1, 2. (a) Fu saide meke den sama di e holibaka gi Yehofa nái mumui anga den sani fu a goontapu ya? (Luku a fowtow na a bigin.) (b) San a den sani di gaanse sama lobi pasa peesi? Ma san na a bakapisi?

DEN sama di e dini Yehofa nái mumui anga sani di e tyai paati kon, sani enke a si di wan sama e si enke a kondee fi en, den gwenti fi en, efuso den kondeeman fi en bun moo taawan. Fu saide? A fu di u lobi Yehofa, fu di u wani dini en anga u hii ati, anga fu di u wani aliki en (1 Yohanisi 5:3). Wi e du san Yehofa leli u, winsi pe wi e libi, efuso winsi pe u kiya. A sani di pelensipali gi wi moo ala taa sani na a tan di wi e tan holibaka gi Yehofa anga en Kownukondee (Mateyesi 6:33). A fu den sani ya ede meke u „nái mumui anga a goontapu”.​—Leisi Yohanisi 17:11, 15, 16; Yesaya 2:4.

² Aini a ten ya gaanse sama lobi a kondee fu den, a lo fu den, efuso den gwenti fu den pasa peesi. Ma a tyali taki den sani ya e meke sama e bigin kwali anga denseefi, e buuse taawan efuso e kii sama di á de anga den na a wan se. Winsi fa u nái mumui aini den sani ya, tokuso a kan taki wi anga wi osufamii  e fii den bakapisi. A kan taki sama e du ogii anga u tu. Te gaanlanti nái tii a kondee bun, da a kan taki useefi o bigin mumui aini den toli fu a kondee, bika Gadu meke wi anga a fii fu sabi san bun anga san ogii (Genesesi 1:27; Deitolonomi 32:4). Fa yu e fii te yu e si taki sama nái du sani a wan leti fasi? I poi holi iseefi, efuso yu e teke sama se?

3, 4. (a) Fu saide meke u nái mumui te tu kondee e feti? (b) Sowtu toli wi o taki aini a artikel ya?

³ Te tu kondee e feti anga denseefi, da sama e si enke a de fanowdu fu holibaka gi wan fu den, bika gaanlanti e leli den taki a dati wan sama di lobi en kondee mu du. Ma wi e waka a Yesesi baka. Neen meke u nái mumui aini politiki. U nái go feti tu (Mateyesi 26:52). Tuutuu Kelesten nái si enke wan pisi fu a goontapu fu Saatan bun moo a taawan (2 Korentesama 2:11). Wi á wani mumui anga den feti efuso den toobi fu a goontapu ya.​—Leisi Yohanisi 15:18, 19.

⁴ Fu di wi a sondu sama, meke a kan taki te anga now wi á kaba lobi taa nasi sama efuso sama fu wan taa lo (Yelemiya 17:9; Efeisesama 4:22-24). A artikel ya o yeepi u fu wi á du sani di o tyai paati kon. Wi o luku tu fa u sa holibaka gi a Kownukondee te wi o meke moiti fu denki enke Yehofa anga Yesesi.

5, 6. Yesesi be e si a wan nasi sama bun moo a taawan? Fu saide?

⁵ Kon u taki sama e sitee efuso e feti anga denseefi. San i sa du efu yu e fii fu mumui aini den sowtu feti ya? I mu akisi iseefi taki: ’San Yesesi be o du?’ Di Yesesi be de a goontapu, den sama fu Yudeya, Galileya anga Samaliya be e abi toobi son leisi. Pakisei den Dyu anga den Samaliyasama di be e puu taki anga makandaa (Yohanisi 4:9). Son leisi den Faliseiman anga den Saduseiman á be e taki go na a wan se (Toli 23:6-9). Den Dyu di be sabi a Weiti be e si enke den bun moo den sama di á be sabi en (Yohanisi 7:49). Boiti dati, a foluku be e buuse den Romesama anga den sama di be e piki moni gi gaanlanti (Mateyesi 9:11). Ma Yesesi á be e mumui anga den toobi de. A be e leli sama den tuu toli fu Yehofa. A be sabi tu taki a den Islayelisama Gadu be teke enke a foluku fi en. Ma noiti wan dei a leli den disipel fi en taki den bun moo taawan (Yohanisi 4:22). Yesesi be e leli den fu lobi ala sowtu sama.​—Lukasi 10:27.

