1, 2. (a) Saide yu e biibi taki Yehofa lobi den sama di e dini en? (b) Anga sowtu fii Yehofa meke libisama?

FA U du sabi taki Yehofa lobi den sama di e dini en? Fosi i piki a akisi ya, luku san wantu baala anga sisa be taki. A omen yali wantu baala anga sisa be e gi wan sisa di den e kai Taylene taanga-sikin. Den be taigi en taki a á mu fii booko-saka efu a á poi du son sani. Taylene taki: „Efu Yehofa á be lobi mi, a á be o meke taawan e gi mi taanga-sikin naamo.” Brigitte a wan sisa di abi tu pikin. Baka di en man dede, neen wawan be e kiya den pikin ya. A taki: „Wan fu den moo taanga sani aini a goontapu fu Saatan, a fu kiya wan pikin fu a toon bunbun sama. A moo taanga te yu enke mma efuso dda wawan mu kiya den. Ma mi sabi taki Yehofa lobi mi, bika a yeepi mi anga ala fa son leisi mi be e kee efuso be abi booko-ede. Noiti a meke tesi miti mi di mi á be poi tyai” (1 Korentesama 10:13). Sandra a wan sisa di abi wan siki di ná abi deesi. Di a be de a wan konkelesi, neen wan sisa kon taki anga en. A man fu Sandra taki: „Aladi wi á be sabi a sisa,  tokuso a fasi fa a a be e booko en ede anga u, be meke u fii bun. Den pikinpikin sani di baala anga sisa e du fu soi taki den lobi u, e soi mi taki Yehofa lobi u tuutuu.”

² Yehofa meke libisama anga a fii fu lobi taawan. A meke den anga a fii tu fu wani taawan lobi den. Ma te u siki efuso abi moni booko-ede, da u sa si enke Yehofa á lobi u moo. Kande wi o fii so tu te sani nái waka enke fa u wani aini a peleikiwooko. Ma te wi e fii so, u mu holi a pakisei taki Yehofa lobi u. Ala yuu a de kabakaba fu holi wi a wi leti-ana fu yeepi u. Noiti a o feegete u te wi e tan dini en.​—Yesaya 41:13; 49:15.

3. Sowtu sani o yeepi u fu si taki Yehofa e soi wi naamo taki a lobi u?

³ Den Kotoigi aini den fosi paragraaf be e biibi taki Yehofa be de anga den te sani be ibi gi den. Useefi sa biibi a sani de tu (Psalm 118:6, 7). Aini a artikel ya, wi o taki fu fo sani di e soi taki Yehofa lobi u. Den sani ya na (1) den sani di a meke, (2) a Beibel, (3) begi, anga (4) a dede di Yesesi kon dede gi u. Te wi e denki dipi fu den bun sani di Yehofa du gi u, da wi o teke en fu bigi taki Yehofa e soi naamo taki a lobi u.​—Leisi Psalm 77:11, 12.

4. San wi e leli te wi e luku den sani di Yehofa meke?

⁴ Te wi e luku den sani di Yehofa meke, da wi e si taki ná pikin lobi a lobi u (Romesama 1:20). Boiti taki Yehofa meke goontapu fu u sa libi neen, a gi u ala san wi abi fanowdu fu piisii aini a libi. A tuu taki wi abi nyanyan fanowdu, toku Yehofa á gi u wan sowtu nyanyan namo. Ma a gi u ala sowtu sani fu nyan, fu u sa de anga piisii te wi e nyan den! (Peleikiman 9:7) Wan sisa di den e kai Catherine e piisii te ai luku den sani di Yehofa meke, moomoo na a ten fu april te a san e bigin e pii bunbun aini Kanada. A taki: „Mi e foondoo tuutuu te mi e luku fa ala sani e kon a libi na a ten de. Den boomiki e goo na a yuu di den mu goo. Den foo di be gwe e daai kon baka. A dansi uman seefi di e kon nyan na a baki di mi poti na a fensee fu a kukuu e daai kon baka. Ala den sani ya e soi mi taki ná pikin lobi Yehofa lobi u.” A Dda fu u lobi den sani di a meke. A wani u piisii anga den sani de.​—Toli 14:16, 17.

5. Fa wi e si taki Yehofa lobi u te u luku a fasi fa a meke libisama?

⁵ Yehofa meke u fu du wooko di e gi u piisii (Peleikiman 2:24). A be gi libisama a wooko fu meke pikin fuu a goontapu. Den be mu solugu a goontapu, den fisi, den foo, anga ala den taa sani di de neen tapu (Genesesi 1:26-28). A meke wi anga bun manii tu, leti enke fa enseefi abi bun manii!​—Efeisesama 5:1.

