu a man anga a igi fu a uman di sumutu miti e paati a omen pikinpikin pisi. Biginbigin den pisi di a paati e gei denseefi, ma bakaten ai paati aini omen ondoo pisi di nai gei moo. Den pikinpikin pisi ya e toon buulu, bon anga taa sani. Bakaten son wan fu den e toon ati, lebii efuso taa sani. Aini neigin mun, a sii fu a man anga a igi fu a uman di sumutu miti e toon wan beibi. Di wan Beibel sikiifiman pakisei a fasi fa Gadu meke u, a be bigi gi en te neen a taki: „Mi e gafa yu, bika i meke mi a wan foondoo fasi.” A omen sama e si en so tu.​—Psalm 139:14

Sowtu wini wi e fende fu a koni di Gadu koni? A Gadu di meke u sabi san wi abi fanowdu fu de koloku. A di a koni meke a sa yeepi u fu u koni tu. Ai koboloiki Beibel fu soi u fa u mu tyai useefi. A leli u taki „u mu e gi taawan paadon anga u hii ati” (Kolosesama 3:13). A wan bun sani a leli u? Eeye. Dataa taki wi o man siibi moo bun te u nai holi sama na ati. Ai yeepi u fu wi á kisi hei buulu tu. Ai yeepi u fu u senuwe á hei. Ai yeepi u tu fu taa siki á kisi u. Gadu de enke wan mati di e booko en ede anga u. Ala yuu a de kabakaba fu yeepi wi anga fu soi u san u mu du (2 Timotiyesi 3:16, 17). Yu á be o wani abi sowan mati noh?

„Yehofa lobi leti-du.”​—PSALM 37:28.

Gadu e du san bun ala yuu. Beibel taki „noiti Gadu e du ogii. Noiti a Taanga Gadu e du sani di á bun” (Yopu 34:10). A psalm sikiifiman seefi be soi taki Yehofa e du sani a wan letifasi. A be taki: „Yu o kuutu ala sama a wan letifasi” (Psalm 67:4). Fu di „Yehofa e si san de a wan sama ati”, meke sama á poi bidiigi en. Ala yuu a sabi fa wan sama de tuutuu. Ai kuutu sani a wan letifasi tu (1 Samuweli 16:7). Boiti dati, ai si ala den ogii di e pasa a goontapu. Ai si fa sama e bidiigi taawan. A paamisi taki dyonson a „o kii den ogii sama puu a goontapu”.​—Odo 2:22.

Ma Gadu a ná wan kuutubakaa di lobi sitaafu sama. Te a de fanowdu ai soi tyali-ati gi sama. Beibel taki: „Yehofa a wan Gadu di e fii gi sama. A abi tyali-ati tu.” Ai soi tyali-ati gi ogii sama di daai den libi. A sani ya e soi taki ai du sani a wan letifasi. Ná so noh?​—Psalm 103:8; 2 Peitilisi 3:9.

Sowtu wini wi e fende fu di Gadu e du sani a wan letifasi? Apostel Peitilisi taki: „Gadu á lobi wan sama moo a taawan. Ma winsi sowtu kondee wan sama komoto, efu ai lesipeki Gadu, efu ai libi a wan letifasi, Gadu o lobi en” (Toli 10:34, 35). Gadu nai paati bee. A nai luku sama fesi. Wi e fende wini fu di u sabi a sani ya. A sani ya wani taki u sa dini en winsi sowtu kondee u de, winsi sowtu tongo wi e taki, winsi u go a sikoo efuso wi á go a sikoo.

A di Gadu wani u tyai useefi a wan letifasi meke a gi u wan kosensi. Beibel taki a kosensi de enke wan ’weiti di sikiifi aini wi ati’. A taki a weiti ya e meke u sabi efu wan sani bun efuso fowtu (Romesama 2:15). Sowtu wini wi e fende fu a sani ya? Efu u kosensi e wooko bun, a o yeepi u fu wi á du sani di o tyai ogii gi u. Boiti dati te u meke wan fowtu,  ai meke u fusutan taki wi á tyai useefi bun. Ai yeepi u fu u kengi tu. Te u fusutan taki Gadu e du sani a wan letifasi, wi e wani toon en mati tuutuu!

„Gadu a lobi.”​—1 YOHANISI 4:8.

A ná pikin kaakiti Gadu abi, a koni, ai du sani a wan letifasi tu. Ma Beibel á taki Gadu a kaakiti, koni efuso leti-du. A taki Gadu a lobi. Saide? Bika te i luku en bun na a kaakiti fu Gadu e meke a man du sani. Na a leti-du anga a koni fi en e meke a sabi san a mu du. Ma na a lobi fu Yehofa e meke a du ala den sani di ai du.

Yehofa á be e mankei nawan sani, tokuso na a lobi di a abi meke a meke engel anga libisama. Den e fende wini tu fu di Gadu e solugu den. A seeka a goontapu gi libisama fu den sa tan neen. Ai soi taki a lobi ala sama, bika „ai meke a san pii gi den ogii sama anga den bun sama. Ai meke alen kai gi den sama di e libi a wan letifasi anga den sama di nai libi a wan letifasi”.​—Mateyesi 5:45.

Beibel taki: „Yehofa lobi sama tuutuu. A abi tyali-ati tu” (Yakowbesi 5:11). Ai soi lobi gi den sama di e meke moiti fu sabi en anga den sama di e meke moiti fu toon en mati. Ai poti pakisei a ibiiwan fu den sama ya. En Wowtu e soi taki „ai booko en ede anga i”.​—1 Peitilisi 5:7.

Sowtu wini wi e fende di Gadu lobi u? Ai moin gi u te wi e si fa a san e dongo. Wi e fii bun te wi e yee fa wan beibi e lafu. Ai bigi gi u te u famii anga u mati e soi u taki den lobi u. Den sani ya a ná den moo pelensipali sani, ma tokuso den e meke u piisii.

Wan fu den taa fasi fa Gadu soi u taki a lobi u, na a okasi di a gi u fu e begi en. Wi e fende wini fu a sani ya tu. Beibel taki: „Wi á mu booko wi ede anga nawan sani, ma taigi Gadu ala sani te wi e begi. Gi en daa, begi en fayafaya.” Leti enke wan dda di lobi en pikin, a so Yehofa wani u taigi en san de a wi ati. Fu di Yehofa lobi u tuutuu meke a paamisi u taki a o gi wi „a freide fu Gadu di libisama á poi fusutan”.​—Filipisama 4:6, 7.

U taki fu fo pelensipali manii fu Gadu: Kaakiti, koni, leti-du anga lobi. I si enke den sani ya yeepi i fu kon moo sabi fa Gadu tan? Efi i wani sabi moo fu Gadu, wi e gi i taanga-sikin fu ondoosuku fa i sa fende wini fu den sani di a du kaba anga den sani di a o du aini a ten di e kon.