San yu e pakisei te i yee den wowtu: „A kaba de koosube”? Ai meke i denki gaan siton di o komoto a tapu poli a goontapu ya? Efuso yu e denki a feti di ala den kondee o feti booko a goontapu ya? Te son sama e pakisei den sani ya, da den e feele. Taawan baka nái biibi den sani ya, ma den e si den enke lafu toli.

Ma winsi fa, Beibel e taki: „A kaba o kon” (Mateyesi 24:14). Beibel e kai a kaba „a dei fu Gadu” efuso „Alimakedon” (Openbaring 16:14, 16). A tuu taki a ná ala keliki e taki go na a wan se, te den e taki fu a kaba. Den e buuya sama anga den somen sani di den e taki. Ma den sani di Beibel e taki fu a kaba nái buuya sama. Ai soi u san a kaba wani taki tuutuu. Ai yeepi u tu fu sabi efu a kaba de koosube. Ma a moo bun sani, a taki Beibel e soi u san u mu du fu tan a libi te a kaba doo. Meke u go luku fosi san a kaba á wani taki. Bakadati wi o luku san Beibel e taki fu „a kaba”.

1. A KABA Á WANI TAKI WAN GAAN FAYA O KOMOTO A TAPU BOON A GOONTAPU YA.

   Beibel e taki: „[Gadu] fasi a goontapu kinkin poti neen peesi. Noiti sama o poi puu en neen peesi” (Psalm 104:5). A tekisi ya anga wantu taa tekisi e soi u kiin taki Gadu ná o poli goontapu. Noiti a o gi sama pasi fu poli en tu!​—Peleikiman 1:4; Yesaya 45:18.

2. A KABA NÁ O KON INIIWAN YUU DI A WANI

   Beibel taki Yehofa poti wan dei di a o meke a kaba kon. A sikiifi aini Beibel taki: „Nawan sama sabi a dei efuso a yuu de. Den engel a hemel anga a Manpikin seefi á sabi, ma na a Tata namo sabi. U mu tan luku, u mu de na ain, bika wi á sabi on ten den sani ya o pasa” (Malikisi 13:32, 33). A sani ya e soi kiin taki Gadu („a Tata”) poti wan „dei” kaba on ten a o meke a kaba kon.

3. A NÁ LIBISAMA EFUSO GAAN SITON DI O KOMOTO A TAPU O MEKE A KABA KON.

   Fa a kaba o kon? Openbaring 19:11 e taki: „Mi si hemel opo neen mi si wan weti asi. Den e kai a sama di sidon na a asi tapu, a sama di u sa fitoow anga a sama di e taki a tuu.” Vers 19 e taki: „Neen mi si a ogii meti, den kownu fu a goontapu, anga den suudati fu den. Den be mokisa na a wan fu feti anga a sama di sidon na a asi tapu anga den suudati fi en” (Openbaring 19:11-21). Winsi fa somen fu den sani di sikiifi aini den tekisi ya ná o pasa tuutuu enke fa den sikiifi ya, tokuso wi e fusutan kiin taki Gadu o sende den engel fu kii ala den feyanti fi en.

1. LIBISAMA TIIMAKITI DI Á POI YEEPI U NÁ O DE MOO.

   Beibel e taki: „A Gadu fu hemel o sete wan Kownukondee di sama ná o poi puu a pasi.  Den ná o gi nawan taa foluku a Kownukondee ya. A o booko ala den taa kownukondee ya pisipisi. A o puu den a pasi. A kownukondee seefi o tan fu teego” (Daniyeli 2:44). Enke fa u be taki a fesi kaba, da Gadu o kii „den kownu fu a goontapu, anga den suudati fu den” te den o kon makandaa fu feti anga „a sama di sidon na a asi tapu anga den suudati fi en”.​—Openbaring 19:19.

2. OLOKU, OGIIDU ANGA KUKUTU LIBI NÁ O DE MOO.

   „[Gadu] o tyai wan kaba kon a feti na ala se fu goontapu” (Psalm 46:9). „Bika a soso den sama di e libi a wan leti fasi o tan a goontapu. A den sama di e du bun o tan ya. Ma Gadu o kii den ogii sama puu a goontapu. Den bidiigiman ná o de moo tu” (Odo 2:21, 22). Gadu taki: „U luku! Mi e meke ala sani kon nyun.”​—Openbaring 21:4, 5.

3. DEN KELIKI DI NÁI DU SANI ENKE FA GADU WANI EFUSO DI E KOLI SAMA NÁ O DE MOO.

   Beibel e taki: „Den polofeiti e taki polofeititoli di á tuu. Den pilisite e pina sama, fu di den abi makiti. . . . Ma san wi o du te a kaba o kon?” (Yelemiya 5:31). Yesesi be taki: „Somen sama o taigi mi na a dei de taki, Masaa, Masaa, wi á be e taki polofeititoli aini i nen noh? Wi á be e puu ogii yeye aini i nen noh? Wi á be e du somen kaakiti wooko aini i nen noh? Tokuso mi o taigi den taki: ’Mi á sabi u noiti wan dei! U komoto a mi fesi, u wookoman fu ogiidu!’”​—Mateyesi 7:21-23.

4. DEN SAMA DI E HOLIBAKA GI A GOONTAPU YA NÁ O DE MOO.

   Yesesi Kelestesi be taki: „A fu a sani ya ede meke sama o kuutu den. A leti kon a goontapu, ma libisama ben lobi a dunguu moo a leti, bika den be e du ogii” (Yohanisi 3:19). Beibel e taki Gadu be kii ala libilibi sani kaba a goontapu na a ten fu Nowa. A sikiifi taki: „Gadu be poli a goontapu fu a ten de anga wataa. Ma Gadu taki tu, taki a fika den hemel anga a goontapu fu a ten ya fu boon den anga faya. A fika den te enke a dei doo fu a kuutu den ogii sama, da a poli den”.​—2 Peitilisi 3:5-7.

Beibel e teke a dei di Gadu o „kuutu den ogii sama” gei anga a dei di Gadu be poli „a goontapu” aini a ten fu Nowa. A on fasi a goontapu be poli? A ná a tuutuu goontapu be poli, ma a den „ogii sama” efuso den feyanti fu Gadu. Te a dei di Gadu o „kuutu den ogii sama” doo, da a o puu den feyanti fi en a pasi tu. Ma den mati fi en o tan a libi, leti enke fa Nowa anga en osufamii be tan a libi.​—Mateyesi 24:37-42.

Pakisei fa a goontapu ya o moin te Gadu o kii ala den ogii sama! Neen ede meke a bosikopu fu a kaba a ná fu meke u feele, ma na bun nyunsu. Ma kande yu e akisi iseefi taki: ’A sikiifi aini Beibel on ten a kaba o kon? San mi mu du fu tan a libi te a kaba doo?’