1. Saide meke a bun taki u man pakisei sani di wi á si ete? (Luku a fowtow na a bigin.)

YEHOFA gi sama wan sani di den mu teke fu bigi. Dati na a pakisei di den man pakisei sani di den á si ete. Neen ede meke u man pakisei den bun sani di wi o fende aini a ten di e kon. A sani ya e yeepi u tu fu u seeka sani a fesi efuso koti pasi gi polobelema. Yehofa sabi san o pasa aini a ten di e kon. Ai taigi u aini Beibel san a wantu fu den sani di o pasa. Winsi fa wi á si den sani de ete, tokuso u sa pakisei aini useefi fa a ten de o de. U sa biibi tu taki den sani de o pasa tuutuu.​—2 Korentesama 4:18.

2, 3. (a) Saide meke den sani di wi e pakisei pelensipali? (b) Sowtu akisi wi o luku aini a artikel ya?

² Son leisi libisama e pakisei sani di ná o pasa noiti. A kan taki wan pikin meisyo e pakisei fa wan babe e tyai en a tapu e fee lontu. U sabi taki a sani de ná o pasa noiti. Ma a mma fu Samuweli di den e kai Hanna, be e pakisei sani di be o pasa tuutuu. A be e pakisei a dei di a be o tyai a boi fi en go na a tabernakel fu wooko makandaa anga den pilisite. A sani ya á na be wan deen, ma a wan sani di a be  o du tuutuu. Fu di Hanna be e pakisei fa a dei de be o de, meke a be kisi taanga-sikin fu du san a be paamisi Yehofa (1 Samuweli 1:22). Te wi e pakisei den sani di Yehofa paamisi u, da wi e pakisei sani di o pasa tuutuu.​—2 Peitilisi 1:19-21.

³ A omen sama di be e dini Yehofa aini a ten fu Beibel, be e pakisei den sani di Gadu be paamisi den. Fu saide a bun taki den be e du a sani ya? Fu saide a bun taki wiseefi e pakisei fa a libi o de te den sani di Gadu paamisi o kon tuu?

4. Fu saide meke Abel be sabi taki sani be o waka bun aini a ten di e kon?

⁴ A Abel na a fosi sama di be e biibi taki Yehofa o du den sani di a paamisi. A be sabi san Yehofa be taigi a sineki baka di Adan anga Efa sondu. Yehofa be taigi a sineki taki: „Mi o meke yu anga a uman toon feyanti, a pikin fi i anga a pikin fu a uman o de feyanti tu. A pikin fu a uman o masi yu ede, ma yu o nyan a pikin fu a uman neen bakafutu” (Genesesi 3:14, 15). Abel á be sabi finifini fa den sani ya be o pasa. Ma a kan taki a be e pakisei den sani naamo di Yehofa be taki. Kande Abel be e denki taki: ’Sama a sineki be o nyan neen bakafutu? Sama o yeepi libisama fu fende a teego libi baka?’ Abel be e biibi taki ala den sani di Yehofa be paamisi o kon tuu. Neen ede meke Yehofa be piisii anga a ofaandi di a be tyai gi en.​—Leisi Genesesi 4:3-5; Hebrewsama 11:4.

5. Fu saide meke a bun taki Heinok be e pakisei fa a libi be o de?

⁵ Wan taa man di be e biibi taanga aini Yehofa a be Heinok. A be e tan a wantu ogii-ati sama mindii di be e taki ogii fu Gadu. Ma Heinok á be e feele, a be e paati a bosikopu fu Gadu gi den. A be e taigi den taki Yehofa o kii ala den ogii sama (Yudasi 14, 15). San be yeepi Heinok fu du a sani ya? Kande Heinok be e pakisei a fasi fa a goontapu o de te ala sama e dini Yehofa.​—Leisi Hebrewsama 11:5, 6.

