1. San be pasa aini a yali 66? (Luku a fowtow na a bigin.)

KON u taki i be de wan fu den Kelesten di be e e libi a Yelusalem aini a yali 66. A omen sani pasa a Yelusalem a ten de. Wan edeman fu Rome di den e kai Florus be fufuu tyaipi moni di be de aini a tempel. A sani ya be meke den Dyu ati boon. Den kii omen suudati fu Rome. Den á be wani den Romesama tii den moo. Ma Rome á daaidaai. A á kisi dii mun neen den sende Cestius Gallus makandaa anga 30.000 suudati go a Yelusalem. Den Dyu di á be wani den Romesama tii den go kibii aini a tempel, ma den suudati be e meke moiti fu booko a fosi sikotu di be lontu a tempel fu go aini. Ala sama di be de aini a foto be e buuya. Fa i be o fii efi i be si fa ala den sani ya e pasa?

2. San den Kelesten be mu du te den be si den suudati fu Rome lontu a foto? Fa den be o man du a sani ya?

² Omen yali fosi a sani ya be pasa, Yesesi be wasikoi den bakaman fi en taki: „Te u si taki sudaati lontu Yelusalem poti a dyali, da u mu sabi taki a á fika langa moo fu Yelusalem booko. Meke den sama di de aini Yudeya lowe go a den mongo, meke den sama di de aini Yelusalem komoto de, meke den  sama di de a den boiti peesi á kon aini a foto” (Lukasi 21:20, 21). Fa den ben o man lowe komoto a Yelusalem efu suudati be lontu a foto? Wan sani pasa di den á be denki. Wanboowanboo so den suudati gwe komoto a Yelusalem. Enke fa Yesesi taki da Gadu be „satu a ten de” (Mateyesi 24:22). Baka di den suudati fu Rome gwe, neen ala den Kelesten be abi a okasi fu lowe go wantenwanten a den mongo, enke fa Yesesi be taki. * (Luku san sikiifi a ondoose.) Bakaten, neen wan taa kulu suudati fu Rome kon a Yelusalem aini a yali 70. A leisi ya den booko a foto. Ma ala den sama di be du san Yesesi be taki tan a libi.

3. Sowtu sani o miti den Kelesten aini a ten di e kon? San wi o luku aini a artikel ya?

³ Den sani di Yesesi be taigi den disipel fi en e teli gi wi aini a ten ya tu. Dyonson, so wan sani o miti u tu. Di Yesesi be e taki fu den sani di be o pasa aini Yelusalem, a be wani soi u san be o pasa te a „gaan banowtu” be o bigin wanboowanboo so (Mateyesi 24:3, 21, 29). Leti enke fa wantu Kelesten be tan a libi di den suudati be poli Yelusalem, a letiso wan „gaan kulu sama” o tan a libi tu baka a gaan banowtu di o de a hii goontapu. (Leisi Openbaring 7:9, 13, 14.) A de taanga fanowdu fu sabi san Beibel e taki fu den sani di o pasa aini a ten di de a u fesi. Saide? Bika a sani ya wani taki dede efu libi gi u. Meke u luku now fa a libi fu wi o de te den sani ya o pasa.

4. Fa a gaan banowtu o bigin?

⁴ Fa a gaan banowtu o bigin? A o bigin te den o poli falisi biibi. Aini Beibel, den e kai falisi biibi „a Gaan Babilon, a mama fu den hulu-uman” (Openbaring 17:5-7). Saide den e kai falisi biibi wan hulu-uman? A fu di den fesiman fi en daai baka gi Gadu. Pe fu den holibaka gi Yesesi anga a Kownukondee fi en, neen a den tiiman fu goontapu den e holibaka gi. Den e poti den weiti fu Beibel a wan se fu den sa fende moo makiti a den tiiman fu kondee. A fasi fa den e dini Gadu á de enke a kiin fasi fa den salufuwan e dini Gadu (2 Korentesama 11:2; Yakowbesi 1:27; Openbaring 14:4). Ma sama o poli a Gaan Babilon? Yehofa o koboloiki „den tin tutu” fu a „lebi meti di ogii” fu „du san a abi a pakisei”. A „lebi meti di ogii” na a Verenigde Naties. Den „tin tutu” a den politiki tiimakiti di e holibaka gi Verenigde Naties.​—Leisi Openbaring 17:3, 16-18.

5, 6. Fu saide meke wi e taki a ná ala den sama di de aini falisi keliki o dede te a Gaan Babilon o poli?

