A TOLI DI SIKIIFI A FESISE | U MU BIIBI SABIMAN MOO A BEIBEL?

Den sabiman á sabi ala sani

PEE

Aini den bakabaka yali ya, sama di nái biibi taki wan Gadu de, sikiifi wantu buku pe den e kuutu keliki na ala sowtu fasi. Den sani di sikiifi aini den buku ya e meke sama e sitee anga denseefi. Luku san David Eagleman, wan sabiman di e ondoosuku den senuwe tetei fu libisama taki fu den buku ya. A taki: „Son sama di e leisi den buku ya . . . e denki taki sabiman sabi ala sani.” Ai taki tu: „Wan bunbun sabiman wani leli moo sani bika a sabi taki a omen sani de di den a ondoosuku ete.”

Aini a ten di pasa, somen sabiman yeepi u fu kon sabi tyaipi sani fu di den be go ondoosuku den. Ma son wan fu den meke gaan fowtu tu. Isaac Newton be de wan fu den moo koniman fu goontapu. A yeepi libisama fu fusutan taki a wan kaakiti e holi den sitali anga den taa sani enke a san anga a mun a den peesi. Na a man ya meke wan sani di sama e koboloiki fu sete computer, fu go a doose fu a goontapu, anga fu ondoosuku a kaakiti di den e kai atoom. Ma a man ya be e du tofuuwooko tu. Wan fu den sani di a be wani du, a fu meke kopoo anga taa sowtu insii toon gowtu.

Ma 1500 yali fosi a ten fu Newton, da i be abi wan Giiki sabiman di den e kai Ptolomeus. Te a man ya be e luku go a tapu a neti, da a be e sabi pilisisi san a den sani di a be e si. A á be abi masini fanowdu fu du a wooko ya. A be sabi tu fa fu meke kaita di e soi pe den kondee fu goontapu de. A be e biibi taki den sani enke den sitali, a san, anga a mun be e daai lontu a goontapu. Wan sabiman di de e kai Carl Sagan sikiifi fu Ptolomeus taki: „A 1500 yali langa libisama be e biibi taki ala sani e daai lontu goontapu. A sani ya e soi u taki winsi fa wan sama koni, toku a sa meke fowtu.”

Na aseefi sani e miti sabiman aini a ten ya tu. Wan dei o kon pe den o sabi finifini fa ala sani a hemel anga goontapu meke? Ala di a bun taki sabiman kon sabi somen sani di e tyai wini gi u, toku u mu holi a pakisei taki den á sabi ala sani. Wan sabiman di den e kai Paul Davies be taki: „Noiti wi o poi sabi pilisisi fa ala sani a hemel anga goontapu e wooko. Ala yuu wan sani o de namo di sama ná o kaba fusutan.” A man ya be abi leti. Noiti libisama o sabi finifini fa den sani di de a hemel anga goontapu meke. Neen ede meke te sama e taki koniman sabi ala sani, da u mu luku bun anga a sani de.

Wi e si kiin taki Beibel e leli u sani di sabiman á poi leli u

Luku san Beibel e taki fu den moin sani di Gadu meke: „Den sani ya a wantu sani namo fu den sani di a poi du. A wantu sani fi en namo u yee” (Yopu 26:14). Libisama á poi fusutan ala den sani di Gadu meke, bika den ipi. A sani di a apostel Pawlesi be sikiifi so wan 2000 yali pasa a wan tuu toli te anga dei fu tide. A be sikiifi taki: „Den belesi, a koni anga a sabi fu Gadu ipi tuutuu. Wi á poi fusutan fa ai kuutu sani. Wi á poi fusutan den pasi fi en tu!”—Romesama 11:33.

Den sani di sikiifi aini Beibel e kai anga den sani di sabiman ondoosuku

Beibel á de enke den buku di sabiman sikiifi. Tokuso den sama di sikiifi Beibel e taki fu sani di sabiman kon sabi aini a ten ya. Luku wantu fu den sani ya.

O langa hemel anga goontapu de kaba?

Sabiman e taki goontapu gaandi sowan fo dunsu miliyun yali, ma den sani enke den sitali, a san anga a mun gaandi sowan 13 te go miti 14 dunsu miliyun yali. Beibel nái taki onten hemel anga goontapu meke. Nawan peesi aini Beibel wi e leisi taki a wantu dusun yali namo goontapu de. Beibel e bigin anga den wowtu ya: „Na a bigin Gadu be meke hemel anga goontapu” (Genesesi 1:1). Den wowtu ya e gi sabiman a okasi fu ondoosuku o langa hemel anga goontapu de kaba.
O langa Gadu teke fu seeka goontapu fu libisama be sa tan neen?