6. Sowtu sani Nowa be e denki kande baka a Fuudu?

⁶ Nowa a be wan man di be e biibi taanga aini Yehofa, neen meke a á dede di a gaan wataa be sungu goontapu (Hebrewsama 11:7). A fu di Nowa be abi biibi, meke a tyai wantu meti enke ofaandi gi Yehofa (Genesesi 8:20). Baka a fuudu, libisama be kon ogii baka. Wan man di den e kai Nimlotu be toon tiiman. A á be wani sama du san Yehofa taki (Genesesi 10:8-12). Ma den sani ya á be swaki a biibi fu Nowa. Leti enke Abel, Nowa be e biibi taki Gadu o puu sondu anga dede wan dei. Kande Nowa be e pakisei a fasi fa a libi o de te den tiiman di abi ogii-ati ná o de moo. Useefi sa pakisei fa a libi o de te den tiiman ya ná o de moo. A ten de á de faawe moo!​—Romesama 6:23.

7. Sowtu sani Abalaham, Isaki anga Yakopu be e si a den fesi kaba?

⁷ Abalaham, Isaki, anga Yakopu be e pakisei den sani di Yehofa be paamisi  den. Yehofa be paamisi den taki a wan „bakapikin” fu den be o meke ala den foluku a goontapu man fende seigi (Genesesi 22:18; 26:4; 28:14). Gadu be paamisi den tu taki a famii fu den be o toon wan gaan foluku. A foluku de be o tan aini a Paamisi Kondee (Genesesi 15:5-7) Fu di Abalaham, Isaki anga Yakopu be e biibi den sani di Yehofa be taki, meke den ben man si a fesi kaba fa den bakapikin fu den e tan aini a paamisi kondee. Te i luku en bun, da fanafu di Adan anga Efa sondu, neen Yehofa yeepi den diniman fi en fu fusutan taki wan dei o kon pe libisama ná o abi sondu moo.

8. Saide meke Abalaham be abi wan taanga biibi?

⁸ Fu di Abalaham biibi be taanga, meke a be e aliki Yehofa winsi fa sani á be makiliki ala yuu. Abalaham anga taa diniman be e si a den fesi kaba fa den sani di Yehofa be paamisi den e kon tuu, anga ala fa den sani de á kon tuu na a ten di den be de a libi. Beibel e taki: „Den be e si den a faawe kaba, neen den be e piisii anga den.” (Leisi Hebrewsama 11:8-13.) Abalaham be sabi taki ala den sani di Yehofa be paamisi aini a ten di pasa be kon tuu. Neen meke a be sabi taki den sani di Yehofa be paamisi fu du aini a ten di e kon be o kon tuu namonamo.

9. Fa a biibi di Abalaham be e biibi den paamisi fu Yehofa yeepi en?

⁹ Fu di Abalaham be e biibi taki den sani di Yehofa paamisi en o kon tuu, meke ala yuu a be e du san Yehofa taigi en. A be foloisi komoto a Ur, a foto pe a be e tan. Fanafu a dei de, noiti moo a be wani tan aini wan foto en hii libi. A be sabi taki ala den foto di be de neen lontu o kaba a soso, bika den sama di be e tii den á be e dini Yehofa (Yowsuwa 24:2). Neen ede meke a be e angii fu si a ten te a Kownukondee fu Gadu be o tii a goontapu ya fu teego. Na a Kownukondee ya na „a foto di abi wan tuutuu fondamenti. A Gadu na a sama di meke a foto ya” (Hebrewsama 11:10). Abalaham, Abel, Heinok, Nowa anga taa diniman fu Yehofa be e biibi taki te den dede, den o kon a libi baka. Te den be e pakisei fa den o libi fu teego te a goontapu ya o toon wan paladeisi, da a sani de be e taanga a biibi fu den.​—Leisi Hebrewsama 11:15, 16.

10. San Sala be e pakisei kande te a be e denki a sani di Yehofa be paamisi Abalaham?

¹⁰ A uman fu Abalaham di den be e kai Sala, be e biibi den sani di Yehofa be paamisi. A ten di a be abi 90 yali, a á be meke pikin ete. Tokuso a be e pakisei a ten di a be o meke wan pikin. A be poi si a fesi kaba fa den bakapikin fi en be o toon wan gaan foluku (Hebrewsama 11:11, 12). San meke a be e biibi taki a sani ya be o pasa  tuutuu? A fu di Yehofa be taigi a man fi en taki: „Mi o seigi en, da mi o meke a meke wan manpikin gi i. Mi o seigi en, mi o meke a toon a afo fu tyaipi foluku. Den bakapikin fi en o tii enke kownu” (Genesesi 17:16). Sala be meke wan boi leti enke fa Yehofa be paamisi, neen den kai en Isaki. A wonduu ya be gi en a fitoow taki ala den taa sani di Yehofa be paamisi, be o kon tuu. Useefi sa abi wan taanga biibi te wi e denki ala den moin sani di Yehofa paamisi u.