⁵ Na ala sama fiya di de aini falisi keliki o dede te „a Gaan Babilon” o poli? Nono. A polofeiti Sakaliya be sikiifi fa sani be o pasa. Na a ten de, son sama di be de aini falisi keliki fosi o taki: „’Mi a ná polofeiti. Mi a wan man di e paandi goon, bika a yonkuuyonkuu wan sama bai mi enke saafu.’ Efu wan sama akisi en taki: ’San a den soo di de ai sikoo ya?’ Da a o piki taki: ’A den soo di kisi mi di mi be de aini a osu fu den mati fu mi’” (Sakaliya 13:4-6). A sani ya e soi taki wantu fesiman fu falisi keliki seefi o taki den á be de aini falisi keliki. Den o taki den á be e go a falisi keliki seefiseefi.

⁶ San o pasa anga a foluku fu Gadu na a ten de? Yesesi be taki: „Efu a ná satu Gadu be satu a ten de, nawan sama be o fika a libi. Ma Gadu o satu a ten de gi den sama di a kai” (Mateyesi 24:22). Aini a yali 66, Gadu be „satu a ten” fu a banowtu  di be de aini Yelusalem. A sani ya be gi den salufu Kelesten a okasi fu lowe. Na aseefi fasi Gadu o „satu a ten” fu a gaan banowtu fu den salufuwan ede. Den politiki tiimakiti ná o fende okasi fu kii a foluku fu Gadu. Baka te den poli a Gaan Babilon, wan satu pisi ten o de pe ala sani o koo.

7, 8. Sowtu okasi den sama di e dini Yehofa o abi baka te den falisi keliki poli? Fa a foluku fu Gadu o de taa fasi aini a ten de?

⁷ San o pasa baka te den poli den falisi keliki? A o de wan ten fu soi san de aini wi ati tuutuu. A ten de, a omen sama o suku yeepi a den olikanisâsi fu libisama. Beibel e kai den olikanisâsi ya „den gaan siton a den mongo” (Openbaring 6:15-17). Ma a foluku fu Yehofa o suku kibii neen. Di Gadu be „satu a ten” di den suudati fu Rome be kon feti anga Yelusalem, a ná fu be meke ala den Dyu daai teke a Kelesten biibi. Ma a be fu yeepi den sama di be de Kelesten kaba aini Yelusalem fu lowe, leti enke fa Yesesi be taki. A so a o de tu na a ten te den o poli a Gaan Babilon. Te Gadu o „satu a ten” de, da wi á mu denki taki a omen sama o daai teke a tuu biibi wantenwanten. Ma a de wan okasi gi den tuutuu Kelesten fu soi Yehofa taki den lobi en tuutuu. Den o abi a okasi tu fu holibaka gi den salufu Kelesten.​—Mateyesi 25:34-40.

⁸ Wi á sabi pilisisi san o pasa na a ten fu a gaan banowtu. Ma u sabi taki sani ná o makiliki. Wi o abi fu gwe fika wantu sani di wi abi. Aini a ten fu Yelusalem, den Kelesten be mu gwe fika den osu. Den be abi fu nyan pina tu fu be man tan a libi (Malikisi 13:15-18). U mu akisi useefi taki: ’Mi de kabakaba fu gwe fika den gudu di mi abi? Mi de kabakaba fu du ala san mi man fu tan dini Yehofa anga mi hii ati?’ Pakisei a sani ya! Na a ten de a u wawan o dini u Gadu winsi san e pasa, leti enke a polofeiti Daniyeli.​—Daniyeli 6:10, 11.

9, 10. (a) Sowtu bosikopu a foluku fu Gadu o paati na a ten fu a gaan banowtu? (b) San den feyanti fu Gadu o wani du?

⁹ A Gaan banowtu ná o de wan ten fu e paati a „bun nyunsu fu a Kownukondee”. A ten de o pasa kaba, bika a ten fu „a kaba” o doo! (Mateyesi 24:14) A foluku fu Gadu o paati wan kuutu bosikopu gi ala sama. Den ná o feele fu paati a bosikopu ya. Kande den o paati a bosikopu taki a hii goontapu fu Saatan o poli. Beibel taki a bosikopu ya de enke gaan koko eisi di e kai komoto a tapu. Ai taki: „Gaan koko eisi di be e wegi tutenti kilo be e kai komoto a tapu e naki den sama. Den sama bigin wisiwasi Gadu fu di a be e meke den koko eisi kai naki den, bika a sitaafu ya be ibi gi den.”​—Openbaring 16:21.

