1, 2. (a) San i wani du te i de aini a Paladeisi? (Luku a fowtow na a bigin.) (b) Sowtu sani o meke u moo piisii aini a nyun goontapu?

NÁ PIKIN angii wi e angii fu fende a „teego libi”. A apostel Pawlesi be taki, na a teego libi na „a tuutuu libi”. (Leisi 1 Timotiyesi 6:12, 19.) Gaanse sama o libi fu teego aini wan paladeisi a goontapu ya. Nownow u nái kaba fusutan ete san a wani taki fu opo ala mamanten anga wan bun gusontu, efuso anga piisii (Yesaya 35:5, 6). Pakisei fa a o de te yu o de makandaa anga i famii, i mati, anga den sama di o kon a libi baka (Yohanisi 5:28, 29; Toli 24:15). Aini a ten de, yu o leli fu du omen taa sani. Yu o poi du den sani di i lobi a wan moo bun fasi tu. Wantu sani di yu o man du, a fu leli moo sani fu hemel anga a goontapu. Yu o leli fa fu pee poku efuso fa fu meke yu osu.

² Winsi fa wi e angii fu du ala den sani ya, tokuso na a dini di wi o dini Yehofa o meke u moo piisii. Pakisei fa a o de te ala sama o si a nen fu Yehofa enke wan santa sani. Pakisei tu fa a o de te ala sama o si Yehofa enke den tiiman (Mateyesi 6:9, 10). Wi o piisii fu  si fa a goontapu o lai anga sama di ná abi sondu, leti enke fa Yehofa be abi a pakisei. Na a ten de, wi o man toon moo bun mati anga Yehofa, bika u ná o abi sondu moo!​—Psalm 73:28; Yakowbesi 4:8.

3. Gi san u mu teke seeka nownow?

³ Wi e biibi taki Yehofa o du ala den sani ya, „bika Gadu man du ala sani” (Mateyesi 19:25, 26). Efu u wani libi fu teego aini a nyun goontapu, da a nownow u mu kisi a teego libi „holi taanga”. U sabi taki a kaba fu a goontapu ya de koosube. Neen meke a fasi fa wi e libi mu soi taki wi e biibi taki a kaba sa kon iniiwan yuu. U mu du ala san u man nownow fu man libi aini a nyun goontapu. Meke u luku fa u sa du a sani de.

4. San u mu du nownow fu man libi aini a nyun goontapu?

⁴ San u mu du nownow fu man libi aini a nyun goontapu? Kon u taki yu e pakisei fu foloisi go tan a wan taa kondee. Yu o wani du wantu sani fu teke seeka fu tan aini a kondee de. Kande i be o leli a tongo anga den gwenti di den sama fu a kondee de abi. Kande yu o puubei fu nyan den nyanyan fu a kondee tu. A so useefi tu mu du wantu sani nownow fu man libi aini a nyun goontapu. Meke u luku fa u sa du den sani ya.

5, 6. Fa a aliki di wi o aliki a olikanisâsi fu Yehofa o yeepi u fu teke seeka fu libi aini a nyun goontapu?

⁵ Aini a goontapu di wi e libi nownow, Saatan wani meke sama denki taki den sa libi enke fa den wani. A omen sama e si enke a á de fanowdu fu taawan taki gi den. Den e si enke a á de fanowdu fu aliki Gadu. Ma san e miti den fu di den e libi so? Soso pina anga booko-ede (Yelemiya 10:23). Ma Yehofa a wan Tiiman di lobi u. A libi o moo switi aini a nyun goontapu te ala sama o aliki en!

⁶ Aini a nyun goontapu, wi o piisii te wi o du den sani di a olikanisâsi fu Yehofa o taigi u. A olikanisâsi o soi u san u mu du fu meke a goontapu ya toon wan moin paladeisi. A o soi tu fa u mu leli den sama di o kon a libi baka. Yehofa o abi tyaipi wooko gi u. Ma san wi o du efu den sama di e teke fesi akisi u fu du wan wooko di wi á kaba lobi? Wi o aliki? Wi o meke  moiti fu du a wooko anga piisii? Efu u wani teke seeka fu libi aini a nyun goontapu, da a nownow kaba u mu aliki den baala di e teke fesi aini a olikanisâsi fu Yehofa.

7, 8. (a) Saide u mu wooko makandaa anga den baala di e teke fesi? (b) Fa a libi fu son baala anga sisa kengi? (c) Fa wi o fii te u de aini a nyun goontapu?

