1. Fu saide meke Pawlesi taki Yesesi e soi „a kaakiti fu Gadu”?

A OMEN sowtu fasi Yesesi soi a kaakiti di Yehofa abi. Di a be de a goontapu ya, a be du omen wonduu. Te wi e leisi san Beibel e taki fu den wonduu di a be du, da u biibi o kon moo taanga (Mateyesi 9:35; Lukasi 9:11). Yehofa be gi Yesesi kaakiti fu du somen sani, neen meke a apostel Pawlesi be sikiifi taki: „Kelestesi na a sama di e soi a kaakiti fu Gadu” (1 Korentesama 1:24). San den wonduu di Yesesi be du e leli u?

2. San den wonduu di Yesesi be du e leli u?

² A apostel Peitilisi be sikiifi taki Yesesi du „wonduu” (Toli 2:22). San den wonduu ya e leli u? Den e soi u san Yesesi o du te a o tii hii goontapu enke kownu. Te a o tii enke kownu, a o du moo gaan wonduu di o tyai wini gi  ala sama a goontapu. Den wonduu di a be du, e yeepi u fu fusutan sowtu manii en anga en Dda abi. Aini a artikel ya wi o taki fu dii wonduu di Yesesi be du. Wi o si sowtu wini den o tyai kon gi u nownow, anga a ten di e kon.

3. (a) Fu saide meke Yesesi du a fosi wonduu fi en? (b) Fa Yesesi be soi taki a lobi gi sama sani di a be de a Kana?

³ Yesesi be du a fosi wonduu fi en a wan toow aini a foto Kana. Wi á sabi fu saide, ma a win di be de na a toow á be sai gi ala den sama di be kon na a toow. A sani ya be sa meke sen kisi den tu sama di be e toow, bika a den be abi a faantiwowtu fu gi den sama nyanyan anga diingi. A mama fu Yesesi di den be e kai Maliya, be de na a toow tu. A fu di a be e biibi taki Yesesi poi du wonduu meke a begi en fu yeepi den sama di be e toow? Kande Maliya be e pakisei ala den sani di Beibel be taki a fesi fu a manpikin fi en. A be sabi taki den be o kai en „Manpikin fu a Moo Heiwan” (Lukasi 1:30-32; 2:52). U sabi taki Maliya anga Yesesi be wani yeepi den tu sama di toow. Neen ede meke Yesesi meke 380 liti waata toon „bun win.” (Leisi Yohanisi 2:3, 6-11.) A namonamo Yesesi be mu du a wonduu ya? Nono. Yesesi e booko en ede anga sama. A be lobi gi sama sani enke fa en Dda lobi gi sama sani. Neen ede meke a du a sani ya.

4, 5. (a) San a fosi wonduu di Yesesi be du e leli u? (b) San a wonduu ya e leli u fu a ten di e kon?

⁴ Yesesi be meke wataa toon win. A win be sai gi tyaipi sama. San a wonduu ya e leli u? Ai leli u taki Yehofa anga Yesesi á giili, ma den lobi gi sama sani. A wonduu ya e soi u taki den e holi a fasi fa taawan e fii a pakisei. Ai soi u tu taki aini a nyun goontapu, Yehofa o koboloiki a kaakiti fi en fu gi ala sama a goontapu nyanyan.​—Leisi Yesaya 25:6.

⁵ Pakisei a sani ya! Dyonson Yehofa o gi u ala den sani di wi abi fanowdu. Ala sama o abi moin osu anga gusontu nyanyan. Ai bigi gi u te wi e denki ala den bun sani di Yehofa o du gi u te a goontapu o toon wan paladeisi.

6. Fa Yesesi be e koboloiki a kaakiti fi en? Fa u sa waka neen baka?

⁶ Noiti Yesesi koboloiki a kaakiti fi  en fu suku wini gi enseefi. Pakisei san a du di Didibii be e tesi en. Didibii be taigi en fu a meke wantu siton toon beele. Yesesi á du a sani de, bika a á be wani koboloiki a kaakiti fi en fu suku wini gi enseefi (Mateyesi 4:2-4). Ma Yesesi be wani koboloiki a kaakiti fi en fu yeepi taa sama. Fa u sa waka a Yesesi baka? Yesesi be taki u mu „gwenti gi sama sani” (Lukasi 6:38). U sa du a sani ya te wi e kai taawan kon a wi osu fu nyan wan pikin sani anga wi. Kande baka komakandaa u sa yeepi wan baala fu seeka enseefi fu holi wan lezing. U sa yeepi taawan tu te wi e soi den fa fu peleiki moo bun. Wi e waka a Yesesi baka te wi e meke moiti fu yeepi taawan.

