1-3. Saide meke Lana e biibi taki Yehofa sabi san wi abi fanowdu?

WAN pionili sisa di den e kai Lana, ná o feegete san be pasa di a be go a Doisilikondee aini 2012. A be si fa tu sani di a be akisi Yehofa kon tuu. Di a be de aini wan loko fu go teke opalani, neen a begi Yehofa fu yeepi en fu a sa peleiki gi wan sama. Di a doo a pe den e teke opalani, neen den taigi en taki na a taa dei fosi a opalani di mu tyai en, o gwe. Neen Lana begi Yehofa fu a yeepi en, bika a moni fi en á be ipi moo. A be abi wan peesi fanowdu fu pasa a neti tu.

² Fa i si Lana kaba begi, a so a yee wan sama kai en wanten. A sama taki: „Onfa Lana, san yu e du ya?” A wan boi di en anga en be go na a wan sikoo be kai en. A be kon teke opalani fu go a Zuid-Afiikan. En mma anga en gaanmma be kon poti en a opalani. Di Lana taigi den san miti en, neen a mma anga a gaanmma fu a boi kai en fu go siibi a den osu. Den be akisi en omen sani fu a biibi fi en anga  a wooko di ai du enke kowownu pionili.

³ Baka di Lana diingi faya wataa a taa dei, neen a taigi den, den taa sani di den be wani sabi fu Beibel. Lana be meke den sikiifi den telefon nombuu anga a peesi pe den e tan gi en. Da a be o meke wan sama kon a den efu den be wani sabi taa sani. Lana be doo bun a osu. Ai pionili ete. A be si taki Yehofa aliki den begi fi en, bika a be gi en san a be abi fanowdu.​—Psalm 65:2.

4. San wi o luku aini a artikel ya?

⁴ Te polobelema miti u wanboo wanboo so, da a nái taanga gi u fu begi Yehofa fu a yeepi u. Yehofa e piisii tu fu aliki den begi fu u (Psalm 34:15; Odo 15:8). Ma a begi fu Yesesi di a be leli u, e soi taki taa sani de di de moo taanga fanowdu. Aini a artikel ya, wi o luku fa den fo lasiti sani aini a begi di Yesesi be leli u, sa yeepi u fu tan dini Yehofa.​—Leisi Mateyesi 6:11-13.

5, 6. Fu saide meke Yesesi taki u mu akisi Yehofa fu a gi „wi a beele” di wi abi fanowdu, winsi wi abi nyanyan sai?

⁵ Yesesi be leli u taki u mu begi Yehofa fu a gi wi a „beele di wi” abi fanowdu. A á taki „a beele di mi” abi fanowdu. Wan kelen-owluman aini Afiikan di den e kai Victor taki: „Mi lobi gi Yehofa daa taki mi anga mi uman ná abi fu booko wi ede anga nyanyan efuso fa wi o pai yuu osu. Bika den baala e solugu u ala dei. Mi e begi gi den baala anga sisa di e yeepi u tu, fu den wooko anga koni te den abi moni polobelema.”

⁶ A kan taki wi abi nyanyan sai. Ma tyaipi baala anga sisa fu u e pina. A kan taki gaan ogii pasa na a kondee pe den e tan. Boiti a begi di u sa begi gi den, u sa langa wan ana fu yeepi den tu. Kande u sa paati den sani di wi abi anga den. U sa gi moni tu fu holibaka gi a wooko di Yehofa Kotoigi e du a hii goontapu. U sabi taki a moni di wi e poti e yeepi den baala anga sisa fu u di abi yeepi fanowdu.​—1 Yohanisi 3:17.

7. Fa Yesesi soi u taki wi á mu booko wi ede anga a taa dei?

⁷ Baka di Yesesi leli den bakaman fi en fa den mu begi, neen a soi u taki wi á mu booko wi ede anga goontapu gudu. A be soi taki a Yehofa e solugu den boomiki di e goo aini a sabana. Neen meke a be taki: „U sabi kiin taki aladi u nái biibi sai, tokuso a o gi u sani fu wei, ná so noh? Neen ede meke noiti u mu booko wi ede anga sani. Noiti u mu akisi useefi taki, . . . San wi o wei?’” Neen a taki ete wan leisi taki: „Ná booko yu ede anga a taa dei” (Mateyesi 6:30-34). Wi á mu booko wi ede anga den sani di wi abi fanowdu gi a ten di e kon, ma u mu teke en fu bigi te u fende den sani di wi abi fanowdu a dei de. U sa begi fu u fende wan peesi fu tan, wan wooko fu solugu wi osufamii, efuso koni fu sabi san u mu du fu de gusontu.  Ma u mu begi gi wan taa sani tu di de moo taanga fanowdu.

