1. Aini sowtu ten wi e libi?

WI E libi aini wan „taanga”ten. Fanafu di „den kiiboi dei” bigin aini 1914, neen a goontapu kon moo ogii (2 Timotiyesi 3:1-5). Ma u sabi taki winsi fa a goontapu ogii nownow, tokuso a o kon moo ogii, bika Beibel be taki dei fu dei „ogiiman anga bidiigiman o kon moo ogii”.​—2 Timotiyesi 3:13.

2. Sowtu sani somen sama e du fu meke piisii? (Luku a fowtow na a bigin.)

² Aini a ten ya sama e meke piisii a omen sowtu fasi. Somen fu den lobi luku efuso du sani di Gadu e buuse. Ai buuse den sani ya fu di feti, kii, hululibi, bonu efuso taa sowtu ogii de aini den sani ya. Internet, tv, buku, felon anga poku e meke sama si enke ogii anga hululibi a bun sani. Fosi, sama be e dyombo te den be e si taawan e du sani di á fiti. Ma nownow den sani de kon toon kowownu sani gi den. Lanti seefi nái tapu sama moo fu den á du den sowtu sani de. Ma dati á wani taki den sowtu libi ya e bun gi Yehofa.​—Leisi Romesama 1:28-32.

3. Fa den sama fu a goontapu ya e si den sama di e dini Gadu?

 ³ Aini a ten fu den fosi Kelesten, son sama be gwenti go luku sani di Yehofa e buuse te den be wani meke piisii. Ma fu di den bakaman fu Yesesi be e libi enke fa Gadu wani, meke den á be e go luku den sowtu sani ya. A sani ya be e „foondoo” taa sama. San be de a bakapisi? Sama be e soso den. Den be e du ogii anga den tu (1 Peitilisi 4:4). Aini a ten ya tu, sama nái fusutan saide den sama di e dini Gadu de taa fasi. A sani ya á mu foondoo wi, bika Beibel be taki „sama o du ogii” anga den bakaman fu Yesesi.​—2 Timotiyesi 3:12.

4. Saide wi á mu lobi a goontapu ya?

⁴ Efu u wani libi enke fa Gadu wani, da wi á mu „lobi a goontapu efuso den sani fu a goontapu” ya. (Leisi 1 Yohanisi 2:15, 16.) A Saatan e tii goontapu. Neen na „a gadu fu a goontapu ya”. Ai koboloiki sani enke keliki, gaanlanti, bisnis, tv, laadiyow, buku anga taa sani fu koli sama (2 Korentesama 4:4; 1 Yohanisi 5:19). Fu di wi á wani tyai useefi enke den sama fu a goontapu ya, meke wi á mu paa anga den. Beibel e wasikoi u taki: „Ná meke sama koli u. Takuu mati e poli den bun manii di wan sama abi.”​—1 Korentesama 15:33.

5, 6. Anga sama wi á mu e mosoo? Fu saide?

⁵ Efu wi á wani poli mati anga Yehofa, da wi á mu e mosoo anga sama di e du ogii. Wi á mu e mosoo tu anga sama aini a kemeente di e taki den e dini Yehofa, ma tokuso den e taangayesi en. Efu den sama ya du wan gaan sondu sondee fu soi taki ai hati den, da u nái mumui anga den moo.​—Romesama 16:17, 18.

⁶ Wi enke libisama wani du den sani di den mati fu u lobi, bika u wani den mati fu u lobi u. Neen meke efu wi e mosoo anga sama di e taangayesi Gadu, da wi o wani du den sani di den e du tu. Efu wi e mosoo anga sama di e libi wan hululibi, da wi o wani de enke den. Na a sani de pasa anga son baala anga sisa. Den be abi fu puu son wan fu den aini a kemeente, fu di den á be e libi enke fa Yehofa wani (1 Korentesama 5:11-13). Efu den á kengi, da a libi fu den o de leti enke fa Peitilisi taki aini 2 Peitilisi 2:20-22​—Leisi en.

7. Sama u mu teke enke mati?

⁷ Winsi fa u wani libi bun anga ala sama, tokuso wi á mu e mati anga den sama di e taangayesi Gadu. A á be o de wan bun sani fu abi mofu anga wan sama di nái dini Yehofa anga en hii ati. A Gadu mu si wi enke bunbun sama, ná den sama di nái dini en. A den sama di e du san Gadu wani mu de u mati. Yesesi be taki: „A den sama di e du san Gadu wani a mi baala, mi sisa anga mi mma.”​—Malikisi 3:35.

