1. San omen sama e si enke wan kowownu sani?

A GOONTAPU di wi e libi aini nownow á bun seefiseefi. A omen sama e si hululibi, a didon di man e didon anga taa man efuso a didon di uman e didon anga taa uman enke wan kowownu sani. Den felon anga den buku di den e meke nownow, e soi fa man anga uman e didon anga denseefi. A omen sama e meke singi tu fu den sowtu sani ya (Psalm 12:8). Ma tokuso Yehofa poi yeepi u fu u libi enke fa a wani. U poi libi wan kiin libi aini wan goontapu pe sama nái tyai denseefi bun.​—Leisi 1 Tesalonikasama 4:3-5.

2, 3. (a) Fu saide u mu feti anga takuu fii? (b) San wi o luku aini a artikel ya?

² Efu u wani libi enke fa Yehofa wani, da u mu e buuse den sani di ai buuse. Leti enke fa wan fisi e wani nyan wan beti te a si en, a leti so useefi sa kisi a fii fu didon anga wan sama di wi á toow anga en, bika wi a sondu sama. Te wi abi a fii fu didon anga wan sama di wi anga en á toow, da u mu meke moiti fu feti anga a fii de wantenwanten. Efu wi á puu a fii de, da a o kon moo taanga. Efu wi á luku bun, wi o sondu te wi abi a okasi. Neen meke Beibel e taki: „Te u kweki a  fii de te a kon lepi,da ai meke u sondu.”​—Leisi Yakowbesi 1:14, 15.

³ Takuu fii sa goo aini wi ati. Neen meke u mu luku bun anga den sani di u wani. Te wi e feti anga den takuu fii de, da u ná o go didon anga wan sama di wi anga en á toow. Den sani di e miti sama di e libi wan hululibi ná o miti u tu (Galasiyasama 5:16). Aini a artikel ya, wi o taki fu dii sani di o yeepi u fu feti anga takuu fii. Den sani de, na a de di wi anga Yehofa de mati, den leli fu Beibel, anga a yeepi di lepi baala anga sisa e yeepi u.

4. Saide a de fanowdu fu u kon koosube a Yehofa?

⁴ Beibel e taigi den sama di wani kon koosube a Gadu taki: „U kiin wi ana” anga „wi ati” (Yakowbesi 4:8). Efu Yehofa na a moo bun mati fu u, da u ná o wani a lobi den sani di wi e du namo, ma wi o wani a lobi den sani di wi e denki tu. Efu wi e denki sani di kiin, da wi ati o kiin tu (Psalm 24:3, 4; 51:6; Filipisama 4:8). Yehofa sabi taki wi a sondu sama. A sabi taki son leisi wi e pakisei sani di á bun. Ma fu di wi á wani du wan sani di o hati en, meke wi e du ala san u poi fu wi á pakisei sani di sa meke u sondu (Genesesi 6:5, 6). Wi e du ala san u poi tu fu pakisei bun sani.

5, 6. Fa begi sa yeepi u te wi e feti anga takuu fii?

⁵ Efu wi e pakisei fu didon anga wan sama di á de u toowpaa, u mu begi Yehofa, da a o yeepi u fu feti anga a takuu pakisei de. Yehofa e gi wi a santa yeye fi en fu yeepi u fu libi enke fa a wani. Te wi e begi Yehofa, u mu taigi en taki u wani pakisei sani di a lobi (Psalm 19:14). U mu begi Yehofa a wan lesipeki fasi fu a yeepi u fu ondoosuku useefi luku efu wi abi takuu fii aini wi ati di sa meke u sondu (Psalm 139:23, 24). U mu e begi Yehofa naamo fu a yeepi u te wi e fii fu didon anga wan sama di á de u toowpaa. U mu e begi en naamo tu fu a yeepi u fu du sani enke fa a wani, winsi a á makiliki.​—Mateyesi 6:13.

⁶ Kande u be gwenti du sani di Yehofa e buuse a ten di wi á be sabi en. Kande wi e feti anga den takuu fii de ete. Yehofa poi yeepi u fu u kengi, a poi yeepi u tu fu libi enke fa a wani. Baka di Kownu David be didon anga Batiseiba, a be hati en taki a du a sondu de. A be begi Yehofa fu a gi en „wan kiin ati”. A be begi Yehofa tu fu a yeepi en fu a aliki en (Psalm 51:10, 12). Neen ede meke efu u be abi a gwenti fu pakisei sani di á bun, efuso wi e feti anga den takuu fii de ete, da u mu holi a pakisei taki Yehofa abi a kaakiti fu yeepi u fu du sani enke fa wani. A poi yeepi u tu fu pakisei sani di a lobi.​—Psalm 119:133.

