Yu á be o wani i mati yeepi i te sani miti i noh? Na a sani ya meke son sama e si enke Gadu a ná den mati, bika den taki Gadu nai du nawan sani fu yeepi den. Ma te i luku en bun, a omen sani Gadu du kaba fu yeepi u. Boiti dati a o puu ala den booko-ede anga den polobelema di wi abi aini a ten ya. San Gadu o du gi u?

Gadu o puu a lutu fu ala ogii. Beibel e soi u san na a lutu fu ala ogii. A taki: „U sabi taki wi a fu Gadu, ma a hii goontapu de aini a makiti fu a ogiiwan” (1 Yohanisi 5:19). A „ogiiwan” a Saatan Didibii, neen Yesesi be kai a tiiman fu a goontapu ya (Yohanisi 12:31). Na a tii di Saatan e tii a goontapu ya e meke polobelema nai kaba na a goontapu. Ma san Gadu o du?

Dyonson Yehofa o meke en Manpikin Yesesi, ’meke Didibii, a sama di e kii libisama kaba a soso’ (Hebrewsama 2:14; 1 Yohanisi 3:8). Beibel e soi tu taki Didibii seefi „sabi taki a ná abi langa moo” (Openbaring 12:12). Boiti dati Gadu o kii ala den sama di e du ogii.​—Psalm 37:9; Odo 2:22.

Te Gadu o puu ala den ogii di e pasa a goontapu, a o du a sani di a be abi a pakisei gi goontapu anga libisama. San a paamisi u?

Wan bun libi anga freide. „Den safu-ati sama o fende goontapu. Den o piisii fu a libi, bika ala sani o waka bun.”​—Psalm 37:11.

Bun nyanyan o de pasa maiki. „Tyaipi nyanyan o de a goontapu. Te a den mongo ede seefi nyanyan o de pasa maiki.”​—Psalm 72:16.

Bun osu o de anga wooko di e meke sama piisii. „Den o meke osu da den o tan aini, den o paandi doloifigoon, da denseefi o nyan den sani di den paandi. . . . Den sama di mi teke o fende wini fu a wooko di den du.”​—Yesaya 65:21, 22.

Yu á be sa wani libi aini a ten de noh? Aini a ten di e kon na ala dei yu go e si den sani ya.

Aini a ten ya na ala sama e siki, da den e dede. Ma aini a ten di e kon sani o waka taa fasi. Gadu o meke u fende wini fu a dede di Yesesi dede gi u. A o meke ’den sama di e biibi en fende a libi fu teego’ (Yohanisi 3:16). Fa sani o waka te a sani de pasa?

Siki ná o de moo. „Nawan sama di e tan ape o taki: ’Mi siki.’ Den sama di e tan aini a kondee o fende paadon fu den sondu.”​—Yesaya 33:24.

Dede ná o kii sama moo. „A o puu dede fu alaten. A moo hei Masaa Yehofa o sibi a wataa-ain fu ala sama puu a den fesi.”​—Yesaya 25:8.

Sama o libi fu teego. „Gadu koboloiki Kelestesi Yesesi fu gi u teego libi enke kado.”​—Romesama 6:23.

Den sama di dede o kon a libi baka. „Gadu o weki den dedesama baka, den sama di be libi a wan letifasi anga den di á be libi a wan letifasi” (Toli 24:15). Den sama ya o fende wini fu a dede di Yesesi dede gi u.

Fa Gadu o du ala den sani ya?

Gadu o koboloiki a tiimakiti fi en di de a hemel fu meke den sani di a abi a pakisei gi libisama anga a goontapu kon tuu. A Yesesi Gadu poti enke tiiman fu a tiimakiti ya (Psalm 110:1, 2). Yesesi be taki den bakaman fi en mu begi fu a tiimakiti efuso a kownukondee ya kon. Den be mu begi taki: „U Dda di de a hemel, . . . Meke i Kownukondee kon.”​—Mateyesi 6:9, 10.

Na a Kownukondee fu Gadu o tii a hii goontapu ya, da a o puu a pina di sama e pina anga den ogii di e pasa na ala se. Na a Kownukondee ya na a moo bun tiimakiti di sa tii libisama. Neen meke Yesesi seefi be e paati „a bun nyunsu fu a Kownukondee” di a be de a goontapu ya. A be taigi den bakaman fi en fu du aseefi sani ya.​—Mateyesi 4:23; 24:14.

Na a lobi di Yehofa lobi ala den sani di a meke, meke a paamisi u ala den bun sani ya. Te i pakisei a sani ya, yu á be sa wani kon sabi en noh? Yu á be sa wani toon en mati noh? Sowtu wini yu o fende te i du den sani ya? A taa artikel o taki fu a pisi de.