1, 2. San den sama di e dini Yehofa e du?

DEN sama di be e dini Yehofa aini a ten di pasa, be e wakiti fu si fa den sani di Yehofa paamisi be o kon tuu. Wan fu den sama ya a be Yelemiya. A be e wakiti fu si fa den Babilonsama be o kon booko a foto Yuda. A sani ya pasa aini a yali 607 fosi Kelestesi (Yelemiya 25:8-11). Yehofa be meke a polofeiti Yesaya taki a fesi, taki den Dyu di be o de a katibo aini Babilon be o daai go baka a Yuda. Yesaya be taki: „Ala den sama di e wakiti en anga pasensi o de koloku” (Yesaya 30:18). Mika seefi be e wakiti fu si fa den sani di Yehofa be paamisi be o kon tuu. A be taki: „Mi o wakiti Yehofa” (Mika 7:7). A omen ondoo yali a teke fosi a Mesiyas efuso a Kelestesi di Gadu be paamisi be kon. Ma tokuso den sama di be e dini Gadu be sabi taki a be o kon.​—Lukasi 3:15; 1 Peitilisi 1:10-12. * (Luku san sikiifi a ondoose.)

² Aini a ten ya, useefi e wakiti a ten te den polofeititoli di e taki fu a Kownukondee fu Gadu o kon tuu. Dyonson Yesesi, a Kownu fu a Kownukondee, o fii den sama di e dini Yehofa puu aini  a ogii goontapu yaaso. A o kii ala den ogii sama, da a o puu ala den sani di e meke sama pina (1 Yohanisi 5:19). Neen ede meke u mu e si enke a dei fu Yehofa sa kon iniiwan yuu. U mu du ala san u man tu fu de seekaseeka gi a dei de.

3. San wi e akisi useefi son leisi efu wi e wakiti a dei fu Yehofa omen yali kaba?

³ Ná pikin angii wi e angii fu sani waka a goontapu enke fa Yehofa wani (Mateyesi 6:10). Ma efu a omen yali wi e wakiti a dei fu Yehofa kaba, da kande wi e akisi useefi taki: ’A de fanowdu fu si enke a kaba de koosube?’

4. Fu saide meke a de taanga fanowdu fu u „de na ain”?

⁴ Yesesi be taigi den bakaman fi en fu „de na ain”. Neen ede meke a de taanga fanowdu fu u holi a pakisei taki a kaba de koosube (Mateyesi 24:42; Lukasi 21:34-36). Boiti dati, a olikanisâsi e tan membee wi fu „holi a pakisei taki a dei fu Yehofa e doo”. Den e membee wi tu fu u tan pakisei a nyun goontapu di Yehofa paamisi u.​—Leisi 2 Peitilisi 3:11-13.

5. San a wan taa sani di meke u mu de na ain?

⁵ Den bakaman fu Yesesi aini a ten fu den apostel be mu e tan wakiti a dei fu Yehofa. Dati wani taki wi di e libi aini a ten ya mu de na ain moo den fosi Kelesten. Fu saide? Bika wi e si den maiki di e soi taki Yesesi toon Kownu fu a Kownukondee fu Gadu aini a yali 1914. Den maiki e soi tu taki wi e libi aini den „kiiboi dei fu goontapu”. Leti enke fa Yesesi be taki a fesi, da a goontapu ya e ogii namo. A bun nyunsu fu a Kownukondee e paati a hii goontapu tu (Mateyesi 24:3, 7-14). Yesesi á be taigi u o langa den kiiboi dei fu a goontapu ya be o de. Neen ede meke u mu de seekaseeka, bika iniiwan yuu, a yuu fu a kaba kon.

6. Fu saide meke u sabi taki a goontapu o kon moo ogii te enke a kaba kon?

⁶ A kan taki den „kiiboi dei fu goontapu” e soi go a wan ten di mu kon ete pe goontapu o kon moo ogii moo enke san a de nownow? Beibel e soi taki sama be o kon moo ogii aini den „kiiboi dei” (2 Timotiyesi 3:1, 13; Mateyesi 24:21; Openbaring 12:12). Neen ede meke winsi fa a goontapu ogii nownow, tokuso u sabi taki a o kon moo ogii.

7. San Mateyesi 24:37-39 e taki fu a libi a goontapu aini den kiiboi dei?

⁷ Son sama e denki taki feti o go e feti aini ala kondee fosi a gaan banowtu kon. Den e denki tu taki gaanse sama a goontapu o go e siki, efuso o go e dede fu angii (Openbaring 7:14). Ma efu a so sani o waka, da na ala sama o si kiin taki den sani di Beibel be taki a fesi e kon tuu. Den sama di á lobi den leli fu Beibel o si a sani de tu. Wi á mu feegete taki Yesesi be taki aini den kiiboi dei, gaanse sama á be o „poti pakisei” a san e pasa. Den o go e du den sani di den gwenti du ala dei. Neen meke den o dyombo te den o si taki a dei fu Yehofa doo. (Leisi Mateyesi 24:37-39.) Wi á mu denki taki a goontapu o kon ogii pasa peesi fosi a gaan banowtu doo. Bika efu a so, da ala sama be musu biibi taki a kaba de koosube.​—Lukasi 17:20; 2 Peitilisi 3:3, 4.