8. San Yesesi be wani soi u di a taki u mu akisi a beele di wi abi fanowdu fu a dei de? (Luku a fowtow na a bigin.)

⁸ Den sani di Yesesi be taki fu beele, e meke u pakisei wan taa sani di a be taki. A be taki: „Sama á mu libi fu beele wawan, ma fu ibii wowtu di Yehofa mofu taki” (Mateyesi 4:4). Neen meke u mu e begi Yehofa fu ai leli u. U mu e begi tu fu a yeepi u fu tan koosube neen.

9. Saide den sondu fu u de enke wan paiman di u mu pai Yehofa?

⁹ Yesesi be taki: „Gi u paadon fu u sondu” (Mateyesi 6:12; Lukasi 11:4). Den sondu fu u de enke paiman di u mu pai. Aini a yali 1951, A Wakititolen aini Ingiisitongo be taki te wi e sondu, da a leti enke wi abi wan paiman fu pai Yehofa. Ala u mu lobi Yehofa. U mu aliki en ala yuu tu. Ma te wi e sondu, da a leti enke u nái gi Yehofa a sani di a abi leti fu fende. A Wakititolen ya taki efu Yehofa be wani, a á be o de u mati moo. Ai taki tu taki: „Te wi e sondu, da wi e soi taki wi á lobi Gadu.”​—1 Yohanisi 5:3.

10. Saide Yehofa man gi u paadon fu u sondu? Fa u mu si a sani ya?

¹⁰ Ai bigi u taki Yehofa meke Yesesi  dede fu pai gi den sondu fu u. Ala dei u mu begi Yehofa fu a gi u paadon. Pikinmoo 2000 yali pasa di Yesesi dede fu pai gi den sondu fu u. Tokuso wi e fende wini fu a dede fu Yesesi ete. Ala yuu u mu gi Yehofa daa fu a bun di a du gi u. Nawan fu u be o poi pai a paiman di be de fanowdu fu fii useefi anga taawan fu sondu anga dede. (Leisi Psalm 49:7-9; 1 Peitilisi 1:18, 19.) U mu holi a pakisei tu taki Yesesi be leli u fu akisi paadon fu „u sondu”. A á taki u mu begi: „Gi mi paadon fu mi sondu.” A sani ya e soi taki a ná wi wawan abi paadon fu sondu fanowdu, ma ala den baala anga sisa fu u tu. Yehofa wani u booko wi ede anga a matifasi di a abi anga taawan tu, moomoo den sama di du wan hati sani anga u. Son leisi a ná gaan sani den e du anga u. Ma te wi e gi den paadon, da wi e soi taki u lobi den. Wi e soi tu taki ai bigi gi u taki Yehofa e gi u paadon fu u sondu.​—Kolosesama 3:13.

11. Saide meke u mu gi taawan paadon namonamo?

¹¹ Fu di wi abi sondu, meke ai taanga gi u son leisi fu gi taawan paadon te den du wan hati sani anga u (Lefitikesi 19:18). Efu wi e taigi den baala anga sisa aini a kemeente san taawan du anga u, da den sa bigin buuse a sama de. A sani ya sa meke sama puu taki anga taawan aini a kemeente. Efu wi e meke a sani ya pasa, da wi e soi taki u nái teke u nái teke a dede di Yehofa meke Yesesi dede gi u fu bigi (Mateyesi 18:35). Te u nái gi taawan paadon, da Yehofa ná o gi u paadon tu. (Leisi Mateyesi 6:14, 15.) Efu u wani Gadu gi u paadon tu, da wi á mu e du sani naamo di a á lobi.​—1 Yohanisi 3:4, 6.

12, 13. (a) San miti Yesesi baka di a dopu? (b) Saide meke wi á mu gi taawan a fowtu te wi sondu? (c) San Yesesi soi di a tan dini Gadu te enke a dede?

¹² Te wi e pakisei san miti Yesesi baka di a dopu, da wi o fusutan saide meke u mu akisi Gadu fu a yeepi u fu a á „meke tesi miti u.” A santa yeye fu Gadu be tyai Yesesi go aini a sabana fu „Didibii kon tesi en” (Mateyesi 4:1; 6:13). Saide Yehofa be meke a sani ya pasa? Holi a pakisei taki Adan anga Efa á be wani Yehofa tii den, bika den be daai baka gi en. Neen ede meke Yehofa be sende Yesesi kon a goontapu fu tyai wantu toli kon a kiin. Den toli di be mu kon a kiin na: A de so tuutuu taki Gadu á meke libisama bun? Wan sama di ná abi sondu poi libi enke fa Gadu wani winsi fa Saatan e tesi en? Libisama man tii denseefi tuutuu? (Genesesi 3:4, 5). Te ala den toli ya kon a kiin enke fa Yehofa wani, da libisama anga den engel o sabi taki a Yehofa na a moo bun tiiman.

