1. Fa wan engel du toon Saatan?

BIGINBIGIN en anga Yehofa a be mati. Ma bakaten, a engel ya be wani sama dini en. Pe fu a feti anga a takuu fii de, neen a kweki en te enke a sondu (Yakowbesi 1:14, 15). Wi á sabi fa den be e kai en fosi, ma nownow a Saatan den e kai en. „A á be tan aini waaleiti.” A be taangayesi Yehofa. A so a toon „a tata fu lei”.​—Yohanisi 8:44.

2, 3. San den wowtu „Saatan”, „Didibii”, „sineki” anga „kaiman” e leli u fu a feyanti fu Gadu?

² Fanafu a ten di Saatan taangayesi Yehofa, neen a toon a moo gaan feyanti fu Gadu anga libisama. Te wi e leisi san Beibel e taki fu Saatan, da wi e si taki a abi ogii-ati. A wowtu Saatan wani taki „Gensiman”. A sani ya e soi taki a ogii-ati engel ya á wani Yehofa tii hemel anga goontapu. Neen meke ai feti ogii ogii anga Gadu, bika a á wani Yehofa tii seefiseefi.

 ³ Openbaring 12:9 e soi taki a taa nen fu Saatan, a Didiibi. A wowtu Didibii wani taki „ogii-ati Leiman”, bika a poli a nen fu Gadu fu di a kai Gadu leiman. Den wowtu „a fosi sineki”, e membee wi fa Saatan koli Efa anga wan sineki. A „gaan kaiman” a wan taa nen di Saatan abi tu. A sani ya e soi taki en ati de boonboon, a abi ogii-ati. A á wani meke Yehofa du den sani di a abi a pakisei. A poti neen ede fu puu a foluku fu Gadu a pasi.

4. Fu sowtu toli wi o taki aini a artikel ya?

⁴ Wi e si kiin taki a Saatan na a sama di e meke moiti fu poli wi anga Yehofa. Neen meke Beibel e wasikoi wi taki: „U mu de anga u kiin fusutan! U mu de na ain. A feyanti fu u di den e kai Didibii, e waka lontu enke wan lew di e bali. Ai suku sama fu gwili” (1 Peitilisi 5:8). A artikel ya o taki fu dii fasi di Saatan abi. Den fasi ya o soi u fu saide meke a de taanga fanowdu fu luku bun anga Saatan, a ogii-ati feyanti fu Yehofa anga libisama.

5, 6. (a) Sowtu toli e soi taki den engel „taanga tuutuu”? (b) Beibel e taki Saatan „poi kii sama”. San a sani de wani taki?

⁵ Den engel „taanga tuutuu” (Psalm 103:20). Den abi koni anga kaakiti moo wi. Den engel di e dini Gadu e koboloiki a kaakiti fu den enke fa Gadu wani. Wan fu den engel fu Yehofa be kii 185.000 suudati fu den Asiriyasama. Wan libisama á be o poi du a sani ya. A sani ya be o taanga gi wan gaan guupu suudati tu (2 Kownu 19:35). Wan taa leisi, neen wan engel koboloiki a koni anga a makiti fi en fu puu den apostel fu Yesesi a sitaafu osu. Winsi fa den wakitiman be de koosube, tokuso den á si taki a engel opo den doo tyai den apostel go a doose. Den á si seefi di a engel sooto den doo baka!​—Toli 5:18-23.

⁶ Den engel di e dini Yehofa e koboloiki a makiti di den abi a wan bun fasi, ma Saatan e koboloiki a makiti fi en fu du ogii. Saatan abi tyaipi makiti. A poi meke sama du san a wani tu. Beibel e kai en „a tiiman fu a goontapu ya” (Yohanisi 12:31; 2 Korentesama 4:4). Saatan „poi kii sama” tu (Hebrewsama 2:14). A sani ya á wani taki na ala sama fiya Saatan seefi e kii. Da san a sani ya wani taki? A wani taki Saatan e gi sama taanga-sikin fu kii makandaa a hii goontapu. Wi e si tu taki fu di Efa biibi a lei fu Saatan, anga fu di Adan taangayesi Gadu, meke ala sama e sondu, da den e dede (Romesama 5:12). Saatan a „wan kiiman”, enke fa Yesesi seefi  be taki (Yohanisi 8:44). A feyanti fu u di den e kai Saatan abi tyaipi makiti.