6. Saide u mu teke ten fu e pakisei fu a Wowtu fu Gadu?

⁶ A fu di Yehofa lobi u meke a gi wi a Beibel. Beibel e taigi u san a den sani di u mu sabi fu Gadu. Ai taigi u tu fa Yehofa e si libisama. Luku san Beibel e taki fu a fasi fa Yehofa be e si den Islayelisama te den be e taangayesi en. A sikiifi aini Psalm 78:38 taki: „Tyali fu den be e kisi en. A be e tapu den sondu fu den, a á be e kii ala den. A omen leisi en ati be e koo baka. En ati á be e boon pasa peesi.” Te  yu e denki dipi fu a tekisi ya, da yu o si fa Yehofa lobi i kisi. Yu o si tu taki ai booko en ede anga i. Neen meke u sa biibi taki Yehofa e booko en ede anga u tuutuu.​—Leisi 1 Peitilisi 5:6, 7.

7. Saide u mu teke a Beibel fu bigi?

⁷ U mu teke a Beibel fu bigi. Fu saide? Bika na a Beibel Yehofa e koboloiki fu taki anga u. Te wan mma efu wan dda abi a gwenti fu taki anga en pikin, da den e moo lobi denseefi. Den e moo fitoow makandaa tu. Yehofa a wi Dda di lobi u. Winsi fa wi á si en efuso yee en siten wan dei, tokuso a gei enke ai taki langalanga anga u te wi e leisi Beibel. U mu tan aliki en! (Yesaya 30:20, 21) Te wi e leisi a Wowtu fu Gadu, da wi o sabi Yehofa moo bun. Wi o fitoow en tu, bika neen na a sama di e poti wi a pasi. Neen na a sama di e kibii wi tu.​—Leisi Psalm 19:7-11; Odo 1:33.

8, 9. San Yehofa wani u sabi? Sowtu toli aini Beibel e soi wi a sani ya?

⁸ Yehofa wani u sabi taki a lobi u. A wani u sabi tu taki a nái luku den fowtu namo di wi e meke, ma ai poti pakisei a den bun sani di wi e du tu (2 Koloniki 16:9).  Meke u luku fa Yehofa be e poti pakisei a den bun sani di Kownu Yowsafat fu Yuda be e du. Yowsafat be du wan don sani. A be paa anga Kownu Akab fu Islayeli fu go feti anga den Siriyasama a Ramot-gilead. Winsi fa 400 falisi polofeiti be taigi Kownu Akab taki a be o wini a feti, tokuso a polofeiti fu Yehofa di den e kai Mikaya, be taigi Yowsafat anga Akab taki den be o lasi efu den go feti. Na a sani de pasa tu. Akab dede aini a feti. Pikinmoo Yowsafat dede tu. Baka a feti, neen Yehofa sende Yehu fu go taigi Yowsafat taki a á tyai enseefi bun. Ma Yehu taigi en tu taki: „Gadu si den bun di i du.”​—2 Koloniki 18:4, 5, 18-22, 33, 34; 19:1-3.

⁹ Wantu yali a fesi, Yowsafat be sende den gaanman, den Leifisama anga den pilisite go na ala den foto fu Yuda, fu leli a foluku den Weiti fu Yehofa. Den be abi bun bakapisi, bika den taa nasi sama seefi be kon leli sabi Yehofa (2 Koloniki 17:3-10). Winsi fa Yowsafat be meke wan fowtu, tokuso Yehofa á be feegete den bun sani di a be du. A sani ya e toosutu wi, bika son leisi useefi e meke fowtu. Ma efu wi e du ala san u poi fu dini Yehofa, a o tan lobi u. Noiti a o feegete den bun sani di u be du.

10, 11. (a) Saide a mu bigi gi u taki u poi taki anga Yehofa? (b) Fa Gadu e piki den begi fu u son leisi? (Luku a fowtow na a bigin.)

¹⁰ Wan dda di lobi en pikin e teke ten fu aliki den te den e taki anga en. A wani sabi fa den e fii, bika ai booko en ede anga den. Na aseefi sani ya Yehofa, a Dda fu u di lobi u, e du tu. Ai aliki u te wi e begi. A wan gaandi taki u poi taki anga u Dda!

¹¹ U sa begi Yehofa ala yuu. En a wi mati. Ala yuu a de kabakaba fu aliki u te wi e begi. Taylene e taki: „I sa taigi en ala san de a yu ati.” Te wi e taigi Yehofa fa wi e fii, da son leisi ai piki a begi fu u anga wan tekisi, efuso wan artikel aini wan fu den buku fu u. Son leisi ai meke baala anga sisa gi u taanga-sikin tu. Yehofa e yee te wi akisi en fu a yeepi u. Winsi taa sama nái fusutan wi, ai fusutan u. A fasi fa ai piki den begi fu u, e soi taki a lobi u.

12. Saide a bun fu ondoosuku den begi di sikiifi aini Beibel? San a wantu fu den begi de?

¹² U sa leli omen sani fu den begi di sikiifi aini Beibel. Son leisi a bun te wi e taki fu den begi ya na a Osufamii-Anbegi. Te wi e luku fa den fositen futuboi fu Yehofa be e begi, da a sani de o yeepi u fu begi moo bun. Kande i sa sutudeli a fasi fa Yona be begi di a be de aini a bee fu a gaan fisi (Yona 1:17–2:10). Kande i sa luku a fasi fa Salomo be begi anga en hii ati, di a be kaba meke a tempel (1 Kownu 8:22-53). I sa luku a begi tu di Yesesi be leli den bakaman fi en (Mateyesi 6:9-13). Ma a sani di de moo taanga fanowdu, a fu „taigi Gadu ala sani te yu e begi”. A bakapisi a taki „a freide fu Gadu di libisama á poi fusutan o kibii wi ati anga u fusutan”. Da wi o moo teke en fu bigi taki Yehofa lobi u.​—Filipisama 4:6, 7.