¹⁰ Den feyanti fu u o yee a kuutu bosikopu ya. Yehofa be meke a polofeiti Eseikiyeli tyai kon a kiin san Gok fu Magok o du. Gok fu Magok a den sama di o bonduu kon a wan fu go feti anga a foluku fu Gadu. Eseikiyeli be sikiifi taki: „A moo Hei Masaa Yehofa taki: ’Na a ten de yu o sidon pakisei, da yu o sidon denki luku fa i sa du ogii anga den. Yu o taki: „Mi o go feti anga a kondee di ná abi sikotu. Mi o go feti anga den sama di ná abi nawan booko-ede, den wan di nái si enke ogii sa miti den. Ala den e tan aini kondee di ná abi sikotu, sukuufu anga doo.” Yu o pakisei fu teke tyaipi gudu fu den. Yu o pakisei tu fu fufuu taa sani fu den tyai gwe. Yu o wani go poli den peesi pe sama go libi baka. Yu o wani du ogii anga wan foluku di mi puu a den taakondee sama ini. Na a foluku ya e tyai tyaipi gudu kon a wan. Den e tan a leti mindii  fu a goontapu’” (Eseikiyeli 38:10-12). A foluku fu Gadu ná o de enke den taa sama. A o de enke den e tan „a leti mindii fu a goontapu”. Den foluku fu goontapu ná o poi holi denseefi. Den o wani go feti anga den salufuwan fu Yehofa anga den taa Kelesten di e holibaka gi den.

11. (a) Fa sani o waka na a ten fu a gaan banowtu? (b) San sama o du te den o si den maiki?

¹¹ San o pasa baka dati? Beibel nái taigi u pilisisi fa sani o waka, ma a kan taki wantu sani o pasa na aseefi yuu. Di Yesesi be e taki fa sani be o waka na a ten fu a kaba, a be taki: „Boiti dati, maiki o de fu si na a san, a mun, anga den sitali. Den sama di de a goontapu o feele, den ná o sabi pe fu go kibii, fu di a se o bali. A o ligei. Sama ná o sabi fa fu du, fu di ná pikin feele den o feele. Den á sabi san o pasa anga goontapu, bika den kaakiti fu hemel o seke. Da den o si a Manpikin fu libisama e kon aini wan woluku anga makiti anga ala en gendee” (Lukasi 21:25-27; leisi Malikisi 13:24-26). A soi a polofeititoli ya wani soi u taki sama o si sani a hemel di o meke den feele? U mu wakiti a ten de fu si efu a so sani o waka. Ma u sabi taki te den feyanti fu Gadu o si den sani ya e pasa, da den o buuya. Ná pikin feele den o feele.

12, 13. (a) San o pasa te Yesesi o kon anga „makiti anga ala en gendee”? (b) San den sama di e dini Gadu o du a ten de?

¹² San o pasa te Yesesi o kon anga „makiti anga ala en gendee”? A o pai den sama di tan dini Gadu, da a o sitaafu den sama di daai baka gi Gadu (Mateyesi 24:46, 47, 50, 51; 25:19, 28-30). Yesesi be gi wan ageisitoli fu tyai a toli ya kon a kiin. A be taki: „Te a Manpikin fu libisama kon anga ala en gendee, makandaa anga ala den engel, dan  a o go sidon neen gaan kownusutuu. Den o tyai ala foluku kon neen fesi, da a o paati den sama leti enke fa wan sikapuman e paati den sikapu anga den kaabita. A o poti den sikapu neen leti-ana, ma den kaabita a o poti neen kukutu-ana” (Mateyesi 25:31-33). San o pasa anga den sikapu anga den kaabita? Yesesi o kuutu den. Den kaabita, efuso den sama di daai baka gi Gadu, o dede fu teego. Ma den sikapu, efuso den sama di tan dini Gadu, o fende teego libi.​—Mateyesi 25:46.

¹³ San den sama di de enke kaabita o du te den o fusutan kaba taki den o dede? Den o tyali (Mateyesi 24:30). Ma san den salufuwan anga den Kelesten di e holibaka gi den o du? Den o du san Yesesi be taki. Yesesi be taki: „Te den sani ya e bigin, da opo taampu leti-opu, bika a yuu di Gadu o fii yu de koosube.”​—Lukasi 21:28.

14, 15. San o pasa baka te Gok fu Magok bigin feti anga a foluku fu Gadu? Fa a sani ya o pasa?

¹⁴ San o pasa te Gok fu Magok o bigin feti anga a foluku fu Gadu? Beibel taki a Manpikin fu libisama „o sende den engel fu tyai ala den sama di a teke puu a den fo uku fu goontapu kon a wan. Den o de a den moo faawe peesi fu goontapu te go miti den moo faawe peesi fu hemel” (Malikisi 13:27; Mateyesi 24:31). A tyai di den o tyai sama kon a wan nái soi go na a teke di Gadu e teke wan sama enke wan salufu Kelesten. A nái soi go tu na a kiiboi maiki di den salufuwan a goontapu ya o fende (Mateyesi 13:37, 38). Bika den o fende a kiiboi maiki fosi a gaan banowtu bigin (Openbaring 7:1-4). Da san na a tyai di den o tyai sama kon a wan? Na a ten di den o tyai den salufuwan di de a goontapu ete go a hemel (1 Tesalonikasama 4:15-17; Openbaring 14:1). A sani ya o bigin baka te Gok fu Magok o bigin feti anga a foluku fu Yehofa (Eseikiyeli 38:11). A ten de, da „den sama di Gadu e si fu bun sama o beenki aini a Kownukondee fu den Dda”, leti enke fa Yesesi be taki.​—Mateyesi 13:43. * (Luku san sikiifi a ondoose.)

