1. Sowtu sani di u poi du sa yeepi u fu waka a Yehofa baka?

WINSI u ná abi den polobelema di son sama abi, tokuso u poi fusutan fa den e fii, bika a so Yehofa meke u. (Leisi Efeisesama 5:1, 2.) Fa a fusutan di wi e fusutan fa taawan e fii, sa yeepi u fu waka a Yehofa baka? Fu saide meke u mu luku bun anga den sani di wi e pakisei?

2. Fa Yehofa e fii te ogii e miti u?

² Yehofa paamisi u wan bun libi sondee pina aini a ten di e kon. Den salufuwan o abi a okasi fu go libi a hemel, ma den taa sikapu o libi fu teego a goontapu ya (Yohanisi 10:16; 17:3; 1 Korentesama 15:53). Ma anga ala fa Yehofa paamisi u den sani ya, tokuso ai fusutan fa wi e fii te ogii e miti u aini a ten ya. A be e hati Yehofa di a be si fa a foluku fi en be e pina aini Egepte. Beibel e taki: „A be e du en ogii” (Yesaya 63:9). A ten  di den Islayelisama be e bow a tempel baka, den be e feele den feyanti fu den di be e puubei fu tapu a wooko. Ma Yehofa be e fusutan fa den be e fii. A be taigi den taki: „A sama di o holi u, e holi mi ain gaasi” (Sakaliya 2:8). Leti enke wan mma di lobi en pikin, a so Yehofa lobi den diniman fi en. A wani yeepi den tu (Yesaya 49:15). Wi o lobi taawan enke fa Yehofa lobi den, te wi e puubei fu fusutan fa den e fii.​—Psalm 103:13, 14.

3. San be yeepi Yesesi fu abi tyali-ati anga taawan?

³ Winsi fa Yesesi á be abi den polobelema di taa sama be abi, tokuso a be e fusutan fa den e fii. A be sabi taki a libi be e taanga gi den. Den keliki fesiman be e koli den. Den man ya be e fooseli den sama anga wantu weiti di denseefi be meke. A foluku be e feele den (Mateyesi 23:4; Malikisi 7:1-5; Yohanisi 7:13). Winsi fa Yesesi á be e feele efuso biibi den keliki fesiman ya, tokuso a be e fusutan fa a foluku be e fii. A be e hati en te a be e si fa den fesiman be e pina a foluku. Sama á be de fu yeepi den, leti enke „sikapu di ná abi sikapuman” (Mateyesi 9:36). Leti enke Yehofa, a so Yesesi lobi libisama tu. A be abi „tyali-ati” anga den.​—Psalm 103:8.

4. San Yesesi be e te a be e si fa sama e pina?

⁴ Te Yesesi be e si sama e pina, a be e yeepi den, bika a be lobi den. A be abi den manii fi en Dda. Wan leisi di den apostel be kaba peleiki wan hii dei, den be weli. Neen meke den be wani go teke boo den wawan a wan peesi. Ma di den doo ape, neen Yesesi si taki somen sama be de ape e wakiti en. A be fusutan taki den be abi yeepi fanowdu. Neen meke „a bigin leli den tyaipi sani”.​—Malikisi 6:30, 31, 34.

5, 6. San u mu du efu u wani lobi taawan enke fa Yehofa lobi den? (Luku a fowtow na a bigin.)

⁵ San u mu du efu u wani lobi taawan enke fa Yehofa lobi den? Kon u taki wan yonkuu baala di den e kai Alan de aini wan kemeente, da en pakisei de a wan gaandi baala di á poi waka bun. A gaandi baala nái si bun tu. Alan e pakisei a sani di Yesesi be taki aini Lukasi 6:31, pe sikiifi taki: „San i wani sama du gi i, a dati i mu du gi den.” Neen meke Alan e akisi enseefi taki: ’San mi be o wani taa sama du gi mi?’ Kande ai taki: ’Mi be o wani den pee futubali anga mi!’ Ma a gaandi baala á poi lon pee futubali. Neen meke a sani di Alan mu akisi enseefi na: ’Efu a mi be de a gaandi baala, san mi be o wani sama du gi mi?’