7. Fa den ogii yeye soi taki den abi tyaipi makiti?

⁷ Te wi e feti anga Saatan, da wi e feti anga ala den sama tu di e holibaka gi en. Dati wani taki wi e feti anga den somen engel di daai baka gi Gadu tu. Beibel e kai den engel ya ogii yeye (Openbaring 12:3, 4). A omen leisi den ogii yeye soi taki den abi makiti moo wi, fu di den e pina sama a omen sowtu fasi (Mateyesi 8:28-32; Malikisi 5:1-5). Noiti i mu feegete taki Saatan anga den ogii yeye abi tyaipi makiti (Mateyesi 9:34). Efu Yehofa á yeepi u, da noiti wi o poi wini a feti di wi e feti anga Saatan.

8. (a) San Saatan poti neen ede fu du? (Luku a fowtow na a bigin.) (b) Fa den sani di yu e si e soi taki den sama fu goontapu ya abi den seefi manii fu Saatan?

⁸ A apostel Pawlesi be taki Saatan de enke „wan lew di e bali”. Enke fa wan buku e soi, da a wowtu „bali” aini Giikitongo e soi go na a bali di wan meti e bali fu di angii e kii en. Anga ala fa ai tii a hii goontapu kaba, tokuso a á sai en. A de enke wan lew di e suku sama naamo fu nyan (1 Yohanisi 5:19). A de namonamo fu du ogii anga den salufu Kelesten di de a goontapu ya ete, anga den „taa sikapu” di e holibaka gi den (Yohanisi 10:16; Openbaring 12:17). Saatan poti neen ede fu puu a foluku fu Gadu a  pasi. A fasi fa Saatan meke sama du ogii anga den tuutuu Kelesten fanafu a ten fu den apostel te enke now, e soi fa Saatan abi ogii-ati.

9, 10. (a) Fa Saatan meke den Islayelisama sondu? (b) Saide Saatan be wani du ogii namonamo anga den Islayelisama? (c) Fa Saatan e fii te wan diniman fu Yehofa e du wan gaan sondu?

⁹ Saatan soi taki a abi ogii-ati a wan taa fasi tu. Te angii e kii wan lew, da tyali nái kisi en gi a meti di a wani kii. A nái hati en taki a kii en tu. Na aseefi fasi a de anga Saatan. Tyali nái kisi en gi den sama te ai du ogii anga den. Fa i denki Saatan be e fii te den Islayelisama be e hulu efuso te den be e soi taki den giili? Puubei fu si fa Saatan be e piisii di den kii Simri fu di a hulu. Puubei fu si tu fa a be e piisii di ogii miti Gehasi fu di a be abi takuudu.​—Numeri 25:6-8, 14, 15; 2 Kownu 5:20-27.

¹⁰ Saatan sabi fu saide a be wani du ogii anga den Islayelisama. Holi a pakisei taki a den Islayelisama be o meke a Mesiyas. Na a Mesiyas be o de a sama di be o masi Saatan neen ede. Neen be o soi tu taki a Gadu abi leti fu tii (Genesesi 3:15). Saatan á be wani fu Gadu tan wooko anga den Islayelisama. Neen meke a be e du ala san a poi fu meke den sondu. Yu á mu denki taki tyali be e kisi Saatan di David hulu anga Batiseiba. Tyali á be e kisi en tu di Mosesi á be poi go aini a Paamisi Kondee moo. Ai piisii te ai si taki wan diniman fu Gadu du wan gaan sondu. A den sowtu sondu ya ai koboloiki fu soso Yehofa.​—Odo 27:11.