8. San wi e biibi fu di u de na ain?

⁸ Den maiki di Yesesi be kai, a be fu yeepi den bakaman fi en fu fusutan san a den sani di be o go e pasa aini a ten fu a kaba. Neen ede meke den bakaman fi en de na ain (Mateyesi 24:27, 42). Fanafu a yali 1914 somen fu den maiki di Yesesi be kai, kon tuu. Wi e biibi taki wi e libi aini den „kiiboi dei fu  goontapu”. Yehofa poti wan dei kaba fu poli a ogii goontapu fu Saatan.

9. Saide meke u mu e si enke a kaba de koosube?

⁹ Saide meke u mu e si enke a kaba de koosube? A fu di wi e aliki san Yesesi Kelestesi taki. Boiti dati, wi e si den maiki tu di Yesesi be taki u be o si aini den kiiboi dei. Wi e biibi taki a kaba de koosube, ná fu di wi e biibi ala sani di wi e yee sama e taki, ma a fu di wi e si taki den sani di Beibel be taki a fesi e kon tuu. Neen ede meke u mu de na ain. U mu de seekaseeka tu te a kaba o doo.

10, 11. (a) Fu saide meke Yesesi taigi den bakaman fi en fu „de na ain”? (b) San Yesesi taki den bakaman fi en mu du efu a kaba á kon na a yuu di den be denki? (Luku a fowtow na a bigin.)

¹⁰ Somen fu u di e dini Yehofa e wakiti a dei fi en omen yali kaba. Ma winsi on langa wi e wakiti, tokuso u mu e si enke a dei de, de koosube. U mu de seekaseeka te Yesesi o kon poli a ogii goontapu fu Saatan. Yu á mu feegete san Yesesi be taigi den bakaman fi en fu du. A be taigi den taki: „U mu tan luku, u mu de na ain, bika wi á sabi on ten den sani ya o pasa. A sani ya de enke wan man di be go a wan taa kondee. Di ai gwe, neen a taigi den saafu fi en fu luku a osu fi en gi en. A gi ala den wookoman fi en wooko fu du. A taigi a man di be e holi wakiti taki a mu de na ain. Neen meke u mu de na ain, bika wi á sabi a yuu di a Masaa fu a osu o kon. Wi á sabi efu a o kon a sapaten, gaan neti, musude efuso fuuku mamanten. Te a o kon wanboowanboo, a á mu si taki wi e siibi. San mi e taigi u ya, e teli gi ala sama: De na ain.”​—Malikisi 13:33-37.

¹¹ Di den bakaman fu Yesesi fusutan taki Yesesi toon Kownu aini a yali 1914, neen den fusutan tu taki a kaba sa kon iniiwan yuu. A sani de meke den go du moo aini a peleikiwooko fu seeka denseefi gi a kaba. Yesesi be taki kande a o kon a „musude efuso fuuku mamanten”. Efu a sani de pasa, da san den bakaman fu Yesesi mu du? Yesesi be taki: „De na ain.” Neen ede meke wi á mu si enke a kaba de faawe, winsi a gei enke wi e wakiti wan hii pisi ten kaba. Wi á mu denki tu taki a ná o kon aini a ten fu u.

12. San Habakuk be akisi Yehofa? San Yehofa piki en?

¹² Anga ala fa a polofeiti Habakuk be e paati a bosikopu taki Yelusalem foto be o booko, tokuso a be abi pasensi di a be e wakiti a ten de. Den taa polofeiti di be waka neen fesi be paati aseefi bosikopu ya tu. Den be du a wooko ya omen tenti yali. Habakuk be si taki ogii be kon moo ipi a goontapu. Neen meke a begi Yehofa fu du wan sani. A akisi en taki: „Kee  Yehofa, on langa mi mu bali kai i fi i yeepi mi?” Anga ala fa Yehofa á taigi Habakuk o ten Yelusalem o poli, tokuso a taigi en taki: „A ná o kon lati!” Yehofa be taigi Habakuk tu taki a mu „tan luku en”.​—Leisi Habakuk 1:1-4; 2:3.

13. San Habakuk be sa bigin denki? Fu saide meke a denki de be sa tyai dede kii en?

¹³ Kon u taki Habakuk be kon weli di a be e wakiti fu Yelusalem poli. Kon u taki a be taki: ’A omen yali kaba mi e wakiti fu Yelusalem poli. A o teke langa fosi a kaba kon. Da fu saide mi mu e peleiki naamo? Taa sama sa du a peleikiwooko.’ Fa sani be o waka efu a so a be e denki? Yehofa be o daai baka gi en. A á be o de seekaseeka te a kaba be e kon. A sani de be sa tyai dede kii en.