⁶ Winsi fa Alan yonkuu, tokuso ai puubei fu fusutan fa a be o fii efu neen be de a gaandi baala. Ai meke ten gi a baala ya, da ai aliki bun te ai taki. A sani de meke a kon fusutan  taki a taanga gi a baala fu man leisi Beibel. Ai taanga gi en tu te a mu waka osu fu osu aini a peleikiwooko. A no fosi ai fusutan fa a sa yeepi a baala ya. A wani du ala san a poi fu yeepi en. Efu u wani waka a Yehofa baka, da u mu puubei fu fusutan fa taawan e fii. U mu lobi den tu.​—1 Korentesama 12:26.

7. Fa wi o du sabi san e miti den baala anga sisa fu u?

⁷ A ná ala yuu a makiliki fu fusutan fa wan taa sama e fii, moomoo te a sani di e miti a sama á miti u wan dei. A omen baala anga sisa fu u de anga ati-sikin fu di den siki efuso fu di den kon gaandi. Taawan e fii booko-saka fu di den e kusumi efuso fu di sama be du ogii anga den di den be moo nyoni. Son wan mu kiya pikin den wawan fu di den ná abi wan toowpaa fu yeepi den. Taawan baka abi famii di nái dini Yehofa. A sani ya e soi taki ala sama abi polobelema, winsi fa a ná ala wi abi denseefi polobelema. Ma tokuso u wani soi taawan taki u lobi den. U wani yeepi den tu. San u sa du fu yeepi den? A ná ala sama abi aseefi yeepi fanowdu. Ma efu u aliki bun te den e taki, efu u puubei fu fusutan tu fa den e fii, da wi o sabi moo bun fa u sa yeepi den. Kande u sa yeepi den fu fusutan fa Yehofa e pakisei fu a polobelema di den abi. Kande u sa yeepi den anga wan fuka di den abi tu. Te wi e du den sani ya, da wi e waka a Yehofa baka.​—Leisi Romesama 12:15; 1 Peitilisi 3:8.

8. San be yeepi Yesesi fu soi switifasi?

⁸ Yehofa e soi switifasi gi ala sama (Lukasi 6:35). Yesesi de enke en Dda. San be yeepi Yesesi fu soi switifasi gi sama di a be de a goontapu ya? A be e holi a pakisei fa den be o fii te a be o taki efuso du wan sani. Wan uman di á be e libi wan bun libi be kon a Yesesi. A be e kee te, en wataa ain nati Yesesi paata futu. Yesesi be si taki a be hati a uman tuutuu taki a fasi fa a be e libi á be bun. A be fusutan tu taki efu a be o bali en efuso taigi en hati sani, da a uman be o fii moo ogii. Neen meke a gafa en, neen a gi en paadon. Wan Faliseiman di be de ape, á be lobi san Yesesi du. Ma Yesesi taki a wan switifasi anga en tu.​—Lukasi 7:36-48.

9. Sowtu sani o yeepi u fu soi switifasi enke Yehofa?

 ⁹ Fa u sa soi switifasi enke Yehofa? Efu wi á wani hati a fii fu taawan, da u mu denki fosi u taki efuso du wan sani. A apostel Pawlesi be sikiifi taki wan Kelesten „nái suku toobi, ma a mu libi bun anga ala sama” (2 Timotiyesi 2:24). Pakisei luku fa i sa soi switifasi gi taawan a den okasi ya: San yu o du efu wan wookoman fi i nái du en wooko bun? Efu wan baala di á be kon omen mun a zaal, kon a komakandaa, san yu o taigi en? Fa i sa soi switifasi gi wan sama di i go peleiki gi, ma a taigi i taki a ná abi ten fu aliki i? Efu yu uman akisi i taki: „Saide meke yu á taigi mi taki a so wan sani i be o du a sataa ya?” Yu o taki a wan switifasi anga en? U mu e holi a pakisei fa taawan e fii. U mu pakisei tu fa den sani di wi o taigi den o meke den fii. Den sani de o yeepi u fu sabi moo bun san u mu taki anga san u mu du. A so wi o soi switifasi enke Yehofa.​—Leisi Odo 15:28.

