Te i wani sabi wan sama bun, i mu meke moiti fu sabi san a den sani di a du kaba. I mu meke moiti fu sabi san a den sani di miti en aini a libi tu. Na aseefi sani i mu du efi i wani sabi Gadu. I mu meke moiti fu sabi san a den sani di a du kaba. Kande i foondoo te i si sowtu wini i sa fende fu den sani di a du kaba anga den sani di a o du gi wi aini a ten di e kon.

A Yehofa Gadu meke ala sani. „Senten di goontapu sete, neen sama e si kelle san a den fasi di Gadu abi, anga ala fa den nai si Gadu” (Romesama 1:20). „Neen na a Sama di meke goontapu anga en kaakiti. Neen koboloiki a koni fi en fu sete goontapu gingin a pe a de. Neen na a sama di koboloiki en fusutan fu baala hemel enke wan koosi” (Yelemiya 10:12). Den sani di Gadu meke e soi taki ai booko en ede anga u.

Pakisei a sani di Yehofa du gi u. A meke wi a wan apaiti fasi fu di a meke wi „enke fa enseefi de” (Genesesi 1:27). Winsi fa a hei moo wi, toku a gi wi a okasi fu man soi den manii fi en. A meke u fu u man denki enke en. Te wi e meke moiti fu libi enke fa a wani, wi e de koloku. Boiti den sani ya, a gi wi a okasi fu toon en mati tu.

Te wi e luku den sani di Gadu meke, da wi e si taki a abi fii gi u. Apostel Pawlesi taki: „Gadu meke u sabi en fu di ai du bun gi u. Ai meke alen kai komoto a hemel gi u. A poti wan ten, pe nyanyan e de pasa maiki. Neen meke wi e piisii” (Toli 14:17). Gadu e gi u moo enke san wi abi fanowdu fu tan a libi. Ai gi u sowtu a sowtu sani fu u sa piisii aini a libi. Toku den sani ya á sekeseke fu doo den sani di a o du gi wi aini a ten di e kon.

Yehofa meke goontapu gi libisama fu den tan fu teego. Beibel taki: „A goontapu, a libisama a gi en.” Boiti dati a taki: „A ná sosokaali a meke en, ma a meke en gi libisama fu tan” (Psalm 115:16;  Yesaya 45:18). Sama o tan a goontapu? On langa den o tan a goontapu? „Den sama di e libi a wan letifasi o fende a goontapu. A den o tan neen fu teego.”​—Psalm 37:29.

Di Yehofa be meke a fosi man anga uman, Adan anga Efa, a poti den aini wan paladeisi a goontapu fu „paandi anga fu luku a dyali” (Genesesi 2:8, 15). Gadu be gi den tu wooko di be o gi den piisii. A taigi den taki: „U meke pikin fuu a goontapu da u de basi fi en” (Genesesi 1:28). Adan anga Efa be abi a howpu fu libi fu teego a goontapu. Den be o go e piisii tu. Ma a tyali taki den ná aliki Gadu. A sani ya meke den lasi a gaandi di den be abi fu libi a goontapu ya makandaa anga den „sama di e libi a wan letifasi”, bika a den sama ya „o fende goontapu”. Ma dyonson wi o si taki winsi fa Adan anga Efa ná aliki Gadu, toku a o du san a be abi a pakisei anga a goontapu. Ma fosi u luku a toli ya, wi o luku wan fu den taa sani di Gadu du gi u.

U sabi a Beibel enke a Wowtu fu Gadu. Saide Yehofa gi wi a Beibel? A fosi sani, a di a wani u sabi en (Odo 2:1-5). A tuu taki Beibel nai taigi wi ala den sani di u wani sabi fu Gadu. Buku á de di poi taigi wi ala sani fu Gadu (Peleikiman 3:11). Toku ala den sani di sikiifi aini Beibel e yeepi u fu sabi Gadu moo bun. Wi e kon sabi den manii fi en te wi e leisi fa a be e libi anga sama a fositen. Wi e kon sabi sama a lobi anga sama a á lobi (Psalm 15:1-5). Beibel e soi u fa Gadu wani u dini en, fa a wani u libi anga fa ai si gudu. Boiti dati te wi e leisi aini Beibel fa Yesesi Kelestesi be e taki anga a fasi fa a be tyai enseefi, da wi e sabi den manii fu Yehofa.​—Yohanisi 14:9.

