Mi kiya a wan foto den e kai Alikante. A foto ya de aini Sipanyookondee. Sani á be e go bun aini mi osufamii, neen meke hii dei a sitaati mi be e de. Mi be e tan koosube fu wan peesi pe den be e lapu banti. Mi anga wan fu den man di be e wooko ape be toon mati. Den be e kai en José María. A man ya be e booko en ede anga mi moo den famii fu mi. Winsi fa a 20 yali a be gi mi, tokuso a be de enke wan baala anga wan mati gi mi te mi be abi polobelema.

Den Yehofa Kotoigi be bigin sutudeli Beibel anga José María. Mi be si taki a be lobi den sani di a be e leli. A be lobi taigi mi san a be e leli. Mi be e aliki en fu di mi be e lesipeki en, ma a ná taki mi be e booko mi ede anga den sani di a be e leli mi. Enke yonkuu boi mi be e booko mi ede anga taa sani. Ma a sani de be o kengi.

Mi á lobi taki fu a ongooku di be miti mi. Moo enke mi be lei a gaan bolomu enke mi ede opo. Aini wan dei mi hii libi kengi. Mi enke wan yonkuu manengee be kon lan wanboowanboo so, te na ati-osu mi be mu tan wan pisi ten. A sani ya á be makiliki gi mi. Mi be e akisi miseefi taki: ’Saide mi de a libi ete seefi?’

José María be kon luku mi na ati-osu. A be seeka sani wantenwanten tu fu den Kotoigi fu a pisi de kon luku mi. A kon di den be e kon luku mi ala yuu be e meke mi fii bun. Mi be de aini wan kambaa pe den e poti sama di kisi gaan mankei efuso di siki bunbun siki. Ma di den dataa poti mi a wan taa kambaa, neen mi bigin sutudeli Beibel. Mi kon fusutan saide sama e pina, saide den e dede, anga saide Gadu á puu ogii ete. Mi be leli tu taki aini a ten di e kon, den sani di Gadu paamisi u, o kon tuu. A paamisi u taki a hii goontapu o lai anga sama di ná abi sondu moo. A ten de nawan sama o taki: „Mi siki” (Yesaya 33:24). Fositoon aini mi libi mi be kon abi wan howpu.

Di mi komoto na ati-osu, neen mi bigin du den sani di mi be e leli. Aini wan lolosutuu den be e tyai mi go a komakandaa anga a peleikiwooko. Mi dopu na a 5 november 1988 aini wan sowtu gaan tobo pe sama e wasi. A ten de mi be abi  20 yali. Yehofa be yeepi mi fu piisii baka aini a libi. Fa mi be sa soi Yehofa taki a sani ya e bigi gi mi?

Mi be poti a mi ede fu du ala san mi man gi Yehofa, winsi fa mi be siki. Mi be wani meke moiti fu go a fesi (1 Timotiyesi 4:15). Biginbigin a sani de á be makiliki gi mi, bika den sama fu mi á be lobi fa mi be toon wan Kotoigi. Ma den baala anga sisa fu a kemeente be e yeepi mi fu mi á misi komakandaa. Den be e yeepi mi tu fu go aini a peleikiwooko ala yuu.

Mi be kon si taki ala yuu fu a dei mi be o abi sama fanowdu fu yeepi mi. Neen meke mi bigin suku wan peesi pe den e yeepi sama di lan. Di mi suku te, neen mi fende wan aini Falensiya foto. A 160 kilomeiti i be mu lei komoto a Alikante fu doo a foto ya. Na ape mi foloisi go tan.

Winsi mi á poi opo komoto a mi bedi moo, tokuso mi e tan dini Yehofa. Mi be bai wan computer anga a moni di lanti e gi mi fu di mi á poi wooko. Mi be meke den sete en na a bedi ede fu mi. Mi be bai wan telefon tu. Ala mamanten wan fu den sama di e kon yeepi mi e leti mi computer anga mi telefon gi mi. Mi e koboloiki wan sowtu tiki fu wooko anga a computer fu mi. Mi e poti en a mi baiba ondoo, da a so mi e man wooko anga mi computer. Mi abi wan tiki tu di mi e holi aini mi mofu. Anga a tiki ya mi e sikiifi biifi. Anga en mi e doloki den nombuu a mi telefon tu.

