I si enke Gadu o fika libisama fu den e pina taawan naamo? I si enke a o fika den fu den kaba anga a goontapu ya a soso? Nono, enke fa u be si kaba, da Gadu ná o meke a sani ya pasa. A o tyai wan kaba kon na a pina di sama e pina taawan omen ondoo yali kaba. A Gadu di meke a goontapu anga libisama wani fi i sabi taki a ten de, de koosube. Fa a meke u sabi a sani de?

Kon u taki i be o go anga wagi a wan peesi di yu á sabi. Kande yu o akisi sama di sabi a peesi, efuso yu o luku wan kaita di e soi i pe a peesi de. Te yu o bigin si den sani di den sama be taigi i efuso den sani di i be si na a kaita, da i sabi taki i de koosube. Na aseefi sani de Gadu du tu. A gi wi a wowtu fi en, fu soi u den sani di o pasa a goontapu. Te wi e si den sani ya, da wi o fusutan taki a kaba fu a goontapu ya de koosube.

Beibel e soi taki a goontapu be o kon moo ogii fosi a kaba kon. Sani be o pasa a goontapu di á be pasa ete wan dei. Meke u go luku wantu sani di Beibel be taki a fesi.

1. POLOBELEMA DI E PASA A HII GOONTAPU Mateyesi kapitel 24 e taki fu wantu sani di be o pasa aini „den kiiboi dei fu goontapu”. A baka te den sani ya be o pasa „a kaba o kon (Vers 3, 14). Den sani ya, a sani enke gaan feti, angiiten, seke doti, ogiidu, a lobi di sama á be o lobi makandaa, anga a koli di den keliki fesiman be o koli somen sama (Vers 6-26). A tuu taki den sani ya e pasa omen ondoo yali kaba. Ma te a kaba be o kon moo koosube, da ala den be o pasa na aseefi yuu. Boiti den sani di u kai ya, ete dii sani be o pasa. Meke u go luku san a den sani de.

2. A FASI FA SAMA BE O GO E TYAI DENSEEFI Beibel taki aini den „kiiboi dei” gaanse sama be o abi takuu manii. A sikiifi taki: „Bika sama a soso denseefi namo den o lobi. Den o lobi moni. Den o lobi gafa. Den o abi hei membee. Den o go e taki ogii fu taawan. Pikin o go e taangayesi den gaansama fu den. Den ná o sabi kiyoo. Den ná o tei holi a taawan. Den ná o lobi taawan. Den ná o wani meke kuudei. Den o go e meke lei poli taawan nen. Den ná o poi dwengi denseefi. Den o go e de ogii ogii ala yuu. Den ná o lobi sani di bun. Den o go e konkuu taawan. A soso san den wani den o go e du. Den o go e fii enke den hei moo taawan. Den o lobi meke piisii moo enke den lobi Gadu” (2 Timotiyesi 3:1-4). A tuu taki a lesipeki di sama nái lesipeki taawan a wan sani di be de kaba. Ma a be o kon moo ogii aini „den kiiboi dei”. Neen meke Beibel e taki a ten de „a libi o taanga”. Yu e si den takuu manii ya a den sama di e libi aini a ten ya?

3. DEN E POLI A GOONTAPU Beibel e taki: „A ten doo fu poli den sama di e poli a goontapu” (Openbaring 11:18). Fa libisama be o poli goontapu? Na aseefi fasi fa den be poli goontapu aini a ten fu Nowa. Beibel e taki fu a ten de taki: „A tuu Gadu be si taki goontapu á be bun moo. Ogii be kon lai a goontapu. Eeye, di Gadu luku a goontapu, a si taki a be ogii tuutuu”. Neen meke Gadu be taki a o kii den (Genesesi 6:11-13). I si fa a goontapu kon moo ogii aini a ten ya? Boiti dati, nownow libisama poi du sani di noiti den be denki taki den be sa du. Libisama abi a makiti fu kii ala sama di e libi a goontapu anga den feti sani di den meke. Ma boiti dati, libisama e poli a goontapu a wan taa fasi tu. Den e poli den sani di wi abi fanowdu  fu tan a libi. A winta di wi abi fanowdu fu boo á bun moo. Den e kii ala den meti. Den e faa ala den bon. Den e tyobo a se tu.