Wan taa sani saide Yehofa gi wi a Wowtu fi en, a fu soi u san u mu du fu u sa de koloku. Ai yeepi u tu fu wi á si a libi enke wan soso sani. Yehofa e soi u san u mu du fu wi osulibi waka bun, fu tifeedi anga san wi abi. Ai soi u tu san u mu du te wi abi booko-ede. Boiti den sani ya, Beibel e piki den akisi di omen sama wani sabi. Den akisi ya na: Saide sama e pina so? Fa sani o waka aini a ten di e kon? Beibel e soi u san Gadu du kaba, fu meke sani waka enke fa a be abi a pakisei na a bigin.

A omen sani de ete di e soi taki a Gadu meke sama sikiifi Beibel. A wan sani fu 40 man sikiifi en aini wan sani fu 1600 yali, toku ala den toli di sikiifi aini e go na a wanse, bika a Gadu meke den sikiifi en (2 Timotiyesi 3:16). Beibel á de enke den taa gaandi buku. Te i maiki a Beibel fu a ten ya anga den fositen pisi fu Beibel di sama fende, da yu e si taki sani á kengi aini. Boiti dati a omen sama meke moiti fu tapu den sama di be e poti a Beibel aini taa tongo, ma den á fende wini. Den be e du ogii anga den sama di be e paati efuso leisi a Beibel. Ma toku a Beibel na a wan enkii buku aini a ten ya di sama poti aini omen tongo. A omen sama abi en tu. A poli di sama á be man poli a Beibel e soi kiin taki „den sani di Gadu taki e tan fu teego”.​—Yesaya 40:8.

Wan taa sani di Gadu du na a sani di a sete fu meke den sani di a abi a pakisei kon tuu. U be si taki Gadu wani libisama libi fu teego a goontapu. Ma Adan sondu di a ná aliki Gadu. A so a lasi a gaandi fu libi fu teego. Ala den pikin fi en lasi a gaandi ya tu. „Wan man meke sondu de a goontapu, neen sondu tyai dede. Neen meke ala sama e dede, bika ala den abi sondu” (Romesama 5:12). Di libisama ná aliki Gadu, a be gei enke san Gadu be wani du gi libisama á be o pasa. San Yehofa du di a sani ya pasa?

U man si den manii fu Yehofa te u luku san a du di libisama sondu. Fu di ai du sani a wan letifasi, meke a meke Adan anga Efa pai fu san den du. Ma fu di a abi lobi, meke a seeka sani gi den bakapikin fu den. A di Yehofa koni meke a be sabi fa a mu losi a polobelema ya. A taki wanten fa a o losi a polobelema (Genesesi 3:15). Gadu o meke en Manpikin Yesesi fii wi fu sondu anga dede. Fa a o du a sani ya?

 Fu di Yehofa wani puu a bakapisi fu a sondu fu Adan, meke a sende Yesesi kon a goontapu fu leli libisama fa den mu libi fu fende a teego libi. Boiti dati, a kon fu „gi en libi enke wan paiman fu fii omen sama” * (Mateyesi 20:28; Yohanisi 14:6). Yesesi á be abi sondu, leti enke fa Adan á be abi sondu, neen meke a be man dede gi u fu pai fu u sondu. Yesesi á be de enke Adan, bika a aliki Gadu te enke a dede. Yesesi á be mu dede bika a á be sondu, neen meke Yehofa weki en baka fu go libi a hemel. Yesesi gi libisama san Adan á be poi gi den. A gi den sama di e dini Gadu a okasi fu libi fu teego. „Leti enke fa sondu doo omen sama di wan man namo taangayesi, a so omen sama o toon sama di e libi a wan letifasi di wan sama aliki Gadu” (Romesama 5:19). Fu di Yesesi dede gi u, meke Gadu o du san a be paamisi libisama. A o meke den libi fu teego a goontapu.

Wi e leli omen sani fu Yehofa te u luku san a du di Adan ná aliki en. Wi e si taki nawan sani á poi tapu Yehofa fu du san a abi a pakisei. Ala yuu sani e „waka enke fa” a taki (Yesaya 55:11). Ai bigi gi u tu fu sabi taki Yehofa lobi u tuutuu. „Na a fasi ya Gadu soi taki a lobi u di a sende a wan kodo Manpikin fi en kon a goontapu, fu a sa yeepi u fu fende a libi. A lobi ya á wani taki a wi be lobi Gadu, ma neen be lobi wi. Neen meke a sende en Manpikin kon enke wan ofaandi di e tapu den sondu fu u. A ofaandi ya e meke wi anga Gadu kon bun baka.”​—1 Yohanisi 4:9, 10.

Gadu á „mombii wi a wan kodo manpikin fi en, ma a meke a kon dede gi ala u”. A sani ya e soi u kiin taki a o ’gi wi ala den taa sani di a paamisi u’ (Romesama 8:32). San Gadu paamisi u? Leisi go doo da yu o fende a piki fu a akisi ya.