A TOLI DI SIKIIFI A FESISE | SAN U MU DU TE WI ABI BOOKO-EDE?
Na ala se sama abi booko-ede!
„Mi be go bai nyanyan, ma a soso kuku be de aini den wenkii. Ná pikin dii den be dii. I kan taki den be dii sowan 10.000 toon moo san u be gwenti bai den. A taa dei fi en, sani fu nyan á be de seefiseefi aini den wenkii.”—Paul, Zimbabwe.
„A man fu mi kai mi poti a bangi, neen a taigi mi taki a o fika mi. Fa mi o poi tyai a pen ya? Fa den pikin fu mi o du?”—Janet, Ameekankondee.
„Te mi yee a alarm bigin bali, da mi e lon go kibii. Mi e didon langalanga a doti te den bom e sutu. Te den kaba, a omen yuu langa mi ana e dansi ete.”—Alona, Islayelikondee.
A ten di wi e libi aini ya „taanga” (2 Timotiyesi 3:1). A omen sama abi moni polobelema anga polobelema aini a osufamii. Sani enke oloku, siki anga taa gaan polobelema de na ala se fu goontapu. Ma boiti den sani ya, sama abi taa booko-ede tu. Kande wi e akisi useefi taki: ’A koko di mi e fii aini mi sikin sa de kanker?’ Taawan e akisi denseefi taki: ’Fa goontapu o tan te den galanpikin fu mi kon bigi?’
A ná ala yuu a fowtu te wi e booko wi ede anga sani. Enke libisama wi e booko wi ede pikinso te u mu go meke wan eksame, efuso te u mu du wan sani a omen sama fesi. A kan taki wi e booko wi ede te wi e go suku wooko. A bun tu te wi e feele sani di sa du ogii anga wi. Ma efu wi e booko wi ede tumisi wi o siki. Di sama ondoosuku 68.000 gaansama, neen den kon si taki a moo pikin booko-ede seefi sa meke sama dede moo fuuku. Neen meke Yesesi be akisi taki: „Ondu fu u sa booko en ede anga a libi te da a libi fi en kon moo langa?” Yesesi á lei, booko-ede á poi meke u libi moo langa. Neen ede meke a be taki: ’Ná booko wi ede moo’ (Mateyesi 6:25, 27). U poi du a sani di Yesesi taki?
Efu u wani du a sani ya, da u mu wooko anga den leli fu Beibel. U mu biibi Gadu. U mu biibi tu taki sani o go moo bun aini a ten di e kon. Winsi u ná abi gaan polobelema nownow, tokuso u sa miti den aini a ten di e kon. Meke u go luku fa den sani di u kai ya be yeepi Paul, Janet, anga Alona di den be abi booko-ede.
