A TOLI DI SIKIIFI A FESISE | SAN U MU DU TE WI ABI BOOKO-EDE?
Booko-ede taki ogii o miti u
Alona taki: „Te mi yee a alarm e bali, da mi ati e naki moo gaw. Mi e lon go a wan peesi pe sama gwenti go kibii te bom e sutu. Ma anga ala fa mi e de ape, tokuso mi e feele ete. A moo ogii te mi de a doose fu di peesi á de fu mi lon go kibii. Di mi be e waka a sitaati wan leisi, neen mi bigin kee. Mi á be poi boo bun. Baka wantu yuu di mi kisi miseefi, neen a alarm bigin bali baka.”
Alona
A ná oloku wawan e meke sama e feele. Efu yu efuso wan lobiwan fi i abi wan takuu siki, da ná pikin fii yu e fii en. Son sama e booko den ede fu di den á sabi fa goontapu o de aini a ten di e kon. Den akisi denseefi taki: ’Den pikin efuso den galanpikin fu mi o libi aini wan goontapu di tyobo, wan goontapu di lai siki, feti anga ogii?’ San u mu du efu wi abi den booko-ede ya?
Wan sama di koni e „go kibii” te a si taki ogii o miti en (Odo 27:12). Leti enke fa wi e meke moiti fu abi wan bun gusontu, a letiso u mu meke moiti fu wi á denki efuso si sani di o meke u feele. Felon di e soi fa sama e du ogii, anga nyunsu di e soi sani di e meke u sikin goo, sa meke wi anga den pikin fu u feele. Te u nái luku den sani ya, da a sani de á wani taki u nái booko wi ede anga den sani di e pasa. Gadu á be meke u fu wi e si ogii naamo. Pe fu u luku den sowtu sani ya, a sani „di de tuu, . . . di bun, . . . di kiin, . . . sani di e meke sama lobi taawan,” u mu luku. Efu u du den sani ya, da „a Gadu fu freide” o yeepi u fu wi á feele.—Filipisama 4:8, 9.
SAIDE BEGI DE TAANGA FANOWDU
Te u biibi taanga, da a sani de o yeepi u anga den booko-ede fu u. Beibel taki „u mu e de kabakaba fu e begi” (1 Peitilisi 4:7). U sa akisi Gadu fu a gi u koni anga deki-ati te wi abi polobelema. U mu biibi tu taki „ai aliki wi, awinsi san wi e akisi en”.—1 Yohanisi 5:15.
Anga Avi, a man fi en
Beibel e leli u taki a ná Gadu na „a tiiman fu a goontapu ya”, ma na Saatan. Ai soi u tu taki „a hii goontapu de aini a makiti fu a ogiiwan” (Yohanisi 12:31; 1 Yohanisi 5:19). Neen meke Yesesi taigi u fu u begi Gadu fu a „fii wi puu aini a ana fu a ogiiwan” (Mateyesi 6:13). Alona taki: „Solanga mi yee a alarm e bali, mi e akisi Yehofa fu a yeepi mi fu mi á buuya. A man fu mi e bel mi, da ai begi anga mi. Ná pikin yeepi begi e yeepi.” Enke fa Beibel e soi, da „Yehofa de koosube a den sama di e kai en, a de koosube fu den sama di e kai en anga wan kiin ati.”—Psalm 145:18.
A HOWPU DI WI ABI
Di Yesesi be e leli sama na a mongo, a be leli den bakaman fi en fu begi taki: „A Kownukondee fi i mu kon” (Mateyesi 6:10). Na a Kownukondee fu Gadu o puu ala den sani di e gi sama booko-ede. Gadu o meke Yesesi, a „Gaanman fu Freide”, „tyai wan kaba kon a feti na ala se fu goontapu” (Yesaya 9:6; Psalm 46:9). „A o koti kuutu gi omen foluku . . . Nawan foluku o teke how fu go feti anga wan taa foluku moo, den ná o leli feti moo tu. . . . Nawan sama o meke den feele”(Mika 4:3, 4) Ala osufamii o de koloku. Den „o meke osu da den o tan aini, den o paandi doloifigoon, da denseefi o nyan den sani di den paandi” (Yesaya 65:21). „Nawan sama di e tan ape o taki: ’Mi siki.’”—Yesaya 33:24.
A ná abi toobi pe u de, efuso san wi e du aini a ten ya, ’sani di wi á poi si a fesi’ sa miti ala u (Peleikiman 9:11). A omen ondoo yali kaba sani enke oloku, siki anga ogii e kii sama. San o pasa anga den sama di dede?
A omen miliyun sama o opobaka. Ma a Gadu wawan sabi pilisisi omen sama o kon a libi baka. Den sama de e siibi nownow, ma dyonson den „o kon a doo” (Yohanisi 5:28, 29). Beibel e taki: „A howpu ya de enke wan ankaa gi u libi, a nái sekeseke komoto a pe a de, a ná wan lei tu” (Hebrewsama 6:19). Boiti dati, „ala sama sa biibi a sani ya, bika [Gadu] meke [Yesesi] kon a libi baka.—Toli 17:31.
Aini a ten ya, winsi wan sama e meke moiti fu libi enke fa Gadu wani, tokuso a o abi booko-ede. Winsi fa Paul, Janet, anga Alona abi booko-ede, toku den de koloku, fu di den tan begi Gadu. Den de koloku tu fu di den e biibi den sani di Gadu paamisi u aini Beibel. ’Meke a Gadu di e gi sama howpu meke u piisii na ala sowtu fasi, meke a gi u freide tu fu di wi e fitoow en.’—Romesama 15:13.