1. Fa u sa koboloiki a begi fu Yesesi di sikiifi aini Mateyesi 6:9-13 te wi e peleiki?

A OMEN sama sabi a begi fu Yesesi di sikiifi aini Mateyesi 6:9-13. Te wi e peleiki, da a den sani di Yesesi taki aini a begi ya wi e koboloiki fu soi sama taki a Kownukondee a wan tuutuu tiimakiti di Gadu sete. Na a tiimakiti ya o meke goontapu toon wan paladeisi. Wi e koboloiki a pisi di e taki „a nen fi i mu santa” tu, fu soi sama taki Gadu abi wan nen. Wi e leli den tu taki den mu si a nen fu Gadu enke wan santa sani.​—Mateyesi 6:9.

2. Fa u du sabi taki Yesesi á wani wi e taki aseefi sani te wi e begi?

² A wani Yesesi wani u taki aseefi sani ala yuu te wi e begi, enke fa son sama gwenti begi? Nono. Yesesi be taki: „Te wi e begi wi á mu e taki aseefi sani naamo” (Mateyesi 6:7). Di Yesesi be soi den disipel fi en wan taa leisi fa den mu begi, a be taki aseefi sani di a be kai aini a begi di a be leli den a fosi leisi, ma a leisi de a koboloiki taa wowtu  (Lukasi 11:1-4). A sani ya e leli u taki Yesesi be wani soi u san a den sani di u mu e akisi te wi e begi.

3. San i mu akisi iseefi te yu e ondoosuku san Yesesi taki aini a begi di a be leli den bakaman fi en?

³ Aini a artikel ya anga a taawan, wi o taki finifini fu a begi di Yesesi be leli den bakaman fi en. Te yu e leisi a artikel ya, i mu akisi iseefi taki: ’Fa a begi ya sa yeepi mi fu begi moo bun? Mi e du den sani di Yesesi be taki aini a begi’?

4. San den wowtu „A Dda fu u” e leli u? Fu saide u sa kai Yehofa u Dda?

⁴ Den wowtu „a Dda fu u” e membee wi taki a Yehofa na a Dda fu ala den baala anga sisa fu u a hii goontapu (1 Peitilisi 2:17). Yehofa na a Dda fu den salufu Kelesten di o go a hemel, bika a teke den enke en manpikin (Romesama 8:15-17). Den sama di o libi fu teego a goontapu sa kai Yehofa „Dda” tu, bika neen gi den libi anga ala den taa sani di den abi fanowdu. Den sama ya o toon „Gadu pikin”. A sani ya o pasa baka te den ná o abi sondu moo anga te den holidoo te Saatan o tesi den a lasiti leisi.​—Romesama 8:21; Openbaring 20:7, 8.

5, 6. San na a moo bun kado di mma anga dda sa gi den pikin? San den pikin mu du anga a kado ya? (Luku a fowtow na a bigin.)

⁵ Te mma anga dda e yeepi den pikin fu si Yehofa enke den Dda, te den e leli den fa fu begi, da a leti enke den e gi den pikin wan kado. Wan kelen-owluman fu Zuid-Afiikan taki: „Fanafu di den meisyo fu mi be de potopoto pikin, mi be gwenti begi ala neti anga den, boiti te mi á be de a osu. Den umanpikin fu mi e taki den á poi membee san mi be e taki aini a begi, ma den sabi ete fa den be e fii den pisi ten de, te u be e taki anga Yehofa a wan lesipeki fasi. Den be e fii bun, den be e fii tu taki Yehofa be e kibii den. Di denseefi be poi begi, mi be e gi den taanga-sikin fu begi taanga, bika mi be wani yee san den e taigi Yehofa. A so mi be e sabi fa den e pakisei anga fa den e fii tuutuu. Mi be e leli den fu taki fu wantu sani fu a begi di Yesesi be leli den bakaman fi en, te den be e taki anga Yehofa. A so den be e leli fu begi moo bun.”

⁶ Di den umanpikin fi en kon moo bigi, den tan meke moiti fu kon moo koosube a Yehofa. Nownow den toow. Den anga den man e dini Yehofa aini a fuuten diniwooko. A moo gaan bun di mma anga dda sa gi den pikin, a te den e yeepi den fu toon moo bun mati anga Yehofa. Ma a den pikin seefi mu meke moiti fu tan bun mati anga Yehofa.​—Psalm 5:11, 12; 91:14.