10, 11. Fa u sa soi taki u koni leti enke Yehofa?

¹⁰ Ná pikin koni Yehofa koni. Efu a wani, a poi si san o pasa aini a ten di e kon. Ma aladi wi á poi si san o pasa aini a ten di e kon, tokuso useefi sa soi taki u koni. A on fasi? Fosi u du wan sani, u mu pakisei luku fosi sowtu bakapisi a o tyai gi wi, anga taawan. Wi á mu de enke den Islayelisama. Den á be e pakisei san be o miti den te den be o taangayesi Yehofa. Anga ala fa Yehofa be du somen sani gi den, tokuso Mosesi be sabi taki den Islayelisama á be o wooko anga den weiti fu Yehofa. Neen meke a be taki: „Den a wan foluku di nái teke taki. Nawan fu den abi fusutan. Efu den be koni baa! Da den be o pakisei den sani ya. Den be o pakisei san be sa miti den bakaten.”​—Deitolonomi 31:29, 30; 32:28, 29.

¹¹ Kon u taki yu abi mofu fu toow anga wan sama di i lobi. A fii di yu abi fu didon anga a sama de e taanga. Ma noiti i mu du wan sani di sa meke yu anga Yehofa poli. Pe fi i du a sani de, i mu soi taki u koni. Wi á mu du sani di o tyai ogii gi u bakaten. Du san Yehofa e taigi u aini Beibel. Beibel e taki: „Wan sama di koni e go kibii te a si taki ogii o miti en. Ma a sama di ná abi ondoofeni e waka go doo, neen meke sani miti en.”​—Odo 22:3.

12. Fa den sani di wi e pakisei sa meke ogii miti u?

¹² Wan sama di koni e luku bun anga san ai pakisei, bika a sabi taki den sani di ai pakisei sa tyai wini gi en efuso ogii. A leti enke faya. Efi i koboloiki faya bun, da a sa tyai wini gi i. I sa koboloiki en fu boli nyanyan. Ma faya sa tyai ogii gi i tu. Te i nái koboloiki en bun, a sa boon yu osu efuso kii den sama di de aini a osu. A so a de anga den sani di wi e pakisei tu. Efu wi e pakisei den sani di Yehofa e leli u, da a o tyai wini gi u. Ma efu wi e tan pakisei a didon di u wani didon anga wan sama di á de wi toowpaa, efuso e pakisei taa ogii, da te fu kaba wi o du den sani de tuutuu. A sani de sa meke Yehofa daai baka gi u.​—Leisi Yakowbesi 1:14, 15.

13. Fa Efa be e pakisei taki a libi fi en be o de?

¹³ U sa leli wan sani fu a fosi uman di den e kai Efa. Yehofa be taigi Adan anga Efa taki den á be mu nyan a sii fu „a bon di den e kai sabi bun anga ogii” (Genesesi 2:16, 17). Ma Saatan be taigi Efa taki: „I ná o dede seefi, bika Gadu sabi taki a dei di yu o nyan a sii fu a bon, yu ain o opo, yu o kon de enke Gadu, yu o sabi san bun anga san ogii.” Efa be bigin pakisei taki a libi fi en be o moo bun te a be o taki gi enseefi san bun anga san ogii. A be e pakisei a sani ya naamo, neen te fu kaba a si taki „a sii fu a bon be bun fu nyan anga fa a be fiti ain, eeye, a á be man wai ain puu na a bon seefi”. San be de a bakapisi? „A piki wan fu den sii na a bon neen a nyan. Bakaten a gi en man a sii fu nyan tu, di den tu man be de makandii. Neen a man seefi bigin nyan” (Genesesi 3:1-6). Na a sani di den du de „meke sondu de a goontapu, neen sondu tyai dede” (Romesama 5:12). Efa á be mu e tan pakisei sani di á bun.