13. Sowtu okasi wi abi fu di Yesesi dede gi u?

¹³ Yehofa meke Yesesi kon dede gi u fu u sa „fende a libi” (1 Yohanisi 4:9). A  apostel Pawlesi be taki fu a gaan sani ya di Gadu du gi u. A sikiifi taki: „Di a yuu doo neen Kelestesi dede gi sondu sama. A taanga fu fende wan sama di be o wani dede gi wan sama di e libi a wan leti fasi. Ma kande wan sama be sa wani dede gi wan bun-ati sama. Tokuso Gadu soi wi taki a lobi u fu di a meke Kelestesi dede gi u, aladi u be de sondu sama ete” (Romesama 5:6-8). A moo bun fasi fa wi e si taki Yehofa lobi u, a di a meke Yesesi kon dede gi u. A dede fu Yesesi e gi libisama a okasi fu toon mati anga Gadu.

14, 15. Fu di Yesesi dede gi u, da sowtu wini den (a) salufu Kelesten o fende?(b) sama di o libi a goontapu ya o fende?

¹⁴ Wan a duupu Kelesten e fii a lobi fu Yehofa a wan taa sowtu fasi (Yohanisi 1:12, 13; 3:5-7). Gadu salufu den Kelesten ya anga a santa yeye. Fu di a salufu den, neen meke den toon en pikin (Romesama 8:15, 16). Son wan fu den de a goontapu ya ete. Da saide meke Pawlesi taki: „A meke u kon a libi baka tu, neen a meke u go sidon aini hemel, fu di wi anga Kelestesi Yesesi toon wan”? (Efeisesama 2:6) A fu di Yehofa gi den a howpu fu libi fu teego a hemel.​—Efeisesama 1:13, 14; Kolosesama 1:5.

¹⁵ Den sama di á salufu anga santa yeye sa toon mati fu Gadu, efu den e biibi taki a dede fu Yesesi o tyai wini gi den. Denseefi abi a okasi fu toon pikin fu Gadu. Den o man libi fu teego aini wan paladeisi a goontapu tu. A dede di Yesesi kon dede gi u e soi taki sama á de a goontapu di Yehofa á lobi (Yohanisi 3:16). Wi e fii bun fu di u sabi taki Yehofa o gi wi a moo bun libi di de aini a nyun goontapu, efu u tan dini en anga u hii ati! Neen meke u mu soi taki a dede di Gadu meke Yesesi kon dede gi u e bigi gi u, bika disi na a moo gaan sani di Yehofa du fu soi taki a lobi u.

16. San wi o du te wi e sidon denki den somen fasi fa Yehofa soi taki a lobi u?

¹⁶ Wi á poi teli den somen fasi fa Yehofa soi taki a lobi u. Kownu David be singi taki: „Den sani di yu e pakisei e bigi gi mi! Gadu, ná pikin ipi den ipi! Efu mi be o puubei fu teli den, da den be o ipi moo santi” (Psalm 139:17, 18). Efu wi e denki den somen fasi fa Yehofa soi taki a lobi u, da a sani de o gi u taanga-sikin fu lobi en. A sani de o meke u du ala san u man fu dini en anga u hii ati.

17, 18. Fa u sa soi Gadu taki u lobi en?

¹⁷ A omen fasi de fu soi Yehofa taki u lobi en. Wan fasi fa u sa soi en taki u lobi en, a te wi e du ala san u man fu paati a bun nyunsu fu a Kownukondee gi taawan (Mateyesi 24:14; 28:19, 20). Wan taa fasi, a te wi e holidoo te tesi e miti u. (Leisi Psalm 84:11; Yakowbesi 1:2-5.) Efu den tesi di e miti u e moo wi, da u mu holi a pakisei taki Yehofa e si fa wi e pina. A o yeepi u tu bika a lobi u.​—Psalm 56:8.

¹⁸ Fu di u lobi Yehofa meke wi o teke ten fu e pakisei den somen moin sani di a meke. Wi e soi Yehofa taki u lobi en anga a Wowtu fi en te u gwenti sutudeli Beibel. Boiti dati, wi e taki anga Yehofa ala yuu fu di u lobi en. U wani toon wan moo bun mati fi en tu. Te u denki a fasi fa a lobi u fu di a meke Yesesi kon dede gi u, da a sani de o meke u moo lobi en (1 Yohanisi 2:1, 2). Disi a wantu fu den sani di u sa du fu soi Yehofa taki a fasi fa ai soi u taki a lobi u, e bigi gi u.