7. Sowtu gaandi wi abi? Ma san useefi mu du?

⁷ Wi abi a gaandi fu sabi a nen fu Gadu. Wi abi a gaandi fu „tyai a nen fi en” tu (Toli 15:14; Yesaya 43:10). Wi e begi Yehofa fu a nen fi en mu santa. Te wi e begi so, da u nái akisi Yehofa namo fi en nen mu santa, ma fu a yeepi u tu fu wi á taki efuso du sani di o gi en polinen. Wi á mu de enke wantu Kelesten aini a ten fu den apostel di á be e du den sani di den be e leli taawan. Pawlesi be taigi den taki: „A fu wi ede meke den taa foluku e gi Gadu polinen.”​—Romesama 2:21-24.

8, 9. Sowtu toli e soi taki Yehofa e yeepi den sama di wani santa a nen fi en?

 ⁸ Wi e du ala san u poi fu lesipeki a nen fu Yehofa. Baka di wan sisa fu Noorwegen man be dede, neen en wawan be kon fika anga a boi fi en di be abi tu yali. A sisa ya taki: „A á be makiliki gi mi a pisi ten de. Dei á be e pasa di mi á be e begi. Beina na ala yuu fu a dei mi be e begi Yehofa fu a yeepi mi fu mi á buuya tumisi. Mi be e begi Yehofa tu fu yeepi mi fu mi á du sani di be o meke Saatan fende a okasi fu wisiwasi en. Mi be wani santa a nen fu Yehofa. Mi be wani a boi fu mi si en dda baka aini a paladeisi tu.”​—Odo 7:11.

⁹ Yehofa aliki den begi fu a sisa ya? Eeye. A be kisi taanga-sikin fu di a be gwenti kon makandii anga den baala anga sisa fi en. Baka feifi yali a sisa ya toow anga wan owluman. A boi fi en abi 20 yali nownow. En na wan dopu baala. A sisa ya taki: „Ai switi gi mi taki a man fu mi yeepi mi kiya a boi fu mi.”

10. Fa Yehofa o santa a nen fi en doo pe a mu santa doo?

¹⁰ Yehofa o santa a nen fi en doo pe a mu santa doo, te a o kii ala den sama di e gi en polinen anga den sama di á wani a tii den. (Leisi Eseikiyeli 38:22, 23.) Sama ná o abi sondu moo a ten de. Ala libisama anga den engel o dini Yehofa. Den o lesipeki a santa nen fi en tu. Te fu kaba, da „Gadu o de ala sani gi ala sama”​—1 Korentesama 15:28.

11, 12. San Yehofa meke den diniman fi en kon fusutan aini a yali 1876?

¹¹ Fosi Yesesi go a hemel baka, neen den disipel fi en akisi en taki: „Masaa, aini a ten ya yu o sete a Kownukondee gi Islayeli baka?” Yesesi be taigi den taki a ten á doo ete fu den sabi on ten Gadu Kownukondee o bigin tii. A taigi den taki anga a peleikiwooko den mu moo booko den ede, bika a dati na a moo pelensipali wooko. (Leisi Toli 1:6-8.) A be leli den disipel fi en taki den be mu e begi fu a Kownukondee fu Gadu kon. Den be mu e angii fu a kon tu. Neen ede meke te anga a dei fu tide, useefi e begi fu a Kownukondee kon.

¹² Di a ten be koosube fu Yesesi tii enke Kownu, neen Yehofa yeepi den diniman fi en fu sabi on ten a sani de o pasa. Aini a yali 1876, Charles Taze Russell be sikiifi wan artikel di den e kai „A ten fu den taakondee sama. On ten a o kaba?” A be sikiifi taki den „seibin ten” aini a polofeititoli fu Daniyeli, anga „a ten di poti gi den foluku” aini a polofeititoli fu Yesesi, na aseefi. A artikel de be soi taki a ten de be o kaba aini a yali 1914. * (Luku san sikiifi a ondoose.)​—Daniyeli 4:16; Lukasi 21:24.

13. San be pasa aini 1914? San den sani di pasa a goontapu fanafu 1914 e soi u?

¹³ Aini a yali 1914 wan feti be booko aini Europa. Bakaten a feti de be feti doo hii goontapu. A feti ya be tyai wan gaan angii ten kon a goontapu. Di a feti ya kaba aini 1918, neen wan takuu siki booko a goontapu. A siki ya kii sama moo a feti. Yesesi be taki den sani ya be o de enke wan „maiki” di e soi taki ai tii enke Kownu aini hemel (Mateyesi  24:3-8; Lukasi 21:10, 11). Na aseefi yali de, Yesesi „go feti anga den feyanti fi en baka makandaa, te enke a wini ala den” (Openbaring 6:2). Yesesi be fiingi Saatan anga den ogii yeye kon a goontapu. A so a polofeititoli bigin kon tuu di e taki: „Heelu fu goontapu anga se. Bika Didibii saka kon a wi anga gaan ati boon, fu di a sabi taki a ná abi langa moo.”​—Openbaring 12:7-12.