7. Sowtu polobelema o de ala yuu aini a goontapu fu Saatan?

⁷ Ná a tide sama e pina a goontapu. Yehofa be taigi den Islayelisama taki „na ala yuu pootiman o de na a kondee” (Deitolonomi 15:11). Baka wantu ondoo yali Yesesi be taki: „Na ala yuu den pootiman o de ya anga u” (Mateyesi 26:11). A soi Yesesi be wani soi taki alaten pootiman o de a goontapu? Nono. A be wani soi u taki pina ná o kaba aini a goontapu fu Saatan. Ma sani o de taa fasi di wi o de aini a nyun goontapu. A ten de pina ná o de moo. Ala sama o nyan te den bee fuu!

8, 9. (a) Fu saide meke Yesesi be gi dunsudunsu sama nyanyan? (b) Fa yu e fii te yu e pakisei a wonduu ya?

⁸ A psalm sikiifiman be sikiifi fu Yehofa taki: „Yu o opo yu ana, da a so ala libisani fiya o fende san den abi fanowdu” (Psalm 145:16). Yesesi di de enke en Dda, be lobi yeepi sama di a be de a goontapu ya. A á be e yeepi den namo fu soi taki a abi makiti, ma a be e booko en ede tuutuu anga taawan. Meke u taki fu Mateyesi 14:14-21. (Leisi.) Wan gaan kulu sama be waka a Yesesi baka (Mateyesi 14:13). Di peesi be bigin dunguu, neen den disipel be akisi Yesesi fu sende den sama gwe fu go suku nyanyan bai, bika den be si taki angii be e kii den. San Yesesi be o du?

⁹ Yesesi be teke feifi beele anga tu fisi namo, neen a gi umansama, pikinengee anga 5000 manengee fu den nyan. Fu saide Yesesi be du a wonduu ya? A fu di a lobi sama tuutuu. A be e booko en ede anga den. A nyanyan di Yesesi be gi den be ipi, bika ala den sama di be de ape „nyan te den bee fuu”. A nyanyan di den nyan be o gi den kaakiti fu waka a langa pasi go a osu baka (Lukasi 9:10-17). Baka di den sama nyan te a sai den, neen den disipel lai a beele di be fika aini 12 bakisi.

10. San o pasa anga pina dyonson?

 ¹⁰ Den tiiman fu a goontapu ya e denki denseefi namo. Den giili tu, neen ede meke omen miliyun sama e pina. A omen Kotoigi de tu di nái abi sani fu nyan. Ma dyonson ala den sama di e dini Yehofa o tan aini wan goontapu pe pina anga bidiigi libi ná o de moo. A Yehofa na a moo gaan Gadu. Neen wawan abi a makiti fu gi ala sama san den abi fanowdu. Ai angii fu puu wi aini a pina ya. A paamisi u taki dyonson a o tyai wan kaba kon na a pina di sama e pina!​—Leisi Psalm 72:16.

11. Fa i du sabi taki dyonson Yesesi o koboloiki en kaakiti fu yeepi ala libisama? San i wani du fu di i sabi a sani ya?

¹¹ A dii anga afu yali namo Yesesi du wonduu a wantu peesi a goontapu (Mateyesi 15:24). Ma te a o tii enke Kownu wan dunsu yali, da a o yeepi ala libisama (Psalm 72:8). Den wonduu di Yesesi be du, e soi u taki a wani koboloiki a makiti di a abi fu yeepi u. Ma san u sa du aladi u ná abi a makiti fu du wonduu? U sa koboloiki u kaakiti anga u ten fu taigi taawan san a den moin paamisi di de aini Beibel. Na a faantiwowtu de wi abi enke Yehofa Kotoigi (Romesama 1:14, 15). Te wi e denki dipi fu den sani di Yesesi Kelestesi o du dyonson, da wi o wani taigi taawan den sani de.​—Psalm 45:1; 49:3.

12. Fa u du sabi taki Yesesi e fusutan fa den sani a goontapu e wooko?

¹² Di Yehofa be e meke a goontapu anga ala den sani di de neen tapu, neen Yesesi be de neen se enke „wan sama di koni fu du en wooko” (Odo 8:22, 30, 31; Kolosesama 1:15-17). Neen meke Yesesi sabi bunbun fa ala sani a goontapu e wooko. A sabi fa a mu basi den sani enke a se anga a winta.

13, 14. Fa u du sabi taki Yesesi poi basi a winta anga a se?