14. Fu saide meke a o bigi gi u aini a ten di e kon taki Yehofa be taigi u fu u tan wakiti a kaba?

¹⁴ Kon u taki i de aini a nyun goontapu. Ala den sani di be sikiifi aini Beibel fu den kiiboi dei pasa enke fa Yehofa be taki. A pisi ten de a biibi di yu e biibi Yehofa kon moo taanga. Yu e biibi tu taki ala den taa sani di Yehofa paamisi o kon tuu. (Leisi Yowsuwa 23:14.) Na a ten de a o bigi gi i taki Yehofa be tyai a kaba kon na a moo bun yuu. A o bigi gi i tu taki a be taigi a foluku fi en fu tan luku a dei de.​—Toli 1:7; 1 Peitilisi 4:7.

15, 16. Fu san ede u mu du ala san u man aini a peleikiwooko aini a ten ya?

¹⁵ A olikanisâsi fu Yehofa o tan gi u taanga-sikin fu si a dini di wi e dini Yehofa enke a moo pelensipali sani aini u libi. Boiti taki a sani de o yeepi u fu tan dini Yehofa, a o yeepi u tu fu si a peleikiwooko enke a moo pelensipali sani di u mu du. Wi e biibi taki den sani di wi e si nownow, a den sani di Yesesi be taki u be o si aini den kiiboi dei. Wi e biibi tu taki a kaba de koosube. Neen ede meke wi e si a dini di wi e dini Yehofa enke a moo pelensipali sani. Boiti dati, wi e tan paati a bun nyunsu fu a Kownukondee.​—Mateyesi 6:33; Malikisi 13:10.

 ¹⁶ Te wi e paati a bun nyunsu gi taawan, wi e yeepi den fu den á dede, bika dyonson a goontapu fu Saatan o poli. Wan fu den moo gaan ogii di pasa a se, na a sungu di a sipi Wilhelm Gustloff be sungu aini a yali 1945. A omen dunsu sama be dede. Wan Kotoigi sisa anga en man be de aini a sipi ya tu. Sama be yeepi en anga en man fu den á dede. A taki ai si ete fa wan uman be e bali e kee fu den gudu fi en di a sipi be e sungu. A be e bali taki: „Mi tasi! Mi tasi! Den gowtu sani fu mi. Den gowtu sani fu mi fika aini mi kambaa a ondoose. Mi lasi ala sani!” Ma wantu fu den sama di be de aini a sipi be e yeepi taawan fu tan a libi, bika den be e fusutan taki na a sani de be de moo taanga fanowdu. Aini a ten ya, a omen sama o dede tu. U wani de enke den sama aini a sipi di be e booko den ede anga taawan. Neen meke u mu si a peleikiwooko enke wan sani di pelensipali tuutuu. U mu du ala san u man fu yeepi den sama fu den á dede te a kaba kon.

17. Fu saide meke u mu e si enke iniiwan yuu a yuu fu a kaba kon?

¹⁷ Wi e si kiin taki den sani di Beibel be taki a fesi e kon tuu. Wi e si tu taki dyonson a ogii goontapu ya ná o de moo. Wi e wakiti fu si fa den „tin tutu” anga a „ogii meti” o poli a Gaan Babilon efuso den falisi keliki (Openbaring 17:16). Wi á mu denki taki a baka omen ten fosi den sani ya o pasa. Wi á mu feegete taki a Gadu o meke den tiiman fu a goontapu „du san a abi a pakisei”! (Openbaring 17:17) Dyonson a ogii goontapu fu Saatan o poli. Neen ede meke u mu du san Yesesi be taki. A be taki: „U mu luku bun taki den sani enke nyan pasa maiki, diingi pasa maiki anga den booko-ede fu a libi á meke wi ati kon ibi. Efuso a wanboowanboo so a dei de o doo a u tapu enke wan kaapana ”(Lukasi 21:34, 35; Openbaring 16:15). Neen ede meke a de fanowdu fu u de na ain. U mu dini Yehofa anga u hii ati, fu di wi e biibi taki Yehofa „o du wan sani fu yeepi den sama di e tan luku en”.​—Yesaya 64:4.

18. Fu sowtu akisi wi o taki aini a taa artikel?

¹⁸ Te wi e wakiti a kaba fu a goontapu, da u mu du san a disipel Yudasi taki. A be sikiifi taki: „Lobiwan, meke u taanga useefi anga a moo santa biibi. Meke u begi anga santa yeye tu, fu Gadu sa tan lobi u. U mu wakiti u Masaa Yesesi tu fu a soi tyali ati gi u, fu u sa fende a teego libi” (Yudasi 20, 21). Ma fa u sa soi taki wi e biibi taki a nyun goontapu fu Gadu de koosube? San u mu du fu soi taki wi e angii fu a goontapu de kon? Wi o taki a toli ya aini a taa artikel.