14. (a) Saide meke wi e tan begi fu a Kownukondee fu Gadu kon? (b) San na a moo pelensipali wooko di u mu du aini a ten ya?

¹⁴ A polofeititoli di sikiifi aini Openbaring kapitel 12, e yeepi u fu fusutan saide omen ogii bigin pasa a goontapu na a ten di Yesesi bigin tii enke Kownu fu a Kownukondee fu Gadu. Winsi fa Yesesi e tii enke Kownu aini hemel, tokuso a Saatan e tii a goontapu. Ma te Yesesi o puu ala den ogii di e pasa a goontapu, da a o „wini ala den feyanti” fi en. Neen ede meke u mu e begi naamo fu a Kownukondee fu Gadu kon. U mu du ala san u man tu fu paati a bun nyunsu fu a Kownukondee. Te wi o du a sani de, da a sani di Yesesi be taki o kon tuu. A be taki: „A bun nyunsu fu a Kownukondee fu Gadu mu peleiki na a hii goontapu meke ala sama yee, dan fosi a kaba o kon.”​—Mateyesi 24:14.

15, 16. A begi wawan u mu e begi fu sani waka enke fa Gadu wani a goontapu? Taki fu saide.

¹⁵ Wan sani fu sigisi dunsu yali pasa, sani be e waka a goontapu enke fa Gadu wani. Neen ede meke Yehofa be taki ala sani „be bun” (Genesesi 1:31). Ma bakaten Saatan taangayesi Gadu. Fanafu a ten de, gaanse sama nái libi enke fa Gadu wani. Ma nownow a moo enke aitin miliyun sama e dini Yehofa. Den e begi fu sani waka a goontapu  enke fa Gadu wani. Den e meke moiti tu fu du san Gadu wani. Den e du ala san den man fu paati a bun nyunsu fu a Kownukondee gi sama.

¹⁶ Wan zendeling fu Afiikankondee di abi 80 yali, dopu aini 1948. A zendeling ya e taki: „Mi gwenti begi gi den sama di de enke sikapu fu den yee a bun nyunsu. Mi e begi tu fu den kon sabi Yehofa fosi a lati. Boiti dati, fosi mi peleiki gi wan sama, mi e akisi Yehofa fu a gi mi koni fu mi sa doo a sama ati. Mi e begi tu fu a yeepi u fu solugu den sikapu di u fende kaba.” A gaandi sisa ya yeepi omen sama fu kon sabi Yehofa. I sabi taa gaansama di e du ala san den man fu du san Yehofa wani?​—Leisi Filipisama 2:17.

17. Fa yu e fii te yu e pakisei den sani di Yehofa o du gi libisama aini a ten di e kon?

¹⁷ Solanga Yehofa á kii den feyanti fi en puu a goontapu, u mu e tan begi fu sani waka a goontapu enke fa a wani. Da a goontapu o toon wan paladeisi. A omen miliyun sama di be dede o kon a libi baka. Yesesi be taki „wan ten o kon di ala den sama di de aini den geebi o yee en siten, da den o kon a doo” (Yohanisi 5:28, 29). Pakisei fa wi o piisii te wi o miti anga den lobiwan fu u di be dede! Gadu „o dee den wataa ain” fu u (Openbaring 21:4). Gaanse fu den sama di o kon a libi baka a ná sama di be e libi enke fa Gadu wani, bika den á be fende a okasi fu leli sabi Yehofa anga Yesesi. Wi o piisii te wi o leli den fu libi enke fa Gadu wani. Bika na a sani de o yeepi den fu fende a „teego libi”.​—Toli 24:15; Yohanisi 17:3.

18. San a den moo pelensipali sani di libisama abi fanowdu?

¹⁸ Te a Kownukondee fu Gadu kon, a o santa a nen fi en. Ala sama a hemel anga goontapu o dini en enke wan famii. Yehofa o gi libisama den sani di den abi taanga fanowdu, te a o meke den dii sani fu a begi fu Yesesi kon tuu. Aini a taa artikel, wi o taki fu den taa pelensipali sani di Yesesi leli u aini a begi ya.