Beibel e soi u taki sama o dede te a kaba o kon. Ai taki: „Bika wan gaan banowtu o kon. Fanafu goontapu meke, noiti sama á be miti a banowtu ya ete . . . Efu a ná satu Gadu be satu a ten de, nawan sama be o fika a libi” (Mateyesi 24:21, 22). Ma Gadu e paamisi u taki, a omen sama o tan a libi te a kaba o kon. Beibel e taki: „A goontapu ya . . .  ná o de moo. Ma den sama di e libi enke fa Gadu wani o tan fu teego.”​—1 Yohanisi 2:17.

San i mu du efi i wani tan a libi te a kaba doo? San i mu du efi i wani libi fu teego? I si enke a te wi o kibii nyanyan anga taa sani, da wi o tan a libi te a kaba doo? Nono. Beibel e taki u mu du wan taa sani. Ai taki: „Fu di ala den sani ya o sumutu gwe, meke u mu ondoosuku useefi luku sama u mu de. A fasi fa wi e tyai useefi anga den sani di wi e du, mu soi taki wi na santa sama di e dini Gadu anga u hii ati. U mu e holi a pakisei taki a dei fu Yehofa e doo” (2 Peitilisi 3:10-12). A tekisi e soi taki den sani di o sumutu, a den tiimakiti fu a goontapu ya anga den sama di e holibaka gi den. Tuutuu, nawan enkii gudu di wi abi o poi kibii wi te a goontapu ya o poli.

Neen meke efu u wani tan a libi te a kaba doo, da u mu dini Yehofa anga u hii ati. U mu leli tu fa u mu tyai useefi a wan fasi di o meke Gadu piisii (Sefanya 2:3). Wi á mu de enke den sama fu a goontapu ya di e du enke den nái si den maiki di e soi taki wi e libi aini wan pelensipali ten. Ma „u mu e holi a pakisei taki a dei fu Yehofa e doo”. Den Yehofa Kotoigi sa soi i san Beibel e taki u mu du fu tan a libi te a kaba doo.