8. Fa den Islayelisama be tyai denseefi di den go mosoo anga sama di nái dini Yehofa?

⁸ Te wi e mosoo anga sama di nái dini Yehofa, da a sani de sa tyai ogii gi u. Luku san be pasa anga den Islayelisama. Fosi den be go aini a Paamisi Kondee, Yehofa be taigi den fu luku bun anga den sama di be e tan ape. A be taki: „Wi á mu boigi gi den gadu fu den. Wi á mu meke sama koli u fu dini den. Wi á mu meke sani di gei den gadu fu den. U mu naki den booko. U mu booko den santa ponsu fu den tu. A Yehofa a Gadu fu u, u mu dini” (Ekisodesi 23:24, 25). Ma gaanse fu den Islayelisama ná aliki Gadu. A sani de meke den daai baka gi en (Psalm 106:35-39). San Yehofa du di den daai baka gi en? Bakaten enseefi be daai baka gi den tu, neen a teke a Kelesten kemeente enke a foluku fi en.​—Mateyesi 23:38; Toli 2:1-4.

9. Saide u mu luku bun anga den sani di wi e si a tv, Internet anga buku?

⁹ Gaanse fu den sani di den e soi a tv, Internet anga buku, sa meke wi anga Yehofa poli mati. Den sani ya nái yeepi Kelesten fu fitoow Yehofa. Den nái yeepi u tu fu biibi den sani di a paamisi u. Ma den e gi sama taanga-sikin fu fitoow a ogii goontapu fu Saatan. Neen meke u mu luku bun anga den sani di wi e luku, e leisi efuso e aliki, bika den sani ya sa meke u kon abi den „takuu fii di den sama fu a goontapu abi.”​—Titesi 2:12.

10. San o pasa anga den tawgii sani di sama e luku efuso e leisi?

¹⁰ Dyonson den tawgii sani di sama e luku efuso e leisi ná o de moo, bika Gadu o puu ala den sani ya te a o poli a goontapu fu Saatan. Beibel taki: „A goontapu anga den fii di den sama fu a goontapu abi ná o de moo, ma den sama di e libi enke fa Gadu wani o tan fu teego” (1 Yohanisi 2:17). A Psalm sikiifiman be taki sowan sani tu. A be taki: „Gadu o kii den ogii sama.” A be taki tu: „Ma a den safu-ati sama o fende goontapu. Den o piisii fu a libi, bika ala sani o waka bun.” Fu on langa? Beibel e taki: „A den sama di e libi a wan leti fasi o fende a goontapu, a den o libi neen tapu fu teego.”​—Psalm 37:9, 11, 29.

11. Fa Yehofa e yeepi u fu tan dini en?

¹¹ A olikanisâsi fu Yehofa á de enke a goontapu fu Saatan, bika ai yeepi u fu fende a teego libi. Di Yesesi be e begi Yehofa, neen a be taki: „Efu wan sama wani fende a teego libi, da a mu leli sabi yu enke a wan kodo tuutuu Gadu, anga Yesesi Kelestesi di i be sende kon a goontapu” (Yohanisi 17:3). Yehofa e koboloiki a olikanisâsi fi en fu gi u ala san wi abi fanowdu fu kon sabi en. Wi abi tyaipi buku, felon anga sani a Internet di e yeepi u fu tan dini Yehofa. A olikanisâsi e seeka komakandaa gi u tu aini moo enke 110.000 kemeente a hii goontapu. Den sani di wi e leli a den komakandaa ala wiki anga den gaan komakandaa e taanga u biibi aini Yehofa. Den e meke u biibi den sani di a paamisi u tu.​—Hebrewsama 10:24, 25.

12. San a wani taki fu toow „anga wan bakaman fu Masaa”?

¹² Kelesten di wani toow mu luku bun anga sama den e mati. A Wowtu fu Gadu e wasikoi wi taki: „Ná paa anga sama di á de a biibi. Bika u si enke leti-du anga ogiidu e paa? Efuso u si enke kiin anga dunguu e go?” (2 Korentesama 6:14) Beibel e soi den sama di e dini Gadu taki den mu toow „anga wan bakaman fu Masaa”. Dati wani taki den mu toow anga wan sama di dopu, wan sama di e libi enke fa Yehofa wani (1 Korentesama 7:39). Te i toow anga wan sama di lobi Yehofa, da a o yeepi i fu tan dini Gadu.

13. San Yehofa be taigi den Islayelisama te den be o toow?

¹³ Yehofa sabi san bun gi wi. Ná a tide ai taigi den sama di e dini en taki „anga wan bakaman fu Masaa” den mu toow. Luku san a be taigi den Islayelisama. A be meke Mosesi taigi den taki: „Wi á mu toow anga den. Ná meke den umanpikin fu u toow anga den manpikin fu den. Ná meke den manpikin fu u toow anga den umanpikin fu den. Bika den o meke den pikin fu u fika mi go dini taa gadu. Da Yehofa ati o boon a u. Esi-esi a o kii u puu.”​—Deitolonomi 7:3, 4.

14, 15. San be miti Salomo di a taangayesi Yehofa?