⁶ Saide meke Yesesi á be e si a wan nasi sama bun moo a taawan? A fu di en anga en Dda sabi taki ala sama na aseefi. Yehofa be meke libisama fu fuu a goontapu anga ala sowtu nasi sama (Genesesi 1:27, 28). Neen ede meke Yehofa anga Yesesi nái si a wan nasi sama, wan sama fu wan taa kondee efuso wan sama di e taki wan taa tongo bun moo wan taawan (Toli 10:34, 35; Openbaring 7:9, 13, 14). U mu meke moiti fu waka a den baka.​—Mateyesi 5:43-48.

7, 8. (a) Sama wi e holibaka gi? Fu saide? (b) San wi á mu feegete te u luku den polobelema di libisama abi?

⁷ Saide meke u nái holibaka gi den tiiman fu goontapu? A fu di wi e holibaka gi Yehofa. Neen na u Tiiman. Saatan be taki aini a dyali fu Eden taki Yehofa nái tii libisama a wan bun fasi. A be wani libisama biibi taki a poi du sani bun moo Gadu. Yehofa e gi wi a okasi fu useefi luku sowtu se wi o teke. Ma onse i taampu? Yu e aliki Yehofa fu di yu e biibi taki a fasi fa ai du sani bun moo enke fa yu be o du sani? Yu  e biibi taki na a Kownukondee fi en wanwan too poi losi den polobelema fu u? Efuso yu e si enke sani o waka moo bun te libisama tii denseefi?​—Genesesi 3:4, 5.

⁸ Kon u taki wan sama akisi i fa yu e denki fu den politiki palitei efuso den olikanisâsi di wani kengi a fasi fa sani e waka a goontapu. San i be o piki? Kande son wan fu den sama ya wani yeepi taawan tuutuu. Ma wi sabi taki na a Kownukondee fu Yehofa wawan poi losi den polobelema fu libisama. Neen wawan poi meke sani waka a wan leti fasi. Boiti dati, nawan sama e du san a wani aini a kemeente, ma wi e du sani enke fa Yehofa e soi wi. Neen meke wi e libi na a wan aini a kemeente.

9. Sowtu polobelema son Kelesten aini a ten fu den apostel be abi? San den be mu du?

⁹ Aini a ten fu den apostel, son wan fu den Kelesten fu Korente be e sitee anga denseefi. Den be e taki: „’Mi a fu Pawlesi’, efuso ’mi a fu Apolos’. Taawan be e taki: ’Mi a fu Seifas’, efuso ’Mi a fu Kelestesi.’” Pawlesi dyombo di a yee a toli ya. A sani ya a be wan gaan polobelema, bika a be e tyai paati kon aini a kemeente. Neen meke Pawlesi akisi den taki: „A kemeente fu Kelestesi paati?” Pawlesi wasikoi den taki: „Den baala, mi e begi u aini nen fu wi Masaa Yesesi Kelestesi fu wi e taki go na a wan se.Wi á mu lobi a wan sama moo a taawan. U mu denki go na a wan se.” Aini a ten ya a sani ya e teli gi u tu. Sani á mu de di e tyai paati kon aini a kemeente.​—1 Korentesama 1:10-13; leisi Romesama 16:17, 18.

