A TOLI DI SIKIIFI A FESISE | WAN SAMA DI DEDE POI KON A LIBI BAKA?
San e pasa anga wan sama te a dede?
„Mi be e si enke a dii peesi wan sama sa go te a dede: hemel, hel anga wan taa peesi di den e kai vagevuur. * Mi sabi taki mi á be bun fu go a hemel. Ma mi á be ogii tumisi fu go boon a hel tu. Mi á be e kaba fusutan san na a vagevuur. Noiti mi leisi en aini Beibel. A sama mi be yee e taki a sani de.”—Lionel.
„Den be leli mi taki ala sama di dede e go a hemel. Ma mi á be e kaba biibi a sani de. Mi be e si enke dedesama á be e libi go doo. Mi be e si enke den ná abi nawan howpu moo tu.”—Fernando.
I akisi iseefi wan leisi kaba san e pasa tuutuu anga wan sama te a dede? Den sama fu u di dede de a wan peesi e pina? Wi o si den baka wan dei? San meke u sa biibi a sani ya? Luku san Beibel e taki fu a toli de. Meke u go luku fosi anga sowtu sani Beibel e teke dede gei anga en. Bakadati wi o luku san Gadu paamisi u aini Beibel.
San e pasa anga wan sama te a dede?
SAN BEIBEL E TAKI: „Den sama di de a libi sabi taki den o dede. Ma dedesama á sabi nawan sani. Den ná o fende pai moo tu, bika nawan sama e membee den moo. Ala san i fende fu du anga yu ana, du en anga ala i kaakiti, bika nawan wooko, nawan pakisei efuso koni de aini a geebi, a peesi pe yu o go.” *—Peleikiman 9:5, 10.
Geebi na a peesi pe sama e go te den dede. A wan peesi pe sama á poi denki efuso du sani. Fa Yopu be e si Geebi? Aini wan dei a be lasi ala den gudu di a be abi. Ala den pikin fi en be dede na a dei de tu. Bakadati, neen a kisi gaan poisi na ala en sikin. Den poisi ya be e hati en. A be begi Gadu taki: „Efi i be sa kibii mi aini Geebi baa [a sikiifi „hel” aini a Catholic Douay Beibel]. Kibii mi te enke yu ati koo” (Yopu 1:13-19; 2:7; 14:13). A sani ya e soi kiin taki Yopu á be e si enke Geebi a wan gaan faya, pe a be o moo pina. Ma a be e si en enke wan peesi pe a be o boo.
Wan taa fasi de fa u sa sabi san e pasa anga wan sama te a dede. U sa leisi den toli fu den aitin sama aini Beibel di be kon a libi baka.—Luku a faki „ Aitin opobaka di sikiifi aini Beibel.”
Nawan fu den aitin sama de taki den be de a hemel, efuso wan peesi pe den be e pina. Efu den sama ya be go a so wan peesi di den be dede, da den be musu taigi taa sama, ná so noh? A toli ya be o sikiifi aini Beibel fu ala sama be sa leisi en. Ma nawan fu den sani ya sikiifi aini Beibel. Den aitin sama di be kon a libi baka á be poi gi den toli de. Fu saide? A fu di den á be sabi wan fa fu denseefi, leti enke fa wan sama di e siibi dipi á sabi wan fa fi enseefi. Son leisi Beibel e koboloiki a wowtu siibi fu soi san dede wani taki. Di a meisyo fu Yairus be dede, neen Yesesi be taki „ai siibi.”—Malikisi 5:39.
Sowtu howpu de gi den sama di dede? Den man weki komoto aini a siibi ya?
^ paragraaf 3 Na a biibi di sama e biibi taki sama di dede abi wan yeye di e go pina wan pisi ten a wan peesi. A pina di den e pina, e kiin den fu den sondu fu den fosi den fende a okasi fu go aini hemel.
^ paragraaf 7 A wowtu „Geebi” na aseefi enke a Hebrew wowtu „Syeol” anga a Giiki wowtu „Hades”. Son Beibel sikiifi „Hel”, ma Beibel nái leli u taki dedesama e go boon aini wan gaan faya.