11. Fu saide a kan taki a Saatan be e tesi Sala?

¹¹ Ná pikin buuse Saatan be e buuse a famii di be o meke a Mesiyas. Pakisei san pasa baka di Yehofa taigi Abalaham taki a be o meke a toon „wan gaan foluku” (Genesesi 12:1-3). Di Abalaham anga Sala be de a Egepte, neen Farao tyai Sala go neen osu. A be wani Sala toon a uman fi en. Ma Yehofa kibii Sala. A yeepi en di a polobelema ya miti en. (Leisi Genesesi 12:14-20.) Aseefi sani ya miti Sala aini a foto Gerar baka. A pisi ten de Sala á be meke Isaki ete (Genesesi 20:1-7). A kan taki a Saatan be e meke den sani ya miti Sala. Ná feegete taki Sala be gwe fika a gudu foto Ur fu go tan aini tenti. A tesi Saatan be wani tesi Sala anga den moin osu fu kownu Farao anga Abimeilek? A denki Saatan be denki taki Sala be o gwe fika Abalaham anga Yehofa, da a toow anga wan fu den kownu ya? Beibel nái taki a pisi de. Ma Saatan be o piisii te Yehofa á be o gi Sala a gaandi moo fu toon wan afo fu a Mesiyas. A á be o hati Saatan seefiseefi taki a poli a toowlibi anga a bun nen fu a uman ya. A á be o hati en taki Sala anga Yehofa be o poli mati. I si fa a abi ogii-ati!

12, 13. (a) Fa Saatan soi taki a abi ogii-ati baka di Yesesi meke? (b) Fa i denki Saatan e pakisei fu den yonkuuwan aini a ten ya di e dini Yehofa fu di den lobi en?

 ¹² A omen ondoo yali baka a ten fu Abalaham Yesesi mma be meke en a goontapu. Yu á mu denki taki a pikin ya be e moin gi Saatan, bika a be sabi taki neen be o toon a Mesiyas. Yesesi di be de a moo pelensipali bakapikin fu Abalaham, na a sama di be o „tapu den wooko fu Didibii” (1 Yohanisi 3:8). I denki Saatan be o si enke a abi ogii-ati tumusi efu a kii wan pikin? Nono. A nái booko en ede efu den sani di ai du bun efuso ogii. Gawgaw a seeka sani fu kii Yesesi puu. Fa a du a sani de?

¹³ Di den lukuman taigi Kownu Herodes taki den meke a „kownu fu den Dyu”, neen en ati boon te, a be wani kii a pikin (Mateyesi 2:1-3, 13). Neen meke a sende den suudati fi en fu kii ala den pikin boi na a pisi fu Betelehem di á pasa tu yali. (Leisi Mateyesi 2:13-18.) Ma den á fende Yesesi kii. San a sani ya e soi u fu Saatan? Saatan nái si a libi fu wan sani. A ná abi toobi anga pikinengee. A de enke wan „lew di e bali” tuutuu. Noiti i mu feegete fa a ogii kisi!

14, 15. Fa Saatan e „beendi a fusutan fu den sama di nái biibi”?

¹⁴ A wan enkii fasi fa Saatan sa meke sama daai baka gi Gadu, a te ai koli den (1 Yohanisi 4:8). Saatan e koli sama te, den nái si moo „taki den abi Gadu fanowdu” (Mateyesi 5:3). Didibii „beendi a fusutan fu den sama di nái biibi”. Neen meke den á poi fusutan san Beibel e taki fu Yehofa.​—2 Korentesama 4:4.

¹⁵ Falisi keliki a wan fu den sani di Saatan e moo koboloiki fu koli sama. Saatan sabi taki Yehofa wani sama „dini en wawan” (Ekisodesi 20:5). Pakisei fa ai piisii te ai si sama e dini den afo fu den, efuso te den e dini meti, bon anga taa sani enke gadu. A omen sama e biibi taki den e dini Gadu a wan bun fasi. Ma den sani di den e du a sani di falisi keliki e leli sama. Na aseefi sani be e miti den Islayelisama di be e libi aini a ten fu Yesaya. Neen meke Yehofa be akisi den taki: „Fu saide wi e bai sani naamo di nái tapu angii? Fu saide meke wi e bai sani di ná abi wini anga a moni di u wooko? Aliki mi bun. U nyan bunbun nyanyan, da wi o piisii”.​—Yesaya 55:2.