10. San Pawlesi be membee den salufu Kelesten? San wi e leli fu a toli de?

¹⁰ Pawlesi be membee den salufu Kelesten taki den o go libi a hemel. A taigi den taki den á mu booko den ede anga „goontapu sani” (Filipisama 3:17-20). * (Luku san sikiifi a ondoose.) Den salufu Kelesten e teke peesi gi Gadu anga Yesesi a goontapu ya. Te wan kondee sende wan sama fu go teke peesi gi en aini wan taa kondee, da a sama de nái mumui anga den polobelema efuso den politiki palitei fu a kondee di a go. A so a de tu anga den salufu Kelesten. A á fiti fu den go mumui anga den polobelema efuso den politiki palitei fu goontapu (2 Korentesama 5:20). Den sama di o libi a goontapu ya seefi, e holibaka gi a Kownukondee anga den hii-ati. Denseefi nái mumui anga den feti efuso den toobi fu goontapu.

11, 12. (a) Sowtu manii wi á mu abi efu u wani holibaka gi a Kownukondee fu Gadu? (b) Fa wan sisa be e si den Serfiyasama? Ma san yeepi en fu a denki taa fasi?

¹¹ Gaanse sama a goontapu moo lobi den sama di den anga den kiya na a wan peesi, efuso di e taki aseefi tongo fu den. Ná pikin lobi den lobi a peesi pe den kiya tu. Ma a ná so u mu tyai useefi. U mu kengi a fasi fa wi e denki. U mu meke moiti tu fu a kosensi fu u wooko enke fa Yehofa wani. Da den sani ya o yeepi u fu wi á mumui anga den sani di e tyai paati kon. San o yeepi u fu u du a sani de?

¹² Mirjeta * (Luku san sikiifi a ondoose) meke aini a kondee di sama be sabi fosi enke Yugoslafiya. Den sama di be e tan ape a kiya be e buuse Serfiyasama. Di a kon sabi Yehofa, neen a kon fusutan taki  Yehofa á lobi a wan nasi sama moo a taawan. A kon fusutan tu taki a Saatan wani fu u buuse taa nasi sama. Neen meke a be meke bunbun moiti fu kengi a fasi fa a be e si den sama ya. Ma di feti be booko na a pisi pe a be e tan, neen a be bigin buuse den Serfiyasama baka. Mirjeta á be wani peleiki gi den sama ya tu. A be sabi taki a á be mu buuse den, neen meke a begi Yehofa fu yeepi en fu a á buuse den moo. A akisi Yehofa tu fu a yeepi en fu a du a pioniliwooko. Mirjeta taki: „Mi si taki a poti di mi e poti pakisei na a peleikiwooko yeepi mi na a moo bun fasi. Te mi de aini a peleikiwooko mi e meke moiti fu lobi taawan enke fa Yehofa lobi den. A sani de e yeepi mi fu mi á buuse taawan moo.”

13. (a) San be miti Zoila? San a du di a sani de miti en? (b) San wi e leli fu a fasi fa Zoila tyai enseefi?

¹³ Wan sisa fu Meksikow di den e kai Zoila be foloisi go tan a Europa. Wantu baala anga sisa fu taa pisi fu Meksikow be de aini a kemeente pe a be go. Sonwan fu den be e soso a kondee pe a komoto. Den be e lafu den gwenti anga den poku fu a kondee tu. A á be lobi den sani di den be e taki, neen ede meke a begi Yehofa fu a yeepi en fi en ati á boon. Efu a yu be de a sisa ya, san i be o du? Ai taanga ete gi son baala anga sisa fu u fu holi denseefi te taawan e soso a peesi pe den kiya. Neen meke noiti u wani taki efuso du sani fu soi taki wi e paati bee. Wi á wani du sani tu di sa tyai paati kon aini a kemeente efuso a wan taa peesi.​—Romesama 14:19; 2 Korentesama 6:3.

14. San o yeepi u fu si taa sama enke fa Yehofa e si den?

¹⁴ Ala u sabi taki den sama di e dini Yehofa e libi na a wan. Neen meke noiti u mu si enke a wan peesi efuso a wan kondee bun moo a taawan. Ma kande yu e si enke a peesi pe i kiya bun moo taa peesi, fu di  den famii fi i efuso den sama a pe i kiya be e denki so tu. Kande te enke now yu á kaba lobi taa nasi sama, sama di e taki wan taa tongo, efuso sama di abi taa gwenti. San sa yeepi i fu denki taa fasi? Denki dipi fu a fasi fa Yehofa e si sama di e fii denseefi efuso sama di e si enke a kondee fu den bun moo taawan. Ondoosuku moo sani fu a toli ya aini den buku fu u te yu e holi yu Osufamii Anbegi, efuso te yu e sutudeli anga iseefi. Bakadati, akisi Yehofa fu a yeepi i fu si taa sama enke fa ai si den.​—Leisi Romesama 12:2.