7. Fa a Wowtu fu Gadu sa yeepi u fu feti anga takuu pakisei?

⁷ Te wi e begi Yehofa fu a yeepi u, da anga a Beibel ai piki den begi fu u. A koni di de aini a Wowtu fu Gadu „soifili” (Yakowbesi 3:17). Neen meke te wi e leisi Beibel ala dei, wi o go e pakisei bun sani (Psalm 19:7, 11; 119:9, 11). Boiti dati, Beibel lai toli di o yeepi u fu feti anga a fii efuso a pakisei fu didon anga wan sama di wi anga en á toow.

8, 9. (a) San tyai wan yonkuuman go didon anga wan wei-uman? (b) Anga san u mu luku bun te u luku a toli di sikiifi aini Odo kapitel 7?

⁸ Aini Odo 5:8, a Wowtu fu Gadu e  wasikoi wi fu tan faawe fu hululibi. Aini Odo kapitel 7, wi e leisi a toli fu wan yonkuuman di be e koi pasa koosube fu a osu fu wan wei-uman a neti. A uman be de na a uku fu a sitaati. A be „wei koosi di wei-uman gwenti wei”. A waka miti a yonkuuman, a kisi en holi, neen a bosi en. A taigi en sani di meke a kisi a fii fu didon anga en. A yonkuuman á feti anga a fii de. A so meke a didon anga a uman. Winsi fa a yonkuuman á be komoto a osu anga a pakisei fu go didon anga a uman, tokuso a sondu. A be abi fu libi anga den bakapisi fu a sondu di a du. Efu a be sabi san be o miti en, a á be o kon koosube fu a uman ya.​—Odo 7:6-27.

⁹ Leti enke a yonkuuman ya, a kan taki wi o du sani sondee fu pakisei a ogii di sa miti u. Kon u taki yu e luku tv a gaan neti. Den yuu de, den lobi soi sani a tv di á fiti. Neen meke a á be o bun fu wi e sukusuku san den e soi a tv den ten de. Te u de a Internet, da u mu luku bun anga website pe sama e go fu taki anga taawan. Sani á be o waka bun anga u efu wi e go doloki sani na Internet sondee fu u sabi pilisisi san a den sani de. Bika den sani di wi o si sa meke u kisi a fii fu taangayesi Yehofa.

10. Saide meke a á bun fu poolo gi wan sama aladi u ná abi a pakisei fu toow anga en? (Luku a fowtow na a bigin.)

¹⁰ Beibel e soi u fa man anga uman mu libi anga denseefi. (Leisi 1 Timotiyesi 5:2.) Wan Kelesten mu poolo gi en toowpaa wawan efuso gi a sama di a wani toow anga en. Den nái pee anga  taawan fii. Son sama e si en enke wan kowownu sani fu poolo gi wan sama, aladi a á wani toow anga en. Den e si enke i sa poolo gi en solanga i nái holi en. Ma te tu sama e poolo gi denseefi, da den sa kisi a fii fu didon anga denseefi. Te fu kaba den sa hulu. A sani ya be pasa kaba, a sa pasa baka.

11. San a a toli fu Yowsefu e leli u?

¹¹ A toli fu Yowsefu e yeepi u fu si san u sa du fu wi á hulu. A uman fu Potifali be meke ala sowtu moiti fu didon anga en. Anga ala fa Yowsefu be e puu nono gi en, tokuso a be de neen baka ete. A be e akisi Yowsefu ala dei fu „de anga en wawan a wan peesi” (Genesesi 39:7, 8, 10). Wan sabiman fu Beibel taki a uman fu Potifali be e denki taki efu en anga Yowsefu wawan be de a wan peesi, da a kan taki Yowsefu be o kisi a fii fu didon anga en. Yowsefu be poti neen ede taki a uman á be mu fende en koli. Enseefi á be e poolo gi en tu. A á be e gi takuu fii a okasi fu goo aini en ati. Neen ede meke di a uman fu Potifali kisi a dyakiti fi en holi fu suwa anga en, „a lon go a doose, fika a dyakiti fi en aini en ana”.​—Genesesi 39:12.

12. Fu saide meke den sani di wi e luku, sa meke u kisi a fii fu go didon anga wan taawan?

¹² Yesesi be taigi u taki den sani di wi e luku sa meke u kisi a fii fu go didon anga taawan. A be taki: „Ala sama di e luku wan uman naamo anga a fii fu didon anga en, didon anga en kaba aini en ati” (Mateyesi 5:28). Na a sani ya miti Kownu David. „Di a de na a tapu osu, neen a si fa wan uman e wasi”. Ma di a si a uman e wasi, a á wai fesi, a tan luku. A be e pakisei a uman ya naamo (2 Samuweli 11:2). Anga ala fa a uman be abi en man kaba, tokuso David be wani en namonamo. Te fu kaba a didon anga en.