Akisi iseefi a sani ya osi: ’Libisama be abi a makiti fu poli a hii goontapu wan ondoo yali pasa?’ Nono. Ma nownow den poi du a sani ya, fu di dei fu dei den e meke kofaliki fetisani di sa kii somen sama wan pasi. Den e poli den sani di wi abi fanowdu fu tan a libi tu. Den e meke ala sowtu nyun sani, sondee fu pakisei a bakapisi. Ma tokuso Gadu ná o gi libisama pasi fu poli a hii goontapu. Fosi den du a sani de, da Gadu o kii ala den sama di e poli a goontapu. A so a paamisi u!

4. WAN WOOKO BE O DU A HII GOONTAPU Wan taa sani be o pasa tu na a ten fu a kaba di wi á be si ete. Beibel e taki: „A bun nyunsu fu a Kownukondee fu Gadu mu peleiki doo hii goontapu, dan fosi a kaba o kon” (Mateyesi 24:14). A peleikiwooko ya be o de wan hii taa fasi. A á be o de enke a peleikiwooko di den keliki du aini den somen ondoo yali di pasa. Aini den kiiboi dei, a moo pelensipali bosikopu fu a peleikiwooko ya be o de „a bun nyunsu fu a Kownukondee”. I sabi wan keliki di e paati a bosikopu ya? Den e peleiki a bosikopu ya a wan peesi namo efuso a „hii goontapu”, fu ala sama yee?

A Website www.pr418.com e paati „a bun nyunsu fu a Kownukondee”. A Website e koboloiki buku anga taa sani fu paati a bun nyunsu aini moo enke 700 tongo. I si enke taa sama e meke moiti so fu paati a bun nyunsu a hii goontapu? Fosi Internet be de, den be sabi den Yehofa Kotoigi kaba enke sama di e paati a bun nyunsu fu a Kownukondee. Fanafu a yali 1939, neen den sikiifi den wowtu: „Ai bali basiya gi Yehofa Kownukondee” a fesise fu A Wakititolen. Wan buku di e taki fu keliki, sikiifi taki noiti ete sama be meke moiti so fu peleiki a somen sowtu fasi, anga a somen peesi. A bun nyunsu di den Kotoigi e paati, e soi taki a ná o teke langa moo fosi a Kownukondee fu Gadu tyai „a kaba” kon.

Yu e si fa den fo sani di Beibel be taki a fesi, e pasa aini a ten fu u ya? A moo enke wan ondoo yali kaba A Wakititolen e taki fu den sani di e pasa a goontapu, fu meke sama fusutan taki  a kaba de koosube. Ma tokuso somen sama nái biibi den toli ya. Den e si enke den sama di sikiifi en sikiifi san denseefi e denki. Taawan e taki den sani di sikiifi aini A Wakititolen nái pasa tuutuu. Den e taki a fu di wi e yee den ogii di e pasa a hii goontapu, meke ai gei enke ogii kon moo ipi. Ma winsi san den e taki, den sani di e pasa nownow e soi kiin taki a goontapu ya e kaba a soso. Den e si kiin taki a kaba de koosube.

Wantu koniman seefi e si enke a ná o teke langa moo fosi sani kengi a goontapu ya. Aini 2014 wantu sama di e ondoosuku sani be wasikoi VN, taki son kondee lai fetisani di sa kii ala sama a goontapu. Den ondoosukuman be taki: „Te wi e luku ala den feti sani di sama e meke, da wi e si kiin taki den sa poli a hii goontapu.” A omen sama e si kiin taki wi e libi aini wan pelensipali ten. Den sama di sikiifi A Wakititolen anga somen fu den sama di e leisi en, sabi taki wi e libi aini den lasiti dei fu a goontapu ya. Den sabi taki a kaba de koosube. Ma saide u ná abi fu feele a ten di de a u fesi? A fu di u sa tan a libi te a kaba o kon!