16, 17. (a) Fu saide Yesesi taigi Peitilisi taki: „Pasa go a mi baka, i Saatan”? (b) Fa Saatan sa koli u fu wi á de na ain moo?

¹⁶ Saatan poi koli den sama tu di e dini Gadu anga den hii ati. Pakisei san be pasa di Yesesi be taigi den apostel fi en taki sama be o kii en. A apostel Peitilisi di be lobi Yesesi taki: „Masaa, i mu luku iseefi bun. A sani  ya ná o miti i seefiseefi”. Neen Yesesi taigi Peitilisi taki: „Pasa go a mi baka, i Saatan!” (Mateyesi 16:22, 23). Fu saide Yesesi be kai Peitilisi „Saatan”? Yesesi be sabi taki a á be o teke langa moo fosi a be o dede gi libisama. A dede fi en be o soi taki Didibii a wan leiman. A ten de a ná be yuu fu Yesesi ’luku enseefi bun’. Saatan be o piisii efu Yesesi á be de na ain.

¹⁷ Fu di a kaba fu a goontapu ya de koosube, meke useefi e libi aini wan pelensipali ten. Saatan wani u ’luku useefi bun’, neen meke a wani u suku balinen efuso gudu aini a goontapu ya. A wani u feegete taki wi e libi aini den kiiboi dei fu a goontapu ya. A á wani u de na ain. Ma ná meke a fende i koli! Meke moiti fu „de na ain” (Mateyesi 24:42). Noiti i mu biibi a lei fu Saatan taki a kaba fu a goontapu nái kon ete efuso taki a ná o kon seefiseefi.

18, 19. (a) Fa Saatan wani gi u a denki taki Gadu á lobi u? (b) Fa Yehofa e yeepi u fu de na ain?

¹⁸ Saatan wani koli u a wan taa fasi tu. A wani u biibi taki Gadu á lobi u. A wani u biibi tu taki noiti Gadu o gi u paadon fu den sondu fu u. Ma den sani ya a soso lei. Pakisei a sani ya. Sama na a sama di Yehofa á lobi? A Saatan. Sama na a sama di Gadu ná o gi paadon noiti? A Saatan. Ma Beibel e taki fu den sama di e dini Gadu taki: „Gadu nái du sani a wan kukutu fasi. Neen meke a ná o feegete a wooko di u du gi en, anga a soi di u soi taki u lobi a nen fi en” (Hebrewsama 6:10). Ala den sani di wi e du fu meke Yehofa piisii, e bigi gi en. Noiti ai si a wooko di wi e wooko gi en enke wan lawlaw sani. (Leisi 1 Korentesama 15:58.) Neen meke yu á mu gi Saatan pasi fu a fende i koli.

¹⁹ Enke fa u si, da Saatan abi makiti, a abi ogii-ati, anga ai koli sama. San o yeepi u fu wini a feti di wi e feti anga a feyanti ya? Yehofa gi wi a Wowtu fi en fu soi u fa Saatan e wooko fu u sa „sabi fa ai koli sama” (2 Korentesama 2:11). Efu u sabi ala den fasi fa Saatan e meke moiti fu koli u, da a o moo makiliki gi u fu de na ain. Ma a ná sabi u mu sabi namo fa Saatan e koli sama. Beibel e taki: „Saka useefi a Gadu ondoo, da toto futu gi Saatan, da a o lon gwe” (Yakowbesi 4:7). Aini a taa artikel, wi o go luku dii sani anga san u mu luku bun, efu u wani wini a feti di wi e feti anga Saatan.