11, 12. San be taanga a lobi di Mosesi be abi gi Yehofa?

¹¹ Mosesi seefi be e biibi den sani di Yehofa be paamisi. Den be kiya en enke wan kownupikin aini Egepte. Ma fu di a be lobi Yehofa moo ala taa sani, meke a á be e feti fu abi makiti anga gudu. En mma anga en dda be de Islayelisama. Den be leli en taki wan dei Yehofa o puu den Islayelisama a katibo, tyai go aini a Paamisi Kondee (Genesesi 13:14, 15; Ekisodesi 2:5-10). O moo Mosesi be e pakisei den sani ya, o moo a be e lobi Yehofa.

¹² Beibel e soi u san a den sani di Mosesi be e pakisei ala yuu. Ai taki: „A fu di Mosesi be abi biibi, meke a á be wani sama kai en a manpikin fu a umanpikin fu Farao, di a be kon bigi. A be de kabakaba fu nyan pina makandii anga a foluku fu Gadu a peesi fu piisii wan pisi ten namo fu sondu. A be wani du a sani ya, bika a be e si a sen di be o kisi en enke a Salufuwan, enke wan gudu di bigi moo den gudu fu Egepte. A be poti ala en pakisei na a pai di a be o fende.”​—Hebrewsama 11:24-26.

13. Saide a bun taki Mosesi be e pakisei den sani di Yehofa be paamisi?

¹³ Mosesi be musu fu e pakisei a paamisi di Yehofa be paamisi fu puu den Islayelisama a katibo. Leti enke taa diniman fu Yehofa, Mosesi be sabi taki Yehofa o puu dede (Yopu 14:14, 15; Hebrewsama 11:17-19). A sani ya be meke Mosesi fusutan taki a ná pikin lobi Yehofa lobi libisama. Neen meke a lobi di a be abi gi Yehofa be kon moo taanga. A biibi fi en be kon moo taanga tu. Na a biibi ya yeepi en fu dini Yehofa en hii libi langa (Deitolonomi 6:4, 5). Di Farao be wani kii Mosesi, a á be e feele, bika a be sabi taki Yehofa be o pai en bakaten.​—Ekisodesi 10:28, 29.

14. San tyaipi sama e pakisei te den e denki a ten di e kon?

¹⁴ Te son sama e pakisei a ten di e kon, dan den lobi pakisei sani di ná o pasa noiti. Son sama di e pina e deen taki wan dei den o kon gudu, da den ná o abi booko-ede moo. Ma Beibel e soi taki a libi aini a goontapu fu Saatan o „lai booko-ede anga pina” ala yuu (Psalm 90:10). Taawan baka e denki taki wan libisama tiimakiti o seeka ala den polobelema fu a goontapu ya. Ma Beibel e soi taki na a Kownukondee fu Gadu namo poi du a sani de (Daniyeli 2:44). Somen sama e denki tu taki a goontapu ya ná o kengi. Ma Beibel e soi taki Gadu o poli a ogii  goontapu ya (Sefanya 1:18; 1 Yohanisi 2:15-17). Den sama di e denki taki sani ná o waka enke fa Yehofa taki, o si taki den ná abi leti.

15. (a) Saide a bun fu u pakisei a libi di Gadu paamisi u aini a ten di e kon? (b) San a wan fu den sani di i wani du aini a ten di e kon?