¹³ Di Yesesi be de a goontapu, a be soi taki Gadu gi en a kaakiti fu basi den sani di de a goontapu. Pakisei fa a be basi wan gaan winta a se tapu. (Leisi Malikisi 4:37-39.) Wan Beibel sabiman be taki: A Giiki wowtu di den koboloiki gi „gaan winta” aini Malikisi 4:37, e soi go a wan gaan daaiwinta di sa kii sama. Te den sowtu winta ya e wai, da dondoo e bali, tapu e koti faya. Gaan alen e kai. Te a pasa, da a peesi e de fanyaa. A apostel Mateyesi be taki a winta ya a wan gaan winta.​—Mateyesi 8:24.

¹⁴ Denki a toli: Fu di a wataa be e seke ibi, meke wataa be e kon aini a boto naamo. Anga ala fa a gaan winta be e seke a wataa, tokuso Yesesi be  e siibi, bika a be weli. Fu di den disipel be e feele meke den be weki en. Den taigi en taki: „Wi e sungu!” (Mateyesi 8:25). San Yesesi du? A opo, neen a taigi a winta anga a se taki: „Kaba! Tan pii!” (Malikisi 4:39). Wantenwanten a gaan winta saka, neen „ala a peesi koo pii”. A sani ya e soi kiin taki Yesesi poi basi a se anga a winta.

15. Fa Yehofa soi taki a poi basi a winta anga a se?

¹⁵ A Yehofa be gi Yesesi a kaakiti fu du wonduu, neen meke u sabi taki Yehofa poi basi den sani enke a winta anga a se. Fosi a gaan Fuudu aini a ten fu Nowa, Yehofa be taki: „Ete seibin dei, da mi o meke alen kai a goontapu fotenti dei anga fotenti neti” (Genesesi 7:4). Aini Ekisodesi 14:21, wi e leisi taki: „Yehofa meke wan gaan winta wai komoto na a se pe a san e opo, neen a winta wai a wataa te, neen a paati a tu.” Aini Yona 1:4 wi e leisi taki: „Yehofa meke wan gaan winta wai na a se tapu, neen a wataa bigin seke fu ogii. Pikinmoo a sipi sungu.” A bun fa u sabi taki Yehofa o basi ala den sani enke a winta anga a se aini a nyun goontapu.

16. Saide ai gi u taanga-sikin fu sabi taki Yehofa anga Yesesi poi basi den sani enke a winta anga se?

 ¹⁶ Ai gi u taanga-sikin te wi e pakisei a makiti di Yehofa anga Yesesi abi. Te Yesesi o tii goontapu, da nawan sama o feele. Sani enke daaiwinta, seke doti anga taa sani ná o du ogii anga sama a goontapu ya moo, bika Gadu o kibii libisama (Openbaring 21:3, 4). U sabi taki Yehofa o gi Yesesi a makiti fu basi den sani a goontapu te a o tii enke Kownu aini a Dunsu Yali Tii fi en.

17. Fa u sa waka a Yehofa anga Yesesi baka?

¹⁷ Winsi san sama e du, den á poi tapu sani enke gaan daaiwinta anga seke doti. A Yehofa anga Yesesi namo poi du a sani de. San wi enke libisama sa du? U sa du san sikiifi aini Odo 3:27. (Leisi.) Te den sowtu sani ya e miti den baala anga sisa fu u, u sa yeepi den anga sani enke nyanyan anga koosi. U sa gi den taanga-sikin tu efuso toosutu den (Odo 17:17). Wan sisa di man dede be taki fa den baala anga sisa yeepi en baka di wan gaan daaiwinta be poli en osu. A taki: „A bigi gi mi taki mi de aini a olikanisâsi fu Yehofa. Ná fu di den baala yeepi mi anga den sani di mi be abi fanowdu wawan, ma den gi mi taanga-sikin tu fu tan dini Yehofa. Wan taa sisa di á toow be fii booko-saka di wan gaan winta be poli en osu. Baka di den baala yeepi en seeka a osu, neen a taki: „Mi á poi taigi i fa mi e fii. Mi á sabi san fu taki. Yehofa, gaantangi fi i!” Ai bigi gi u taki den baala anga sisa fu u e yeepi taawan di abi yeepi fanowdu. Ma ai moo bigi gi u taki Yehofa anga Yesesi e booko den ede anga u.

18. Fa yu e fii te i luku fu saide Yesesi be e du wonduu?

¹⁸ Di Yesesi be e du a peleikiwooko, a be soi kiin taki neen na a sama di e soi „a kaakiti fu Gadu”. Ma noiti a koboloiki a kaakiti de gi enseefi efuso fu suku balinen. Ma a be e koboloiki en fu du wonduu, fu di a be lobi sama. Wi o leli moo fu a toli ya aini a taa artikel.