⁷ Efu u wani de seekaseeka fu libi aini a nyun goontapu, da u mu leli fu de tifeedi.U mu leli tu fu wooko makandaa anga a olikanisâsi fu Yehofa anga taa baala anga sisa. Efu den gi u wan wooko fu du, da wi o meke moiti fu du a wooko de. Wi o piisii tu anga a wooko di den gi u. Efu nownow kaba wi e meke moiti fu wooko anga den baala di e teke fesi, da a ná o taanga gi u fu du aseefi sani de aini a nyun goontapu. (Leisi Hebrewsama 13:17.) Di den Islayelisama be go aini a Paamisi Kondee, den sama di be e teke fesi be soi den pe den mu tan (Numeri 26:52-56; Yowsuwa 14:1, 2). Wi á sabi ete pe den o meke u tan aini a nyun goontapu. Ma efu u gwenti du den sani di den baala di e teke fesi e taigi u, da wi o piisii fu du san Yehofa wani, winsi pe fu goontapu wi o tan.

⁸ Pakisei fa a o bigi gi u fu dini Gadu aini a nyun goontapu te a Kownukondee fi en o tii. Neen meke nownow wi e piisii fu wooko makandaa anga a olikanisâsi fi en. Wi e piisii tu fu du a wooko di den gi u. Ma son leisi den sa gi u taa wooko. Na a sani de be pasa anga wantu baala anga sisa di be e wooko a Betel aini Ameekankondee. Den baala be poti den aini a pioniliwooko. Den be poti wantu kelen-owluman enke spesuutu pionili tu, fu di den be kon gaandi, efuso fu di sani be kengi. Tokuso ala den baala anga sisa ya be e piisii anga a wooko di den be gi den. Yehofa be holibaka gi den tu. Efu useefi e begi Yehofa fu a yeepi u, efu u du ala san u man fu dini en, neen u de tifeedi anga a wooko di den gi u, da wi o de koloku. Yehofa o meke sani waka bun anga u. (Leisi Odo 10:22.) San wi o du efu u wani tan a wan peesi aini a nyun goontapu, ma a olikanisâsi fu Yehofa akisi u fu go tan a wan taa peesi? A ten de a ná abi toobi pe wi o tan efuso san wi o du. A o bigi gi u taki wi e libi aini a nyun goontapu.​—Nehemiya 8:10.

9, 10. (a) Saide a o de fanowdu fu abi pasensi aini a nyun goontapu? (b) Fa u sa soi taki wi abi pasensi nownow?

 ⁹ A kan taki son leisi a o de fanowdu fu abi pasensi te u de aini a nyun goontapu. Kande wi o yee fa taa sama e piisii fu di den mati anga den famii fu den kon a libi baka. Ma a kan taki wi o abi fu wakiti moo langa fu si den sama fu u di be dede. San wi o du efu sani waka so? Wi o abi pasensi? Wi o piisii anga taa sama fu di den mati anga den famii fu den kon a libi baka? (Romesama 12:15) Efu nownow kaba wi abi pasensi fu si fa Yehofa o du den sani di a paamisi u, da wi o man abi pasensi na a ten de tu.​—Peleikiman 7:8.

¹⁰ Wan taa fasi fa u sa seeka useefi fu libi aini a nyun goontapu, a te wi abi pasensi te den baala e yeepi u fu fusutan son leli fu Beibel moo kiin. Wi e meke ten fu ondoosuku den toli di den baala kengi? Wi abi pasensi te u nái kaba fusutan ala den sani ya wantenwanten? Efu wi e wooko so, da a o moo makiliki gi u fu abi pasensi aini a nyun goontapu, te Yehofa o taigi u wan nyun sani di a wani u du.​—Odo 4:18; Yohanisi 16:12.

11. Saide meke u mu gwenti gi taawan paadon nownow? Fa a sani ya o yeepi u aini a nyun goontapu?

¹¹ Ete wan fasi fa u sa seeka useefi fu libi aini a nyun goontapu, a te u gwenti gi taawan paadon. Te Yesesi o tii goontapu dunsu yali enke Kownu, da ten o de fanowdu fu meke libisama ná abi sondu moo (Toli 24:15). Fa wi o tyai useefi na a ten de? Wi o lobi taawan? Wi o go e gi den paadon? Efu nownow kaba u gwenti gi taawan paadon, u nái holi den na ati, da a o moo makiliki gi u fu du den sani de aini a nyun goontapu.​—Leisi Kolosesama 3:12-14.

12. Saide meke u mu teke seeka nownow fu libi aini a nyun goontapu?

¹² A kan taki a ná ala yuu wi o go e fende san u wani aini a nyun goontapu. Kande wi o abi fu wakiti son leisi. Wi o abi fu tifeedi anga den sani di wi abi. Te i luku en bun, da wi o abi denseefi manii fanowdu di Yehofa e leli u nownow. Efu wi e meke moiti fu abi den manii de nownow, da wi e soi taki a nyun goontapu a wan tuutuu sani gi u. Wi o soi tu taki wi e teke seeka gi a teego libi (Hebrewsama 2:5; 11:1). A so wi o soi tu taki u wani libi tuutuu aini wan goontapu pe ala sama e aliki Yehofa.