Genesesi kapitel 1 e koboloiki a wowtu „dei” te ai taki fu a ten di Gadu be e meke goontapu anga den taa sani a goontapu. A tekisi ya e soi taki libisama be de a lasiti sani di Gadu meke. Beibel nái soi o langa den sigisi „dei” ya be de. Neen meke sabiman abi a okasi fu ondoosuku o langa den sigisi dei ya be de. U sabi taki den sigisi dei di Gadu meke ala sani, a ná „dei” fu 24 yuu enke fa u sabi. Ma a be moo langa.
Wan sani e holi a goontapu?

Beibel e soi taki „nawan sani” e holi goontapu fu a á kai (Yopu 26:7). I ná o leisi aini Beibel taki a wan gaan bigi langa man e tyai a goontapu neen sikoo efuso taki a wantu gaan meti di de a wan koo tapu e tyai a goontapu a den baka, enke fa son anainsitoli e taki. Neen meke sabiman abi a okasi fu ondoosuku den sani ya. Bakaten sabiman Nicolaus Copernicus anga Johannes Kepler taki a wan kaakiti e meke den palaneiti e daai lontu a san. Baka ten Isaac Newton soi taki a wan kaakiti di den e kai a zwaartekracht e meke ala sani a hemel anga goontapu tan a den peesi.
Sani di e yeepi sama fu den á paati siki

Aini a Beibel buku Lefitikesi da Yehofa e taigi den Islayelisama san den be mu du fu den á paati siki. A buku e soi tu taki den sama ya wawan be mu de a wan peesi fu a siki fu den á kisi taawan. Yehofa be taigi den Islayelisama aini Deitolonomi 23:12, 13 taki den be mu seeka wan peesi a doose fu a kampu fu sama be sa go a weisei. Den be mu diki wan olo, da den be mu „tapu a olo” baka te den be kaba weisei. A den 200 yali di pasa ya fosi dataa anga sabiman kon si taki a sani ya a wan bun sani.

A omen ondoo yali pasa kaba di Gadu be meke sama sikiifi den sani ya aini Beibel. Fa den sama di sikiifi Beibel be du sabi den sani ya, aladi koniman aini a ten fu den á be sabi den sowtu sani ya? A Gadu di meke sama sikiifi Beibel taki: „Leti enke fa hemel hei moo goontapu, a so den pasi fu mi hei moo den du fu u, a so den pakisei fu mi hei moo den du fu u tu.”—Yesaya 55:9.

Sani di sabiman á poi leli u

Sabiman e yeepi sama fu kon sabi sani fu hemel anga goontapu. Ma Beibel e leli u fa u mu libi bun anga taawan. Ai yeepi u tu fu abi wan bun libi. Luku wantu fu den sani di Beibel e leli u.

Ai yeepi u fu wi á du ogii

Ai yeepi u fu si a libi enke wan pelensipali sani

„Yu á mu kii sama.”—Ekisodesi 20:13.

„Ibiiwan sama di e buuse en baala, a wan kiiman.”—1 Yohanisi 3:15.

Tan libi bun anga taawan

„Ná du ogii moo, ma du bun. Suku freide, da i du ala san i poi fu libi bun anga taawan.”—Psalm 34:14.

„Den sama di e libi bun anga taawan, e paandi aini bun ten. A nyanyan di den o koti a letidu.”—Yakowbesi 3:18.

Buuse ogii

„Yehofa e ondoosuku den bun ati sama anga den ogii sama. Ai buuse ala den sama di lobi ogii.”—Psalm 11:5.

„Ná dyalusu anga wan sama di e du ogii. Ná waka neen baka tu, bika Yehofa e buuse den sama di e bidiigi taawan.”—Odo 3:31, 32.
Ai yeepi osufamii fu de koloku

Aliki i mma anga i dda

„Pikin, u mu aliki u mma anga u dda. A so Gadu wani, bika a dati bun gi en. ’Lesipeki i mma anga i dda.’ Disi na a fosi weiti anga wan paamisi: ’Da sani o go bun anga u. Wi o libi langa a goontapu.’”—Efeisesama 6:1-3.

Gi i pikin bun leli

„Wi á mu e fooseli den pikin fu u, ma tan kweki den anga den leli fu Yehofa. Tan kweki den anga den sani di Yehofa e taigi u.”—Efeisesama 6:4.

„Wi á mu e fooseli den pikin fu u, efuso wi o meke den booko-saka.”—Kolosesama 3:21.

I mu lobi i toowpaa. I mu lesipeki en tu

„Meke ibii man lobi en uman enke fa a lobi enseefi. A uman fi en se mu abi dipi lesipeki gi a man fi en.”—Efeisesama 5:33.
Ai yeepi u fu wi á poli a goontapu

Luku san Beibel e taki fu den sama di be e poli Islayeli. A taki: „Den sama di e tan ape poli a kondee . . . A den sama di e tan ape meke den sani ya pasa” (Yesaya 24:5, 6). Gadu o akisi den sama di e poli goontapu faantiwowtu. A o „kii den sama di e poli a goontapu” (Openbaring 11:18). Den ná o poi lon gi a sitaafu fu den.