A wan don sani fu biibi taki den sama di dede o kon a libi baka? A apostel Pawlesi á be e si en enke wan don sani. A be sikiifi taki: „Efu u ná o fende wini fu Kelestesi baka te u dede, da sama mu tyali gi wi moo iniiwan taa sama. Ma Kelestesi kon a libi baka tuutuu. Fu den sama di dede neen na a fosiwan di kon a libi baka”(1 Korentesama 15:19, 20). Pawlesi be e si a opobaka enke wan tuutuu sani, bika Yesesi seefi be kon a libi baka. * (Toli 17:31). Neen ede meke Pawlesi be kai Yesesi „a fosiwan”, fu di a Yesesi na a fosi sama di be opobaka fu libi fu teego. Efu Yesesi na a fosiwan, da dati wani taki taawan be o opobaka fu libi fu teego tu.

Luku wan taa sani di e meke i sa biibi taki den sama di dede o kon a libi baka. Beibel e taki: „Gadu. . . á poi lei” (Titesi 1:2). Noiti Yehofa lei wan dei. Noiti a o lei tu. A paamisi u taki den sama di dede sa kon a libi baka. Aini a ten di pasa, a meke wantu sama kon a libi baka. Da i denki taki a paamisi fi en sa daai toon lei? A sani de á kan!

Fu saide meke Yehofa o meke den sama di dede kon a libi baka aini a ten di e kon? A fu di a lobi sama. Yopu be akisi taki: „Efu wan sama dede, a sa kon a libi baka?” Enseefi be gi a piki, bika a be taki: „Yu o kai mi, da mi o piki i. Yu o angii fu si mi, bika a yu ana meke mi” (Yopu 14:14, 15). Yopu be e biibi taki a Dda fi en a hemel di lobi en, be o angii fu meke a kon a libi baka. A fasi fa Gadu e pakisei kengi? Enseefi taki: „Mi a Yehofa. Mi nái kengi” (Maleyaki 3:6). Te enke now Gadu wani den sama di dede kon a libi baka enke gusontu sama di de koloku. Na a sani ya iniiwan mma efu wan dda di lasi wan pikin be o wani tu. Den ná abi a makiti fu du  a sani de, ma Gadu abi a makiti fu du den sani di a wani.​—Psalm 135:6.

Yehofa o gi en Manpikin a makiti fu meke ala den sama di lasi wan lobiwan piisii baka. Fa Yesesi seefi e pakisei fu a opobaka? Fosi Yesesi be meke Lasalesi kon a libi baka, a be si fa den sisa anga den mati fu Lasalesi be e tyali. Neen meke enseefi „bigin kee” (Yohanisi 11:35). Wan taa leisi a be miti wan uman fu Nain di boi be dede. Di Yesesi si a uman, „tyali kisi en te, neen a taigi en taki: ’Ná kee moo.’” Wantenwanten a meke a boi fu a uman kon a libi baka (Lukasi 7:13). A sani ya e soi taki ai hati Yesesi te a si fa sama e dede efuso e tyali. Neen meke a o switi gi en te a o puu tyali, fu meke ala sama a goontapu piisii!

I tyali wan dei kaba fu di wan sama fi i be dede? Kande yu e si enke nawan sama poi yeepi u fu wi á dede moo. Ma Gadu poi yeepi u. A o meke a Manpikin fi en meke den dedesama kon a libi baka. Holi a pakisei taki Gadu wani fi i si te a o du a sani ya. A wani fi i de ape fu baasa den sama fi i di kon a libi baka. Pakisei fa a ten de o de, te yu anga den sama fi i o de makandaa fu teego. Noiti moo dede o meke u naki paati!

Lionel di u be kai a fesi e taki: „Mi be kon leli taki den sama di dede o kon a libi baka. Biginbigin a be taanga gi mi fu biibi a sani ya. Mi á be e kaba fitoow a sama di be taigi mi a sani ya. Ma mi go ondoosuku a sani ya aini Beibel, neen mi si taki a tuu sani a be e leli mi! Mi á poi wakiti fu si mi gaandda baka”.

I be sa wani sabi moo? Den Yehofa Kotoigi o piisii fu soi i aini i Beibel saide meke den e biibi taki den sama di dede o kon a libi baka. *