14. Sowtu wasikoi Beibel e gi wi?

¹⁴ A tuu taki a sondu fu Efa ná abi fu du anga hulu. Tokuso Beibel e wasikoi wi taki wi á mu e pakisei fu didon anga wan sama di á de wi toowpaa. Yesesi be taki: „Ala sama di e luku wan uman naamo anga a fii fu didon anga en, didon anga en kaba aini en ati” (Mateyesi 5:28). Pawlesi seefi be taki: „Ná sidon e pakisei fa yu o du den sani di a sondu sikin wani.”​—Romesama 13:14.

15. San mu de a moo pelensipali sani gi u? Fu saide?

¹⁵ Beibel e taigi u tu taki u mu e pakisei naamo fa u sa du sani fu meke Yehofa piisii, ma wi á mu e pakisei fu kon gudu. Winsi wan sama gudu, tokuso a moni di a abi á poi meke a tan a libi (Odo 18:11). Yesesi be taki wan sama di e kibii gudu aini a goontapu ya a wan don sama, bika a nái poti Gadu a fesi aini en libi. Den sowtu sama de „á gudu aini Gadu ain” (Lukasi 12:16-21). Te wi e ’kibii den gudu fu u aini hemel’ fu di wi e du den sani di Yehofa fende bun, da ai piisii. Useefi o piisii tu  (Mateyesi 6:20; Odo 27:11). Nawan sani pelensipali moo a de di wi anga Yehofa de mati.

16. San o yeepi u te wi e booko wi ede tumisi?

¹⁶ Efu wi e suku fu kon gudu aini a goontapu ya, a soso booko-ede wi o abi (Mateyesi 6:19). Yesesi be taki efu wan sama e booko en ede tumisi anga moni, a ná o poi poti a Kownukondee fu Gadu a fesi aini en libi (Mateyesi 13:18, 19, 22). Son sama e booko den ede naamo taki iniiwan yuu ogii sa miti den. Ma efu wi e booko wi ede enke den sama ya, wi o siki, anga ala u ná o poi fitoow Yehofa moo. Ala yuu u mu abi a biibi taki Yehofa o yeepi u. Beibel taki: „Tyaipi booko-ede o meke wan sama fii booko saka, ma te wan sama taki switi anga en, da ai piisii” (Odo 12:25). Neen meke efu yu e booko yu ede anga wan sani, puubei fu taki anga wan sama di e dini Yehofa, wan sama di sabi i bun. Den sama di sa gi i taanga-sikin fu fitoow Yehofa a sama enke i mma, i dda, i man, yu uman, efuso wan bun mati. Den sa yeepi i tu fi i á booko yu ede tumisi.

17. Fa Yehofa e yeepi u te wi abi booko-ede?

¹⁷ Yehofa sabi moo ala taa sama fa wi e fii. A sabi fa a mu yeepi u te wi e kusumi. Pawlesi be sikiifi taki: „Yu á mu booko yu ede anga nawan sani, ma taigi Gadu ala sani te yu e begi. Gi en daa, begi en fayafaya. Da a freide fu Gadu di libisama á poi fusutan o kibii wi ati anga u fusutan anga yeepi fu Yesesi Kelestesi” (Filipisama 4:6, 7). Neen meke te yu e kusumi, pakisei den somen fasi fa Yehofa e yeepi i fu yu anga en á poli mati. A gi u den baala anga sisa fu a kemeente, den owluman, a koni saafu di u sa fitoow, den engel, anga Yesesi fu yeepi u.

18. Fa a pakisei di u poi pakisei sani e tyai wini gi u?

¹⁸ Enke fa a artikel ya soi u, da wi e waka a Yehofa baka te wi e puubei fu fusutan fa taawan e fii (1 Timotiyesi 1:11; 1 Yohanisi 4:8). Wi o fii bun te wi o soi switifasi gi taawan efuso te u lobi den. Te u nái kusumi tumisi, efuso te wi e denki bun fosi u du wan sani, da a sani de o meke u fii bun tu. Meke moiti fu pakisei fa a libi o de te a Kownukondee fu Gadu o tii goontapu. Meke moiti tu fu waka a Yehofa baka.​—Romesama 12:12.