A TOLI DI SIKIIFI A FESISE | SAN U MU DU TE WI ABI BOOKO-EDE?
Moni booko-ede
Paul toow. A abi tu pikin. A taki: „Wanboowanboo so a moni fu a kondee saka. Nyanyan be kon dii. A be taanga tu fu fende nyanyan bai. A omen yuu u be e taampu aini leini fu bai nyanyan. Ma son leisi fosi u doo fesise, a nyanyan be kaba. Sama be e kon mangii. Son wan fu den be e kai a sitaati fu di angii be e kii den. Den sani di u be abi taanga fanowdu be e dii pasa. A omen miliyun u be mu e pai gi den. Te fu kaba, yu á be poi bai nawan sani moo anga a moni fu a kondee, bika a be lagi pasa. Mi be lasi ala a moni di mi be abi a bangi.”
Paul
Paul be fusutan taki a be mu wooko anga den „koni” leli fu Beibel, efu a be wani en osufamii tan a libi (Odo 3:21). A taki: „A wooko di mi be e du a fu poti faya a sama osu. Ma di sani kengi, da mi be e du ala taa wooko di mi be poi fende, winsi a moni di den be e pai mi á be ipi.” Son sama be e pai mi anga nyanyan efuso taa sani di mi be sa koboloiki a osu. Efu den be pai mi anga 4 koko sopu, mi be e seli tu, da mi holi den tu taawan. Te fu kaba mi be kon abi 40 osufoo. Di den be kon bigi, neen mi seli den. Anga a moni de mi be bai ete 300. Bakaten, mi gi wan sama 50 fu den foo, neen a gi mi wan saka bolon fu 50 kilo. A wan hii pisi ten mi osufamii anga wantu taa famii nyan a bolon de.
Paul be sabi tu taki a moo bun sani di wan sama be sa du na a ten de, a fu fitoow Yehofa. Te wi e du san Gadu taki, da ai yeepi u. Yesesi be soi u san u mu du te wi e meke moiti fu fende den sani di wi abi fanowdu fu tan a libi. A be taki: „Ná booko wi ede moo. Bika . . . u Dda sabi taki wi abi den sani ya fanowdu.”—Lukasi 12:29-31.
A tyali taki Saatan, a feyanti fu Gadu, koli omen sama. Neen meke den sama ya e feti a gudu baka. Sama e du ala san den poi fu fende den sani di den wani, anga ala fa son leisi den ná abi ala den sani de fanowdu. Somen fu den e meke paiman. Den Odo 22:7.
sama ya kon si taki „a sama di lobi leni moni na a saafu fu a sama di leni en a moni”.—Son sama e du sani di e tyai ogii gi den bakaten. Paul e taki: „A omen biitisama gwe fika den osufamii anga den mati, fu go suku wan moo bun libi a wan taa kondee. Son wan fu den á be abi pampila fu a kondee di den go. A sani de meke den á be poi fende wooko. Son leisi den be abi fu kibii gi sikowtu efuso siibi a sitaati. Den á gi Gadu a okasi fu a yeepi den. Ma mi anga mi osufamii be tan a makandii. U be e si Yehofa enke a sama di be sa yeepi wi anga den polobelema di u be abi.”
DU SANI ENKE FA YESESI TAKI
Paul e taki tu taki: „Yesesi be taki: ’Ná booko yu ede anga a taa dei, bika a taa dei seefi abi en booko-ede. Ibii dei abi en booko-ede.’ Neen meke a sani di mi be e akisi Gadu te mi be e begi, a fu a be „gi wi a beele di wi abi fanowdu” a dei de, fu u be sa tan a libi. A yeepi u tu, leti enke fa Yesesi be taki. A ná ala yuu u be e fende a sani di u be wani. Wan leisi neen mi taampu aini leini fu bai nyanyan sondee fu sabi sowtu nyanyan den be e seli. Di mi doo fesise, neen mi si taki a yogort. Mi á lobi yogort. Ma a nyanyan. Neen meke a yogort u nyan a neti de. Mi e gi Gadu daa taki a hii pisi ten de, noiti mi anga mi osufamii go siibi anga angii.” *
Gadu paamisi u taki: „Mi ná o gwe fika i. Noiti mi o fika i wawan.”—Hebrewsama 13:5
„Nownow sani e go moo bun anga u. Ma u kon si taki a moo bun deesi gi booko-ede, a te wan sama e fitoow taki Gadu o yeepi en. Ala yuu Yehofa * o yeepi u, solanga wi e meke moiti fu du san a wani. U si fa Psalm 34:8 kon tuu. Ape sikiifi taki: ’Tesi, da yu o si taki Yehofa bun. A sama di e go kibii neen o de koloku.’ A bakapisi a taki u nái feele moo te wi o miti anga moni polobelema wan taa leisi.
Gadu e yeepi sama di e dini en fu fende ’a beele di den abi fanowdu fu a dei de’
„Now wi e fusutan kiin taki a ná moni efuso wooko libisama abi fanowdu fu tan a libi, ma a nyanyan. Wi e angii fu si a ten te den sani di Gadu paamisi o kon tuu. A paamisi u taki: ’Tyaipi nyanyan o de a goontapu.’ Ma fosi a ten de doo, ’efu wi abi nyanyan, koosi, anga wan peesi fu tan, da u mu tifeedi anga den sani de.’ Beibel e gi u taanga-sikin te ai taki: ’A fasi fa yu e libi mu soi taki yu à lobi moni. Ma u mu tifeedi anga san wi abi nownow, bika Gadu taki: „Mi ná o gwe fika i. Noiti mi o fika i wawan.”Neen meke u sa taki anga ala deki-ati taki: „A Yehofa a mi yeepiman. Mi ná o feele.”’” *
A tuutuu biibi wan sama mu abi efu a wani ’waka anga Gadu’ enke Paul anga en osufamii (Genesesi 6:9). Winsi wi abi moni polobelema nownow efuso kande aini a ten di e kon, u sa leli tyaipi sani fu a biibi di Paul be abi. U sa leli tyaipi sani tu fu a fasi fa a wooko anga den koni leli fu Beibel.
Ma san u mu du efu polobelema aini a osufamii e gi u booko-ede?
^ paragraaf 9 Luku Mateyesi 6:11, 34.
^ paragraaf 10 Enke fa Beibel e soi, a Yehofa na a nen fu Gadu.
^ paragraaf 11 Luku Psalm 72:16; 1 Timotiyesi 6:8; Hebrewsama 13:5, 6.