¹³ Yehofa a wan santa Gadu. Neen meke a nái tesi sama anga ogii. A Saatan  na „a sama di e tesi sama” (Mateyesi 4:3). A omen sowtu fasi Saatan e tesi u. Ma a wi mu meke moiti fu a á fende u koli. (Leisi Yakowbesi 1:13-15.) Te Saatan be e tesi Yesesi, da wantenwanten Yesesi be e taki san sikiifi aini a Wowtu fu Gadu. Neen meke Saatan á fende en koli. Ma tokuso Saatan á gi abaa. A be e suku fu „kon baka a wan moo bun yuu” fu tesi Yesesi (Lukasi 4:13). Ma winsi san Saatan be e du, Yesesi be tan aliki Gadu, bika neen a be e si enke en Tiiman. A soi tu taki wan sama di ná abi sondu poi dini Yehofa anga en hii ati, winsi sowtu tesi e miti en. Ma tokuso Saatan e puubei fu koli den bakaman fu Yesesi te anga a dei fu tide. A wani i taangayesi Yehofa tu.

14. San u mu du fu Saatan á fende u koli?

¹⁴ A de taanga fanowdu ete fu soi efu den sani di Saatan taki fu Yehofa a tuu. Neen meke Gadu e gi Saatan pasi ete fu tesi u. Ma a ná Yehofa e „meke tesi miti u”. Yehofa sabi taki u man dini en anga u hii ati. A wani yeepi u tu. Ma a nái dwengi wi fu du sani enke fa a wani. Ai lesipeki a fii wani fu u. Neen meke a gi wi a okasi fu soi efu wi o dini en anga u hii ati. Efu wi á wani Didibii fende u koli, da u mu tan koosube a Yehofa. U mu e begi en naamo tu fu a yeepi u. Fa Yehofa e piki den begi fu u, te wi e akisi en fu a yeepi u fu tesi á miti u?

15, 16. (a) Anga sowtu tesi u mu luku bun? (b) Sama na a sama di u mu gi a fowtu te wi sondu?

 ¹⁵ Yehofa e gi wi a santa yeye fi en fu yeepi u te Saatan e tesi u. A santa yeye na a moo taanga kaakiti di de. Yehofa gi wi a Beibel tu anga den komakandaa fu wasikoi wi. Ai leli u taki wi á mu koboloiki u ten, u moni, anga u kaakiti fu suku sani di á de taanga fanowdu. Espen anga Janne a wan toowpaa di e libi aini wan gudu kondee a Europa. A omen yali den be de enke kowownu pionili a wan peesi pe moo peleikiman be de fanowdu aini a kondee fu den. Ma di den be meke a fosi pikin fu den, neen den be abi fu tapu fosi anga a pioniliwooko. Nownow den abi tu pikin. Espen taki: „Wi e begi Yehofa naamo fu a yeepi u fu Didibii á fende u koli, bika u nái pionili moo Wi e begi en fu a yeepi u fu u du ala san u man aini a peleikiwooko. Wi e begi en tu fu u sa tan dini en anga u hii ati.”

¹⁶ Wan taa sani di de enke wan tesi gi wi, a den felon efuso buku pe den e soi fa man anga uman e didon anga denseefi efuso pe den de soso sikin. Wi á poi gi Saatan a fowtu te wi e luku den sowtu sani ya. Fu saide? Fu di Saatan anga a goontapu fi en á poi dwengi wi fu du wan sani di á bun. Son sama e luku den sowtu sani ya fu di den nái feti anga den takuu fii di e kon aini den ati. Ma a omen baala anga sisa fu u á meke Saatan koli den anga a sowtu tesi ya. Useefi sa waka a den baka tu. ​—1 Korentesama 10:12, 13.

17. (a) San u mu du fu soi Yehofa taki u wani a „fii wi puu aini a ana fu a ogiiwan”? (b) San Gadu o du dyonson?

¹⁷ San u mu du fu soi Yehofa taki u wani a „fii wi puu aini a ana fu a ogiiwan”? Wi á mu „mumui anga a goontapu”. Wi á mu „lobi a goontapu efuso den sani fu a goontapu” tu (Yohanisi 15:19; 1 Yohanisi 2:15-17). Wi o piisii te Yehofa o puu Saatan, anga te a o poli a ogii goontapu ya. Ma fosi a ten de doo, wi á mu feegete taki Saatan de anga „gaan atiboon”, bika „a sabi taki a ná abi langa moo”. A o du ala san a poi fu meke u daai baka gi Yehofa. Neen meke u mu e begi Yehofa naamo fu a kibii wi fu Saatan á fende u koli.​—Openbaring 12:12, 17.

18. San u mu du efu u wani tan a libi te Gadu o poli a ogii goontapu fu Saatan?

¹⁸ I wani libi aini wan goontapu sondee Saatan? Efu a dati i wani, da begi Gadu naamo fu a Kownukondee fi en kon. Begi en tu fu a nen fi en mu santa, anga fu a meke sani pasa enke fa a wani a goontapu. I mu e biibi ala yuu taki Yehofa o solugu i. A o yeepi i tu fu tan dini en. Du ala san i poi fu du den sani di de aini a begi di Yesesi be leli den bakaman fi en.