Fa den sani ya yeepi mi? Mi be man koboloiki den fu go na a jw.org Website anga a Waktitoren LIBRARY TAPU INTERNET. Ná pikin yeepi a website ya yeepi mi. Son dei a omen yuu langa mi e sutudeli den buku fu u di de a Internet. A so mi e kon sabi Gadu moo bun. Mi e kon sabi den manii di a abi moo bun tu. Te mi e fii booko-saka, da mi e go na a website. Ala yuu mi e fende wan sani di e gi mi taanga-sikin.

Mi sa aliki efuso teke paati a den komakandaa anga a computer fu mi tu. Mi man gi piki, begi, holi lezing efuso leisi na a Wakititolen-sutudi. Winsi fa mi á poi go a komakandaa moo, tokuso mi e fii enke mi de aini a kemeente.

A telefon anga a computer fu mi e yeepi mi fu du a peleikiwooko tu. Mi á poi go a sama osu fu leli den enke den taa Kotoigi. Ma tokuso mi e du san mi man fu leli sama. Mi e koboloiki den sani di mi abi fu leli taa sama san mi e biibi. Fu di mi lobi koboloiki a telefon fu mi fu leli sama, meke den owluman fu a kemeente akisi mi fu sete sani  fu taa baala anga sisa sa peleiki so tu. A sani ya yeepi omen baala anga sisa di á poi komoto a osu fu peleiki.

Ma a ná computer anga telefon wawan e yeepi mi. Ala dei den mati fu mi e kon luku mi. Den e kon anga famii anga taa sama di wani sabi moo fu Beibel. Son leisi wan hii osufamii e kon luku mi, da den e holi a Osufamii Anbegi fu den makandaa anga mi. San mi moo lobi, a te den pikinengee e kon sidon a mi bedi mofu, da den e taigi mi saide den lobi Yehofa.

Ai bigi gi mi taki somen sama e kon luku mi. Gaanse leisi mi kambaa e lai anga sama di komoto na ala se. A sani ya e foondoo den sama di e wooko a pe mi e tan. Ala dei mi e gi Yehofa daa taki mi abi somen baala anga sisa di lobi mi.

Te sama e akisi mi fa ai go anga mi, da mi e taigi den taki: „Ai go, mi nái gi abaa!” Mi sabi taki a ná mi wawan e feti a feti ya. Winsi sowtu polobelema wi abi, toku ala wi de aini wan feti. Ala wi e „feti a bun feti fu a biibi” (1 Timotiyesi 6:12). San yeepi mi fu feti ala den yali ya? Mi e begi ala dei. Ma mi e gi Yehofa daa tu taki a gi mi howpu aini a libi. Mi e du ala san mi poi fu dini en. Mi e tan pakisei a howpu di a gi mi.

Mi lobi pakisei fa a libi o de aini a nyun goontapu, te mi o man lon efuso dyombo a tapu baka. A mati fu mi José María be kon lan tu. Son leisi mi e deegi en taki: „Mi anga i, sama o wini te wi o sitee lon aini a nyun goontapu?” A lobi taigi mi taki: „A ná a toobi sama o wini. A moiti u mu meke fu doo aini a paladeisi.”

A á be makiliki gi mi fu man libi anga a siki ya. Ma mi sabi taki na a don sani di mi du di mi be yonkuu, meke a ogii ya miti mi. Tokuso mi e piisii taki Yehofa á fika mi. A gi mi omen sani. Mi abi omen baala anga sisa aini a olikanisâsi. Mi á wani dede fu di mi lan. Mi man piisii fu di mi e yeepi taawan. Boiti dati mi sabi taki mi libi o kon moo bun aini a ten di e kon. Efu mi be mu taki satu fa mi e fii, da mi be o taki Yehofa gi mi moo enke san be de fanowdu.