13. San o de a moo pelensipali sani gi u aini a nyun goontapu?

¹³ Aini a nyun goontapu, wi o fende ala san wi abi fanowdu fu abi wan bun libi di e gi u piisii. Ma a sani di o gi u moo piisii, na a de di wi o de mati anga Yehofa (Mateyesi 5:3). Wi o abi tyaipi fu du aini a diniwooko fu Yehofa. A dini di wi o dini Yehofa o gi u piisii tu (Psalm 37:4). Efu wi e poti Yehofa a fesi aini u libi nownow, da wi e seeka useefi fu libi aini a nyun goontapu.​—Leisi Mateyesi 6:19-21.

14. Sowtu maiki yonkuuwan sa poti te den e dini Yehofa?

¹⁴ San o yeepi u fu abi moo piisii aini a dini di wi e dini Yehofa? Wan sani di o yeepi u, a te wi e poti maiki di u wani doo. Efi i yonkuu ete, da teke ten pakisei fa i sa koboloiki i kaakiti fu dini Yehofa. Go luku san den buku fu u e taki fu a fuuten-diniwooko. Kande i sa meke moiti fu du a wooko de tu. * (Luku san sikiifi a ondoose.) Taki anga sama di e du a fuuten-diniwooko omen yali kaba. Efi i de aini a fuuten-diniwooko, da yu o leli sani di o seeka i fu libi aini a nyun goontapu fu Yehofa.

15. Sowtu taa maiki u sa poti te wi e dini Yehofa?

 ¹⁵ A omen maiki u sa poti te wi e dini Yehofa. Kande u sa poti enke maiki fu leli wan nyun fasi fu du a peleikiwooko. U sa puubei tu fu fusutan den leli fu Beibel moo bun, da u meke moiti fu wooko anga den aini u libi. U sa puubei tu fu leisi moo bun, holi lezing moo bun efuso gi moo bun piki a komakandaa. A sani di u wani i fusutan na: Te yu e poti maiki di i wani doo, da yu o du a diniwooko anga i hii ati. Yu o de seekaseeka tu gi a libi aini a nyun goontapu.

16. Saide meke na a moo bun libi wan sama abi te ai dini Yehofa?

¹⁶ A lasi wi e lasi nownow te wi e koboloiki u ten fu teke seeka gi a nyun goontapu? Nono! Dini Yehofa na a moo bun fasi fu libi. U nái dini Yehofa fu di sama e dwengi u, efuso fu di u wani pasa a gaan banowtu libilibi. Te wi anga Yehofa a bun mati, wi o abi wan moo bun libi. Wi o moo piisii tu, bika a meke u fu de mati anga en. Sani á de di switi enke a lobi di Yehofa lobi u, efuso a leli di ai leli u fa u mu tyai useefi. (Leisi Psalm 63:1-3.) Ala wi e piisii te wi e dini Yehofa anga u hii ati. Son wan fu den baala anga sisa di e dini en omen yali kaba sabi taki na a moo bun libi wan sama abi te ai dini Yehofa.​—Psalm 1:1-3; Yesaya 58:13, 14.

17. San o de a moo pelensipali sani gi u aini a paladeisi?

¹⁷ Aini a Paladeisi, wi o abi ten fu meke piisii, efuso du den sani di u lobi. A Yehofa meke wi anga a fii fu piisii. Ai paamisi u tu taki „ala libisani fiya o fende san den abi fanowdu” (Psalm 145:16; Peleikiman 2:24). A de fanowdu fu libisama teke boo. A de fanowdu fu den meke piisii tu. Ma te wi e poti a dini di wi e dini Yehofa a fesi, da den sani ya e moo switi gi u. A so a o de tu aini a nyun goontapu. Neen meke a bun fu „tan poti a Kownukondee fu Gadu” a fesi, anga fu tan pakisei den wini di wi e fende fu di wi e dini Yehofa.​—Mateyesi 6:33.

18. Fa u sa soi taki wi e seeka useefi fu libi fu teego aini a nyun goontapu?

¹⁸ Aini a nyun goontapu, a libi o switi moo enke san u be denki. Meke u soi taki u wani de ape, fu di wi o teke seeka nownow gi a „tuutuu libi”. Meke moiti fu kon abi den manii di Yehofa e leli u. Meke moiti tu fu paati a bun nyunsu anga i hii ati, da yu o piisii fu di a dini fu Yehofa o de a moo pelensipali sani gi i. Wi abi a biibi taki aini a nyun goontapu, Yehofa o du ala den sani di a paamisi. Neen ede meke, kon u libi enke u de aini a nyun goontapu kaba!