¹⁵ Yehofa paamisi u wan bun libi aini a ten di e kon. Te wi e pakisei a ten de, wi o moo piisii. Wi o fende taanga-sikin tu fu tan dini en. Winsi yu abi a howpu fu libi a goontapu ya efuso a hemel, yu e si kaba fa yu o piisii te Yehofa o du den sani di a paamisi? Kon u taki i de aini a paladeisi. Fa a libi o de na a ten de? Kande yu anga den mati fi i e wooko fu meke a goontapu toon wan moin boomiki dyali. Den sama di e teke fesi aini a wooko ya e booko den ede anga i. Ala sama di de ape lobi Yehofa, leti enke fa i lobi en tu. I nái siki, i lai kaakiti. Sani á de di e gi i booko-ede. Yu e piisii fu di yu e koboloiki a koni anga a kaakiti fi i fu yeepi taawan. Yu e piisii tu fu di yu e koboloiki den fu gafa Yehofa. Kande yu e yeepi sama tu di be kon a libi baka fu kon sabi Yehofa (Yohanisi 17:3; Toli 24:15). Ná deen yu e deen te yu e pakisei den sani ya. Ala den fiya o kon tuu, bika a so Beibel taki sani o waka aini a ten di e kon.​—Yesaya 11:9; 25:8; 33:24; 35:5-7; 65:22.

16, 17. Saide a bun fu taki fu den sani di Yehofa paamisi u aini a ten di e kon?

¹⁶ Te wi e taigi den baala anga sisa fu u san u wani du aini a nyun goontapu, da wi e yeepi makandaa fu si a moin ten ya enke wan tuutuu sani. A tuu taki wi á sabi pilisisi san wi o du na a ten de. Ma te wi e taigi makandaa san u wani du, da wi e soi taki wi e biibi den sani di Yehofa paamisi u. A so  wi e gi makandaa taanga-sikin fu tan dini Yehofa winsi tesi e miti u, enke fa Pawlesi anga den baala aini Rome be e gi makandaa taanga-sikin.​—Romesama 1:11, 12.

¹⁷ Te yu e pakisei den sani di Yehofa paamisi u aini a ten di e kon, i ná o pakisei den polobelema di yu abi so ipi moo. Wan leisi a apostel Peitilisi be e booko en ede anga wantu sani. Neen meke a akisi Yesesi taki: „U gwe fika ala san u be abi, neen u kon waka ai baka. Sowtu paiman wi o fende?” Yesesi be wani Peitilisi anga den taa disipel pakisei den moin sani di den be o du aini a ten di e kon. A taigi den taki: „A manpikin fu libisama o sidon na a gaan kownusutuu fi en. Da wi di be waka a mi baka, o sidon a 12 Kownusutuu fu kuutu den 12 lo fu Islayeli. Soseefi ala sama di gwe fika osu, efu baala, efu sisa, efu dda, efu mma efu uman efu pikin, efu ala san a abi, fu di a wani waka a mi baka, o fende den sani ya wan ondoo toon baka. A o fende teego libi tu” (Mateyesi 19:27-29). A sani ya be yeepi Peitilisi anga den taa disipel fu si fa den be o tii makandaa kaba anga Yesesi aini hemel. Den be poi si tu fa den e yeepi den sama di tan dini Gadu fu ná abi sondu moo.

18. Saide a bun fu u pakisei a ten te Gadu o du den sani di a paamisi?

¹⁸ U leli aini a artikel ya san be yeepi den diniman fu Yehofa fu abi wan taanga biibi. Abel be e pakisei a paamisi di Yehofa be paamisi taki libisama be o abi wan moo bun libi aini a ten di e kon. Fu di Abel be e biibi a sani ya, meke Yehofa be e piisii anga en. Abalaham be e denki go na a ten te den sani di Yehofa be taki fu a „bakapikin” fi en be o pasa. Neen meke ala yuu a be e aliki Yehofa, winsi a á be makiliki (Genesesi 3:15). Mosesi be e pakisei a ten di a be o fende a pai di Yehofa be paamisi en. A sani ya be yeepi en fu tan du san Yehofa wani (Hebrewsama 11:26). Te wi e pakisei a ten te Yehofa o du den sani di a paamisi, da a biibi fu u anga a lobi di u lobi Yehofa o kon moo taanga. Aini a taa artikel, wi o luku san o yeepi u fu fusutan fa taawan e fii, aladi u ná abi den polobelema di den abi.