¹⁴ Di Salomo toon kownu fu Islayeli, neen a begi Yehofa fu a gi en koni. Yehofa be piki a  begi fi en. A koni fu Salomo be gi en balinen. Di a be e tii a foluku ala sani be e waka bun tu. A uman-kownu fu Skeiba be foondoo di a be si fa Salomo koni kisi. Neen meke a uman ya be taki: „A koni anga a gudu fi i pasa san mi be yee” (1 Kownu 10:7). Ma a sani di miti Salomo e soi u tu san sa pasa anga wan sama di e taangayesi Yehofa, fu di a go toow anga wan sama di á de wan Kelesten.​—Peleikiman 4:13.

¹⁵ Winsi fa Yehofa be e holibaka gi Salomo, tokuso Salomo be taangayesi Yehofa. Salomo „be lobi tyaipi taa kondee uman” di á be e dini Yehofa. Te fu kaba a be kon abi 700 uman di be abi balinen. Boiti dati, a be e libi anga 300 taa uman. Fa sani be waka gi en? Di Salomo kon gaandi, „neen den uman fi en meke a go dini taa gadu, . . . neen Salomo du sani di Yehofa á lobi” (1 Kownu 11:1-6). A fu di a be go libi anga den uman di be e dini taa gadu, meke a á tan dini Yehofa anga en hii ati. Efu a sani ya be miti Salomo, da a sa miti u tu. Neen meke u nái pakisei seefi fu toow anga wan sama di á lobi Yehofa!

16. San Beibel e taigi den sama di abi wan toowpaa di nái dini Yehofa?

¹⁶ San wan sama mu du te a toon wan Kotoigi, ma en toowpaa nái dini Yehofa? Beibel e taki:„ Uman, a so u mu tyai useefi tu. Saka useefi a u man ondoo. Te son wan fu den á wani du san Gadu Wowtu e taki, da a fasi fa wi e tyai useefi sa meke den kon a biibi sondee fu u taigi den wan sani” (1 Peitilisi 3:1). A sani ya e teli gi wan man tu efu a uman fi en nái dini Yehofa. A Wowtu fu Gadu e taigi u kiin san u  mu du. U mu de wan bun man efuso wan bun uman, da u du den sani di Beibel e taigi sama di toow. Efu a toowpaa fi i si taki yu e tyai iseefi a wan bun fasi, da enseefi o wani dini Yehofa tu. A omen toowpaa ondoofeni a sani ya.

17, 18. San be yeepi Nowa fu tan a libi di a fuudu kon? San be yeepi den Kelesten di be e tan aini Yelusalem fu tan a libi?

¹⁷ Sama di nái dini Yehofa sa meke i taangayesi en. Ma bun mati o yeepi i fu tan dini en. U sa waka a Nowa baka. A be e libi aini wan ten pe „libisama be e du somen ogii a goontapu”. Beibel e taki „a soso ogii den be e pakisei aini den ati” (Genesesi 6:5). Fu di den sama be ogii tumisi meke Yehofa be taki a be o poli a goontapu. Ma Nowa be de taa fasi. Beibel e kai Nowa „wan man di be e libi a wan leti fasi”, bika a „be e waka anga a tuu Gadu”.​—Genesesi 6:7-9.

¹⁸ Nowa á be e mosoo anga den sama di á be lobi Yehofa. En anga en osufamii be e wooko taanga fu meke a ark. Boiti dati, Nowa a be wan „peleikiman fu leti-du” (2 Peitilisi 2:5). Nowa, en uman, den dii boi fi en, anga den uman fu den boi, a be mati. Den be e koboloiki den ten fu du san bun gi Gadu. A so meke den be tan a libi di a fuudu kon. Ala wi a bakapikin fu den. Neen meke u mu teke en fu bigi taki Nowa anga en osufamii aliki Yehofa. U mu teke en fu bigi tu taki den á be e paa anga den sama di á be e dini Yehofa. Den Kelesten aini a ten fu den apostel seefi á be e paa anga sama di á be lobi Yehofa. Fu di den be aliki Yehofa, meke den be tan a libi di Yelusalem be poli aini a yali 70.​—Lukasi 21:20-22.

19. San u mu du efu u wani tan dini Yehofa anga u hii ati?

¹⁹ Nowa anga en osufamii, anga den Kelesten di be e libi aini a ten fu den apostel, á be e paa anga sama di á lobi Yehofa. A so useefi nái paa anga sama di á lobi Yehofa. Wi abi omen miliyun baala anga sisa di u sa teke enke mati. Den o yeepi u fu „taampu gingin aini a biibi” aini den taanga ten ya (1 Korentesama 16:13; Odo 13:20). Pakisei fa a o switi te wi o pasa a kaba fu a ogii goontapu ya libilibi fu go aini a nyun goontapu fu Yehofa! Neen meke a de taanga fanowdu nownow fu wi á paa anga den sama di nái dini Yehofa!