¹⁵ A omen sama di de aini falisi keliki e biibi taki den o go a hemel anga libisama sikin. Den e biibi tu taki den o si anga den ain fa Yesesi o daai kon baka fu tii a goontapu. Ma Beibel e soi kiin taki sama ná o si anga den ain fa Yesesi o daai kon baka. Ai taki: „Den o si a maiki fu a Manpikin fu libisama a hemel.” A sikiifi tu taki Yesesi o kon „a den woluku tapu” (Mateyesi 24:30). Beibel e soi tu taki „dugudugu anga buulu ná o go aini a Kownukondee fu Gadu”. Neen meke den sama di o go a hemel „o kengi wantenwanten, fosi i pingi yu ain, te den boo a lasiti tutu”. * (Luku san sikiifi a ondoose.) (Leisi 1 Korentesama 15:50-53.) A sani ya e soi taki a wanboowanboo den o tyai den salufuwan di de a goontapu ete go a hemel.

16, 17. San mu pasa ete fosi a Pikin Sikapu toow?

¹⁶ Te ala den 144.000 salufu Kelesten de a hemel kaba, da den o seeka den sani di be mu seeka ete gi a toow fu a Pikin Sikapu (Openbaring 19:9). Ma wan taa sani o pasa fosi a ten de. Holi a pakisei taki fosi Yesesi tyai den salufuwan di de a goontapu ete go a hemel, da Gok o go feti anga a foluku fu Gadu (Eseikiyeli 38:16). San a foluku fu Gadu o du? Den o du san sikiifi aini 2 Koloniki 20:17. Ai taki: „A ná wi o feti a feti ya. U taampu, u de pii, da luku fa  Yehofa o fii wi. . . . Ná feele, i sikin á mu dansi tu.” Te Gok o bigin feti anga a foluku fu Gadu, da ala den salufuwan di de a goontapu ete o go a hemel. Openbaring 17:14 e taki: „Den o feti anga a Pikin Sikapu, ma fu di a Pikin Sikapu a Masaa fu den masaa, anga Kownu fu den kownu, meke a o wini den. Den sama di Gadu kai, den sama di a teke, di e tan neen se, o de makandaa anga a pikin Sikapu tu. Denseefi o wini a feti.” A sani ya e soi taki Yesesi anga den 144.000 salufuwan di o tii enke kownu o fii a foluku fu Gadu a goontapu.

¹⁷ Te den o kon fii a foluku fu Gadu, da Alimakedon o bigin. A feti ya o meke sama gafa a nen fu Yehofa (Openbaring 16:16). Ala den sama di de enke kaabita o dede. Neen meke ogii ná o de a goontapu moo. Wan „gaan kulu sama” o pasa Alimakedon libilibi tu. Bakadati, da a sani di sikiifi na a kabapisi fu Openbaring o pasa. San na a sani de? Na a toow di a Pikin Sikapu o toow! (Openbaring 21:1-4) * (Luku san sikiifi a ondoose.) Ala den sama di o tan a libi o de sama di Gadu fende bun. Den o si fa a lobi den, anga fa a lobi gi sama sani. Ná pikin angii wi e angii fu si a ten de. A toowfesa de o bigi tuutuu!​—Leisi 2 Peitilisi 3:13.

18. San ala u mu du nownow te u luku den sani di o pasa dyonson?

¹⁸ San ala u mu du nownow te u luku den sani di o pasa dyonson? A apostel Peitilisi be sikiifi taki: „Fu di ala den sani ya o sumutu gwe, meke u mu ondoosuku useefi luku sama u mu de. A fasi fa wi e tyai useefi anga den sani di wi e du, mu soi taki wi na santa sama di e dini Gadu anga u hii ati. U mu e holi a pakisei taki a dei fu Yehofa e doo . . . Lobiwan, now di wi e wakiti den sani ya, meke u meke ala moiti fu Gadu si wi enke sama di kiin, di ná abi fowtu, di e libi bun anga taawan” (2 Peitilisi 3:11, 12, 14). Neen meke u mu du ala san u man fu u sa tan dini Gadu enke fa a wani. Wi á mu mumui anga falisi keliki. U mu holibaka tu gi Yesesi Kelestesi, a Kownu fu freide.