15, 16. (a) San son sama e du te den si taki u de taa fasi? (b) Fa mma anga dda sa yeepi den pikin fu den fu holibaka gi Yehofa?

¹⁵ U wani dini Yehofa anga wan kiin kosensi, neen meke son leisi den sama di wi anga den e wooko na a wan peesi, den sikoo mati, den biitisama, efuso u famii o si taki a libi fu wi anga den kengi (1 Peitilisi 2:19). Yesesi be taigi u taki sama be o buuse u fu di u de taa fasi. Ná feegete taki den sama di e tesi u á sabi a Kownukondee fu Gadu. Neen ede meke den nái fusutan fu saide meke na a Kownukondee wawan wi e holibaka gi. Den nái fusutan fu saide meke u nái holibaka gi den politiki palitei.

¹⁶ Efu u wani holibaka gi Yehofa, da u mu du san a taigi u, winsi san taa sama e taki efuso e du anga u (Daniyeli 3:16-18). A á makiliki gi den yonkuuwan fu u fu de taa fasi aini a goontapu ya. Mama anga dada, u yeepi u pikin fu den á feele fu taki fu a biibi fu den a sikoo. Kande den pikin fu u e feele fu taigi sama a sikoo taki den ná o singi gi a faaka. A kan tu taki den e feele fu taigi sama taki den nái fii den fesa fu a kondee. Te wi e holi a Osufamii Anbegi, taki fu toli di e soi fa Yehofa e si den sowtu sani ya. Leli den fa den mu taigi taawan san den e biibi a wan lesipeki fasi (Romesama 1:16). Efu a de fanowdu, go taki anga den sama di e leli a pikin fi i san a den sani di wi e biibi.

17. Sowtu denki wi á mu abi? Fu saide?

¹⁷ U lobi a nyanyan di u gwenti nyan, a tongo di wi e taki, a peesi pe u kiya, anga a fasi fa u gwenti du sani. Ma wi e si enke den sani di u lobi bun moo den sani di taawan lobi? Yehofa wani u piisii anga den sowtu a sowtu sani di a meke (Psalm 104:24; Openbaring 4:11). Da saide meke u mu si enke a fasi fa wi e du sani bun moo a fasi fa taawan e du sani?

18. Saide a bun fu si taawan enke fa Yehofa e si den?

¹⁸ Yehofa wani ala sowtu sama kon sabi en. A wani den dini en tu, fu den sa fende teego libi (Yohanisi 3:16; 1 Timotiyesi 2:3, 4). Efu wan sama wani du sani a wan fasi di kengi fu a fasi fa wi be o du sani, da u mu de kabakaba fu aliki den sani di ai taki, solanga den sani di a wani du bun gi Yehofa. Te wi e du sani na a fasi ya, da a libi fu wi o switi. Wi o libi na a wan tu anga u baala anga sisa. Enke fa u si aini a artikel ya, a fu di wi e holibaka gi Yehofa anga a Kownukondee fi en, meke u nái mumui aini den feti fu a goontapu ya. Wi e buuse a fasi fa den sama fu a goontapu fu Saatan e fii denseefi, anga a fasi fa den e sitee anga makandaa. Neen meke ai bigi gi u taki Yehofa e leli u fu abi sakafasi. Ai bigi gi u tu taki ai leli u fu libi na a wan. Wi e fii leti enke a Psalm sikiifiman di be sikiifi taki: „Luku fa a bun anga fa a switi te baala e libi na a wan!”​—Psalm 133:1.