13. Fu saide u mu meke wan „kuudei” anga wi ain? Fa u sa meke a kuudei ya?

¹³ Efu u wani pakisei sani di bun, da u mu waka a Yopu baka. A be taki: „Mi meke wan kuudei anga mi ain” (Yopu 31:1, 7, 9). Leti enke Yopu, noiti u mu luku taawan anga takuu pakisei. Boiti dati, efu u si wan fowtow a computer, aini wan buku efuso a wan taa peesi di sa meke u kisi a fii fu didon anga taawan, da u mu wai fesi wantenwanten.

14. San u mu du efu u wani libi wan kiin libi?

¹⁴ Baka di u luku den toli ya, da kande i kon si wantu sani di i mu du taa fasi fu man feti anga den takuu fii di e kon aini yu ati. Efi i si taki i mu du sani taa fasi, yu á mu daaidaai, du en wantenwanten! Efu yu e du den sani di Yehofa e taigi i, yu o man koti pasi gi hululibi. A so wi o libi wan kiin libi.​—Leisi Yakowbesi 1:21-25.

15. Fu saide meke u mu suku yeepi u te ai taanga gi u fu feti anga den takuu fii di de aini wi ati?

¹⁵ Efu ai taanga gi i fu feti anga den takuu fii di de aini yu ati, da go taki anga wan sama aini a kemeente di e dini Yehofa wan hii pisi ten kaba, wan sama di poi poti yu a pasi anga a Wowtu fu Gadu. Kande sen e kisi i fu taki anga wan sama fu den sowtu polobelema ya, ma tokuso a de taanga fanowdu fu akisi wan sama fu a yeepi i (Odo 18:1; Hebrewsama 3:12, 13). Den Kelesten di abi ondoofeni o poi soi i san i mu du fu feti anga den takuu fii ya. Du den sani di den soi i, bika den sani de o yeepi i fu yu anga Yehofa á poli.

16, 17. (a) Fa den owluman sa yeepi den sama di e feti anga den takuu fii fu den? (b) Fu saide meke den sama di abi a gwenti fu luku sani di á fiti, mu go suku yeepi wantenwanten?

 ¹⁶ Den owluman sabi fa den mu yeepi den baala anga sisa aini a kemeente. (Leisi Yakowbesi 5:13-15.) Wan yonkuu baala di e tan aini Balazilikondee taki fa a be taanga gi en fu feti anga den takuu fii fi en. A omen yali a be abi a polobelema ya. A taki: „Mi sabi taki Yehofa á be lobi den sani di mi be e pakisei. Ma sen be e kisi mi fu taigi wan sama a toli ya.” Ma bakaten wan owluman kon fusutan taki a yonkuu baala ya be abi yeepi fanowdu. Neen ede meke a gi en taanga-sikin fu a meke den owluman yeepi en. A yonkuu baala taki: „Mi foondoo di mi si a fasi fa den owluman soi switifasi gi mi. Mi á be e si miseefi enke wan sama di den be mu soi a switifasi ya gi. Den be taigi mi tu taki den e fusutan fa mi e fii. Den aliki mi te a kaba. Bakadati neen den soi mi aini Beibel taki Yehofa lobi mi. Di den kaba, neen den begi anga mi. Den sani ya be meke a moo makiliki gi mi fu du den sani di den soi mi aini Beibel.” Baka di a yonkuu baala ya meke moiti fu toon mati anga Yehofa baka, neen a taki: „A no mi e fusutan fu saide meke a de taanga fanowdu fu suku yeepi te wi abi wan polobelema. Noiti u wawan mu puubei fu losi den polobelema fu u.”

¹⁷ Efi i gwenti luku buku efuso felon, pe man anga uman e didon anga denseefi, da i mu go suku yeepi wantenwanten. O moo yu e daaidaai, o moo a o taanga gi i fu yu á hulu. A sani de sa meke tyali kisi taawan. A sa gi Yehofa polinen tu. A omen sama go suku yeepi a den owluman. Den sama ya du den sani di den owluman taigi den, bika ala den fiya be wani libi enke fa Yehofa wani. Den á be wani komoto a waaleiti tu.​—Psalm 141:5; Hebrewsama 12:5, 6; Yakowbesi 1:15.

18. Sowtu sani i de kabakaba fu du?

¹⁸ A fasi fa sama aini a goontapu fu Saatan e pakisei fu hululibi e kon moo ogii. Ma den diniman fu Yehofa e du ala san den man fu denki sani di Yehofa lobi. Den e meke moiti tu fu libi wan kiin libi. Ná pikin poolo Yehofa e poolo te ai si taki den diniman fi en e du den sani ya. Meke u du ala san u man fu tan koosube a Yehofa. Meke u du ala san u poi tu fu wooko anga den sani di wi e leli aini Beibel efuso a den komakandaa. Wi o fii bun te wi e du den sani ya, anga ala wi o abi wan kiin kosensi (Psalm 119:5, 6). Te Saatan ná o de moo aini a ten di e kon, da ala wi o libi fu teego aini a nyun goontapu fu Gadu. Na ten de ala sama o libi wan kiin libi.